من أول نظرة

السلام عليكم
إزيك يا برايد
كنت عايزة أفضفض مع حد و أحكيله و مالقتش قدامي غير بيت العرايس فاتحلي أبوابه ..قلت في نفسي طالما
الموضوع - و الحمدلله- ما انتهاش على خير و بالتالي مش هنكد على برايد حبيبتي رفيقة الكفاح ..يبقى
أستعين بالله و أبعته ..و العاقبة عندكم في المسرات

بصي يا ستي..الحكاية بدأت من 3 سنين أول مادخلت شغلي الجديد , سمعتي عن الحب من أول نظرة..
أهو هو ده, من أول مرة شفته فيها كنا كلنا تحت التدريب من غير ما أعرف حتى إسمه طول فترة التدريب ما
عرفتش إسمه لحد ما خلصنا و كل واحد فينا راح في مكان ..في الشركة كل ما كنت باسمعهم بيتكلموا عن حد
ماعرفش هو مين ..لكن باحس أو باتخيل إنه هو ..سنة مابنشوفش بعض لكن حبه بيكبر جوايا يوم بعد يوم

و روحي يا أيام و تعالي يا أيام و اتنقل و اشتغل معاه في نفس القسم و أعرفه و يعرفني..روحي تاني يا أيام و
تعالي تاني برضه ..و أبقى المساعد بتاعه و دراعه اليمين زي مابيقولوا ..نسيت أقول لك إنه شاطر قوي
..شاطر في كل حاجة عشان كده طلع بسرعة و كمان الظروف خدمته

حاولت ألفت نظره بكل الطرق و باستخدام الحاسة الثامنة اللي اتكلمتي عليها لكن مافيش فايده..إتلفت نظره أخيرا
بعد سنة و أكتر و شويه و عرفت منه إنه كان حاسس بكل حاجة من زمان و إن كان فيه في حياته قصة حب فاشلة
هي اللي خلته مش بيفكر أصلا في الموضوع

و في لحظة واحدة و كأنه حلم لقيت الدنيا كلها في إيدي و لقيت نفسي حبه الحقيقي و الوحيد و قاللي إنه كان دافن
نفسه بالحيا و إزاي حرم نفسه طول المدة دي من السعادة الحقيقية و اللي بتتمثل فيا أنا..و إنه طبعا عمره ما حب
قبلي و إنه كان متهيأله إنه مش هيحب أبدا لحد ما قابلني و عرف إني أول و آخر حب في حياته و بسرعة
قويييييييييي جاب أهله و دخل البيت ..مش قادر يعدي يوم و هو مش جنبي فيه

و بسسسسسسسسسسسسسسسسسسسس

المفاجأة بأه إن مامته رفضت الجوازة كلها لأسباب وجيهة جدا

أولا: إني قدمتلهم شاي و جاتوه مع إن المفروض إني أقدملهم عصير

ثانيا:كان فيه دبانة مضيقاها في القاعدة - و مش هي دي المشكلة- المشكلة إني قمت فتحت البلكونة عشان
أطردها فكان تعليقها : فيه عروسة في الدنيا تقوم و "تتمشى" و تفتح البلكونة؟

ثالثا: إن بيتنا تحته قهوة بلدي يعني أكيد أنا مش متربية - ده باعتبار إنهم لاقوني على
الناصية- ..
تفتكري يا برايد لو كانت كافيتريا ولاد و بنات كان هيبقى رأيها إيه؟

رابعا: و السبب الأهم ..إني كنت لابسه طويل و مقفول و ما كانتش عارفة تشوف مني حاجة -وجهة نظر
برضه

و دارت الإسطوانة المشروخة :

آسف يا حبيبتي ..أهلي و ما أقدرش أخالفهم

عرفت بعدها إنهم خيروه بيني و بين الشقة و العربية فاختار الأغلى طبعا و البنات على قفا مين يشيل

و روحي يا أيام و تعالي يا أيام تاني..رجع

وحشاني و مش قادر أستغنى عنك و مش قادر أسيبك ..لكن جواز مش بإيدي يا روحي و مش عارف أعمل إيه
؟..و هاموت نفسي عشان أرتاح و إحساسي بالعجز مش مخليني عارف أبص في وشك

و في عز ما الإسطوانة دي شغالة و أنا باموت نفسي من الحزن و القهر عشانه و عشانيربنا يقدر إني أقعد على
جهاز الكومبيوتر بتاعه في مره عشان أطلع شغل من عليه و ألاقي الماسنجر بتاعه مفتوح و ألاقيه بيكلم مين؟..
أعز صاحباتي و بيقولها إنه عمره ما حب غير حبيبته الأولانيه و إنه بس كان مشتاق لإحساس الحب و ساب نفسه
يعيش معايا و إني أنا اللي غاوية أعذب نفسي عشان أنا لسه بافكر في الموضوع و هو خلاص الموضوع بالنسبة له
إنتهى و إن مافيش حد بيضحي عشان حد و لا بيتمسك بحد ببلاش و إنها لو دورت ورايا أكيد هتلاقي مصلحة من
تمسكي بيه كان نفسي أتشل قدام الجهاز أو أتعمى و ماأقراش باقي الكلام..قعدت بعدها يومين مش بانطق في الشغل و كل ما
يسألني مالك يا حبيبتي أبقى عايزة أنفجر في وشه و أدمره لكن أبص ألاقي نفسي ساكته لحد ماقدرت ألم نفسي و
أواجهه باللي شفته و أنا نفسي يكدبني و يقوللي إنتي فهمتي غلط حتى لو بالكدب..تصدقي كان نفسي أصدقه حتى
لو كدب عليا..لكن لاقيته إتحول تحول الديناصورات ..طلعني ما اتساهلش و إني باتجسس عليه و هو غلطان
إنه حبني و إن أنا اللي جرحته و بعته و إنه مش هيسامحني طول حياته

ما عادش فيه حاجه جوايا ما اتكسرتش بسببه
ما عادش عندي حاجة ما خسرتهاش بسببه

معلش طولت عليكي بس كنت محتاجة مكان أفضفض فيه ..من 4 شهور و أنا مش لاقيه المكان ده ..و الحمد
لله إني لاقيته هنا في بيت العرايس

أختك المقهورة : ضي