بيت العرايس و العرسان

اللي يحبنا ما يضربش نار عندنا

Saturday, November 03, 2007

أستاذ حماده إتجوز يا ميييييييييينز

في الأول جاتلي الرسالة بالأخبار الحلوة....لكن التفاصيل مبهمة
هاى برايد عاملة ايه . انا حمادة صاحب اول بوست فى بيت العرايس والعرسان ياترى لسة فكرانى ؟
انا باكتب لك لسببينالأول انى . أهنيكى على البوست الجميل اللى فى بلوج عايز اتجوز واللى أكد لى انك فعلا موهوبة كبيرة وانك (وياريت متزعليش) خسارة فى الصيدلة وانك تدفنى الموهبة الجميلة دى بين ريحة الفورمالين واليود ومركبات الباراسيتامول
.
السبب التانى انى عايزك تعرفى انى أخيرا وبعد طول عذاب ومقالب أتجوزت ولسه راجع من شهر العسل ( اللى كان شهر فعلا ) وانك كنتى سبب أساسى فى جوازى وأكيد هاكتب لك قصة جوازى علشان تشاركينى انتى وقراء المدونات بتاعتك الفرحة زى ما شاركتونى جزء من المقالب اللى شربتها .
عقبالك وعقبال كل سكان وقراء بيت العرايس والعرسان ( الغير متزوجين طبعا) و حقيقى موش عارف اشكرك إزاى .
و بعدين جاتلي التفاصيل..ماصدقتش نفسي من كتر سعادتي...انا كنت السبب في إن القصة الجميلة دي تكتمل
حقيقي سعادة لا توصف ان الواحدة تبقى سبب و لو غير مباشر في توفيق اتنين بيحبوا بعض...فييييييييينك يا طنط حشرية تشوفي
اقروا معايا
هاى برايدإزيك عاملة ايه وايه أخبار كل الناس فى بيت العرايس والعرسان حقيقى وحشتونى ووحشتنى قصص بيت العرايس والعرسان وتعليقات زوار البيت
كنت بعتلك رسالة أول مارجعت من شهر العسل أشكرك فيها لأنك كان ليكى دور كبير فى جوازى( انا شخصيا باعتبر جوازى معجزة بعد كل اللى شوفته ) وعلشان مطولش عليكى أحكيلك القصة .بعد ما نشرتى قصتى الأولى عن حبيبتى اللى طلعت بنت صديق قديم بحوالى أسبوعين لقيت جرس التليفون بيرن فى مكتبى أول ما دخلت رنة تليفون من خارج الفندق.,اول ما قولت ألو رد علية صوت خلى قلبى فعلا ينزل فى رجليه . كان صوت حبيبتى اللى حكيت لكم قصتى معاها . فعلا حسيت انى موش عارف اعمل ايه . افرح ولا أقفل ولا أعمل عبيط .المهم أنى أخترت الأختيار الأخير وعملت فيها عبيط وموش عارف مين اللى بيكلمنى لغاية ماعرف أتلم على نفسى
.سألت بصوت مرعوش واضح فيه الإستعباط
مين معايا؟
بعد فترة سكوت قالت لى انا فلانة . انت نسيت صوتى ؟
استمريت فى حالة الإستعباط طبعا وقلت لها أهلا وسهلا . إزيك وإزى بابا وماما عاملين ايه والكلام العبيط ده
( قالت لى بعد كده ان صوتى كان واضح فيه انى باستعبط وموش عارف اسبك الدور)
المهم بعد انتهاء حالة الإستعباط قالت لى
انا قريت البوست اللى فى المدونة الجديدة بتاعت برايد وأكيد طبعا انت اللى كاتبه
.
حسيت ساعتها كأنى واقف تحت المطر فى عز يناير بمايوه ومعرفتش أقول لها ايه غير انى آسف انى كتبت حكايتنا من غير إذن منها . المهم انها طلبت منى اننا نتقابل لأنها عايزة تكلمنى فى موضوع مهم . طبعا قلت لها ده مستحيل طبعا أنى أقابل بنت صاحبى من وراه وإن أخلاقى وسنى ميسمحوش بحاجة زى دى.وحسيت بان سكينة كبيرة من بتوع الجزارين بتنغرس فى قلبى لما سمعت صوت بكاءها فى التليفون وهى بتقولى هستناك بكرة فى المكان اللى كنا بنتقابل فيه سواء جيت او مجتش
. طبعا فضلت من ساعتها لغاية ما روحت البيت وانا موش عارف اعمل أيه أو أتصرف إزاى وفضلت سهران طول الليل أفكر .وطبعا قررت بكل حسم انى موش هاروح لكن لقيت نفسى قبل المعاد بساعة كاملة رايح على المكان وقعدت أحاول الاقى تبرير لرجوعى فى القرار لكن معرفتش . لكن السبب الحقيقى كان جوايا وهو انى فعلا باحبها وانها أجمل فرصة تيجى لواحد فى سنى انه يحب ويلاقى اللى تحبه وتتمسك بيه .وقبل المعاد بنص ساعة لقيت حبيتى داخلة من الباب وفعلا حسيت انى كنت غلطان انى أتخليت عنها لما لقيت وزنها نزل كتير ولونها شاحب وكأنها كبرت عشر سنين فى الكام شهر اللى بعدت عنها فيهم . وموش عارف هتصدقينى ولا لأ لمل أقولك انى بمجرد ما إيدى لمست أيديها نسيت كل حاجة كنت قررتها وكل المعاناة اللى عشت فيها الشهور اللى فاتت .ولما سألتها عن سبب طلبها مقابلتى بعد ما أتفقنا انى أكون ليها مجرد صديق قديم لوالدها قالت لى انها لما شافت البوست اللى كتبته حست بأننا هنظلم نفسنا لو محاولناش ,
بصراحة حسيت انها رغم سنها الصغير طلعت اشجعع منى وانها صارحت نفسها باللى انا مقدرتش اصارح بيه نفسى .وقالت لى انها صارحت والدتها بأنى أنا الإنسان اللى كان المفروض يتقدم لها ووالدتها تفهمت الموقف ووعدتها بالمساعدة لو اتقدمت .
روحت وانا فعلا طاير من الفرح وقررت انى أصارح والدها واللى يحصل يحصل وخلاص أول ما وصلت البيت اتصلت بالصديق المشترك اللى بينى وبين أبو حبيبتى واللى كان معاه يوم ما طلب منى إنى احاول احط حد لعلاقة بنته بالراجل اللى فى سن أبوها (اللى هو انا ) قابلته وحكيت له الحكاية على بلاطة زى مابيقولوا لقيت وشه بقى لونه اصفررررررررر والعرق مغطيه
وقال لى بمنتهى الغباء
طيب وانا اقدر اعملك ايه ؟
رديت عليه بنفس الغباء والبرود
زى ما كنت السبب انى ماتقدمتش لها تيجى معايا وانا باطلبها من ابوها
نط كأن فيه تعبان قرصه وقالى
لا يا عم ماليش دعوة
قلت له
هتيجى يعنى هتيجى .
المهم بعد محايلة وإقناع وافق انه يجى معايا على اساس يحوش عنى لو العملية قلبت بغم ويهدى النفوس ويمكن ربنا يفتح عليه بكلمة كويسةالمهم اتصل بوالد حبيبتى واتفق معاه اننا نزوره تانى يوم انا وهو وطبعا الراجل رحب (مانا صاحب فضل عليه بقى) تانى يوم الصبح حبيبتى اتصلت بيا واتفقنا هنعمل ايه لما أكون عندهم ( وإتأكدت انها حافظة رقم الإسعاف علشان لو انا اتعورت ولا حاجة )ورحنا انا وصديقى بيتهم فى حى من أحياء القاهرة الجديدة و أخدت معايا بوكيه ورد شيك .الراجل الصراحة رحب بينا جدا وقعدنا فى الصالون وجه الشاى
.ودخلت علينا حبييتى وسلمت علينا وقالت لوالدها لو سمحت عايزة اوريك حاجة طبعا الراجل استغرب وفهمها انه موش وقته هى أصرت وطبعا أنا كمان اصريت انه يروح معاهاالمهم الراجل راح مع بنته وبعد حوالى تلت ساعة سمعت صوت حاجة بتنهبد وحاجات بتتكسر وصوت زعيق . تفتكروا ليييييه؟ حببيتى فتحت الكومبيوتر على البوست اللى كنت كاتبه وجابت باباها قراه
طبعا الراجل ( وليه حق ) الدم غلى فى عروقه وقام هابد الكومبوتر فى الأرض كسره ميت حتة لأنه فهم الموضوع على طول أول ما قراه خصوصا أن فيه واحد من الإخوة اللى علقوا على البوست كتب عنه كلمتين زودوا عنده ضغط الدم . ورجع لنا الصالون ووشه إتحول للون غريب بين الأحمر والنبيتى وعنيه لون الطماطم ومن غير ما يتكلم ولا كلمة شاور لنا على الباب .طبعا حاولت اتكلم لكن غيرت رأيى لما لقيت عنيه بتتردد بين فازة كبيرة وبين دماغىطبعا آثرت السلامة زى ما بيقولوا وخرجت وحمدت ربنا ان الصالون فى الدور الأولانى لأنه لو كان اعلى من كده كان رمانى من الشباك من غير تردد المهم سبت صاحبى يحاول يقنعه ومشيت وكنت متفق مع صاحبى اننا لو أفترقنا فى المعركة هستناه على القهوة فى مدينة نصر .بعد حوالى ساعة ( عدت كأنها سنة) صاحبى جالى وقال كلمة سعد زغلول الخالدة ( مفيش فايدة )طبعا كل ده كنت متوقعه وكنت متأكد انى موش هاكسب حبيبتى بعد أول جولة أبدا . تانى جولة بقى كانت فى النادى وطبعا إستعنت فيها بكل الأصدقاء اللى اعرفهم علشان أعرف أدخل النادى اللى انا موش عضو فيه .
المهم بعد ماربنا وفقنى ووقف لى ولاد الحلال دخلت النادى اللى كنت عارف ان عيلة صديقى العزيز موجودة فيه (طبعا كانت حبيبتى ناقلة لى تحركات ابوها أول بأول ) وبصراحة أول ما الراجل شافنى رحب بيا زى أى واحد ما بيرحب بعفريت طلع له فى الضلمة واتنطر من على الكرسى ولولا ان حماتى العزيزة غيرت الجو(حبيبتى كانت كسبتها فى صفنا) وزغرت لصديقى العزيز زغرة رجعته على كرسيه تانى
وسألنى بمنتهى الغلاسة والبرود
عايز ايه يا أستاذ
قولت له
انت عارف أنا عايز أيه
رد على بكل هدوء
لأ موش عارف ومفيش داعى تقولى انت عايز ايه
وبص لبنته بصة نارية ومن غير ما يدرى قالها
لو سمحتى قومى شوفى لك حاجة تعمليها على ماخلص كلام مع عمك حمادة (شوفتى الكلمة البايخة)
المهم انها قامت وهى متعمدة تخلى أبوها يشوفها وهى بتبصلى وفتحت الموضوع تانى معاه وطبعا بمساندة حماتى مقدرش يعلى صوته تانى (علشان متبقاش فضيحة فى وسط النادى طبعا)فهمته انى بعدت فى الأول احتراما لصداقتنا القديمة وأنى دلوقت باحاول انى أحافظ على الصداقة دى (وطبعا قلت له كل الكلام اللى فى الأفلام العربى القديمة والجديدة) المهم انه عمل نفسه موش سامعنى لكن لاحظت فى وشه شئ من اللين واعتبرت ده إنتصار لياالمهم قام علشان يصلى الجمعة رحت معاه الجامع وبعد الصلاة كان هدى شوية لكن برضه سابنى وروح من غير ما يدينى جواب
بعد كده بدأت رحلة مطاردة للراجل فى كل حتة ولأننا بنشتغل فى نفس المجال ففيه ناس كتير بيتعاملوا معايا ومعاه ومنهم ناس هو بيحترمهم وبيسمع كلامهم ووسط كل اللى يعرفهم ويعرفونى عنده علشان يوافق وطبعا حبيبتى ومامتها قاموا بدورهم فى البيت فبقى الراجل ياعينى متحاصر فى الشغل بالمعارف وفى البيت بالنكد وماستحملش غير إسبوعين وإستسلم ووافق انى اتقدم لبنته بصفة رسميةوأخيرا تم الإتفاق على كل حاجة ولأننا لا أنا ولا هو عندنا مشاكل مادية وماهوش حجة يأخر بيها الجواز أصر ان مفيش تحديد مواعيد غير بعد ما أجهز الشقة ونشترى العفش وبصراحة زمايلى اللى بيشتغلوا فى الديكور وفى المشتريات عملوا معايا واجب كبير جدا بحيث ان الشقة اتجددت ديكوراتها والعفش جه وركب خلال شهر واحد
وأخيرا حددنا يوم الفرح وحجزت اكبر قاعة فى الفندق وكانت ليلة جميلة فعلا كان نفسى أعزمك فيها أنتى وكل سكان بيت العرايس والعرسان لكن ده طبعا كان هيبقى محتاج انى اعمل الفرح فى الأستاد موش فى قاعة فندق طبعا كنت شايف فى عيون ناس كتير الحسد (ودول طبعا اللى فى سنى ) بسبب عروستى اللى فعلا فى الليلة دى كانت زى القمر . وفيه ناس كانت عنيها مليانة إشمئناط (علشان واحد متجوز واحدة اصغر منه بكتير) . لكن فعلا كان فيه ناس كتير حسيت انهم فرحانين لى بجد وبعد الفرح قضينا شهر عسل أكتر من رائع لفينا فيه أكتر من بلد وبعد ما رجعنا بدأت العلاقة تتحسن بينى وبين حمايا العزيز وقدر يتقبل الموقف
انا باكتب لك دلوقت وحبيبتى جنبى وبعد ما عرفنا أن فيه فرد جديد هينضم لعيلتنا الصغيرة وبعد الفترة اللى مرت على جوازى دى حسيت ان ربنا عوضنى عن كل المقالب اللى أخدتها فى رحلة البحث عن نصى الحلو وان ربنا فعلا بيعوض الصابرين بكل خيرومرة تانية بأشكرك يا برايد وربنا يديكى العريس اللى تتمنيه واللى يسعدك . وعقبال كل سكان بيت العرايس والعرسان
سلام بقى لأننا طولنا عليكم بقى وأكيد زيارتى لبيت العرايس والعرسان عمرها ما هتنقطع باااااااااااااى
ألف مبروك يا أستاذ حماده
و الله و الله فرحتلك

132 Comments:

Blogger واحد مش فاهم حاجة said...

ياااااااااااااااااااااااة

احساس بالسعاة والنشوة
مش عارف لية

عارفة يا برايد

كان نفسى اكون انا صاحب مدونتك دى

لانك فعلا

عن طريقها قدرتى
تعرفى ناس طريق السعادة

3:09 PM  
Blogger Rania said...

حضرتك فعلا اثبتلي ان اللي يصبر ينول وعشان نيتك كانت كويسة فربنا وفقك بعد طول انتظار وحيرة والطيبون للطيبات كما قال الله في كتابه العزيز
كل ده كان اختبار لصبرك وصدق نواياك والحمد لله ربنا اكرمك كرم كبير قوي تستحقه بجدارة

والله العظيم انا فرحانة جدا عشان حضرتك والف مليون مبروك على الزواج السعيد وربنا يديم عليكم السعادة والرضا وتقبل اجمل التهاني بحلول الضيف الصغير

3:20 PM  
Blogger إنـســـانـة said...

اللهم صلى ع النبى

الف الف مبروك يا استاذ حمادة والله فرحنالك اوى

3:31 PM  
Blogger Noony said...

100000000000000 مليون مبروك يا أسناذ حمادة
بجد بجد بجد فيه أمل لسه في الحياة
والحب والتفاهم موجودين

الحمد لله
بجد والله فرحتلك جداً

عقبال برايد وكل البنات يا رب
:)
نهاد

3:56 PM  
Blogger تائهة فى أرض الأحلام said...

بجد استمتعت جدا بقراءة البوست ده

ومبروك ليك وليها وعقبال الباقى
ونشكر برايد على مجهودها الرائع
وعقبال مانسمع خبر جوازك قريب

بجد حكاية جميلة
بس ماتزعلش منى أكيد أبوها مش طايقك لغاية دلوقتى

ربنا يعينك عليه ويتمم لكم بخير

تحياتى لكم جميعا

4:11 PM  
Anonymous noura said...

مبروك بجد يا استاذ حمادة واللهه بجد حاسة اني فرحانة بيكم قوي بجد من غير ما اعرفكم ربنا يوفقكم مع بعض

4:14 PM  
Blogger cinderella said...

انا بجد مش عارف اقول ايه
انا فرحانه زى ما تكون حكايتي انا
بجد ربنا يسعدكم ويهنيكم والف الف مبروك على الجواز
وميت الف مبروك على ثمرة الجواز الجميل ده ويتربى في عزكم ان شاء الله يارب
بجد هى فرحتنا كلنا
ربنا يسعدكم دايما يارب

4:57 PM  
Anonymous Jody said...

مبروووووووووووووووووووووووك فرحانه جدا لكم عقبالك يا برايد
بس بجد أنت إنسان جميل والسبب أنى أتخطبت لبنى آدم أكبر منى ب 12 سنه ورغم إقتناعه شديد بنضج تفكيرى لكنه كان معقد جدا وحاسس إن الفرق بينا 50 سنه وكان بيرفض يظهر معايا فى الأماكن العامه أو أى مناسبه فيها قرايب أو معارف عشان فرق السن مايبانش ورفض نعمل فرح لنفس السبب وكان دايما يتعمد يبعدنى أنا كمان عن الناس والحمد لله ماكملتش فى جحيمه كتير

6:44 PM  
Blogger NeRmeeN said...

بجد الف مليوووووون مبروك يا استاذ حماده

عقبالك يا برايد ...باذن الله ربنا هيجازيكى خير على صبرك ده ....و يجمعك انتى و صنك الحلو ان شاء الله

تحياتى

8:35 PM  
Anonymous ساعد نسرين الايمن said...

الف مليار مبروك يا استاذ حمادة
الف مليار شكرا ليكي يا برايد
يااااااااااااااااااااااه لو ده يحصل معايا
يااااااااااااااااه بس لو نسرين بس تقرا كلامي
يمكن ده اكبر وابرز انتصار ليكي برايد ولمدونتك الجميلة
لكنه كمان انتصار للارداة والتصميم ع الحياة سوا
اسمحوا لي ان احيي البطلة الرائعة الذكية زوجة الاستاذة حمادة

11:26 PM  
Anonymous Nehal said...

100000000000000000000000 mabrouk , i'm so happy 4 u begad men alby :)

1:20 AM  
Anonymous BlueRose said...

انا عيني دمعت
اي كلام هاقوله هايبقى سخيف قوي
بارك الله لكما و بارك عليكما و جمع بينكما في خير

لو تعرف يا أستاذ حمادة قصتك دي فرقت معايا قد ايه و أسعدتني قد ايه :))

ربنا يوفقكم

ألف مبروك

1:52 AM  
Blogger Doba said...

انا سعيدة جدا جدا والدموع مليه عيونى من فرحتى بيكم انتم الاتنين لزواجكم السعيد وللمولود اللى هيشرف بيتكم وينور حياتكم

ربنا يسعدكم ويبارك فيكم ويقدركم تربو اولادكم بطريقة صحيحة

تحياتى وامنياتى بكل الحب
هبة

2:11 AM  
Anonymous Anonymous said...

بارك الله لكما و بارك عليكما و جمع بينكما في خير
الف مبروك يا عريس ربنا يهنيكم و يكرمكم ببعض حطها في عنيك و حافظ عليها و لا تنسي قول الرسول صلي الله عليه و سلم : رفقا بالقوارير .
و عقبالك يا برايد إنشاء الله انتي قد ايه جميلة و رائعة ربنا يحقق كل احلامك و يجعل لكي الخير اينما كونتي

إيهاب

4:55 AM  
Blogger M.Sameer said...

ربنا يرزقهم بالذريه الصالحه يا رب امين

و عقبالي يا رب عشان انا اربت اياس

:-)

6:32 AM  
Blogger بنت عاديه said...

بجد انا فرحت جداااااااااا لك يا استاذ حماده

سبحان الله امس كنت لسه متذكره حكايتك

الحمدلله على هذه النهايه

ربنا يجزي جميع الصابرين خيرا باذن الله

6:33 AM  
Anonymous Anonymous said...

mabrooook ya 7mada :D , w 3o2bal manshof awladak kda..w 2ol bnt tsmyha bride isa :D:D ,
yalla ya gma3a kolna nd3elhom :
allhoma barek lahom w barek 3lihom w agma3 bynhom fe 5yr.allahoma w arzok al sal7een bel sal7at w es3d kol abna2 w bnat el 2omma el islamia ..allahoma ameeeeeeeeeen

sara

6:47 AM  
Anonymous Nehad said...

ربنا يسعدكم بجد و يخليكم لبعض

بس حبها و حطها في عنيك و حافظ عليها و علي شعورها

انا رجعت للقصة الاولي و مبطلتش عياط و انا بقرا الاتنين
ربنا يسامحك بقي

6:58 AM  
Blogger salama said...

السلام عليكم
صدقت دلوقت كلامي يااستاذ حماده؟
الدنيا مابتستناش حد ، يعني مش هاتقف لك لغايه لما تقرر انك تسيبها ولا ترجع لها
المهم الف مبروك ، وان شاء الله المره اللي جايه نسمع عن الضيف الجديد وعنكم كل خير

8:43 AM  
Blogger خمسة فضفضة said...

السلام عليكم ورحمة الله وبركاته


الف الف مبروك

وعقبال الجميع قريب ان شاء الله

11:44 AM  
Blogger 77Math. said...

بجد بجد بجد بجد فرحت لكم...صحيح اتضايقت لأن الخطوة الأكثر شجاعة جاءت من زوجتك لا منك، لكن..دا درس لك عشان بعد كدا ما تتخلاش عن حد\حاجة بتحبها أبدًا...

بارك الله لكما، ورزقكما ذرية صالحة مصلحة..

تحياتي:)

4:01 PM  
Blogger utopia said...

عارف
انا باعيط
ودموعى نازلة على الكى بورد مغرقاه
الحمد لله
الف مبروك يا حمادة وقول مبروك لعروسة بيت العرايس والعرسان
اول عروسة عندنا
الف مبروك
وربنا يعوضك يا برايد خير
ويعوضنا كلنا يارب
قولوا امين

4:33 PM  
Anonymous mishmishaya said...

بجد الف مبروك يا استاذ حماده انا فعلا فرحانة من كل قلبي ليك وربنا يوفقك في حياتك واقولك ياحماده يا جامد لانك قدرت تقنع باباها والف مبروك مره تانيه

11:25 PM  
Blogger shahy said...

الف مليون مبروك
يااااااااااة اللي يصبر ينول

ربنا يبارك فيكم ويسعدكم

تحياتي

1:28 AM  
Blogger emos said...

mabroooooooooooooooooooook mabrok

maboooooooooooooooooork
mabrooooooooooooooooooooooooooooooooooooooooooooooooooooooooooooooooooooooooook
ana bgd kont ha3ayat wana 2a3da
begad bgd mabrook gedan
rabena yewafa2ko ya rab walahi mabrook

3:38 AM  
Anonymous ama l - Morocco said...

السلام عليكم
حكايتك يااستاذ حمادة ولا الأفلام المصرية
الف الف مبروك
بارك الله لكما و جمع بينكما في خير

9:03 AM  
Anonymous amal - Morocco said...

أنا قلت مش كفاية كده.. لازم أفرح بيكم على الطريقة المغربية
الصلاة و السلام عليك أ رسول الله.. لا جاه إلا جاه سيدنا محمد.. يووووووو يووووووو يوووووووووووو
دااااااها و دااااها و الله مااااا خلاها
جااااااثوو و داتو والله ماااا خلاتووو
يووووووو يووووووو يوووووووووووو
الله يجعل كلشي مبارك و مسعود و يكمل عليكم بالخير
امييييين

9:14 AM  
Blogger unknown said...

الف الف مبروك يا استاذ حماده
وربنا يطمنا على العضو الجديد فى الاسره


وعقبالك يا برايد لما نفرح بيكى قريب كده ان شاء الله
وكل سكان بيت العرايس والعرسان

11:26 AM  
Blogger Mahmoud said...

مبروك يا أستاذ حمادة
وعقبالك يا برايد اما نفرح بيكى
ونهنيكى بجوازه عليها القيمة

11:37 AM  
Blogger Abeer said...

الف مبروك يا استاذ حمادة

والله فرحانة لحضرتك كاني انا اللي اتجوزت

ربنا يباركلكم في حياتكم

11:45 AM  
Anonymous islamist bloke said...

مبروك يا أستاذ حمادة

وقول لحماك ميزعلش من الكلمتين الباردين.......دول كانوا من وقع اللحظة بس

والسلام

2:15 PM  
Blogger سهر الليالى said...

بجد بجد بجد قصه اكتر من رائعه جسمى كله قسعر وانا بقراها
وبجد عاملتلى حالة من السعادة مع انى لسه محتاجة كدة

الف الف مليون مبروك
ربنا يبارك لكم ويبارك عليكم ويجمع بينكم فى خير

تمنياتى بدوام السعادة الابدية يارب لانكم تستحقونها

4:43 AM  
Blogger Desert cat said...

خبر مفرح جدا
الف الف مبروك يا استاذ حمادة

4:53 AM  
Blogger Tarek said...

أستاذ حماده
كلمه مبروك قليله قوى على الموقف دا . بارك الله لكما وبارك عليكما وجمع بينكما فى خير. ألف ألف مليون مبروك أنا فرحتلك جدا جدا جدا

10:02 AM  
Blogger ra7eel said...

مبرووووووووووووووووووووووك بجد
وربنا يهنيك ويسعدك
انا بجد مبسوطه جدا
يالا ياجماعه شدوا حيلوكوا
مش كل مره مقالب ونكد وحكايات فاشله عايزين موود جديد وحكايات تفرح
بس ان شاء الله لما ابعت
هبعتلكوا حكاياتى الفاشله
هههههههههههههههههههههههههههه

1:23 PM  
Blogger ROMANTIC ROSE said...

بجد بجد بجد الف مليون مبروك .. و الله انا سعيدة بجد .. كلي سعادة و هنام و بسمة كبيرة علي وشي من القصة الرقيقة و الجميلة دي .. قد ايه ربنا رحيم بعباده و ودود معاهم .. احمدوا ربنا كتير قوي قوي قوي .. لان دي نعمة جميلة .. ربنا يسعدكم و يوفقكم و يجيب البيبي بالسلامة ان شاء الله ..

عقبالك يا برايد ياااااااااااااا رب .. و عقبال كل العايزين :)

2:52 PM  
Anonymous Anonymous said...

احسن تستاهل
:)
الراجل صاحبك معرفش يعاقبك غير باسوء عقاب علي الاطلاق انه يخليك تتجوز
:)
كمان سنه عاوز اعرف كان ضربك بالفازه علي راسك ارحم ولا يسيبك تتجوز ارحم الراجل برضه صاحبك و مكنتش هاين عليه
يالا بقي محدش بياكلها بالساهل

10:23 PM  
Anonymous Anonymous said...

انا سعيده جدا جدا ان فيه حالات حب ناجحة و ليكي ان شاء الله يا برايد ثواب كبير
و كمان ان شاء الله الشباب و البنات يتعلموا ان الحب حاجة كبيره و جميله و محتاج تضحية و ثبات

12:14 AM  
Blogger شيماء الجيزى said...

كلامه يابرايد بيقول انا فرحان ومظقطط
سبحان الله
الاستاذ حمادة ده اول حد اقرأ له واستمتع فى بيت العرايس والعرسان
خفة دمه
وحبه القوى الجميل
بجد
تستاهل كل خير
وابقى يا استاذ حمادة سمى المولود برايد
:D

ربنا يسعدك ويرزقك بالزورية الصالحه
وعقبالك يا صبحتتتتتتتتى

4:19 AM  
Blogger He & She said...

el mawdoo3 khallani a3ayat men el far7a wallahi. One thing missing, a link to the original post to complete the picture. I couldnt find it anywhere in your blog

7:17 AM  
Anonymous Anonymous said...

This comment has been removed by a blog administrator.

7:48 AM  
Blogger Manwella said...

ألـــــــــــــــــــف مـــــــــــبروك يا أستاذ حــــمــــادة

ربـــــــــنـــــــــا عوض صبرك بكل خير
بارك الله لكما وبارك عليكما وجمع بينكما فى خير

وتقبل منى أجمل التـــهـــانــــــــى
لقرب قدوم الضيف الجديد

4:45 PM  
Anonymous شروق said...

والله مش قادرة أقول قد ايه انا سعيدة

سعيدة لبرايد انها ربنا جعلها سبب
وسعيدة للأستاذ حمادة لان ربنا عوض صبر خير
وسعيدة للعروسة لانها دافعت عن حبها ولقت نتيجة جميلة
وسعيدة بالبيبي وان شاء الله يكون الذرية الصالحة

والاهم اني سعيدة ان في ناس في مدونتك يا برايد لسه بتفرح لفرح حد

ربنا يوفقكم كلكم يارب

12:47 AM  
Anonymous أيامنا الحلوة said...

بجد بجد فرحت اوووووي مبروك يااستاذ حمادة مبروك من كل قلبي ربنا يسعدك انت وزوجتك يارب وتفضلو تحبو بعض طول العمر

تحياتي

2:27 AM  
Blogger brokenheart said...

This comment has been removed by the author.

3:35 PM  
Blogger brokenheart said...

مبروك يا استاذ حمادة
انا بالمناسبة باحسدك
بس مش الحسد السئ قصدى يعنى انا باغبطك على اللى انت وصلت له ... فعلا من صبر الليالي نال المعالى
الف الف الف مبروك
وعقبالى يا رب ياريت تدعي لي لانى قربت اصرف نظر عن موضوع الجواز من اصله ...

بالمناسبة ... ليا سؤال يا برايد ... انتى بتوفقى راسين فى الحلال فى البلوجاية دى ... ؟؟؟

لو الاجابة نعم اضغط الرقم 1
لو الاجابة لا اضغط الرقم 2
لو الاجابة بين نعم ولا كسر التليفون


انا عاوز اتجوووووووووووووووووووززز

وعلى راى سعيد صالح فى مدرسة المشاغبين لما قطع البلوزة لابلة عفت ... قلة ادب

3:38 PM  
Blogger NilE_QueeN said...

اللى يصبر ينول
مبروك يا استاذ حماده

مع كان المفروض ترش علينا رشه جريئه باي حاجه بمناسبة الجواز واخبارك الحلوه اللى جات مع بعضها

ربنا يوفقك ويسعد ايامك

9:06 PM  
Anonymous Anonymous said...

الف الف الف مبرووووووووووووووووووك

الله يهنيكم ويهني الجميع بيكم امين يا رب العالمين

2:32 AM  
Blogger Epitaph said...

you evoked tears of happiness

masha ALlah

اللهم بارك لكما
وجمع بينكما في الخير
و ارزقهما الذرية الصالحة
ان شاء الله

5:32 AM  
Anonymous DayDreaming said...

الف الف مبرووووووووووك
ربنا يسعدكوا ويوفقكوا وعقبال ما نفرح بيكي يا برايد

3:03 PM  
Anonymous Maryam said...

ألف ألف ألف مبروك يا أستاذ حمادة
وألف مبروك للمدام
وربنا يجعل أيامكم كلها خير وسعادة وفرح وهنا يارب
ويبارك لكم فى البيبى ياااااااااااارب
وعقبالك يا برايد مانفرح بيكى قريب
وتكون اخر مقالبك دى خير زى الاستاذ حماده كده
وربنا يجازيكى خير على المدونة الرائعه دى يا حبيبتى
وعقبااااااااااااااالى يارب
وبرايد قبلى ;)

Maryam :)

8:18 PM  
Blogger mesh2dra said...

يااااااااااه

الواحد كان نفسه يسمع أى اخبار حلوة


بجد
الف مليون مبرووووك

ربنا يبارك لك فيها ويباركلها فيك


يالا
بوسة كبيرة لبرايد ولعروستك

سلاماتي

7:38 AM  
Anonymous snow white said...

انا فعلا والله حسيت بسعاده لما قريت الموضوع ده بالرغم من اعتراضى على فرق السن الكبير ده بس فعلا من جوايا بتمنلهم كل السعادة وعقبال عندك يا برايد لما تلاقى اللى يستاهلك ويستاهل خفه دمك

2:24 PM  
Blogger الأســـد المصــري said...

اجمل شيء في هذه الدنيا ان يطاردك نصيبك حتى وان استكثرته على نفسك .. وانا لاحظت من الجزء الاول للقصة ان الاستاذ حمادة من النوع القنوع, وليس الذي " يأخذ الدنيا غلابا ".. ولهذا بدت السعادة وكانها هي التي تبحث عنه لا هو ! - ادامها الله عليه وزوجته ورغم ان القصة نادرة الحدوث, لكنها من تلك القصص الجميلة التي تضرب بالمعتقدات الاجتماعية والافكار التقليدية عرض الحائط !!.. فليس هناك قاعدة يسير عليها القدر, وكما تقول الامثال: نصيك يصيبك .. وسبحان الله مسبب الاسباب, فلو كانت برايد تزوجت من العريس الثالث او الرابع لما قامت بانشاء هذه المدونة .. والتي وكأنها صنعت خصيصا من اجل عودة الاستاذ حمادة الى حبيبته مرة اخرى !!..أو من يدري ان كانت هناك مفاجآت سعيدة اخرى .. ومن يدرى باى طريقة ستكون نهاية الانسة برايد .. ومولد "مدام" برايد !! .. عموما بارك الله لكما , والعقبى لبرايد وبقية الاخوة والاخوات قريبا باذن الله

4:45 PM  
Anonymous Anonymous said...

برايد:
بعد التحيه والسلام وخالص التمنيات بان يبارك الله لك في حياتك العمليه والشخصيه
اسمي أحمد
و
أحب اسألك وأسأل جميع الانسات اللي عاوزين يبقوا برايدز
ما هو تحليلك أو تحليلكم لأسباب انتشار هذه الظاهره؟
واحده جميله مثقفه من عائله مركز مرموق بتخرج والناس بيشوفوها بيجي لها عرسان كتير ومع ذلك لا تتزوج
لماذا؟
نفس الشئ بالنسبة للشباب اللي زي خفيف الروح والدم ربنا يسعده ويبارك له أستاذ حماده
ايه المشكله يا جماعه؟
فين العيب؟
ما الأسباب؟
ده جدي وجدتي أيام الخاطبه اتجوزوا بمنتهي السهوله
!!!!!
مع ان التعارف فرصه كانت محدووووووده جدا جدا
أمال احنا مالنا يا عالم؟
تحياتي لجميع ال
brides and would-be brides
والعرسان كمان

8:58 AM  
Blogger 7mada said...

شكرا ليكم كلكم يا جماعة ولو إن الشكر جه متاخر كتير لكن أكيد كلكم عارفين إن فتراتى مع النت بقت قليلة موش زى الأول
والحمد لله زوجتى الحبيبة غيرت حياتى تماما وحتى فترة التأقلم مع الأخر اللى كنت باسمع عنها من أصدقائى ممرتش بيها لإن زوجتى الحبيبةبذكاءها وحبها حسستنى بأن البيت ده فعلا كان ناقصها وبصراحة عرفت إزاى تحتوى واحد زيى عاش وحيد خمستاشر سنة ونتفهم اللى عايز أقوله من مجرد نظرة ليها فى عينيا
وحماى العزيز الحمد لله بقينا أصحاب و أكتر من الأول بمجرد معرفته بخبر الضيف الجديد اللى هيكمل سعادتنا
ونفسى فعلا أوصى كل أم انها تربى بنتها زى ما حماتى ربت بنتها . فبالرغم من حياتهم خارج مصر فإنها منسيتش تعلم بنتها إزاى تحافظ على بيتها وترعاه وتخليه أجمل مكان يرجع جوزها ليه بعد يوم شغل متعب
مرة تانية شكرا ليكم كلكم وعقبالكم جميعا

12:45 PM  
Blogger 7mada said...

شكرا ليكم جميعا يا جماعة ولو إن الشكر ده جه متأخر لكن أكيد كلكم هتعذرونى لأن طبعا فترات إستعمالى للنت قلت جدا(بقى فيه حاجات بتشغلنى دلوقت)
واتمنى لكم جميعا تعيشوا فى نفس السعادة اللى انا عايش فيها من يوم ما الإنسانة الجميلة اللى إتجوزتها دخلت بيتى وحولته لمكان جميل زيها
ومرة تانية شكرا ليكم جميعا

12:56 PM  
Blogger 3ala asm masr said...

الف مبرررررررررررررروك
أنا يمكن معرفش استاذ حماده ويمكن مقرتش قصته من الاول
لكن اكتر حاجه بتفرحنى فى الدنيا دى ان اتنين بيحبوا بعض ربنا يكرمهم ويتجوزوا
عقبالك يابرايد وعقبال كل زوار بيت العرايس والعرسان
ويارب العبده لله ربنا يكرمها وتتجوز اللى بتحبه

6:07 AM  
Anonymous ياسر said...

انا تعبت من قصص الخيال العلمي دي
برايد
بجد حاولي ترجعي زي الاول
لان كدة المصداقيه هتروح دة لو كان اصلا فاضل منها شئ

10:18 AM  
Blogger سفير جهنم said...

الصبر مفتاح الفرج يا حماده

انا ليا الشرف انى اعلق عندك يا حماده


بوست شديد

3:33 PM  
Blogger sherina said...

والله العظيم أنا فرحانة جدا ...ألف مليون مبروك....بارك الله لكما وبارك عليكما وجمع بينكما في خير.... وان شاء الله ربنا يرزقكم بالذرية الصالحة اللهم آمين

5:07 AM  
Blogger The Groom said...


:))))))))))

والله فرحتلك كتير يا عمو حمادة :)

ربنا يباركلك ويكرمك يا رب انت وزوجتك ويبارك لكما في الموهوب وتشكران الواهب

عقبالنا يا رب

تحياتي من ماناساس البلد

8:27 AM  
Blogger Wild at Heart said...

عيطتنى الله يجازيك لكن ولا يهمك
ألف مليون مبروووووووك

8:20 AM  
Anonymous semsemah said...

مبرووووووووووووك
يارب يسعدكم ويهنيكم

2:02 PM  
Anonymous Anonymous said...

ياااااااااه
على الحب
بجد انا كنت شوفت قصتك اول ما البلوج اتعمل
وكانت مأثرة فيا اوى
وبجد اول ما وفت البوست دا اتجننت بجد بجد كنت طايرة من الفرحه على قمه الجمال
بجد انت حسستنى ان فى حب بجد وحبيب مخلص ممكن يضحى بحبه وسعادته علشان يضمن لحبيبته حياة هو شايفها احلى
بس بجد زرجته طلعت بتحبك بجد وعاوزة تحافظ عليك ربنا يباركلك فيها يارب وفى البيبى الجديد اللى هينور حياتكوا وهيكمل قصه الحب الجميله
بجد انا مش عاوزة اقول ايه بس مفيش كلام احلى من انى ادعيلكوا بالتوفيق فى حياتكوا
بارك الله لكما و بارك عليكما و جمع بينكما في خير
وربنا يكرمك انت وزوجتك بالزريه الصالحه ان شاء الله
وربنا يكرمك يا برايد انك وافقتى راسين فى الحلال عقبالك يا قمر وعقبال كل البنات والشباب اللى فى البلوج واللى فى العالم كله

4:50 PM  
Blogger امل وافي said...

ينهار ابيض يا الف نهار مبروك علي الاستاذ حماده و عروستو اللي زي القمر و يا رب لو جابو بنت يسموها برايد و ربنا يارب يوفقهم و الف مبروك مره تانيه

1:45 AM  
Anonymous Anonymous said...

يالله محستش بنفسي غير ولقيت عيوني مدمعة من فرحتي بيك انت وزوجتك القمر دي ياااااااارب يسعدكم وينور خياتكم ياارب ويجعل ايامكم كلها حب وسعادة يارب..انا متابعة قصصك من اول بوست اكتبتيه يا عمو حمادة ولا نقول يا بابا حمادة..الف الف مبروووووووك وربنا بعيط وهزغرت ليكم اهو...لووووووووووووووووووووووووووووووووووووووووووووووووووووووووووووووووووووووووووووووووووووووووووللللللللللللللي...ربا يسعدك يا حمادة انت وقمر حياتك لي ساكنة قلبك يااااارب ويباركلك فيها ..دي باين عليها بتحبك قوي..ربنا يخليكم لبعض ويوصل النونو الجديد قريب يارب بالسلامةو ينور حياتكم كمان وكمان ياااارب.....اما انتي يا برايد العسولة..دا مش غريب عنك القلب الكبير دا والمستوى لي معودانا عليه فبوستاتك واديكي كملتيها وفقتي اجمل حبيبين بالدنيا واسعدتي قلوبهم جدا بدون لتقصدي..ربنا يفرح قلبك كمان ياااااارب ويديكي على قد نيتك...والله وحشتوني كلكم وانشاء الله ابقى اشوفكم باستمرار زي الاول..
اختكم السندريللا السعيدة ..بعد طول غياب

4:21 PM  
Blogger barbie girl said...

مبروووووووووووووووووووووووووووك

4:16 AM  
Anonymous Anonymous said...

فبقى الراجل ياعينى متحاصر فى الشغل بالمعارف وفى البيت بالنكد وماستحملش غير إسبوعين وإستسلم ووافق انى اتقدم لبنته
----------------------------------
وانتا فرحان اوي بالاسلوب اللي اتجوزت بيه عيله ضغيره

1:40 AM  
Blogger Dalia said...

الف مبروك يا استاذ حماده
و يتربي فى عزكم ان شاء الله

8:08 AM  
Blogger عبدالرحمن فارس said...

الرائعون كالأحجار الكريمه لا نصنعهم ولكن نبحث عنهم لنهنئهم بالعام الجديد ... كل عام وأنتم بخير
عام مضى وعام يأتي ويارب السنه دي تكون أحسن من الي قبليها ونشوف نفسنا و بلادنا أحسن .... بدري بدري كده قبل الزحمه

2:15 AM  
Anonymous علي said...

فرح فى الحارة
*************

هيصة وزيطة ف قلب الحارة
اصل النهاردة فرح بنت الجارة
اعلام وزينة والوان
وحاجات حلوة كمان وكمان

جوه البيت الكل بيجرى
باين عليهم اتاخروا ع المجرى
اللى تصب الشربات ف كبابى
واللى تعلى صوتها وتنادى
فين الحنة والبخور ؟
اصل الليلة ليلة سرور

ناس بتنم وناس بتذم
واللى تمصص تمصيص
واللىتقول ده قماش رخيص

وناس بالخير عمرانة قلوبهم
خايفين يزودوا ذنوبهم
بيقولوا بصوا ع الموبيليا
فعلا حاجة جميلة وهايلة

جايبين كوافيرة للعروسة ف البيت
تعمل لها كحكة زوزو وزنبليط
وواحدة بتدى العيال بنبونى
اخدلى واحدة الا ينسونى

ناس ف المطبخ عمالة تطبخ
وناس تانية عاملة تنفخ
فيه ايه حصل ايه ؟
مش عارفين العريس اتاخر ليه ؟

صوت الزمارة من اول الحارة
جت عربية تعبانة ومشخعلة
كل حتة فيها مخلعة
جواها العريس ع سنجة عشرة
اكنه رايح يقرا النشرة

ابو العروسة اتاخرت ليه يبنى ؟
معلش يا عمى اصلها دايما تتعبنى
عطلت منى ف وسط السكة وخليت عربية كارو تسحبنى

يارب اشوف كل وحده منتظره العريس في الكوشههههههههههه

2:31 AM  
Anonymous علي said...

هل انت حماده عوز ام انت والله بحبك موت يا حماد ام انت حماده بتاع بدله حماده بجنيه ونص
علي العموم يا حماده الفين مبروكككككككككككككككك
وعقبال الجميع العازبون والعازبات والمتزوجين

2:34 AM  
Anonymous علي said...

منى ... منى
منى قلبي وروحي
يا بلسم الجـروح
بوجهك الصبوح .. يا منى
منى .. منى
منى و ... يا منايا
يا أجمل الصبايـا
غنيت من هنايـا
الله ما أحلى حبنـا
بصوتك الحنون
تغـردين لي ..كبلبل الغصـون
يا طفلة العيون
ما أجمل الدنيا وانت في عيوني
هنـا .. هنـا
زجل صلاح جاهين الي زوجته مني

3:13 AM  
Anonymous saso said...

الله عليكم
والله انا كنت بقرا البوست وكأنى بتفرج على فيلم رومانسى جميل
بجد مبروووووووووووووك
من قلبى
وربنا يوفقكم يا رب
وعقبالى يا رب وعقبال الباقى

مستنيين بقى البوست التانى تحكولنا فيه الجواز حلو ولا ايه
؟

7:01 PM  
Blogger أحمد منتصر said...

بارك الله لكما وبارك عليكما وجمع بينكما في خير

قصة رومانسية جميلة جدا

2:22 PM  
Anonymous احمد اللى اتولد من جديد said...

اقسم بالله انا بكيت لو تعرفوا الحكاية دى عملت فيا ايه؟ ادتنى الامل اتولد عندى امل بعد ما كنت فقدت الامل فى كل حاجة مش فى الحب بس والله انا بمر بظروف صعبة جدا خلتنى فاقد الامل فى كل حاجة بس دخلت صدفة وصدفة بحتة وقرات الموضوعين واتاكدت ان دى رسالة من ربنا لينا لسه فى امل لسه فى امل سامحنى يارب انى فقدت الامل فى رحمتك بس انتا كريم مسبتنيش يارب يارب سامحنى واحمدك انك ادتنى امل من جديد.انا باعترف قصادكم وانا بعيط والله العظيم وكل كلمة بقولها صدق عشان كلنا يبقى عندنا امل وارجوكم ادعولى ربنا دائما يدينى امال كتيرة ويحققلى امالى وامنياتى ارجوكم ادعولى

10:39 PM  
Blogger el kazzafi said...

دليل المدونات العربية
مدونة كل المدونين العرب .. جريدة كل العرب

انت مدعو للكتابة في مدونة كل العرب
مشروع الجريدة العربية
تكمن فكرة هذه المدونة في جمع اكبر قدر من المدونين العرب واقدرهم وافصلهم لكي يكتبو في مكان واحد
ذلك للحصول في النهاية على مدونة اشبه بالجريدة العربية تناقش القضا ياالعربية وخلافات العرب حيث ان كل الطوائف والبلاد مدعوة للكتابة
وقد تكون نقطة انطلاق للتفاهم والنقاش حول القضايا العربية المختلفة وتقابل وجهات النظر

للمشاركة ارسل ايميلك (بريدك الالكتروني) في تعليق على هذا المقال وسوف تتلقى دعوة للكتابة في هذه المدونة

مزايا الكتابة هنا :
للكاتب :
1- عدد اكبر من القراء
2- تحسين نتايج البحث لعناوين المقالات
3- انت كاتب وفي نفس الوقت قارئ تقرأ ما يكتبه كبار المدونين العرب
4- شهرة اكبر .. ودائما اقول ان في الاتحاد قوة وهذا هو اتحاد المدونين العرب

للقارئ :
1- القراءة للمدونين الكبار تحت صفحة واحدة
2- تجميع المدونات وجعلها مث ل جريدة الكترونية
3- سهولة الوصول للمقالات المرادة

شروط الكتابة (لن يتم التعديل لو مسح اي مقال ):
1- عدم الاساءة للاديان السماوية
2- عدم نشر مقال من اجل ربح المال او التنفع المادي ولكن الشروحات مقبولة ومرحب بها
3- عدم كتابة كلام خارج او الفاظ اباحية
4- الكتابة باللغة العربية

الفكرة تتلخص في ان كل مدون له حق الكتابة فقط بارسال ايميله في تعليق على هذه المدونة
اذا كانت لك مدونتك الخاصة فلا مانع من نسخ مقالاتك الهامة والتي تراها ترقى كي تكون في الجريدة العربية الالكترونية او مدونة كل العرب

وانا شخصيا ساكتب في مواضيع مختلفة وساهتم بتحقيق افضل نتائج للبحث والحصول على اكبر قدر من الزوار حتى تصل مقالاتك لاكبر عدد من القراء
كما ان تجمع المدونين سيجيئ بقراء اكثر وهكذا

برجاء ارسل لنا بريدك الالكتروني كي تستطيع الكتابة في هذه المدونة
ادعو الله ان تكون هذه المدونة ملفتة لنظر القراء ومحط انظار الراي العام العربي
مشروع الجريدة العربية الموحدة

كما يمكنكم اضافة مدونتكم في
دليل المدونات العربية
والله ولي التوفيق

2:18 AM  
Blogger مهندس الرومانسيه said...

ايه الجمال اللى انتم فيه ده يا خراااااااااااااااابى عليكم والله مبضحك ولا الفرح بيعرف طريق لقلبى غير لما بزوركم ربنا يخليكوا ليا ياااااااااااااارب ارجو زياره مدونتى ولكم فائق الاحترام والتقدير

7:14 AM  
Blogger مهندس الرومانسيه said...

الف الف الف الف الف الف مليوووووووون مبروك بجد قصه حب رائعه تعرف الواحد نفسه يلاقى انسانه تحبه زى محبيبتك بتحبك كده اللهم لاحسد وربنا يسعدكم بحب اقول حاجه ارجو انكم تفهموها يا بخت من وفق راسين فى الحلال ارجو زياره مدونتى بحبكككككككككككككككم

7:18 AM  
Blogger posycat said...

ألف مبروك يا أستاذ حمادة
أكيد طبعا او مراتك جابت بنت هتسميها برايد
مبروك مرة تانية

7:21 AM  
Anonymous moh81 said...

بصراحه قصه غريبه جدا جدا جدا .. و الله أعلم إذا كانت حقيقه ولا لأ .. يعنى الجزء الأول حبيبته طلعت بنت صاحبه اللى كان يعرفه من 20 سنه و هو حضر سبوعها .. و نيجى فى الجزء الثانى و من وسط كل المدونات و كل صفحات الانترنت و كل البنات اللى بتتصفح النت .. تصادف ان حبيبته تثرا القصه اللى كاتبها و تعرف ان هو و تتصل بيه و يتجوزوا .. قعلا على رأى العزيزة شويكار ( شئ لا يصدقه عقل )

9:02 PM  
Anonymous Anonymous said...

هو من جمال القصة و كمالها فعلا تحسي انها مش حقيقة رغم انها ممكن ممكن تحقق
فى واحد كتب تعليق : ازاى من بين ملايين المدونات لقت المدونة دى؟!!! هو دا السؤال اللى محتاجين اجابة عليه
لو الاستاذة حمادة جاوب يبقى فعلا حقيقة و يبقى اخيرا اخيرا لقيت قصة افظع من وينتر سوناتا ((:

9:44 PM  
Blogger مش عارف said...

ازيك يا استذ حمادة يا جامد قوووووىىىىى الف مبروك يا باشا و عقبال الانجال ان شاء الله انا فعلا فحان ليك جدا بالرغم انى معرفكش و كنت حلومك جدا او لومتك بالفعل لما قرات مقالك الاولانى فاكرة ولا نسيتة المهم انا ليا سوال انت حتنشر بقيت مقالبك اللى صادفتها لاختيار العروسة ولا حتخاف من المدام الف مبروك

3:54 AM  
Blogger هاجر said...

الللللله،ايه الجمال ده..
ربنا يسعدهم ان شاء الله، و يسعدك انت كمان يا غاده..

7:49 PM  
Blogger aya said...

مش قادره اقول علي قصتكوا غير سبحان الله فعلا الواحد مش بياخد غير نصيبه مهما كان العمر ربنا يبارك ليكم يارب ويرزقكم بالذريه الصالحه

12:26 PM  
Anonymous Anonymous said...

كلها 10 سنين وتدخل فى الخمسين سنه وتبقى هيا فى عز شبابها وشوف بقى ايه اللى هيحصل . و10 سنين ليه اراهنك كلها سنتين بالكتير وهتعرف فرق السن بيعمل ايه ياحماده .

4:51 PM  
Blogger MoodyLicious said...

اللى بيسأل ازاى لقت المدونة دى ربنا لما بيريد مفيش حاجه مستحيل ربنا يهنيهم انشاءلله و بعدين للى بيقولوا السن و وكده محدش ضامن عمرة ياما رجالة 50 او 60 سنة و ميبانش عليهم

9:30 PM  
Blogger foty said...

مبروووووووووووووووووووووووووووك
فوتي

1:35 AM  
Blogger foty said...

مبروووووووووووووووووووووووك
فوتي

1:36 AM  
Blogger one of the puzzled people said...

الف مبرووووووووووووووووووووووووووووك
بارك الله لكما وبارك عليكما وجمع بينكما بالخير.....

5:03 AM  
Anonymous gananoor said...

ألف مليون مبرووووووووووووووووك " أيوه كده يأستاذ حماده اللى عايزحاجه لأزم مش يصر بس عليها لكن يحارب عشانها """ وعلى رأى انسانعزيزعلى نفسى قوىىىىىىىى ومانيل المطالب بالتمنى ولكن تأخذ الدنيا" كداهوه" بالأيد يعنى

10:43 AM  
Anonymous Gogo said...

Rbna Es3edak Ya Austaz Hamada :) and ofcourse you Bride:)

3:04 PM  
Anonymous Anonymous said...

الف مبروك يا استاذ حماده وربنا يسعدكم والله فرحنالكم جدا وسلامنا للمدام وعلى فكرة انجح جواز اللى بيكون فيه فرق في السن بين الزوج والزوجة واسالوا مجرب
دينا

1:18 AM  
Blogger همس الحزن said...

فعلا بجد انا سعيده عشانك انت والمدام وربنا يسعدكم ويوفقكم ويارب يوصل الفرد الجديد ف العائلة بسلامة ويكون وش السعد عليكم ...
فعلا قصتك مؤثرة وفكرتنى بقصتى مع جوزى لما قلت حكاية فرق السن فانا الفرق بينى وبينه 16 سنه بس الحمدلله لحد دلوقتى سعداء مع بعض وفعلا ما كنتش هحس انى سعيده او عايشة لو ما كنتش اتجوزته..وعشان كده قلت لازم اعبرلكم عن سعادتى بيكم وامنياتى ليكم بالتوفيق والسعاده الدائمة والتفاهم المستمر

2:58 AM  
Anonymous Anonymous said...

Mabroook ya ostaz 7amada, Rabena yebreklak fe 7aytak el gedida,,,,take care 3aleeehom ba2a

2:15 PM  
Anonymous Anonymous said...

ما شاء الله لا قوة إلا بالله

و الذى نفسى بيده أنا عيطت من القصة
الله يباركلك فى زوجتك ويباركلها فيك

و يرزقكم بالذرية الصالحة التى تقر
بهـا عينك و عين زوجتــك .. آ مين

8:56 PM  
Anonymous salma said...

mabrook ya ostaz 7amada ma3 enha gaia met2akhara awi awi :)))))) ana 2areet el msg di el 2ol we ba4deen i searched for the 1st msg and read... ana mabsoota awi enoko got married we rabina kedah yekremna kolina we netgawez ba2a..

6:52 AM  
Anonymous Anonymous said...

بجد ربنايوفقكم
صح ممكن مانعرف اشخاص كتير من النت
بس بنفرحلهم

وربنا يخليكم لبعض =)

10:33 AM  
Anonymous Anonymous said...

ألف مبروك يا أستاذ حمادة
وربنا يهنيكم ويسعدكم يا رب ويديم عليكم نعمته
وعقبال كل المينننننززززز والبرايدزززززززز

8:23 AM  
Anonymous AROMA said...

الف مبروك ياستاذ حمادة .. انا اول مرة اقرأ المدونة واول مرة ادخل بيت العرسان ( وطبعا دخلته برجلي اليمين ومحدش غصب عليا )واول حاجه قرأتها هي قصتك .. وفرحتلك اوي وكأنني بعرفك .. يمكن عشان حسيت انك طيب وابن حلال .. ربنا يسعدك ويوفقك ويرزقك الذرية الصالحه .. وبارك للمدام..

اما انت يابرايد فحكايتك حكاية .. اليوم حضرت برنامج خط احمر على قناة ال بي سي .. وكان فيه روبرتاج اتعمل معاك .. كلامك كان جميل وباين عليك ان الشهرة مااثرتش عليك

على فكرة انا تعرفت عليك وعلى كتابك بس من اسبوعين عن طريق صديقه ومن ساعتها وانا معجبه بك
ويمكن تلاقين هب كتبت لك حدوته ببيت العرايس

ربنا يسعدك ويوفقك

( اختك اروما الأروبة ( يعني ايه أروبه

2:58 PM  
Blogger الغلباويه said...

بجد بجد الف مبروك يا استاذ حمادة هى اكيد متاخرة بس انا لسه عارفه المدونه النهاردة بس وقريت كل قصصك واتاثرت بيها اوى وضحكت معاها كمان وكمان برايد انا اتعرفت عليكى من برنامج بالخط الاحمر وكنت بدور على اللينك بتاعك لحد ما لقيته طريقتك حلوة اوى فى الكتابه وفكرة بيت العرايس والعرسان دى حلوة اوى
سورى لو طولت عليكم

4:06 PM  
Blogger shosho said...

الف مبروك لحضرتك . ويارب تعيشوا دايما ف سعاده

9:46 AM  
Anonymous ملكة بحجابى said...

ياسلاااااااااااام بجد انا اتبسطت اوى لما قريت القصة من اولها لاخرها وحسيت انه فعلا النصيب غلاب
وفى السماء رزقكم وماتوعدون
يبقى ربنا كان كاتبكو لبعض وكل اللى حصل انه كان فيه وقت معلوم عشان يحصل اللى ربنا كتبه
سبحان الله
الف مبرووووووووك
ولو انها متأخرة شوية

5:27 AM  
Anonymous ملكة بحجابى said...

عايزة اسجل قصة هنا
بس مش عارفة اسجلها فين هنا
ياريت تقوليلى

5:29 AM  
Blogger wanna b a bride-no more said...

إكتبي قصتك و إبعتيهاعلى الميل ده

wannababride@yahoo.com

و أنا في انتظارك

8:30 AM  
Blogger rasha said...

الف مبروك يا استاذ حماده
دى اول مره اشترك فى المدونه
بس لى تعليق
اللى تستاهل التهانى فعلا زوجتك وحبيبتك وام اولادك
لانها شجاعه
اخدت قرار غير عادى ومش كل الناس يوفقوها عليه واتمسكت بيك وحاربت علشانك
اكيد حضرتك تستاهل
اتمنى لكم السعاده من كل قلبى

8:55 AM  
Blogger koketa said...

بارك الله لكم وبارك عليكم وجمع بينكم فى خير

3:30 PM  
Anonymous sherif said...

مدونتك جميلة ومواضعيك اجمل ربنا يوفقك

11:04 AM  
Anonymous أميرة said...

ماشاء الله لا قوة الا بالله...ربنا يسعدكم يارب ويحميكم ويكمللكم ع خير

12:41 PM  
Blogger kounouz said...

houa lessa fi keda????????
houa lessa fi nas gamila keda??????
houa lessa fi 7ob bel shakl dah?
ana lessa moktashefa el blog dah men osboo3 we 2arya el ketab beta3 el bet ghada elli zay el sokkar we shoft el blog bardo we ba3deen geet hena a7awel anasy nafsy el 3eesha el gamila elli ana 3ayshaha, anyways el kalam khadni
rege3t le awil resala ba3at-ha el ostaz 7amada 3ashen afham el mawdoo3 la2etny mozbahella. kol marra kan beykteb feeha "mesh 3ayez 7ad yetarya2" kont barod (wel soot kaman) houa fi 7ad momken yetarya2 3ala gamal zay kedaaaaaaaaaaaa? (nesit 2a2olloko en el cleenex kheles fel leela di)
kont begad 7assa enni bashoof film men ayam zaman mesh mekaddeba el ostaz 7amada tab3an bass il kalam hazzeni men gowa awiiiiiiiiiii
we lahwi ba2a 3alli 7assali lamma 2areet re7let el kefa7 lel 7osool 3ala el 3aroosa el amar
rooh ya sheekh rabbena yeg3al ayamko kollaha hana
elahy wenta gahy torzo2 el ostaz 7amada we 7aramo 3ala kol femto sanya 3eshtaha fel leela wana de kemmet el entesha2 kheer we baraka we 7OOOOOOOOOOOOOOOOOOBBBBBBBBBBBBBBBB
da3wet weleya sa3et fagreya 2ollo amin (we bel marra ya rab atgawez ragel ye7ebbeny begad ma tenta2 yad mennak leeh laha 2ollo amin)
fottoko be 3afia

8:54 PM  
Anonymous Anonymous said...

معتقدش ان القصة دى ممكن تتكرر تانى مع اى حد وخصوصا ان الناس اللى باقت باقية على حبها الحقيقى قليلين اىو اوى الايام دى ع العموم الف مبروك لحماده

4:04 PM  
Blogger Admin said...

بجد رغم اني معرفكمش بس انا سعيدة وفرحانة جدا
الف الف الف مبروك
ربنا يخليكوا لبعض ويرزقكم بالذرية الصالحة
يارب
وربنا يرزقك يا برايد بابن الحلال يارب انتي وكل العرايس والعرسان اللي هنا

5:08 AM  
Anonymous Anonymous said...

بجد بجد 1000 مبروك أنا بتمنالكم كل السعاده الى في الدنيا وربنا يكرم ويرزق كل الناس بالسعاده انا اول مره اضيف تعليق بس بجد ده لان قصص الفشل كتيرررررررررره جدا الانسان بجد ما بيصدق يفرح حتى لو لحد غيره مبروك ليكوا وعقبال كل الى متجوزوش




تمنياتي لكم بدوام بالسعادة وسلامة الضيف الجديد

7:43 AM  
Anonymous Anonymous said...

بجد بجد 1000 مبروك أنا بتمنالكم كل السعاده الى في الدنيا وربنا يكرم ويرزق كل الناس بالسعاده انا اول مره اضيف تعليق بس بجد ده لان قصص الفشل كتيرررررررررره جدا الانسان بجد ما بيصدق يفرح حتى لو لحد غيره مبروك ليكوا وعقبال كل الى متجوزوش




تمنياتي لكم بدوام بالسعادة وسلامة الضيف الجديد

7:44 AM  
Blogger زهرة الاحزان said...

الف الف الف الف مليون مبروك استاذ حمادة وربنا يديم الفرح عليكو يارب وربنا يجعلها زيجة صالحة ويخلف عليكو بالذرية الصالحة يارب ةالف مبروك للعروسة وربنا يسعدكم يارب والله فرحتلكم اوى وعقبالى وعقبال كل بنت لما تلاقى واحد راجل بجد يحبها الحب دة كلة ويقف ادام الكل عشانها وفى الاخر يفوز بيها وتفوز بية اللهم امين

1:21 PM  
Blogger واحـ ـ ـدة تـ ـانـ ـيـ ـه said...

الف الف مبروووووووك يا استاذ حمادة

6:42 PM  
Blogger زيزو said...

والله فرحتلك اوي يا اخ حماده ربنا يهنيك انت وزوجتك

انا قرأت الجزء الثاني من الفيل.. لا اقصد من القصه الجميلة

فبحثت عن الجزء الاول لتكمله التمثل.. ييه القصة قصدي

ربنا يديم الحب بينكم

بس ليا عتاب عندك
المفروض تسيب (الشيشه) ديه لانها مضره بالصحه وحرام عليك تمرض نفسك منها

4:26 AM  
Blogger walad 3etra said...

استاذ حماده
أنا قرأت كل مشاركاتك التهارده
انا لا أعرفك, وسنى من سن الكريمه زوجتك
لكن بجد، انا سعيد لكما جدا جدا جدا
ربنا يكرمكم و تعيشوا حياه سعيده وهانئه
مبروك لكم وربنا يخليكوا لبعض إن شاء الله

7:42 AM  
Blogger انسانة طموحة said...

والله سبحان الله

اللى نصيبة فشىء بياخدة مهما طال الزمن

الف مبروك استاذ حمادة ليك ولعروستك الجميلة

1:48 AM  
Anonymous nony said...

الف الف الف مبروك يا استاذ حماده .بجد فرحتلكو اوى اوى اوى .و يارب تسعدوا بعض على طول . و اوعى تكون انت سبب فى دموعها ف يوم زماتزعلوش بعض ابدا.

6:40 AM  
Blogger rania said...

بجد الف مليون مبروك مافيش كلمه ااقدر ااقولها غير مبروك
مبروك انك صممت على هدفك مبروك انك متخلتش عن حبك
مبروك ان ربنا جمعكم بالخير
مبروك ان ربنا رزقكم بالذريه الصالحه وربنا يبارك لكم فيه يارب العالميين

10:10 PM  
Blogger Wanda said...

مبروك الف مبروك
احلى حاجة فى قصتك انك بتقول فيه امل حتى بعد 20 سنه بجد مبروك
لولولولولوولولولوى
و يديم عليكم السعادة و يبعد عنكم العين و الحسد

بس بصراحة :-) لو انها غلاسة كنت تكمل باقى الحواديت
(طبعا صعب تاخذ اذن كلهن بس بالتورية يعنى)
اصلها بصراحة خبرة تعليمية قيمة

10:10 AM  
Anonymous Anonymous said...

الف مبروك الف مليون مبروك لسه فى امل فى الدنيا ديه والله العظيم فرحتلك

1:10 AM  
Blogger mido said...

الف مبروك يامان ربنا عوض عليك يس لازم تعرفنا ايه اللي المقروض تعملع علشان تحافظ علي السعاده دي
يعني عاوزين نعرف رايك بعد كمان كام سنه
انا بصراحه ماجل مشروع الجواز علشان اللي بشوفه حواليه
بس ربنا يسعد كل الناس ويديم سعادتك

9:20 AM  
Blogger mido said...

ربنا يوفقك

9:24 AM  
Blogger kindprincess said...

الف مبرووووك يا أستاذ حماده والف مبروووك للعروسه وربنا يسعدكم ويوفقكم ويهنيكم ياااارب ويفرحكم بالضيف الجديد

1:19 PM  
Blogger رؤية said...

السلام عليكم
انا متابعة المدونة من فترة
بعد الدموع تأثرا بالقصة وعشان تعرفوا انا صعب ادمع واتأثر بحاجة الا لو كانت صادقة قوى وده حسيته فى كلام استاذ حمادة وحكاياته
بجد لو قولتلك انى لو كنت انا اللى اتجوزت مكنتش فرحت كده مش هبقى بكدب ابدا
الحاجات دى بتدينى امل كبير فى الحياة وانها لسه حلوة
ربنا يسعدكم يارب ويملى حياتكم هنا وهدوء
سلملى كتير على القمر اللى جنبك وانا فعلا حبيتكم من غير ما اعرفكم
ربنا يبارك فيكم يارب

1:47 AM  
Anonymous Anonymous said...

يا استاذ حماده حضرتك مثال حى على ان اللى بيصبر بينول وحضرتك واضح انك صبرت كتير وربنا سبحانه وتعالى اراد يكافئك فى النهايه الف مليون مبروووووك انا يمكن تتعليقى متأخر كتير واحتمال ابنكم او بنتكم عنده دلوقتى سنتين وكام شهر بس حكايتكم تستاهل انها يتعلق عليها للابد وبالنسبه لحبيبتك اللى بقت زوجتك دلوقت بقولها انتى مثال لكل البنات فى الاصرار والعزيمه لأنك متنازلتيش عن حقك فى انك ترتبطى بالانسان اللى قلبك اختاره بعيدا عن اى تعقيدات ملهاش اى داعى لأن كتير ناس بيتجوزو ناس قريبين منهم فى السن وحياتهم بتبقى جحيم دى مش قاعده بس اللى عاوزه اقوله برافو عليكى بجد وربنا يهنيكم ويسعدكم واتمنى ان برايد متعملش ديليت للبلوج دا ابدا عشان لما نحب نفرح وننسى همومنا نقرا قصه زى قصه الاستاذ حماده وحبيبته اللى اصبحت زوجته و اتمنى ربنا يوفق كل واحد وواحده فينا مع شريك حياته وعقبالك يا برايد يا جميله (نونى)

12:07 PM  
Anonymous Anonymous said...

كل ما اقرى الحكايه دى بحس انى عاوزه اعيط من الفرحه

1:35 PM  
Blogger Sad Rose said...

مش لاقيه اي حاجة تتقال غير ألف مبروك بارك الله فيكما وجمع بينكما بكل الخير وجعل حياتكم خيرا ووهبكم من الخيرات والرزق الوفير وجعل زريتكما من الصالحين

6:33 PM  
Anonymous Noha B. said...

الف مليون مبروك يا استاذ حمادة.. انا لسة قارية قصتك النهاردة... الجواز... و القصة الاولانية بعدها...
اسلوبك اكتر من رائع...
لكن الاجمل هو الصدق النابع من كلماتك -حلوة الحتة دي- و انت بتحكي عن حبك
...
بشكل خلاني احس بانه هو في كده في الدنيا؟؟؟ حد ممكن يحب بالشكل ده؟ حد ممكن يحارب كل الناس -حتى نفسه- بالشكل ده عشان اللي بيحبه؟
خلتني احس ان كل القصص اللي باشوفها حواليا بتكون عن ناس عاملة نفسها بتحب.. لان اللي ربنا كرمك بيه ده هو الحب..
خلتني احس ان انا مش خيالية لما اكون باحلم بجد اني الاقي حد يقتحم قلبي و عقلي و حياتي و كياني..
خلتني احس باحساس راااااااااااااايييييييق و راحة نفسية لما عرفت ان ممكن لسه الحبايب يلاقو بعضهم...
خلتني احب مراتك قوي.. على تمسكها بحبها و بيك... و خلتني احب احساسك اوي بتمسكك بيها و استسلامك للحب الكبير اللي جواك..
ربنا يسعدكم و يهنيكم و يهدي سركم يا رب.. و اكيد طبعا عندكم اطفال دلوقتي... سلملي عليهم و على امهم الجميلة اللي تستاهل بني ادم جميل زيك و ادعولي الاقي البني ادم اللي يحارب الدنيا علشاني.. و احارب الدنيا علشانه... و المهم انه يكون يستاهل كده فعلا...

9:43 AM  

Post a Comment

<< Home