بيت العرايس و العرسان

اللي يحبنا ما يضربش نار عندنا

Friday, May 11, 2007

اذا لم تكن خروفا..فلا تجعلني معزة

شفته انا و اهلى عن طريق الشيخ "محمد" جارنا كان كلامه تقليدى .
كل اللى عرفناه عنه قبل ما ييجى
انه دكتور اسنان و عنده عياده . و بعد التعارف المبدئى بره البيت جالنا تانى مره
البيت و كان ذوق قوى جايب
معاه تورته و الابتسامه على وشه عريضه و هندامه منمق و بصراحه اكتر حاجه
لفتت نظرى انه بيحب النظافه
قوى حتى الشوز من كتر النظافه كان شكلها لسه جايه من المحل و هدومه لسه جايه
من المكوى حاجه تفرح
بس لما كمان اتكلمت معاه لقيته و لا بيحب ياكل بره و
لا يجيب اكل جاهز غير قليل قوى عشان بيخاف من الامراض
و كرهنى فى كل اصناف الاكل الجاهزه حتى الفول و الطعميه يعنى من الآخر
حينقعنى فى الديتول3 او 4 ايام قبل ما نتجوز !
بعد اول زياره فى البيت اتضح لى انه دكتور الصبح و مقاول بعد الظهر و فاتح
مكتب للتجاره و ما عندوش
عياده و لا حاجه و لقيت طريقه كلامه مره توحى بأنه راجل اكاديمى و مره
تانيه الاقيه عامل زى التجار
و طريقه كلامه سوقى و حتى تفكيره زى التجار فبقيت مش
عارفه احدد هو ايه بالضبط
.
كان فرق السن بيننا كبير 15 سنه بس انا قلت شكله كده انسان محترم
و يعتمد عليه و راجل بجد ممكن
يتحمل المسئوليه و لقيته هو اللى خايف انى اكون مدلعه و ما اقدرش
اشيل مسؤليه بيت و سألنى
زى ما اكون فى امتحان عن طريقه عمل الملوخيه و المحشى و سألنى
اذا كنت بنظف البيت و لا بجيب
حد يساعدنى
بصراحه انا بشتغل و ماما تعبانه عشان كده بنجيب
ام محمد تساعدنا كل اسبوعين
لقيته اتشال و اتحط
"لأ أنا ما احبش حد غريب يدخل بيتى "
دى ام محمد بنتعامل معاها من سنين
"لأ انا ما احبش ابقى زى حد "
يا سيدى الناس اغلبها كده"
انا ما ليش دعوه بحد"
طيب نعدى الحكايه دى .
سألته بيحب يخرج فين قال لى
انا ما بحبش الخروج و بصراحه المولات و
الكافيهات دى اماكن للدعاره و مقابله البنات و الاولاد
"طيب يا سيدى و احنا مالنا بيهم , المولات دى فيها محلات
لبس و الناس بتقضى طلباتها هناك
"
رد عليا
"الكلام ده مش مضبوط و الاماكن دى مشبوهه و لو اى حد راح
بتكون شبهه حتى لو الست
حتروح مع جوزها و كمان لبس العبايات شبهه . من الآخر انا ما بنزلش
غير وسط البلد و مش كتير
كمان انا مش فاضى للخروج كل شويه و ما احبش مراتى تخرج لوحدها
ابدا حتى و لا مع اهلها .لازم
اكون معاها . تزورى اهلك ساعه ساعتين و اروحك بنفسى"
شكل الموضوع
كده غم من اوله انا صحيح مش غاويه خروج بس ده اسمه حظر تجول و انا كمان بشتغل و
اتعلمت ازاى الموضوع يكون فيه توازن لا خروج على طول و لا قعاد على طول
.
نلاقيه دايما مشغول لما ييجى يزورنا ما يكملش ساعه و يمشى عشان الشغل
و العملاء و التجاره والمكتب و الاعلانات حتى ما عندوش اجازه و لا يوم فى الاسبوع .
يخرج للشغل الساعه 7 مساءا و يروح ساعه ساعتين و ينزل الشغل تانى و
يرجع واحده بالليل و عينيه شكلها عايزه نوم 10 سنين قدام هو صحيح مجتهد بس الحياه كده صعبه
و سألته اذا كان بيحب الاطفال احباب الله
قال لى دول وجع دماغ .
و مره بسأله
بتحب طيب تصيف مره فى السنه
لقيت الرد
" بسافر طبعا يوم
و ارجع فى نفس اليوم او تانى
يوم بالكتير امال يعنى اتفرج على المايوهات و المسخره
"
يعنىمن الآخر
لا بيحب الخروج و لا الاطفال
والمصايف و لا عنده وقت من اساسه !!
بتروح يوم و ترجع فى نفس اليوم ازاى يعنى بتعمل امه زى الاستغمايه و
ترجع مثلا و بعدين مش كل
المصايف مسخره . المصايف فيها بحر الواحد يتمشى جنبه او حتى على
الكورنيش يروح الاسواق
يعنى ياكل بره و يغير جو
"لأ يا آنسه اذا كنتى فكرانى بتسستم لأ , و
اذا كنتى فكرانى خروف
من بتوع اليومين دول انا مش خروف
"
ما كانش فيه غير رد واحد على لسانى
"
اذا كنت انت مش خروف فأنا كمان مش معزه و
حتسحبها وراك عن اذنك يا دكتور
أختك المعذبة:ميريت
قصتها و بأسلوبها!"

47 Comments:

Blogger Spyfun said...

هو في ايه هي كل الحكايات عن ناس مش عايشه وسطينا والله في ناس طبيعيه كتير مش زي الدكتور دا و ابو ركبه واللي عنده 43 سنه وعايز واحده اصغر ب 19 سنه ياريت نسمع حكايات ناس ناجحه مش كل واحد قابل واحد تحفه يحكيلنا عليه

2:15 PM  
Blogger sunset said...

السلام عليكم
انا معاكى ان وضع التحكم فى الستات لمجرد السيطره ولانه هو الراجل موجود لكن مننكرش ان فى سيطره نابعه عن الحب والخوف وده طبعا اساسها التفاهم وده نادر لكن موجود وبرده موضوع العرسان اصحاب الشخصيات المتقلبه دى اكتر نقطه مش حقدر اتكلم فيها لان ملهاش حل غيردعوه ام بان ربنا يكرمك بالزوج الصالح وكذلك فى البنات يارببببببى بجد نفسى الشباب اللى بتنبهر بالبنات الجميلات يحاولوا يعرفوا شخصياتهم يا جماعه متنبهروش بلمعان الماس ولما تمسكوها تقولوا ده زجاج دوروا على الاخلاق واكيد حتكتشفوا ان فى بنات كتيره زوجات صالحات واخيرا اشكرك جدا يا بريد بجد انت انسانه جميله اوى وانا بموت فيكى بس حاولى متكتبش كتير الفتره دى على شان الامتحانات وادعيلى زى ما بدعيلك بابن الحلال اللى يستاهلك ادعيلى بالنجاح والشفاء لاخويا وربنا يوفقك

2:35 PM  
Blogger Noony said...

هو سؤال..ولية يتجوز أصلاً؟
هو عنده وقت؟

حسبي الله ونعم الوكيل
ربنا يستر

نوني

3:15 PM  
Anonymous باشمهندز تقريبا said...

هوا الراجل معاه حق في حاجات كتير
زي خروج الست لوحدها
لانه بعد التحرش في وسط البلد يوم العيد لازم الرجال يبقى مع مراته وهيا خارجه
علشان لو حصل حاجه يدافع عنها و يفديها بروحه

وبرضه موضوع المولات والمصايف
معاه حق
الاماكن دي بقت اماكن مشبوهه
وفيها مناظر قذره
و الست لو بتغير على جوزها
هيا اللي هاترفض انه يروح الاماكن دي
لكن طبعا فيه اوقات بتكون العمليه رايقه
زي اوقات الامتحانات والدراسه
لكن في الاجازات ...
............

لكن طبعا غلطان في موضوع الشغل 24 ساعه
ان لبدنك عليك حق
وان لزوجك عليك حق

وطبعا الاطفال حبهم فطري

3:30 PM  
Anonymous islamist bloke said...

المقال ده ياخد 2 من عشرة

3:53 PM  
Anonymous me... said...

hi,
allah yekoun f 3ounek,
realy it's a big problem to take the decision of rejecting someone, also a big responsability,
and thanks god he gave you the right answer in the right time,
i liked so much the title, as this 3ariss may be a good person, but not for you, for someone like him only.
GOOD luck all,
and Big thanks to Bride

4:35 PM  
Blogger Rivendell** said...

نهار ازرق


بالسلامة يا شربات


مش معنى الكلام انك تدوري على واحد مقضي حياته في الديسكوهات لكن اول ما كلمة خروف دي سابت بقه بقى واضح هو اسلوب تفكيره عامل ازاي ... العقل المحجر اللي مالوش في النقاش


لا بجد بالسلامة يا شربات

طب كنتي اتاكدتي اذا كان موافق انك تشتغلي ولا لا

شكله كدا مدي على لا

حد يقول ولحدة هيتجوزها العيال دول وجع دماغ

دا ناوي يفرض الاحكام العرفية في البيت بقى

5:34 PM  
Blogger سجدة said...

يا عين امك يا اختى
يا خبر ابيض
دا ولا معسكر فى ألمانيا
دا المفاهيم عنده بايظة خااااااااالص
بس اكيد ليه وجهة نظر
ربنا يرزقك بالزوج الصالح يارب
وبرايد كمان
وانا

1:03 AM  
Anonymous أيامنا الحلوة said...

والنبي انا جتلي عقدة من الجواز .. ايه الرجالة دول ..ده على كده هنعنس ربنا يسترها

3:00 AM  
Anonymous shahy said...

ياميريت يااختي كان اللة في عونك كويس انك رديتي علية بس عاوزة اقولك حاجة فرق 15 سنة دة كتير اوي يعني اللراجل دة من زمن غير زمنك خالص وفي رأي يفضل ان الفرق لا يزيد عن 6 او7 سنين علشان دماغكو تبقى بتفكر قريب من بعض مش يبقى هو في وادي وانت في وادي تاني
رزقك الله بالزوج الصالح ان شاء الله

3:38 AM  
Anonymous Anonymous said...

انا مش عاجباني القصة دي خالص انا شايفة ان ممكن تعتبريها مش موجودة في حياتك لانه مايستحقش ابدا انك تفكري فيه ولا تحكيه لحد ولا تضيعي وقت حد ولا حتي دقيقة وانت بتحكيله عن انسان مش مفروض يكون ليه وجود زي دة لانه لم ولن يضيف في الحياه شيء دة انسان اناني عايش بلاهدف عايش لنفسه وخلاص ولو كنت اتجوزتيه كان ممكن بل واكيد حيرميكي في البيت ولا يسال فيكي اهو يلاقي حد يرجع يلاقيه وخلاص ونس مثلا زي التلفزيون احمدي ربنا انك خلصتي منه دة صعب قوي ولما تيجي تفكري فكري صح بعد كدة وفعلا 15 سنة دة عمر بس مش مع كل الناس

5:01 AM  
Anonymous قلوب حائرة said...

مش عارفة ايه الموضوع الواحد عاز يفرح شوية اقلبوه الصفحة التانية علشان خاطري

5:21 AM  
Blogger Masria said...

واضح جدا إنه جاي من القرن اللي فات, و مش قادر يعيش في دلوقتي,بس اكيد في واحدة مناسبة ليه
ردك عجبني جدا,كمان المقالة لذيذه جدا

6:51 AM  
Blogger wael said...

السلام عليكم قبل اي حاجه
انا هتكلم من وجهة نظر شخص شرقي ممكن يكون متفتح نوعا ما بس سيظل راجل شرقي
الراجل بطبعه ميعرفش يعيش مع بنت شخصيتها اقوى منه فالاخ اللي انتي بتحكي عنه عنده ماشاء الله كميه محترمه من الغباء الاجتماعي سمحتله انه يعمل كده وده بدليل انا مش خروف
البيه مشحون شحن محترم في موضوع دبح القطه وكده غالبا قبل ما يكلمك عشان كده عمل الغباوه دي
بشكل عام كل رجل شرقي بيبحث عن انه تكون له اليد العليا في علاقته الزوجيه والبنت العاقله والمحترمه اعتقد انها بتبحث عن ان جوزها يكون هو فعلا الاقوى بس بلا قهر
بشكل عام الشخص ده هيعذب الغلبانه اللي هيتجوزها اي كانت هي مين
وربنا يوفق البنات ومتعتقديش ان مشكلتكو اصعب من الولاد الولد عشان يتجوز بيتبهدل كتير اوي
ولو تسمحيلي بسؤال وده بجد
هو لو بنت حبت ولد فعلا وكانت شايفاه كويس بس هو لا يبادلها نفس الشعور او على الاقل مش حاسس بتعمل ايه عشان والله بفكر فيه كتير وللاسف انا معرفش بنات عشان اسألهم وحتى لو اعرف اكيد مش هسألها سؤال زي ده في وشها والا هيبقى عامل زي انا مش خروف كده هينافس السؤال ده في الغباء

8:56 AM  
Blogger emos said...

mesh ha2ool 3'eer 7asbeya allah wa ne3ma el wakeel

hat wa7da men wara el gamosa 3ashan tetgawezha

w shokran

9:43 AM  
Blogger Desert cat said...

ده راجل محافظ اوووووى
وبيخاف على نفسه من الفتنة
وبيخاف على نفسه من الصداع بتاع الاطفال
وبيخاف برضه يتاخر بره البيت من غير ميكون فى شغل
ومش بعيد يخاف من اللى يتجوزها لتقتله ما هو كدا شئ غير طبيعى بصراحة

9:45 AM  
Blogger السندريللا السعيدة said...

اهههههههههههههههههههههههههههه

دا عريس دا ولا شيخ منظر...
ولا يمكن شيخ جامد من المتشددين قوي....ليه حق ميخلفش دا كان هيموت بنتو من قبل متتولد..يا ختي بلا قرف...

ربنا نجاكي منو....دا ايه العرسان دي...ايسه الزمن العجيب دا ..ناس بتحب وقلبها طيب وملهاش نصيب في ابسط حقوقها ..الحب ...وناس كويسة جدا ومش لاقية عريس مناسب..

ربنا يستر علينا بس

ربنا يوفقك يا معذبة

9:55 AM  
Anonymous Tam said...

والله شكله فعلا أن هوه اللي خروف




يا خرووووووووووووووووووووووووووف

2:37 AM  
Blogger نسرين - أمة الله said...

السلام عليكم
هو من حق اى راجل انه يخاف على مراته
بس مش من حقه انه يخنقها
اه عايزها متخرجش لوحدها مش مشكله بس لازم كمان تخرجها عشان على الاقل يكون فى تجديد
والله الحياه الزوجيه رحمه وتراحم

6:44 AM  
Blogger نسرين - أمة الله said...

السلام عليكم
برايد لو سمحت موضوع واحد من عشره يكون يفرح احنا تعبنا

6:46 AM  
Blogger BaTresYa said...

لاحول ولا قوة الا بالله ...هما الناس جرى لها ايه ... أنا اعرف ناس على حقيقة كدا يعني دا بجد مش نادر انك تلاقيه

2:27 PM  
Blogger صوت فيروز said...

هو بس في تعليق صغير, المذكور قال انه بيروح المصيف يوم واحد وده لان المصايف فيها قلت ادب و ميوهات ومسخره.
السؤال اللي بيطرح نفسه بقوة هو
بيروح يوم واحد بس وده علي اساس ان اليوم الواحد ده بيبقي اجازة للميوهات ولا بيروح يوم واحد في الشتا؟؟؟؟؟
عزيزي القارء احكم انت
اللهم صلي علي محمد

11:01 PM  
Blogger The Groom said...


سستمني واسستمك

غديني واعشيك

كلني و اكلك

مش عارف ايه و انت مش عارف ليه

انت معاكي كل الحق و هو مالوش اي حق

بس سيبك ربنا يكرمك و يرزقك باللي يقدرك و يكرمك

تحياتي لك من ماناساس البلد

6:50 AM  
Blogger Esmeralda said...

اهى بلاو بتتحدف و ياما الواحد بيورد عليه

انتى الكسبانه

5:46 AM  
Anonymous Anonymous said...

الي كل انسه ترغب بعريس تفصيل
زمن التفصيل انتهي
ولا عزاء للانسات زوي العقول الحمضانه
وان شاء الله
انا بفكر اجيبلكم عرسان صيني
استيراد يعني
عشان ان اتخنقت من قصصكم اللي ملهاش طعم
يا كاملي الاوصاف

6:17 PM  
Blogger Aardvark EF-111B said...

أوصاف لرجل خلق ليكون أعزبا,دون أن يعنيذلك أنه سيئ بالضروره
ببساطه غير مناسب, حاول مره أخرى لاحقا

12:52 PM  
Blogger الشنكوتي الكبير said...

حرام عليكي يا برايد انا بكره الشخصيات ديه لأني عارفهم كويس كل الضغط والبخل والغتاته ديه بيمارسوها على اهل بيتهم بس لكن هم بيعيشوا حياتهم على هواهم ومبيزعجش نفسه ابدا
يعني المصيف نظام اليوم الواحد ده هيكون ليه هو بس انما هي لازم تقعد في البيت عيب تشوف المسخرة دي
والجدع التاني اللي انضرب ده مش عارف اقوله ايه نفسي اقوله روح خلص عليهم هما التنين لكن اهم اتطلقوا
ممكن تنتقم منها وتضحك عليها انت كمان

6:31 AM  
Blogger Mohamed said...

rad gamed moooot
nice reaction

2:11 PM  
Blogger Doba said...

الرسول عليه الصلاة والسلام بيقول من جاءكم من ترضون دينه وخلقه فزوجوه.........إلى كل فتاة أرجو التوقف قليللا...فالزواج مقام على الشريعة الإسلامية وآدابها وواجبات وحقوق كل من الزوجين

أحب بس أقول ان الزواج فى الاسلام غير مقام على اساس الذهاب للمصايف ولا الخروج للمولات ....أساسه دين وخلق

وأكيد الاعتدال فى كل الآمور شىء مهم ومطلوب لنجاح اى علاقة وخاصة الزواج ولذلك أرجو من كل فتاة راغبة فى تحقيق حلم حياتها بالارتباط برباط الله المقدس أن تخشى الله فى اختيارها ولا تجعل مغريات الجيل الجديد تغمى عينيها عن الاساس الصحيح

سلامى......هبة

2:16 AM  
Blogger LOJAIN said...

لا بجد ان وقعت من الضحك
خضوضا تعليق دودو وهى بتقول هو اليوم ده اجازة مايوهات
ههههههههههههههههه
على فكرة النوع ده مقرف و معفن من جوه برده بس مبيبنش من تحت لتحت يعنى


انضمى يا فتاتى الى قائمة كسبانين الخسارة
بجد انتى كسبتى انك خسرتيه
يابت ده كان ممكن يعملك حبل الغسيل جوه البيت , ومش بعيد يبقى اسلاك شائكة مش حبل

ربنا يوعدك بسيد سيده
Regards:
Lojain :)

2:54 AM  
Blogger Doba said...

عندى بوست جديد يهمنى جدا ردكم عليه
هتنورونى طبعا

متنشوس ....عاوزة حقيقى رأيكم وبصراحة

سلامى.........هبة

2:54 AM  
Blogger Sokomonoce said...

هى الرجالة مالها في ايه؟

احنا مش رجالة برضة؟ يمكن صنف تانى

اذا كان الرجالة من الصنف بتاع الاخ الباشمهندس الدكتور يبقى اكيد احنا صنف غير دول

5:40 AM  
Blogger momken said...

ازيك يا برايد اقولك ايه بس انتى عديتى ميريت على العمزم بلغى مريت انه
(اتلم المتعوس على خايب الرجا)

8:15 AM  
Blogger elzain said...

كفو! زين سويتي فيييه ..

1:42 AM  
Blogger 77Math. said...

عاجباني جدا الجملة دي...حقيقي حدخلها قاموسي !

اذا لم تكن خروفا..فلا تجعلني معزة

7:08 PM  
Blogger ريهام said...

ههههههههههههه

عندك حق و الله

اذا كان هو مش خروف

فأكيد انتي مش هتبقي معزه

رجاله اخر زمن

11:16 AM  
Blogger ريشه said...

عندكم حق انكم محتاجين تسمعو قصص ناحجه انا عنده قصص ناجحه عوزه اعرفكم عليها اه القصصلا اعرفكم عليها

9:35 AM  
Blogger فلفسة مي said...

اية الراجل المعقد دة اعتقد ان الحياة منغير جواز افضل بمليون مرة من الجواز يشخصية زي دي واحد زي دة محتاج واحدة تقولة امين علي اي حاجة عندة نقص في شخصيتة لانة لو سوي كان هيبقا عندة ثقة في الناس الي حوالية واعتقد انة فاقد الثقة في نفسة عشان كدا فاقدها في الناس

12:53 PM  
Anonymous Anonymous said...

ماتستغربيش ان في ناس بالعقليه دي الخروف ده ثقته بنفسه هتزيد لما يلاقي معزه يجرها وراه ....والمعيز كتير

2:38 PM  
Anonymous Anonymous said...

كل الناس شايفة ان الانسان اللى اتقدملك غريب الاطوار ماعدا الاستاذ اللى شايف عقول البنات حمضانة و عايزة عرسان تفصيل اكيد هو من النوعية دى ادام بيدافع عنه بيدعوا للزواج لمجرد الزواج من اى حد حتى لو كان عاهة من العاهات و انا اعتقد ان لو كانت اخته اتقدم لها عريس من النوع ده كان هو اول واحد حيرفض ، لان العريس الغريب ده لايملك تفكير محافظ و لا متدين و لا متشدد انما اراء غريبة و شاذة عن تفكير البشر ( افتكرت و حتى غير البشر دا الحيوان و النبات بيخلف و يجيب نباتات و حيوانات بيبى حتى لو ضحى بنفسه ) ، ربنا معاكى و معانا .

7:36 PM  
Blogger mora_227 said...

This comment has been removed by the author.

7:48 PM  
Blogger mora_227 said...

يوووووووووووه من ده كتير هو و الاخ بتاع البطاطس الطفس ، و اللى يشوف بلوة غيره تهون عليه بلوته

7:49 PM  
Anonymous wael elrayyes said...

اشوفي بقة يصراحة أنا لسة مقرتش الحكاية الأخيرة بس أنا حاقراها بعدين انا حبيت اقولم ان انا استمتعت بكتابك عايزة اتجوز وضحكت وعيط من قلبي فى وقت واحد شوفتي المعجزة !!!!
وليه كلمة عايزأقولها كملي واتبي وعيشي حياتك زي مانت عايزة وما تخليش حد يعيشلك حياتك
وإلي الامام سر

3:39 AM  
Anonymous Anonymous said...

اولا سلامي لميريت الحقيقه ان في حاجه غريبه ايه كميه النماذج العجيبه ديه الي الواحد بيقابلها من الرجاله وكاننا اتنقالنا فجاه لكوكب تاني او في فيروس وانتشر في الجو ما احنا لقينا ايهات ده جمع اب يعني وكانوا في يوم من الايام عرسان وناس طبعيين عمرنا ما سمعنا من امهتنا انهم عملوا كده ولا اتشرطوا واتنوا واتفردوا بالشكل ده وكانوا رجاله بجد مش زي عينه اليومين دول حد يقولي هو الغلط فين فينا ولا فيهم ولا في الوقت والظروف والسلام ختام

1:27 AM  
Blogger Girl said...

hi
انا معجبة جدا بالموقع داومدونة برايد خصوصا والحمدلله طلع في وحدة خرجت وصرخت بصوت كل البنات باننا فعلا عايزيين تنجوز ,احنا ياجماعه مشوحشين جمال ايه وطعامه ايه واذب واخلاق ايه بس مين يقدر المهم ماطولش عليكم خبيت اتسجل في المدونة دي واشارك برئي انا كمان ولا ايه
يلا اشوفكم بقى سلام

8:53 AM  
Blogger بلاحدود said...

انا مجرد عابر بس اتعودت اني اشوف كل حاجه بعيوبها ومميزتها الدكتور يمكن محبكها شويتين تلاته يعني مفيش رجاله بل المنظر ده دلوقت مش مسلسل جلباب ابي هوا ولا فيلم سي السيد بس منكرش برضو اني شفت فيكي حاجه انا عن نفسي بعترض عليها عموما في اي شخص مش شرط بنت او ولد انتي زي ما كتبتي اوام رضيت عليه
وهوه ده العيب انا واحد بشوف الناس ادامي واشوف ده فعلا يستاهل النقاش ولا لا انتي حسيتي كل ده من كلامه كان ممكن ترفضيه بكل بساطه من غير معيز وخرفان ربنا يوفقق ويرزقق بل الاحسن منه

10:21 AM  
Blogger another pharmacistaia said...

مع احترامى لكل الناس و الله لكن العيال الدحيحه (اللى انا منهم) بتوع كليات القمه دول مخهم لاسع و المذاكره لحست مخهم نصيحه ابعدو عنهم عن تجربه او اكثر ههههههه

2:44 PM  

Post a Comment

<< Home