سمك شيكولاته بطاطس...أحمدك يا رب

هاي يا برايد ..إزيك

أنا كنت بعتلك ايميل قبل كده و كنت بادخل على المدونة كتير و باعلق و من يجي شهرين كده ربنا سهلهالي و اتكعبلت في عريس كويس ..قلت يا بت مابدهاش اطلعي من الطابور و ادي فرصة لغيرك

فعشان خاطر كل بنات مصر اللي انا واقفة في سكتهم ..و عشان خاطري برضه ..قمت اتخطبت

و بما انك واخده علينا عهد في المدونة ان اللي تتخطب ماتقولش عشان خاطر الضغط و النقطة و شلل الأطفال و كده ..قلت يا بت بلاش تنكدي على برايد و تقوليلها و هي لما تلاقي الطابور فضي قدامها هتفهم لوحدها


شوفي يا ستي

قبل الخطوبة بكام يوم رحنا نحجز الورد من عند الراجل

قلت اما اخده معايا..مانا طول عمري نفسي يبقالي راجل كده أمشي معاه و اتباهى قدام الناس ..و كل اما حد يجي يكلمني أشاور عليه و أقول اتكلم مع الأستاذ بتاعي ..أصلوا مابيحبنيش أكلم شوباب خااالص

و فضلت ماشية معاه و فاضلي تكة و اوقف الناس اللي في الشارع عشان أقولهم..حبيييبي اهه ..ترارم ترارم..خطيييبي أهه..تررارم تررارم..الليه يمسيكي بالخير يا شادية

وصلنا للراجل بتاع الورد و انا في نفس حالة الإفتخار و الإعتزاز دي..الراجل وراني الورد و عجبني خدته مسكته في ايدي..و أستنى أستنى أستنى..الراجل برضه شكله قلق..أبص على الأستاذ بتاعي..ألاقيه سرحان..طب اعمل ايه؟؟ أفوقه ..أعمل اني بوريلوا الورد و ادلق عليه شوية ماية و الا ايه...قلت يا واد طنش خاااالص..عديها بأه جايز فعلا مش واخد باله ..قلت يا بت جايز مش واخد باله بجد ..رحت مطلعه الفلوس و حاسبت الراجل..بسيطة يعني..

و عملنا الخطوبة ..ماعزمتكيش عشان بحبك ..مانا عارفة النظام بأه..بعد الخطوبة بشوية كده قاللي تعالي أما اعزمك على الغدا...قلت يادي الهنا يادي المنا..ابتسم كده و بقه بأه 2متر و هو بيسألني..تحبي تتغدي فين..؟؟؟

قلتله على محل سمك مشهور عندنا مانا اسكندرانية بأه..لقيت ابتسامته بقت سالب خمسه و ارتبك و بلم..قلتله مالك في حاجة ..قاللي لأ بسيطة بسيطة

يوم العزومة فات عليا و انا ايه لابسه اللي ع الحبل و في العربية لقيته رايح سكه تانية خالص ..ايه فيه ايه ..فين السمك؟؟؟

قاللي لأ أبدا ..أصل بتاع السمك ده غالي شوية و احنا لازم نعمل حساب لمستقبل أولادنا ..أمال ايه؟..أنا هاوديكي حتة أفخم و أحلى بكتير...كوك دوور


كوك دوووور؟

وشي اتقلب و علامات الإذبهلال طلعت عليه ...بس كتمت في نفسي و قلت معلش يابت يمكن المرتب طلع جمعيات ..مانا بنت أصل ولازم أستحمل

قعدنا و طلبنا السندوتشات و قعدنا نتكلم و شدينا في الكلام شوية و مالحقناش ناكل السندوتشات ..المهم خدناهم دليفري ..الراجل لفهوملنا في كيسه و خرجنا بعد ماوصلنا لبيتي لقيته واخد السندوتشات في حضنه و فتح الكيس و طالعلي البطاطس و قاللي ..خدي دي أنا مش باحبها و نزلت من العربية وانا ماسكه علبة البطاطس و فاتحه بقي من الإذبهلال على آخره ..و هو خد السندويتشات في حضنه و مشي

شفتي الهنا اللي انا فيه؟

ده غير انه مرة جابلي كيسه كده و قاللي ماتوريهاش لحد
قلت يبقى قبض جمعية م الجمعيات و جابلي حتة دهب كده و الا حاجة
و الله و صبرك طلع على خير يابت
ماهي حاجة مش عايز حد يشوفها و لا حتى أمه ...أفتح الكيس يا برايد ألاقيلك كيلو شيكولاته

طب أحكيلك ايه تاني ..والا تكونيش زهقتي ؟؟

أكملك بعدين

عندي حكايات كتييير عن سي الأستاذ بتاعي

استني الباقي أجمل

أختك..روأه