بيت العرايس و العرسان

اللي يحبنا ما يضربش نار عندنا

Sunday, March 18, 2007

ابو ركبه

اخبارك يا برايد و احوالك بعد السلام و التحيه و الذي منه احب اختار لك انا من المجموعه بتاعتي العريس ابو ركبه
طبعا انا قلت لك انا عندي 23 سنه لسه يعني مدخلتش في قاموس القطر فتها و الكلام ده بس انا و لله الحمد ماشيه في الطريق ده , قلت لك يا برايد اني الحمد لله من نواحي كتير كويسه و دي مشكله في الزمن ده لانك بتلاقي كل من هب و دب عايز يفوز بالحاجه النادره دي و ده مش غرور و لا كلام من عندي و الله بس ده اللي بيتقلي خصوصا مع نسبه العرسان العاليا اللي بتيجي ( الله ما لا حسد) وطبعا كلهم فشنك,,,
ما علينا

تبدأ الحكايه يوم ما رحت الشركه القديمه بتاعتي و اللي اتعينت فيها لسببين اني شاطره و عنيا خضرا
المهم كنت كل ما امشي في الكريدور بتاع الشركه اسمع همس ورايا و لمذ للموظفين و منهم و احد ما شاء الله بدقن و شيخ
و نظرا لاني متربيه ما كنتش بتسكع علي المكاتب و لا احاول انقل كلام و اتطقس علي اللي بيحصل
كنت كيف البطه البلدي يا برايد يا ختي –و لازلت – المهم بقيت شايفه الشيخ ده كل ما يشفني عنيه تلمع
عارفه انت اللمعه دي اللي في الرجاله اللي تخوف –يا دي النيله و ده عايز ايه ده كمان, ,, انا ناقصه ما اللي قبليه كان عايز يدخلني في الجماعه الاسلاميه لانه شاف فيا رغبه للاتجاه الصحيح و الصلاح و اني ممكن اكون اخت من الاخوات , ده متنيل متجوز عايز ايه ده كمان , هيطبق مثني و ثلاث و رباع عليا خيبه قويه .
و كنت بخاف منه موت ,
لحد ما راح لزملتي اللي اكبر مني و متجوزه و قالها انا عايزك في موضوع بخصوص البنت اللي معاكي , بصراحه كده انا كنت بتصنت عليهم و راميه و داني و سمعته بيقول كده و عملت عبيطه , المهم مشيوا الاتنين و انا عماله اقول يخيبك راجل بقي يا مدهول عايز تتجوزني , يا خبر يا خبر ده قد ابويا

جت صحبتي و بصت ليا بنظره خبيثه و انا قالبي كان بيتنفض من الغيظ و الخوف, و قالت لي ده عم الشيخ سالني عليكي و قال انه عايزك لخوه الصغير و خليكو معايا في صغير دي و افتكروها كويس
بجد !!ده انا,,, بقي كل الفحص و المحص ده عشان اخوه امال لو هو اللي عايز يتجوز كان عمل ايه المهم قلت الراجل بيعز اخوه ,,, وعرفت بعض التفاصيل زي ان العريس مهندس و عنده 26 سنه و ده اكيد طبعا سن مثالي ليا و اخلاق و خلافه ,,,, الخ الخ

اتفقنا نروح النادي يوم الصبح عشان هو ده الوقت الفاضي ليه و اهو ناخد اليوم من اوله . و كالعاده سحبت امي المسكينه و قلنا نقابل العريس و امه ,عشان نبقي علي راحتنا و نستني سهم كيوبيد يرشق في قلبنا- و جع في قلبه -
طبعا لاني بنت مودرن و روشه كنت ديما بقول لازم العريس يشفني علي طبعتي يعني مش لازم الايشارب ابو ترتر عشان يزغلل عنيه و الا الميكب الفاقع و التحديد عشان اكبر شفايفي و ابقي اليسا. رحت عادي جدا بجيب جينز و كوتشي و سويت شيرت لطيف كده بنوته علي الاخر,,,, ما احنا رايحين النادي بقي, الصبح بقي, هلبس ايه يعني سواريه, عيب,, , المهم و الاهم ان انا اؤزعه و قله علي الاخر و لما بلبس الكوتشي ببقي ازعنن بنت في الدنيا مع الجيبه ببقبي تقريبا لا أري بالعين المجرده

وجت اللحظه الحاسمه,,,,, و ركنت العربيه بتاعتي و شفته بيركن ما كانش باين اوي هو ايه بس اللي كان و اضح انه شب جسمه كويس ما شاء الله باين جوه العربيه وبعديييييييين...
تم تم تشششششششششششششش( موسيقي تصوريه) لما يا جماعه المارد خرج من القمقم اااقصد العريس خرج من العربيه
بالظبط يا جماعه نفس احساس الاعلان بتاع ميلودي تتحدي الملل تقريبا نفس النظر بتاعت الراجل اللي طلع من العربيه و ميلودي اتسرع منه
لا تتخيلو قد ايه هو ضخم و بكرش كبيييييييييييير لا يمكن يكون رباه في 26 سنه بس لا, ده اكيد و اخده ورث من جده و او جد جده او جد جد جده


مش مهم , يا بت خالي المركب تمشي
و اهو ضل رجل و لا ضل حيطه و ده مش اي رجل هيعمل ضل كويس في ايام اغسطس و الحر, ديتها بس يفرد كفه فوق دماغك و هيبقي مظله و لا مظلة استاد القاهره, و بالنسبه للحيطه فهو ماشي بيها ,,, معلش شوفي الجوهر و سيبك من المظهر

طبعا ما قولكمش علي مدي الفرحه الي هو كان فيها ,, طبعا لاقي عروسه بلاستك يلعب بيها لما يكون زهقان حاجه كده فك و تركيب بالنسبه له و ده كان نفس انطباع مامته اللي مش قادره افهم لحد دلوقتي و لدته ازاي لكن دي الحكمه الاهيه اللي و ضعها في الام!! بس اللي متاكده منه انه ما نزلش زينا كده
استغفر الله باخد ذنوب بالهبل ,,, (وهو اللي اتعمل فيا مش ذنوب) ما علينا

الانيل بقي ان حضرته كان لابس بدله رمادي من بتوع الارشيف و كانت يادوب يا دوب دخله فيه (مافيش مقاسه بقي نعمل ايه) و طبعا لان اليوم كان حر و الصبح,, كان بيشر عرق ( ما أكيد طبيا نسبه الدهون اللي علي قلبه عاليا) حسيت و الله اني و اقفه قدام يحي شاهين او عماد حمدي
من غير تطويل قاعدت معه علي اساس اني لازم اشوف الجوهر
الجوهر يا دودو الجوهر يا حببتي ما تتخضيش يا ماما لازم تكوني عاقله( ده انا بصبر نفسي)
ااااااااااااااااه

جه الجوهر,,, الاستاذ مش مجرد شكله ضخم و كانه جايب مراته و عياله جوه الجكته لا ده لاستاذ بيكلمني كانه راجل عنده 56 سنه مش 26 انا فضلت فاتحه بوقي لحد لما جيت اقفله و جعني,, الفك السفلي نمل يا برايد يا اختي
من كتر الكلام اللي قاله بقيت بقوله حضرتك بشكل لا ارادي,,,,,بجد كبير جدا في كل حاجه
و سئالته هو انت ارتبطت قبل كده قالي ااااااااااه ارتبطت مرتين
لما فتح بوقه و قال كده حسيت ان البنتين دول بلعهم قبل كده و طلعين وارا لسان المزمار بيقولولي طلعينا من هنا
( يا ماميييييييييييييييييييي)
فضلت ساكته و شايله في قلبي اعرف دماغه فيها ايه بجد انا مش عايزه اظلم حد و برده عاااااا مش عايزه اتظلم
علي الرغم من اني بشتغل و هو عارف ده و اخوه جايبني من الشركه لا انه شرط عليا اني اقعد في البيت لاني جميله و جوهره مكنونه و لازم يحافظ عليها ( اكيد عايز يربيني زي البط عشان ابقي اده) كلام جميل بس اللي اجمل انه ليه اختار و احده بتشتغل من الاصل؟ و لاغرب انه بيقعد من الساعه 6 الصبح ل 9 باليل في الشغل, و انا مفروض اكون حاطه ايدي علي خدي استناه!!!!! ماشي,, حاضر,, مفيهاش حاجه,, الست ما لهاش غير بيتها و عيالها برده

المهم فجأه
عيني جت علي ركبته
لاااااااااااااااااااااا
حرام
لحد كده بقي و ستوب
بدون مبالغه او تهريج
ركبته قد دماغي
حقيقي ركبته ,
الركبه اللي هي المفصل ده ,,اللي في الرجل, الصغنن ده,
قد دماغي

سعتها قمت و قولت الله يلعن ... العقل و الجوهر و النيله ,,لا جوهر و لا مظهر و ندهت علي امي و قلت لها اجري اجري يا ماما لحد ما اسهيه و احصلك قبل ما نتبلع ده يشوف له و احده يا دوب اد امه تعرف تتفاهم معه


التعليق بقي بتاع ماما ....... اني بتتبطري,,,بس انا كنت علمي و اخدت فيزياء و عارفه يعني ايه كتله و حجم
و الاغرب انها بتقول عليه و شه بيبي فيس ,,بالزمه بيبي فيس ده
فيس متركب عليه بيبي
حسبي الله و نعم الوكيل
و اشوفك في بيت العدل و ما يشمتش فيكي عدو يا حببتشي
إمضاء حبيبتشك دودو

قصتها و بأسلوبها

52 Comments:

Blogger BESTIC said...

معلش يا دودو بقى ابن عز

في تعليق بيبقى على لسان ماما في المواقف الي زي دي

(مش لو كنتي معلقة واحد كنتي ريحتينا من وجع القلب ده)

يا ريت لو حد بيعرف يعلق يقولي
اكيد مفيش حد هنا بيعرف يعلق :-))))

5:40 PM  
Blogger ert3ashat said...

:D :D :D :D :D :D :D :D :D...rokbeto 2ad rasek :D:D:D...ya 3eeny ya benty est7mlty kteeer wlahyyy.....

ana mdwen 7aeth we ya ret t2blony m3ako we man el blog dh we blog ana 3ayza atgwez homa elly shg3ony aslan enny a3mel blog

1:58 AM  
Blogger Shower-Mirror said...

وايه اللى يخليكى تبصى على ركبة الشاب !!!!

قلة ادب

هههههههههههههههههههههه

3:41 AM  
Blogger Noony said...

ركب بني آدم!!!
طيب يعني الرجل الشيخ زمبلك في الشغل مش يكون عنده نظر شوية!!

نعلش بقى نصيب...المرة الجاية ابقى اسألي هو حجم ركبته أد اية :)
إن شاء الله المرة الجاية تبقى الأخيرة ونفرح بيكي يا رب

3:42 AM  
Blogger Anima said...

يا بنتي ده إنتي بتتبطري ع النعمة هو احنا لا قيين فردة شراب حتى

و ماله لو كانت ركبته كبيرة حبتين هههههههههههههه و لا إنت عايزة ركبه شبه ركب عبد الحليم يعني

6:16 AM  
Blogger بيييييكو said...

انتي قابلتي عريس ولا اوتوبيس


وقال ايه شوفت علي مستوي نظري ركب بني ادم

ركب بني ادم اللي عاندنا تحت دي

عنده هو فوق


ربنا رحمك دا
انت لو زعلتيه يوم
ماحدش عارف كان ممكن يعمل ايه

8:02 AM  
Blogger بيييييكو said...

يا رب ارزقها بواد حليوه

ييجي متر و خمسه وسبعين
و 80 كيلو
سمبتيك يعني


و يارب مايكنش بزلحه ولا كرش

دانت تستهلي توم كروز و الله

8:08 AM  
Blogger The Groom said...


لا دي تستاهل من هو احسن و اجمل من توم كروز التعبان ده اللي مافيه حاجة عدلة و اسألوني أنا

الحمدلله بعد ما قريت البوست بصيت على ركبتي و حمدت ربنا أوي صحيح هي بتوجعني حبتين بس ماشي الحال الحمدلله

على العموم أهم حاجة في الزواج القبول و التراضي

"انظر اليها فانه احرى أن يؤدم بينكما"

يعني يكون في قبول و تراضي

يللا اللي بعده

سلاااااام

5:04 AM  
Blogger e7na said...

مع تانى قصه النجاح- ماشاءالله- مستمر بس مش عاوزين ده يأثر على المدونه الاصليه
ربنا ينفخ فى ركبنا جميعنا قولوا آمين

6:40 AM  
Blogger Azmiralda said...

بصى هو موضوع التريقة على العيوب الجسمانيه لحد مش كويس , اساسا المفروض منترياش على حد من اصله, انا بقى من النوع اللى ميسبش حد فى حاله برضه بس الصفات الجسمانية لأ لانها خلقة ربنا , فى موضوع التريقة باجى لغاية العرايس
و العرسان و استوب

مانا ممكن اقع فى واحد فيه عيوب
الدنيا و انا شايفاه جورج كلونى , و برضه لما باكون فى فرح باجى لغاية العروسة و استوب لأن يوما ما حاقعد نفس القعدة , قولوا انشالله
ليا واحده صاحبتى سفروته كده برده و اتحطت فى نفس الموقف , واحد من النوع الضخم بس هى اللى اترفضت لأن فعلا ماكانش حاينفع

ليه مفكرتيش مش هو اللى ضخم و ان انتى اللى سفروته

دايما بنشوف عيوب الناس مش عيوبنا

1:07 AM  
Blogger sherehan84 said...

انتي عارفه لو كلبوزه شافت الكلام اللي انتي كاتباه ده هتطين عيشيتكو انتو الاتنين ..
قال تخين قال .. مالهم التخان يا هانم .. ومالها ركبته .. انتي باين عليكي ما شفتيش ركبتي هههه
عيب يا بنت كده اياكي اسمعك تتكلمي عال تخان تاني

5:43 AM  
Blogger ahmedthatsit said...

nice kessa, bosy , lawo enty masrou3a 3ala gawaz, drop me a line, 3arees lo2ata we bakhto 2alil (ana).

7:04 AM  
Blogger emos said...

ادى اخرت البنات الطيبين
انتى كتر الف خيرك انك قعدتى معاه اصلا انتى كان المفروض اول لما تشوفية نازل من العربية تروحى طلعا بعربيتك امريكانى و تهربى
دة بقيت عمرك يا ماما
و بعدين واحد عريس مش المفروض ياخد بالة من نفسة
يكنش كدة واخد بالة من نفسو و عامل رجيم؟
يادى المصيبة استغفر الله
ربنه يرزق كل واحد على قد حاجمة يا رب

1:45 PM  
Blogger asmoka said...

بجد يا دودو انا مش عارفة اضحك ولا اعيط من الموقف بتاعك ده,,
انا مش عارفة انتي قدرتي تقعدي معاه ليه اصلا
انتي من الاول كنتي جريتي
نصيحة مني يا بنتي...اوعي تتنازلي وتقولي الجوهر....
لو حاسة بقبول ولو 60% تبقي ساعتها تبصي للجوهر عشان تزود النسبة شوية
ربنا يرزقنا كلنا بالازواج الصالحين
امييييييييييييين
اسلوبك عسسسسسسسل
بانتظار المزيد


مبروك يا برايد على البيت الصراحة جميل اوي وانا بحب القعدة فيه بلا جواز بلا نيلة
تحيااااتي

7:29 AM  
Blogger esraa said...

انت عارفه يادودو انت فعلا كان ممكن تتنازلي عن أي حاجه, لكن الركب لأ, كله الا كده.
الحمدلله انك رجعتي سليمه يابنتي, يالا حمدالله علي السلامه.

8:02 AM  
Blogger مصر هى أمى said...

بصراحة ومن غير زعل قصة سخيفة جدا اقعدت اقراها لاخرها علشان حتى اشوف اى عيب فى الراجل او مشكلة
والله يا انسة مش غلطة الراجل انه كبير وركبته اد سعادتك مرتين دى خلقة ربنا
ممكن ترفضى علشان مرتحتيلوش ممكن ترفضى علشان جسمه اكبر منك بكتير زى ما انتى قولتى لكن من غير تريقة عليه هوا الراجل قابلكم باحترام وزى ما انتى بتقولى بتكلم كانه عنده 56 سنة يعنى راجل عاقل وفاهم الحياة ةلا هوا لازم يكون جاى لابس جيمز وسلسلة فى رقبته وبنطلون جينز ساقط علشان يعجب

على فكرة انا وزنى 145 كيلو ومبسوط جدا بوزنى وما اعتقدش انى ممكن اغير من نفسى علشان خاطر اى حد

رجاء اخير مكنش ليها لازمة التريقة على اخو العريس وانه شيخ وبدقن وعمال يبصى بصات غريبة لان فى الخر الراجل طلع غرضه شريف وعايزك لاخوه يعنى غرضه مش وحش لو محصلش نصيب يبقى ده بتاع ربنا
وربنا يوفقك للعريس اللى فى دماغك وينولك كل خير

8:26 AM  
Blogger Wild at Heart said...

يا دودو كان ممكن تقولي لنا الحوار اللى دار بينكوا و خللاكى ترفضى تماما انك تتجوزيه. تفكيره كبير ازاى يعنى؟ وللا انت كنت بس مركزة على الشكل؟

6:25 PM  
Blogger emos said...

و اية المشكلة يعنى لما البنت تبص على الشكل من حقها طبعا
ولا هى لما تلاقى شخصيتة حلوة و شكلو وحش جدا لازم تيجى على نفسها و تعيش مع واحد هتيجى على نفسها و تبصلة
الشكل بيبقى اهم من الشخصية فى اللحظة الاولى من التعارف بعد كدة لازم تبص على الشخصية بس
و اللا مكنش ليها لازمة انها تقابلة اصلا

3:57 AM  
Blogger smraa alnil said...

يا عيي عليكي يا بنتي
ههههههههههههههههههههههههه

يعني انتي تغاضيتي عن كل دة ومسكتي في الركب بس

عادي بقي في غيرك كان بيبص علي المراخير هههههههههههههه

يلا ربنا يوفقك يارب

7:31 AM  
Blogger صوت فيروز said...

مش عارفه بصراحه يا جماعه اشكركم ازاي لانكم علقتم علي موضوعي, و بشكر اللي كان بيدعي و بشكر برده اللي كان بيقول انه موضوع سخيف, و بشكر جدا اي حد قدم لي نصيحه عشان التريقه حرام و انا عارفه ده , بس و الله السبب الاساسي و اللي يمكن ذكرته في القصه ان البني ادم ده استفزني اسلوبه و شخصيته, اكتر من شكله, ممكن انا اللي فعلا قليله مش هو اللي كبير , بس المشكله يا جماعه ان العريس ده جه و هو عارف شكلي ايه و اكيد اخوه و صفني ليه و صف دقيق, بالاضافه انه جي و عارف ظروفي ايه كامله لكن بالرغم من ده حب يدخل حياتي و يغير فيها , و كان في و سط القاعده كلمه كررها كتير (لازم نضحي) نضحي بايه مش عارفه , و اكيد طبعا اللي هيضحي انا او ممكن انا اللي هيضحه بيها ههههه, ام بالنسبه للاخ محمد اللي بيحب مصر كتير, فاعيزه اقوله ان مش من الصحي و لا الطبيعي ان يكون عندك 26سنه و تفكر تفكير 56 لان لو ربنا عايزنا كده كان خلقنا كلنا كبار. ممكن يكون عندك 26و بتفكر بنضج و بعقل لاكن ما تخسرش حلاوه و طعم سنك لان كل وقت و له اذان, الشئ الوحيد اللي ديما بسال ليه كل و احد مش محدد هو عايز ايه و بيدور علي ايه بمعني,,, ان لو و احد عايز و احده قاعده في البيت و ده تفكيرها و اتجها (انا مش بقول ان الاعده في البيت غلط) بس انا اتجاهي مختلف ليه ما تروحش تدور علي و احده كده من الاول و ليه التعب و حده بتشتغل و رغم سنها الصغير شايله قسم علي قلبها كامل و الناس بتشهد بشغلها , تيجي و تقولها اقعدي في البيت علي اي اساس ده غير اسلوب فرض السيطره بشكل كبير من البدايه و اعجابه ان رغم صغر سني اني بتكلم بمتهي العقل!!! طب ما العقل ده انا جبته من الاحتكاك و الشغل اللي انت عايزني اسيبه ده!!! غريب بصراحه , ده غير اتجهات تانيه مش احب اني اذكرها بس و الله لو كان علي الشكل انا ما كنتش رفضت .الجوهر هو اللي استفزني احساسي بانه طماع لانه عايز كل الامتيازات عايز البنت العامله اللي شكلها كويس و كمان اللي تتحبس عشان سعادته عارفين حتي لو هو سعات شغله مثلا قلييله و عايز يقعد معايا و نخرج و نبقي مع بعض مثلا , لا ده عايز و احده و ده كلامه بالنص( انا بتعب طول اليوم و بقضي اكتر من 15 ساعه في الشغل و عايز لما اجي الاقي راحه كامله ) يعني عايز فارخه مش عروسه او زوجه تبقي معاه لا عايز و احده بس تكون في انتظاره تعشيه و يدخل يتقلب ينام بعد 15 ساعه شغل وده في نظري انانيه و طمع و مش من حقك تفرض سيطرتك لمجرد انك انعمت عليا و فكرت تتجوزني و لو هو مش كده كان دور علي و احده تخدمه و بس و تعيش في البيت اللي في مجاهل افريقيا لوحدها مدة 15 ساعه بدون انيس و لا جاليس ده منتهي الانانيه, كل اللي عايزه اقوله انكم كلكم تدعوا اللهم اعف بنات و شباب المسلمين

2:14 AM  
Blogger Motazaweg said...


طيب بصفتي من المقتربين من الأرض وقلة زي حالات كاتبة البوست.. فبكل تأكيد متبني موقفها.. وعلى الطوال العراض تدور الدوائر

عايز أقول لكم يا جماعة إن الموضوع دهش هايحس بيه بجد غير الأزع والقلة أمثالنا
أما الجماعة اللي ربنا مبارك فيهم سواء طولياً أم عرضياً أم دياجونال.. فاللهم لا إعتراض ولا تريقة عليهم بس يبقوا يبعدوا عننا ويتقوا شر من إقترب من الأرض.. مش يروحوا في محاولات للزواج بالسلالة بتاعتنا لتحسين النسل نروح إحنا ضحيته

بركبته الطاهرة دي إللى أفزعت البنت المسكينة.. فالمفروض القارئ يفهم حاجات ماتتكتبش
يعني يفهم مثلاً إن الراجل عنده صحة 24 حصان.. مقلناش حاجة ولا بننق عليه
ربنا يزيده كمان وكمان.. ده راجل فخر للفحولة ونديله نيشان يعلقة على ركبه وثباتها وصلابتها وحجمها الخارق

لكن يروح ويحاول يتجوز من عصفورة؟ يبقي لازم ياخد قرار إزالة وربنا يهده ببلدوزر على قده

كدا أصبح راجل عار على الفحولة طالما وصل للسن ده ومش فاهم يعني إيه زواج!
مش بعيد طالما معرفة الشيخ التقي يبقى بالأغلب معتقد إن السلالة البشرية بتتكاثر بالتعقيل والشتلات والصوب والبذور زي النباتات

ده جواز يا جماعة.. جوااااز..
يعنى حاجات كتير.. كتير قوى.. بنغلوش بيهم على حاجة وحيدة يتيمة وكله بيتكسف يقولها رغم إن كله بيتجوز عشانها

أهي الحاجة الوحيدة اليتيمة دي

+

عريس بالركب العظمة دي

+

عروسة أزعة وقلة بالشكل ده

=

صنية بطاطس مهروسة أو محل فطاطري.. مش جواز!


(*)
لا يمكن أن يختلط الزيت بالماء
لا يمكن أن يختلط الزيت بالماء
سيدي القاضي لا يمكن أن يختلط الزيت بالماء


___________________
(*)منقول بتصرف من هاني رمزي في فيلم محامي خلع

8:27 AM  
Blogger Wild at Heart said...

:):)يا بنتى طب كنتى قلتى كده من الأول

9:37 AM  
Blogger عبدالله said...

قصه جميله برضه بتوضح تناقضات المجتمع المصري
طبعا بجد مش غلط ان حد يترفض علشان حجمه مش مناسب للعروسه دي طبيعي جدا في احجام ممكن تعدي و في احجام هتعمل كارثه اكيد اللهم احفظنا
بوست مرح في انتظار الي بعده

تحياتي

2:32 PM  
Blogger bastokka طهقانة said...

هههههههه
حتفضلي تطلعي في كل واحد القطط الفطسانة كده يا دودو
و ماله يا امي ركبة كبيرة
الركب البيضا تنفع في اليوم الاسود

بس بجد عسولة
ربنا يسعدكم كلهم يا بناتيت يا حلوين و ترجعوا تقولوا يا رتنا ما اتوكسنا
زينا
هههههههههه
سلام

7:10 AM  
Blogger Islamist Bloke said...

قصة سخيفة جدا ولا ليها اى طعم ولا لون ولا ريحة

ليه يعني التريأة على الشيخ اخوه فى الاول؟ مش عارف لية حسيت بالمشهد اللى عمله -ربنا يسامحه ويهديه- احمد عقل فى الارهاب والكباب بتاع اللاعادل واللامام

لية لو شاب لابس سلسلة وبيمضغ لبانة بص لك او حتى تحرش بيكي ممكن تسكتي بينما لو شيخ - واهو بشر برضة وبيقاوم احتياجاته وبيدور عالحلال والشيطان بيغريه- لو شيخ بص لك بصة سريعة غصب عنه وغض بصرة بعدها تقوم الدنيا ولا تقعد ويبقى الشيوخ كلهم زبالة ووحشين

انا مش بهاجمك بس نصيحة بلاش اللهجة دي لانها تحمل فى طياتها مهاجمة الاسلام نفسه لان دول رموزه ...بلبسهم ومعاملاتهم وكلامهم ..بيمثلوا الاسلام فى زمن ندر فيه من يتمسك بدينه....فبلاش نغلط فيهم

النقطة التانية ان مفكرتيش هو بعد ما سابك قال عنك اية؟
تفتكرى قال لوالدته اية الأوزعة دي او اية دي اللى جايبينها دي قصيرة جدا وصغيرة وحجمها مش مناسب وبعدين دي هامشى جنبها ازاى فى الشارع والكلام ده
تفتكرى هو اغتابك بواحد على الف من اللى انتى قلتيه واللا سكت وقال قدر الله وما شاء فعل

فيه نقطة كمان...انا كنت مستهتر جدا من حوالى 3 سنين وكنت مصاحب واحدة كمان ولما حبيتها اوى قابلت ابوها وكلمته عشان الارتباط وكدة..وكنت عايش سنى جدا صدقيني...يعني الضحك والهزار والمعايشة والتعايش والرنات والبنطلونات والتى شيرتات وكل ما تحلم به البنات...عارفة كان الرد اية...حاسس انه عيل اوى
دلوئتى بقول ربنا يسبغ علينا نعمة العقل ويرزقنا الحكمة...عشان الاقى واحدة ترضى بيا واعرف افتح بيت لانه ثبت ان المجانين والمتصابين والشباب الطايشين بيطلقوا بعد اقل من سنة

سؤال اخير-وشكرا لسعة استيعاب حضرتك -تفتكرى مين اللى كسب فى الجوازة دي ومين اللى خسر؟

واحد على صراط ومنهج ولو كانت واحدة اتجوزته كان ممكن يعلمها من الدين شىء جديد تاخد بيه حسنتين ينفعوها يوم القيامة لحظة الموازين...وواحدة هتتجوز شاب روش ممكن يكون ما بيصليش اصلا وياخدها على جهنم والعياذ بالله

فكرى كويس وربنا يهدينا ويهديكي

10:35 AM  
Blogger lojain said...

الا الاخ اسلاميست بلوك ده ماله؟ هو حضرتك مشوفتش انها قالت لو كانت على الشكل كانت قبلت بس شخصيته نرفزتها ؟ وقالت انها متقصدش تتريق على الجسم بس هى من وجهة نظرهاوبعدين هى مالها انت لفيت ولا درت ولا غيره ولما هو كده مفتكرتش ليه وانت بتهاجم قوى انها ممكن تاخد حد كده صايع انه كذلك كنتم من قبل ويورثك شعور بالرافة حيال الشباب اللى همه الشكل اللى بره وفرحة بان ربنا نجاك ده ذنب فى حد ذاته اسمه عُجب وفى الوقت نفسه اللى يخليها ترفض حد عشان شخصيته يخليها تقبل غيره عشان شخصيته بس موضوع الشكل كان شوية كوميدى يعنى . وهى مقصدتش تشوه فى صورة الاسلام ولا حاجة بتقول هى كان شيخ و ملتحى بس ظهر لها انه بيبص و بيتهيالى انه كان نظرها فى محله بس الاختلاف انه طلبها لحد تانى ... وده ملهوش علاقة وفعلا فى كتير بيتدارو فى اللحية على حساب الاسلام وهم دول اللى بيشوهوا فيه اصلا واذا كنت انت من الملتزمين جديدا يعنى فانت تكره الناس بجد فى الالتزام شوف دخلتك عاملة ازاى قصة سخيف ولا لون ولا طعم وهتبقى معجبة باللى يتحرش بيكى؟؟ ايه ده؟؟ هو ده بقى اللى اتعلمته بعد الاحترام ؟ وافكرك بحديث الرسول عليه الصلاة و السلام اللى قال فيه ان المؤمن ليس بطعان ولا بلعان ولا بذىء .... ربنا ينجيكى يابنتى و يكرمك و يكرمنا و ينولك اللى يريح بالك

5:56 PM  
Blogger Rozza!.......فاقد الذاكرة said...

مع ان لي كرش وتخين, بس عاذرك
لان فرق الحجم مشكلة
بس من ساعة ما حكيتي شيخ, انا حكيت الموضوع منيل "بالنسبة ليكي" من اوله
و26سنة مين, ده على دوامه كمان سنتين حيصير 35 سنة
الله يجوزك ابن الحلال قريب الحجم يا رب
وطبعا ميكونش ابو ركبة ولا ابو رجل مسلوخة

1:09 AM  
Blogger صوت فيروز said...

بصراحه يا لوجين مش هقول اكتر من اللي قولتيه
يا جماعه انا ماسئتش للشيخ بحاجه , انا حكيت ان الموضوع بالنسبه ليا كان مريب, و الراجل معملش غير انه كان بيبص عليا و ده حصل فعلا لكن مش لغرض غير الموضوع ده, و علي ما اضن اني و ضحت ده
اما بالنسبه للاستذ اللي بيقولي اني اقبل ان حد يتحرش بيا عشان بلبانه فا دي اسائه كبيره , لكن انا هعلمك الاسلام بيقول ايه في الحلات دي, ربنا يسمحك و يعفوا عنك و يهيديك بجد, مش منظر و لا داعي للسير بمدبأ اللي علي راسه ,,,, لن انت اللي اساءت ليه , و لكل و احد بدقن و لا ملتحي مش انا و جزاك الله كل خير
اللهم اعف بنات و شباب المسلمين قولوا امين

2:21 AM  
Blogger lojain said...

يادودو ولا يهمك كلنا لها واحنا لبعض و ربنا بيوقف للى نيته سليمة اللى زيه وردك عليه بادب على الرغم من الاساءة بيتهيألى هو ده فعلا الاحترام ومكارم الاخلاق اللى وصى عليها دينا "انما بعثت لاتمم مكارم الاخلاق", مش مقنع. الايمان ما وقر فى القلب و صدقه العمل واتقدم ما وقر فى القلب على العمل على الرغم ان العمل اللى ظاهر متقالتش ما ظهر من العمل ووقر فى القلب ,ووالله تصرفك ده فعلا خلانى نفسى اتعرف عليكى اكتر و اوطد صلتى بيكى عشان انتى بنى ادمة محترمة وزى العسل. نجينا يارب قولوا امين

7:04 PM  
Blogger Islamist Bloke said...

انا مش فاهم الطريقة اللى صاحبة القصة ولوجان فهموا بيها اسلوبي كن حتى لو كنت انا احتديت شوية فى طريقة النقد لكن اهو نقد ومن حقى اقوله

اما نقطة الشخصية فالمفروض نفسيا ان المرأة تحترم زوجها جدا وده مش بينشأ من فراع...لازم ينشأ عن اعجابها الشديد بعقله وحكمته وهدوئه وقدرته على حل المشاكل و طبعا ده بيخليها تحس انه انسان مسئول ويقدر يشيل مسئوليتها ومسئولية الاولاد اللى هينتجوا عن الجواز ده...اما لو واحدة اتقدم لها شاب مستهتر من بتوع توتى وفوفي ....اكيد هترفضه لانه فى نظرها عيل ميتحملش مسئولية

واما أسلوبي فى مقدمة النقد-رغم انه حاد- فأنا شايف ان النقد له اساليب منها انى أبدأ بمدح واطراء وتعديد العناصر الجيدة بالقصة ثم ان اتبعها بكلمة-ولكن- وأبدأ اقول النقط اللى معجبتنيش
لكن فى القصة دي فعلا مفيش حاجة عجبتني واعتقد اننا لما هنجامل بعض مش هنتقدم لكن لازم كل واحد يقول رأيه بصراحة تامة وبدون مجاملات لانه مالهاش لزمة هنا....احنا فى مجتمع انترنت...انسوا المجتمع المحيط بكل واحد فينا والحاجات اللى بيشوفها يوميا....احنا فى مجتمع له قواعده وخصائصه واسلوبه اللى يمكن معرفش عنهم كتير لكن اعتقد انه مختلف تماما عن المجتمع العادي اللى عايشين فيه

واعتذر لأى كلمة سيئة بدرت منى فى الحوار لكن زي ما حضراتكم قلتم...لسة ملتزم جديد...وانتو عارفين الجماعة اللى لسة ملتزمين جديد بيكونوا عايشين الدور اوى وفعلا بيكونوا واخدين الموضوع بحمية شديدة وغيرة على الاسلام ورموزه وانا اعتبرت القصة حاجة من النوع ده وعشان كدة بقولكم متزعلوش مني لو كنت زعلت حد منكم

نقطة هى مالها انت كنت صايع واللا لا....الجملة دي انا قلتها عشان متفتكرش انى واحد مقفول عن الدنيا ومش عارف الحياة برة فيها اية...عشان اليومين دول فيه صورة عن الشاب الملتزم انه اتربي فى بيت منغلق ومعزول عن الدنيا وميعرفش اى حاجة من حوله...فعشان كدة حبيت اقول ان كلامي مش من فراغ

وشكرا لاخلاقكم العالية

7:20 AM  
Blogger Nile.prince said...

Te3shy wet7'ady 3'erha..a simple question , why don't you guys ask for a picture before meeting the to be groom, atleast to avoid any surprises and u can expect what u gonna see for a better judgment..good luck dodo..good luck bride..

8:18 AM  
Blogger BackBone said...

ممكن يكون فعلاً حجمه كبير بس انا ملقتش بس ده مش العيب اللي يترفض عشانه. انا معلش حاسس انك واخده بينسل في نفسك

11:40 PM  
Blogger khaled said...

صباح الخير
جميل أوي القصة دة بجد انا كنت هموت من
الضحك
بس المهم جميل اسلوبك بس هاسلك سؤال
لو كان الشخص دة قابلتية في مكان ما وعملك فيها رميو ونزل علي رجلية قصدى ركبتة اللي موش عجباكي وقلك انا معجب بيكي وعايز نرطبط
اكيد كان الموضوع اختلف
ولو لقيتية فالنتينو وفية بنات معجبة بية كان الموضوع اختلف
كنتية هاتقبلية علي حالة لو ركبة كبيرة أو لو حتي ركبة معوجة وعايزة يتغيرلها رومان بلي
انا عارف اللي موش عاجبك و في بنات كتير زيك
اللي خانقك هو موضوع جواز الصالونات
هي دة المشكلة صح علي العموم ربنا يوفقك انا عايز اعرف رد سؤالك
علي فكرة انا اول مرة اشوف الموقع دة وبصراحة100/100



khaled_saleh1984@hotmail.com

1:42 AM  
Blogger صوت فيروز said...

صدقت يا خالد
انت عندك حق
بس القضيه في انك لما بتلاقي حد و تحبه و تنسي شكله بالمعمله بيخليك تقدر تقدر
زي ما تقول كده,امممممممم, المعمله خلت اللي قدامك يبقي جميل
الشخصية فتحت باب
و مش قضية ان و احد ينزل علي ركبه لا... القضيه ان العيوب و المميزات بتبان
عقل بيقبله
و الحب مسئول عنه العقل
و العقل لازم يشوف براهين قدامه
اما الشخصيه او الاخلاق او الشكل
بس ,هو كانت افكره نفسها صعبه
و بعدين بفرض اني ممكن اتعود عليه و احبه
طب ليه و انا شايفه اختلافات كبيره من الاول
ليه اعلق نفسي بواحد في الاصل تفكيرة غيري
لمعلوماتك
هو كان معجب بنفسه اوي, و انا ههههههههه بصراحه نكشته و قلت له
هو انت ارطبت في الكليه قالي كتير كانواههههه معجابين بس انا ما كنش في دماغي
يعني زي ما انت بتقول كده في حد حبه
و ربنا و فق ركبيتين في الحلال

11:49 PM  
Blogger السندريللا السعيدة said...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه...

ايه العريس القمر دا يا دودو....ههههههههههه..اسمحيلي اقلك دودو كدة حاف يعني...
بس بجد ..دا عريس لقطة...انتي لقيتيه فين العريس دا....هههههههههههههههههههههههههه...

موتيني من الضحك...دا عريس ولا فيل على رجلين...ربنا معاك يا ضناية..تعيشي وتاخدي غيرهاهههههههههههههههههه...والله مش قادرة امسك نفسي من الضحك بجد..ايه البلاوي دي يا حبيبتشي....والله ربنا يصبرك يا رب ويكون في عونك ...

بس بجد اسلوبك في سرد قصتك جميل جدا ...

ربنا يوفقك يا رب ..

اختك السندريلا

8:25 AM  
Blogger Osman said...

طبعا انا قلت لك انا عندي 23 سنه لسه يعني مدخلتش في قاموس القطر فتها و الكلام ده بس انا و لله الحمد ماشيه في الطريق ده , قلت لك يا برايد اني الحمد لله من نواحي كتير كويسه و دي مشكله في الزمن ده لانك بتلاقي كل من هب و دب عايز يفوز بالحاجه النادره دي و ده مش غرور و لا كلام من عندي و الله بس ده اللي بيتقلي خصوصا مع نسبه العرسان العاليا اللي بتيجي ( الله ما لا حسد) وطبعا كلهم فشنك,,,
ما علينا

يعنى انت من الآخر 100/100 و هو اللى فيه العبر, الإسلوب ده بيدايقنى , مش قادر اتفهم موقفك او اتعاطف معاكى علشان اتقدملك واحد بكرش, عارفه لو حكيتى الجزء بتاع افكاره القديمة والحاجات دى بس, كنت تعاطفت معاكى جداً, بس انا دلوقتى شايفك بنوتة مدَلعة بتحب تتريق على الناس.

4:08 AM  
Blogger habutta said...

هاي مدونتك جميلة جدا وبتعبر عن العفوية ومشاكل البنات في مصر ،،، انا الصراحة مصري مقيم بالامارات ومسافر من 8 سنين و ما رجعت مصر من يوم ما سافرت مش عارف الوضع لبنات مصر وصل الوقتي لغاية 15 مليون بنت عايزين عرسان عموما اشكرك على مدونتك الجميلة وارحب بيكي في مدونتي www.habutta.tkمع انها خارج نطاق الخدمة نهائية لأنها تشمل ديكورات وهي خاصة بعملي كمصمم ديكور ومكن تنفع في بيت برضه العرسان

10:12 AM  
Anonymous Anonymous said...

بصي بفي بصراحة انا شايف انك مش وش نعمة انتي كل اعتراضك انه ضخم وانت قصيرة واذعة طيب مش تحمدي ربنا ان الراجل قبل وكان راضي بيكي
وبعدين عايزك تقعدي في البيت يعني عايز يريحك من الموصلات وقرفها والشغل وهمه لكن في نسوان كدة مالهمش غير في البهدلة ووجع القلب
ربنا يهديكي وهو اكيد ربنا هيكرمه بواحدة احسن منك
ياريت ماتزعليش من تعليقي دة
وسلام بقي

3:47 AM  
Blogger حواديت وحكاوي said...

انتي ازااااااااي يا ينت انتي تفوتي عريس زي ده

حد لاقي دنياصور في الزمن ده
ده انتي تلمي عليخ فلوس بالركبه بس
قد كده

ياله نصيبك
المره الي جايه
هايجيلك عريس انتي الي هاتشيليه

بس ما تخافيش ال تالته تابته

4:41 PM  
Blogger adamnooreldin said...

why all these bad words regarding

fat men. am fat man. am not
sad being fat man.fat men are intelligent ,motivated ,funny& know how to treat with others not like u .i think bradbit will be the suitable husband for u
thanks

1:13 PM  
Blogger Bint said...

بقى قلتي كل الكلام الوحش على الراجل .. واستحملتي كل الحاجات اللي قالها وجيتي على ركبته ؟ معلش بس طريقة كلامك بتناقض بعض .. ودا مش منطق إنك تتربئي كدا وأنتي بتناقضي كل كلامك .. ربنا يوفقلك اللي فيه الخير !

3:20 PM  
Anonymous علاء said...

وقت مستقطع ....

اسمحولى جميعا أنا شايف ان الكلام كله بيدور حوالين ركبة الأخ الفاضل فى حين انى شايف انها مجرد جمله اعتراضيه او ابتسامة طفيفه ندارى بيها همومنا غلفت بيهاالأخت الموضوع بشيء من الطرافه لا أكثر.

أما الموضوع الرئيسى وهو الأسلوب والتوافق بينهم ودا اللى محصلش والأسباب واضحه . أولا لم تتقبل الشكل العام . أوك مش مهم نشوف الجوهر ممكن يكون متوافقين كشخصيتين لكن برضه محصلش .
ثانيا مفيش اى اتفاق بينهم من حيث الاسلوب وطريقة التفكيرهو عايز يقعدها من شغل هى ناجحه فيه ويلغيها تماما فى نفس الوقت اللى معندوش فيه اى استعداد انه يهتم بيها يعنى مش تقعدى علشان بغير عليكى مثلا لأ علشان عاوز أروّح ألاقى الأكل جاهز فآكل وأنام بعمق . يعنى شيء محدش يقبله بصراحه .

انا مش شايفك مخطئه وكذلك مش شايفه غلط هو دى شخصيته ودى شخصيتك محصلش توافق بس .

أعتذر عن الاطاله
وأحييكى على اسلوبك الجميل وروحك المرحه واتمنالك كل التوفيق
تحياتى
علاء

6:23 AM  
Anonymous Anonymous said...

انا مش مصدقه ان في بني ادم بجد فهم انا عايزه اقول ايه انت هايل يا علاء بجد ده اللي حصل،،،،،ناس كتير اتهمتني بحجات غريبه
أشكرك بجد

4:52 AM  
Blogger الغلباويه said...

هههههههههههههه
بجد انتى موتينى من الضحك
اسلوبك فظيع كنت متخليه كل كلمه انتى كتباها وعارفه احساس الصدمه اللى الواحد بيحسوا بعد مابيرسم الاحلام
دة طبعا المقصود بيه احساس الصدمه للولد وللبنت لو الطرف التانى محصلش قبول نحيته وكذلك الجوهر اللى بيقولوا عليه دة
وعموما ربنا يوفقك ويوفقنا جميعا

3:50 PM  
Anonymous Anonymous said...

فكرتينى بمسرحية العيال كبرت الراجل اللى ضرب سلطان جوز مدرسة الموسيقى اكيد هوه ده بس عرفه ادينا بنتسلى ههههههههههههههههه

1:18 PM  
Blogger another pharmacistaia said...

ربنا يرزقك يا بنتى بحد قصير زيك كده و تجيبو عيال اقزام

2:07 PM  
Anonymous Anonymous said...

الاخت بتاعت العريس ابو ركبه
موضوعك بصراحه مستفز واسلوبك وقح سورى فى اللفظ
انتى من حقك ترفضى العريس او تقبلى ومن حقك برضو انك ترفضيه عشان شكله -ولو ان ده يدل على انك شخصيه سطحيه-بس ده من حقك
بس بصراحه رائي انك انسانه تافهه ومغروره انك تتريقى على حد بالاسلوب ده دى وقاحه بصراحه
ولو كنتى رفضتيه عشان تفكيره مش عاجبك بيتهيقلى كنتى مقعدتيش تتريقى على شكله كل ده
من حقك انك ترفضى ده حلال
بس تتريقى ده حرام
على فكره انا اتحطيت فى مواقف زى ده كتييير ولا بتريق ولا بعمل زى حضرتك كفايه اوى انك تقولى معجبنيش -مع انها تجرح برضو - بس احسن من السخافه اللى انتى كتباها دى
حرااااام تتريقى على حد كده
بلاش حراام وحلال - لان واضح ان الحكايه دى مبتفرقش معاكى- تخيلى لو العريس ده قرا البوست ده هيبقى احساسه ايه
تحبى حد يقول عليكى كده
مفيش حد كامل
-استفزتنى اوى يعنى عايز عروسه كامله دى_ يعنى حضرتك بقى كامله
لو حضرتك مغروره بشكلك وشيفاه انه حلو اعرفى ان الجمال ده مساله نسبيه وان فى ناس اكيد انتى فى نظرهم واحده عاديه وناس انتى فى نظرهم واحده شكلها وحش
نصيحه :
متتكبريش على الناس ممكن ربنا يبتليكى بحاجه و تتشوهى وتبقى معاقه - ربنا يحفظك طبعا - انا بس بوضح انك ساعتها مش هاتبقى مبسوطه لما حد يتريق عليكى -على فكره انا واحده من الى الناس بيقولوا عليهم نهم جمال -عنين زرقه وشعر اصفر...._يعنى مش واحده متغاظه ان حضرتك جميله
بصراحع انا شايفه انك انسانه تافهه وفاضيه من جوه
و البوست بتاعك سخيف وبايخ وان الناس اللى عاجبهم زيك او بيجاملوكى - بيتمحلسوى يعنى - طبعا دى وجهه نظرى وانا حره فيها
نصيحه اخيره قولى اللهم كما حسنت خَلقي فحسن خُلٌقي و متتريقيش على الناس

1:03 AM  
Anonymous Anonymous said...

هى القصه سخيفه فعلا لأن كل تعليقك كان على الشكل .. وانا شايفه انك مغروره عشان جميله زى مابتقولى وانك بتحاولى تبينى جزء طيب فيكى وانك مابتاخديش بالشكل وانك استنيتى للاخر عشان الجوهر
ورغم تأكيدك على النقطه دى الا انك فى الاخر اللى وقفك هو الشكل والركب
وحاجه ماتضحكش ابدا انك تعدى جسمه كله وتقفى عند ركبه
وعلى حسب تعليقك الاول هنا لأن انا ماكملتش التعليقات انك اتجاهك مش القعده فى البيت يبقا الموضوع كان منتهى معاكى من نواحى كتير يبقا ماكانش له لزمه التريقه دى كلها على الراجل
وزى ماهو جاى وأكيد واخد فكره عن شكلك وظروفك فانتى كمان أكيد رايحه وواخده فكره عن شكله ... يإما انك راحه تزودى عدد العرسان ومشاوير مامتك (الغلبانه) وبس وخصوصا ان واحده زيك مابتحبش ترتبط بطريقة الصالونات

4:16 AM  
Anonymous Anonymous said...

بجد موتينى والله من الضحك اسلوبك فظيييييع وكوميدى جدا وفعلا انتى عندك حق ومش هاتكلم من ناحيه الشكل بس لا الاسلوب كمان بتقولى كبير فى كلامه واكيد البنى ادم لازم يرتاح ويتقبل الشكل مع الجوهر انتى اللى عملتيه صح وكل شئ نصيب بجد مش عارفه ابطل ضحك هههههههههههههههههههههههههههههههههه

5:04 PM  
Blogger انسانة طموحة said...

هههههههههههه معلش يا دودو بيقولوا الدهن فى العتاقى هههههههه

2:38 AM  
Blogger سعيد الدراملى said...

انا اسمى سعيد وبصراحة انا اول مرة اكتب فى اى مدونةلا نى فعلا فى موضوعات كتير شدتنى ولاقيت انى شريك اساسى فى اغلب المواضيع دى لانى لعبت فيها دور كبير انا عملت زى الولد بتاع المانيا وعملت زى بتاع السجاير وعملت زى البنت بتاعت ابو ركبة انا بجد مش قادر اسامح نفسى ونفسى على الاقل انى اقدم نصيحة لكل بنت تاخد النصيحة من اللى هقوله لانه كلام مهم ومفيد

7:15 PM  
Anonymous Anonymous said...

بصى يا دودو انا فاهمه كلامك كويس قوى وانتى بتقولى(بيكلمني كانه راجل عنده 56 سنه مش 26 لأنى كنت فى نفس موقفك ده انا كان عندى 21سنه واللى كان خطيبى كان عنده 28 سنه وكان محسسنى انى حفيدته مش خطيبته شكلا وموضوعا كان بيتفنن فى انه يلبس لبس يبينه اكبر من سنه كله بدل بدل بدل وطريقته فى الكلام كانت منقرضه كأنه شهد دخول الهكسوس مصر وانا كنت زييك بالظبط كنت صغيره جنبه اوييييييي بس مش اوذعه الصراحه وبعدين اذ فجأه قررت ان جوازى منه باااااااااطل وفكيت وانا دلوقتى بكلمك وانا مقتنعه مووووووت بالقرار ده سيبك يا بنتى اللى من نصيبك هيصيبك وبالنسبه للاخ اللى بيقول ان دى حاجه كويسه انه بيتكلم كلام اكبر من سنه احب اقولك انك لو ناوى تتعامل مع شريكه حياتك من المنطلق ده فاكيد هتفشل والله اعلم..لأن ربنا سبحانه وتعالى خلق لكل مرحله جمالها ورونقها سواء كانت طفوله او شباب او كهوله يبقى ليه نبقى فى مرحله الشباب ونتخطاها لمرحله لسه بدرى عليها قوى.. البنت بتبقى محتاجه تحس ان شريك حياتها شباب قلبا وقالبا مش سنه 26 وقلبه قلب واحد عنده 56 دا هيعجزها جنبه بدرى ويخليها كركوبه وهى لسه ماقفلتش التلاتين البنت عاوزه واحد عاقل ومتفتح اه بس ايه المانع ان دماغهم تلسع مره ويجرو تحت المطر مثلا هيحصل ايه يعنى هياخدو برد؟ مش مهم ..ودا طبعا مستحيل لو كان مش عايش سنه زى الاستاذ ده.. انسى يا بنتى وهقولك مثل من امثال جدتى (قعده الخزانه ولا جوازه الندامه)ببياى نونى

9:04 AM  

Post a Comment

<< Home