بيت العرايس و العرسان

اللي يحبنا ما يضربش نار عندنا

Saturday, March 31, 2007

فرصة نضيفة

أنا بقى – ولا أعوذ بالله من كلمة أنا – هي يعني كلمة "أنا" عيب ولا إيه ؟!
المهم أنا ليّ تجربة واحدة, وبطلت بعهدها الموضوع ده خالص..زي ماتقولوا كده طلعت من التصفيات
أنا أصلاً لا ليّ في الطور ولا في الطحين..إلا صحيح إيه علاقة الطور بالطحين..ما علينا
يعني من الآخر أصلاً مكبر دماغي من موضوع الجواز ده خالص..عايش بطولي كده مع دماغي وكل علاقاتي مع الجنس الآخر تنحصر في أم علاء مرات البواب..ومدام كريمة موظفة التأمينات الاجتماعية..وخالتي بهية اللي ساكنة في الوراق
غير كده مافيش أي علاقات نسائية غير بقى الزمالات والصداقات, وبيني وبينكم كده كل الصديقات والزميلات - ولا مؤاخذة يعني – شبهي

آخر واحدة حلوة شوفتها في حياتي كانت فاتن حمادة الله يرحمها في فيلم العذراء والطفل الأحمر

المهم كان فيه واحدة صديقة –صداقة بريئة- من زمان, وبنتعامل أنا وهي عادي
وشوية كده حسيت إنها بدأت تتكلم في كلام فارغ وبتسأل أسئلة غبية
وطبعاً العبد لله ردوده أغبى
حاجات من نوعيه
إيه رأيك في البارفان بتاعي ؟
لا والله عندي زكام
بتحس بإيه وإحنا مع بعض ؟
إنتو مين وبتبقوا مع بعض إمتى
!
خلاصة الكلام عشان ماتتخنقوش زي ما هيّ اتخنقت البت جابت من الآخر
وعملِت زي ما قالت المطربة العصماء "أنا هاطلب إيدك بكرة..أنا بجحة قوي على فكرة"
لقيتها بقى بتاعة حب وكلام فاضي..وبتقولي أنها اكتشفت إن أنا بحبها بس مكسوف أصارحها, مش هي اللي بتحبني لأ أنا اللي بحبها, شوفته بجاحة أكتر من كده؟

الخلاصة البت صعبت عليّ وقلت أخطبها بقى وخلاص..والبت مش بطالة يعني وأنا صحيح مابفكرش في الجواز بس كلنا لها في النهاية, وأهو كله بثوابه

اليوم الموعود بقى..ضربت الحتة الكلاسيك الكحلي..ودلقت على نفسي نص إزازة البارفان اللي عندي من ثانية ثانوي..واشتريت طبق حلويات من قويدر بخمسة وتمانين جنيه, وروحت أقابل أبوها
خبطت على الباب وفتحلي أبوها..راجل محترم كده وباين عليه ذوق, دخلنا على الريسبشن حاجة كده عشرين متر في أربعين متر..زي ملعب كرة اليد
بعد السلامات والترحيب والذي منه –كشف الهيئة يعني- دخلنا في الجد على طول
شقتك فين؟
-مش يسأل عندك شقة ولا لأ.. ده الطبيعي عنده إن فيه شقة-
في مدينة نصر سيادتك
فين في مدينة نصر؟
أنا قلت إيه الأسئلة دي..الراجل شغال في التعداد ولا إيه
قصره..نجاوب وخلاص..
في الحي السابع..اوصل حضرتك بس عند موقف عربيات المقطم واسأل عن بسيوني الحلاق..أنا العمارة اللي بعده
على طول
عربيتك إيه ؟
خلاص بقى أنا فهمت اللعبة..الراجل حاسس بقيمتي وسائل عني وعارف كويس امكانياتي ومش هيضيع وقتنا في سؤال أنا عندي ولا لأ..المهم الكواليتي
أنا اتجعصت ورديت بفخر..
سيات..بس معالجة للسخونة..وهاجيبلها كاوتش جديد إن شاء الله في عيد العمال الجاي
وطبعاً معاك مبلغ يكفي لمصاريف الجواز
إلا معايا..أنا صحيح مش من نواب القرود..بس مستورة
معاك كام يعني؟
بقولك مستورة يا حاج..وبلاش نفضحها

الراجل اتعدل في قعدته وبدأ يتكلم
بص يابني..إنت شاب مجتهد, والبنت عايزاك..بس لازم عندك نقاط ضعف لازم تعالجها
يا نهار إسود ومنيل! عرف منين ده؟! هوه أنا باين عليّ قوي كده؟!
لسه هاقوله يا عمي أنا بالفعل بدأت أعالجها..وبعدين دي مش حاجة تعطل الجواز وخصوصاً بعد نزول الفياجرا الهندي أم خمسة جنيه للقرص

لقيته بيتكلم في موضوع تاني خالص..بيقولي
إنت لازم يبقى معاك على الأقل ربع مليون جنيه في البنك عشان تتجوز بنتي
ليه يا عم؟ هاتجوز سمية القيصر ؟! -ولا باين اسمها سمية الخشاب..الي بيقولوا عليها حلوة..معلش أصل أنا مش متابع الحركة الفنية-
أقولك أنا ليه
تبيع شقتك وتكمل عليها وتجيب شقة في الزمالك أو المهندسين
صدقت أنا ساعتها كلام بنته بعد ما كانت يوم عندي في البيت – مالكوش دعوة بتعمل إيه في البيت, قلنا قبل كده صداقة بريئة, اطرد هذه الفكرة القذرة من رأسك يا فتى- وقالتلي يومها إن أبوها مش هايوافق إننا نتجوز هنا وكنت فاكرها بتهزر, إيه يا جماعة؟ هوه أنا ساكن في مزبلة ولا إيه؟
وفرش الشقة يليق بينا..وطبعاً هنشارك معاك في الفرش
لأ كتّر خيرك الصراحة-
وتجيب شبكة بثلاثين ألف جنيه
والفرح في مش عارف إيه...
و
......

أنا بقى فقدت حاسة السمع ومش مركز معاه, وهوّ قاعد يملي شروطه وأنا الصراحة كل تفكيري في حاجة واحدة
طبق الحلويات أبو خمسة وتمانين جنيه

وفجأة فوقت عليه وهوّ بيقول
وطبعاً تغير عربيتك وتجيبلك عربية نضيفة!
لحد هنا واستوب..كله إلا عربيتي
قال عربية نضيفة قال! انتفضت من مكاني وقلت له..
فرصة نضيفة قوي يافندم..كل شئ قسمة ونصيب

خرجت من عنده وأنا مش شايف قدامي وسايق العربية بسرعة وزي أفلام السينما بقى شريط الذكريات بيجري قدامي
ووقف الشريط عند نقطة مريرة للغاية..لأ يا فالحين طبعاً مش طبق الحلويات أبو خمسة وتمانين جنيه, أنا مش بخيل يعني للدرجة دي..ده أن سامحت فيه خلاص
بس افتكرت إزازة البارفان الميت مللي اللي استعملت منها تلاتين مللي على مدار أربعتاشر سنة.. وضيعت منها خمسين مللي النهاردة


وفجأة يقطع شريط ذكرياتي صوت يصرخ..امشي عِدِل يا بني آدم..أمال لو كنت راكب عربية نضيفة كنت عملت إيه



إمضاء
أخوكي...وائل
قصته و بأسلوبه

76 Comments:

Blogger Esmeralda said...

اوبااااااااااااااااااااااا

انا اول الجلادين


و الله تستاهل كل اللى يجرا لك

مش فارق معاك اللى حاتتجوزها اصلاو عايز تتجوزها شفقه و شايفها بجحه و اسالتها غبيه و شايف زميلاتك شبهك , و عندك ازاازه بارفان من مش عارف كام سنه وطول القعدة شاغل نفسك بطبق الحلويات و اساسا عندك نقاط ضعف

يعنى انت موافق على كلام الراجل على الشبكة و الشقة و الربع ارنب و جات على العربيه اللى من الواضح من الكلمه الاخيرة انها عايزة النسف ؟؟؟؟؟

دي تلاكيك يا عم

بس من الواضح اهتمامك بالارقام
طبق الحلويات بخمسه و تمانين جنيه و قست الرسبشن و انت داخل و استعملت خمسين مللى من مش عارف كام
انت مش بخيل دا انت

جلدااااااااااااااااااااااااااااه

2:56 PM  
Anonymous Anonymous said...

gmeeela aweee elkessa :DD

6:04 PM  
Blogger The Groom said...


لا قصة مش جميلة

أتمنى من الله أن دي تكون قصته و بأسلوبه

لا يا برايد مستوى القصة دي منحدر شوية و الكلام مبتذل شوية

أزميرالدا أنا تاني الجلادين

تحياتي ليكي يا برايد و والله زمان و مش تحياتي ليك يا وائل

من ماناساس البلد اللي بتسلم عليكي يا برايد انت بس و زعلانة كمان

سلااااااام

10:17 PM  
Blogger ert3ashat said...

برغم انك مهتمتش اوي ب الطلبات...
بس انا زهقتتتت....زهقتتتتتتت.....زهقتتتتتت
كفايه طلباااااااااااات بقى....
هو الحق على الواحد انه بيبقى عيز يتجوز....ده حتى الولد يا جماعه مش مشكله لو الوقت سرقه....ممكن يتجوز براحته اكتر....

1:15 AM  
Blogger Shower-Mirror said...

و الله الراجل حمايا ده لازم اعمله تمثال ....

( بس اوعوا تقولوا لمراتى )

الراجل قالى: انا اتأكدت خلاص انك كويس و ابن ناس .. هو ده اللى يهمنى و اللى تقدر عليه اعمله ..كله ليك فى الاخر ... يافرحتى بواحد يجيب اللى احنا عاوزينه و تانى يوم يضرب بنتى بالجزمه .....


انما يا وائل الراجل اللى انت روحتله ده و اضح انه كان بيطفش .... بيعجزك يعنى .. تلاقى البارفان عفن من كتر الركنه و ريحتك قلبت البيت ...!!

المهم انا ليا سؤالين مهمين :

- انتو كنتوا بتعملوا ايه فى البيت مع بعض ...;)

- نقاط ضعف ايه دى اللى رايح تتجوز بيها .... دى يادوب تتفرج بيها على اغانى هيفا ...انما الجواز ماينفعش معاه نقاط ضعف ..ما حدش هايرحمك يا بنى

3:25 AM  
Anonymous Ahmed Nasr said...

وكما قال الشاعر:
وآدي جزات اللي ميسمعش كلمة ماما تقولهااااا

أنا بقى عايز افهم، هي ماما عمرها ما قالت لك تصحاب العيال اللي من مستواك؟!
إيه اللي خلاك تصاحب البنت دي؟!
غلطتك يا وائل!!

5:28 AM  
Blogger مصر هى أمى said...

ايه يا اخوانا حرام عليكوا وائل مش كفاية اللى هوا فيه

وائل انت فكرتنى بالبنت اللى كنت هتقدملها ورحت فعلا واتقدمتلها مش عايز اقولك ان طلبات ابوها كانت زى الفل متقولش حاجة على حماك دا اللى انت كاتبه ده يبقى ملاك بالنسبة للى كان هيبقى حمايا

الفرح فى المريديان
الشبكة ب 25 الف الكلام ده من 7سنيين
الشقة يكون فيها 3 مكيفات الاجهزة الكهربائية كلها مستوردة الكوافير لازم يكون محمد الصغير
كل ده وانا لسه بتقدم والراجل بيكلمنى فى كوافير بتاع الدخلة وفرش الشقة كلها على العريس فسالته امال انت هتعمل ايه
عارف الرد اللى يفقع قالى ايه الشرع بيقول ان الجواز كله على العريس وان العروسة واهلها مش عليه غير شنطة هدومها
مش عايز اقولك عملت فيه ايه وطبق الحلويات اللى دخلت بيه خته وانا ماشى علشان كان لسه محطوط على البوفية اللى جنب باب الشقة
فمتزعلش نفسك خالص

5:56 AM  
Anonymous Anonymous said...

wael pasha

don;t change your car , it is like your son don't leave it for any reason
and if u would like to sell it i could buy

Baby face

6:42 AM  
Blogger emos said...

بص يا وائئول
من الواضح كدة ان مافيش امل
لا فيك ولا فى البنت و لا فى ابو البنت
عايز تتجوز دور على واحدة تعجبك و تسأل عليها الاول و على اهلها مش عايز تتجوز يبقى احسن برضو عشان انا شيفة انك متنفعش صراحة هتبقى زوج مش مهتم بحاجة خالص زوج فاشل من الاخر
ربنا يهديك و لو ليك نصيب ربنا يرزقك باللى تستهلك

8:38 AM  
Blogger Islamist Bloke said...

شوف يا حاج وائل

انا معاك من الاول للاخر

بس فيه سؤال بسيط جدا

القصة دي حقيقية واللا خيال علمي؟

بجد متزعلش من سؤالى بس انا مؤمن تماما ان عصر الشقة التمليك والعربية خلاص انتهى...ناهيك عن فرح فى الميريديان والكلام ده...تصدق بالله...انا لو رايح اتجوز وقالوا لى عايزين شبكة ب 3000 جنية هقول له شكرا وسلامو عليكو

يا راجل العالم دي يا اما معندهاش عقل يا اما بتطفش

وبعدين الحريم على قفا من يشيل وانزل اقرب شارع عمومي لمنطقتك وانت تشوف وتحكم

وبعدين محدش يعتب على الرجل انه بيحسبها بالارقام..واية يعني...ماهو اللى يطلع عينه فى البلد دي عشان يشتغل واخر الشهر ياخد 500 جنية واللا حتى 1000 جنية وكمان المجتمع بيقوله اتجوز يعني لازم يعيش بالسحتوت عشان يعرف يحوش ويجيب شقة ايجار جديد ب 300 جنية فى التجمعات العمرانية الجديدة فى الصحرا لازم يحسبها بالارقام واكتر من كدة كمان

وبعدين هى الخسرانة يا وائل باشا...اوعى تفكر في الاشكال دي تانى يا عم-مش هى طبعا انا معرفهاش هى اية لكن متفكرش فى العيلة اللى زي كدة

الجواز قبل ما يكون اتنين بيحطوهم مع بعض فى شقة ويقولولهم ياللا اتجوزوا وعيشوا حياتكم الطبيعية...الجواز ارتباط اسرتين او عائلتين ببعض

واهم حاجة فى الجواز الاسرة اللى هتناسبها وخصيصا الاب

افرض بكرة حصلت ازمة فى البلد والعريش قعد فى بيته ومش لاقى شغل...اول حاجة هتعملها هتبعتها عند اهلها عشان المصاريف لحد ما تلاقى شغل...لو الاب مش قد كدة هيقولك معرفكش...واللى واخد بنته بيعة وشروة مش هيساعدك فى اى ظروف قهرية تواجهك

انما لو واخد رجل بيقدر-وصدقنى انت قبل ما تنقى العروسة نقى ابوها-لو واخد رجل بيقدر هيقف معاك فى كل مشاكلك لانه هيعتبرك ابنه...وبعدين الاباء اللى مش بيقدروا احتياجات بناتهم ولا مشاعرهم ولا متطلباتهم دول يستاهلوا الضرب بالجزم القديمة...خليها قاعدة جنبك يا حلو وبكرة تلاقيها ماشية بعقد عرفى يا اما صابرة ومستحملة لو ملتزمة وربنا هاديها وكمان -والاهم- لو ربنا ابعد عنها ولاد الحرام اللى يلفوا على عقل البت ويقول لها تعالى نطلع نشرب كوبايتين الشاى ومفيش غير بوسة واحدة بس يا ستى

الواحد كاتم فى نفسه ومش راضى يتكلم...لكن انت فقعتني اوى اوى بحكاية الاب ده اللى عايز شقة فى المهندسين...طيب انا عندي سؤال...المهندسين منطقة بها تعداد ثابت من الشقق ومش هينفع نعمل لها توسعات...يبقى لو فيها 40 الف شقة مثلا وخلاص خلصوا...نتجوز احنا فين بأة...وبعدين يا حاج وائل انا شاكك فى نقطة المهندسين دي...لان اقل شقة فى المهندسين او الزمالك بتعمل لها 4 او 5 مليون جنية دلوئتى...مفيش حاجة اسمها ربع مليون يا حاج...انت جاى من العصر الحجرى واللا اية؟ يا عم ده الشقة فى الحى العاشر اللى اسمه بيئة ومنطقة واطية-الشقة 180 متر ب 260 الف جنية وهتاخدها عالمحارة ومفيهاش صحى ولا سلك كهرباء فى الحيطة حتى...يعني محتاج لك ولا 40 الف جنية تشطيبات على ما قسم ده غير العفش

عموما ربنا يهدي الجميع ويرزقك العروسة الصالحة اللى تكون سبب فى دخولك الجنة...ويا عالم...مش يمكن لو كنت اتجوزت الانسانة دي اللى متربية فى بيئة مادية بحتة...مش يمكن جوازك منها كان يبقى سبب لشقائك وانك تتحول الى الة لجمع النقود فقط لا غير طول حياتك....ويوم القيامة تلاقى مفيش حاجة فى الميزان

ربنا يوفقك

امين

شكرا يا برايد عالفكرة الهايلة دي وانتظرى اولى قصصى قريبا....اخوكم كان صايع اوى ولفيت كتير فى مشاوير الجواز دي

والسلام

9:23 AM  
Anonymous Anima said...

بس مريت حاجي بكرا أعلق على اللي انت قلته

9:33 AM  
Blogger Noony said...

اسمحلي أقولك يا أخ وائل اك أصلاً ابتديت بداية غلط وتستاهل اللي يجراك وأكتر كمان
أما انت مش عايز تتجزوز أصلاً..وشتمت البنت عشان صريحة -زيادة عن اللزم- وقلت عيلها بجحة، رايح تتقدملها؟ أما انت من غير زلا حاجة بتقول عليها كدة، بعد الجواز "هتقول" و"هتعمل" فيها اية؟
بصراحة برضه عشان الواحد يقول اللي ليه واللي عليه...أبوها مزودها أوي، وفعلاً بيعجزك...بس بجد انت تستاهل لأن نيتك مكنتش أد كدة من الأول


سلامات

11:23 AM  
Blogger الطريق الي الكنز said...

مـــحـــــجــــوز
معلش بحضر رد
جامد
بس
الموضوع كده مش مظبط

1:05 PM  
Blogger أبو أمك said...

إيه يا جماعة
زي ما تكونوا مسكتوا حرامي
بالراحة عليً شوية

1:20 PM  
Blogger Sa7bet Nouny said...

الحاجة الوحيدة اللي تستحق الاحترام في كل اللي حضرتك كتبته يا سيد وائل هو "تسيباس"... يا رب تكون صينية الحلويات كان من مندرين قويدر الكوربة مش أي قويدر آخر.

2:35 PM  
Blogger Sa7bet Nouny said...

وعلى فكرة... آدي نموذج للرجل اللي ما يقدرش إن بنت تعجب بيه فتكلمه بصراحة. لما الإنسان يكون محترم ويشوف تصرف ما يحترموش، يبقى على الأقل ما يتماداش فيه... يعني لو مش محترم إعترافها ليك بإعجابها، خليكي أنت محترم وانسحب من حياتها.

2:41 PM  
Blogger SAMEH said...

القصة دي بتفكرني بواحد صاحبي اتقدم لواحدة و اترفض
تخيلوا إيه سبب الرفض!!!!!
ماعندوش شقة........لا
ماعندوش فلوس للجواز.......برضه لا
ماعندوش صحة....... متهيألي كده لا
أمال إيه
علشان مش راضي يعمل شهر العسل في اوروبا
شوفتوا بقه البنات مظلومين إزاي

4:45 PM  
Blogger سيدوفسكي said...

سلام عليكم

الأسلوب جامد جدا صراحة .. ساخر وعاجبني بصفة خاصة

بالمناسبة .. علاقة التور بالطحين .. أظن يعني أنه المقصود التور اللى كان بيلف في الساقية بتاع المطاحن ده .. فيعني لما حد يقول لا له في التور ولا الطحين ، يعني مالوش في الليلة من أولها لآخرها .. حاجة كده يعني

بس مش عارف .. حاسس ان الحكاية جاية قلب في قلب كده .. يعني زي ماتقول كده انت رايح الجوازة م الأول زي مانا بانزل الكلية كده بالظبط .. باروح من غير حماس حقيقي ، ولمجرد أني لازم أروح

عموما .. ربنا يكرمك إن شاء الله .. ويكرم الجميع

5:01 PM  
Blogger lojain said...

انا لو شفت وائل ده مشعارفة هعمل فيه ايه اصلا دى طريقة كلام عن واحدة كان ممكن تبقى مراته اه الصراحة ابوها مزودها وعلى الاخر بس فى ايه يعنى ومش اول ولا اخر وده انا مش عايزة ابقى تالت الجلادين ده انا هخدها وظيفة و اقف بالكرباج وانا اللى هنفذ الجكم بنفسى بلا اى فخر او كبرياء و مجانا

5:21 PM  
Blogger lojain said...

على فكرة نسيت اقولك انك هتاخد واحدة مش تمشى على العجين متلخبطوش , لا هتبقى مواهب تمشى على حبل ميوقعوش تمشى على الحيط ميزحلقوش والله اعلم بما خفى .... وصحيح هو وائل باشا بيشتغل ايه؟؟؟؟

5:24 PM  
Anonymous Anonymous said...

اية يا عم وائل هما بيضربوك بالكرباج جامد كدة لية

والله انت قصتك عجبتني بجد واسلوبك مش وحش
بس بلاش تسال اسئلة كتير ومتجوبهاش زي "انا" عيب ولا لأ وعلاقة الطور والطحينة عشان بنتزاول

براحة علية يا جماعة
انا لما ابقي متفق مع حبيبتي في الكلية 4 سنين
وقايلالي انها مظبطا الوالد وموافق علي كل حاجة واروحلة يقولي شقتي مش مناسبة ولا عربيتي وعايز شقة في فكتوريا او ميامي قريبة من البحر وعايزني اغير شغلي - معرفش هو مالة بموضوع الشغل دة هو لة اكل ولا بحلقة - واغير عربيتي كمان تصوروا طلب اني اغير عربيتي مش كفاية اني معايا عربية لا كمان لازم اغيرها

الطبيعي ابيع البت وابوها وابيع فكرة الجواز اصلا واتريق عليها كمان

12:57 AM  
Blogger Rozza!.......فاقد الذاكرة said...

ههههههههههههههههههههه
طب سؤال, رصيدك بالبنك بالمصري ولا الدولار, بتعرف عشان قيمة الانسان الايام ده بالفلوس
القصة معتادين عليها, بس مش غلط سرد القصة, ومش ضروري تكون القصة ضحك فقط, سرد القصة هي تجربة

1:20 AM  
Blogger إنـســانة said...

هههههههههههههههههه

لا حول ولا قوة الا بالله

هما كلهم عليك ولا ايه

معلش تعيش وتاخد غيرها يافندم

3:47 AM  
Anonymous Tam said...

ادي يا عم الناس اللي بتقولك في مشكله عنوسه ليه؟؟؟؟
تبقي البنت من دول عرقوبها يدبح رقبه الوزه زي مابيقولو
وأهلها عمالين يتشرطوا عالشقه والعفش والمهر!!!
احسنلك روح دور علي واحده اوروبيه ولا امريكيه
ولا حتى ماليزيه
وأخرتها خاتم ب 15 -20 ألف جنيه
وشقه إيجار جديد علي شويه عفش مش هايكلفوك أدهم
والبنت من دول هاتصحي كل يوم الصبح تبوس ايدك شعر و دقن "علي رأى اللمبي"
انك اتجوزتها وريحت دماغك من أرف الحموات و الحوار ده!!

5:02 AM  
Blogger سمسم said...

ايييييييييييييييييييه
وكمان
ايييييييييييييييييييه
ست ستها تتمناك
بس انت اشر كده
وهجبلك جوازه نضيفه
هو من إلت الصابون يعني
لأه
ده إحنا رجاله قوي
بس مش عايزين نفتري

ويجعلوعاااااااااااااااااااااامر

5:18 AM  
Anonymous Anima said...

يابني ده إنت تستاهل
كانت بتعمل ايه عندك في البيت؟ و تقولي صداقة بريئة

و كمان رايح تخطب من غير أهلك

و همك بس ع البرفان

يا اخواتي ايه العرسان دول

6:42 AM  
Blogger emos said...

يعنى عريس متنيل على عينة و كمان الرجالة بتدافع عنة

واحد بيسمح لوحدة انها تجيلة الشقة
و الله اعلم مين غيرها جه
و كمان مبيحترمش الجنس اللطيف من اساسة يعنى مش هيحترم مراتة
و رايح يخطب لوحدة على رأى انيميا
و جلدة على رأى اسميرالادا

يعنى لا ينفع زوج ولا اب ولا حتى ضل حيطة

و مش عارف مين بيقول لة هنجبلاك احسن منها
مفيش واحدة فى الدنيا تستاهل الجدع دة ولا حتى طنط الراقصة اللى اتقدملها

و كمان زعلان عشان الناس هجمت علية
ربنا يهديك يا ابنى و يقلل من امثالك

8:45 AM  
Anonymous Anonymous said...

اية يا عم وائل اغيب اغيب وارجع الاقيهم لسة زعلانين منك وبيضربوك بالكرباج
والله انت صعبان عليا لولا انها كانت عندك في الشقة دية

حتي براااااااااااايد ام قلب طيب باعتك خردة ودخلت مخصوص عشان تكتب

قصتة وباسلوبة

10:49 PM  
Blogger Sa7bet Nouny said...

وائل... كلمة في ودنك بقى: واضح إن مثل هذه الحوارات ماينفعش تحكيها قدام بنات خالص. خلي المستوى ده من التفاصيل بينك وبين صحابك الصبيان. أعتقد إن مافيش بنت هتقبل تسمع إهانة في بنت تانية لمجرد إنها عبرت عن مشاعرها بصراحة، بس الولاد يتهيألي بيهيصوا في الحاجات ديه.
ويا ريت الناس تبطل كلام عن الكرابيج والأشياء المروعة دي. مش لازم يعني الواحد يقشعر وهو بيقرأ التعليقات!

1:06 AM  
Blogger Sampateek said...

هههههههههههه
انتم ناس زي السكر
بجد روعة

6:18 AM  
Anonymous Anonymous said...

السلام عليكم ورحمة الله وبركاته..،

معلش هو في حاجة نفسي أقولها من الأول..

في حد قال إن الأهل دايمًا بيطلبوا كذا وكذا وحاجات كتير في الجواز

وفي واحد قال إن الكلام ده لم يعد موجود والبنات على قفا من يشيل...

مع أحترامي لمن كتبه مش هي دي المعادلة اللي المفروض تختار بيها زوجتك اللي هي هتكون أم لولادك

يعني مينفعش تنزل الشارع وتدور على أي واحدة تتزوجها والسلام وبردوا مش بقول الإنصياع الكامل لطلبات الأهل الثقيلة..

ولكن المستوى الاجتماعي بيفرق من عائلة لعائلة مينفعش مثلا تروح تتقدم لبنت هي أصلا عايشة عيشة مرفهة جدًا
من الطبيعي أهلها يرفضوك لو أنت على قدك
وحتى هي هتستحملك شويتين تلاتة وبعد كدة تزهق ومش هيبقى في استقرار ولا هتحس إنك الرجل الذي كانت تتمناه..

لكن لو كل شاب فكر ألف مرة قبل ما يتقدم لزواج بنت إيه هي المواصفات اللي عاوزة وإيه اللي نفسه يشوفها فيه.. أكيد الحياة هتفرق..

التوافق الاجتماعي مهم جدااااا

يعني مثلا أنا على سبيل المثال بجد أهم حاجة عندي الاستقرار النفسي والاجتماعي
ومنها سيتولد الاستقرار المادي...

وربنا يرزق جميع الشباب بالزوجات الصالحات.. ونرتاح منهم بقى

10:10 AM  
Blogger شروق الشمس said...

This comment has been removed by the author.

10:12 AM  
Blogger شروق الشمس said...

السلام عليكم ورحمة الله وبركاته..،

معلش هو في حاجة نفسي أقولها من الأول..

في حد قال إن الأهل دايمًا بيطلبوا كذا وكذا وحاجات كتير في الجواز

وفي واحد قال إن الكلام ده لم يعد موجود والبنات على قفا من يشيل...

مع أحترامي لمن كتبه مش هي دي المعادلة اللي المفروض تختار بيها زوجتك اللي هي هتكون أم لولادك

يعني مينفعش تنزل الشارع وتدور على أي واحدة تتزوجها والسلام وبردوا مش بقول الإنصياع الكامل لطلبات الأهل الثقيلة..

ولكن المستوى الاجتماعي بيفرق من عائلة لعائلة مينفعش مثلا تروح تتقدم لبنت هي أصلا عايشة عيشة مرفهة جدًا
من الطبيعي أهلها يرفضوك لو أنت على قدك
وحتى هي هتستحملك شويتين تلاتة وبعد كدة تزهق ومش هيبقى في استقرار ولا هتحس إنك الرجل الذي كانت تتمناه..

لكن لو كل شاب فكر ألف مرة قبل ما يتقدم لزواج بنت إيه هي المواصفات اللي عاوزة وإيه اللي نفسه يشوفها فيه.. أكيد الحياة هتفرق..

التوافق الاجتماعي مهم جدااااا

يعني مثلا أنا على سبيل المثال بجد أهم حاجة عندي الاستقرار النفسي والاجتماعي
ومنها سيتولد الاستقرار المادي...

وربنا يرزق جميع الشباب بالزوجات الصالحات.. ونرتاح منهم بقى

10:12 AM  
Blogger lojain said...

والله ياايموس بجد ماشاء الله
اول كلامها و اخره تحفه
اوله يعنى عريس متنيل على عينه
واخره خلاصة :ربنا يقلل من امثالك
ودليل على انها استفزت فعلا انها ردت بالعربى الفصيح عشان ميخونهاش اللفظ خالص و الصاحة اهنيها و هخليها تجلد معايا
والغريب كل شوية يختى واحد يقوله
قفا من يشيل قفا من يشيل
زىمايكون بضاعة و هجيب لك احسن منهاو بسعر اقل
وبرده معرفتش , الاخ بيشتغل ايه بس؟؟؟؟

1:29 AM  
Blogger emos said...

خليهم يقولو اللى هم عيزينو يا لوجى
البنات فعلا على قفا مين يشيل
بس اللى بنتا اللى تنفع للجواز
و البنات المحترمين
نادريين مووت
و اللى يلحق بقى

11:38 AM  
Blogger سكينة said...

انا متخيلة ان الحادثة المفجعة اللي خسرت فيها بارفان معتق بالاضافة لثمن طبق الحلويات هتخليك تبص للستات بجد
:)
احتمال شتمية عربيتك ذنب البارفان اللي قلقت راحته
اسلوبك لطيف بس متشتمش في الستات ثاني
:)

3:49 PM  
Blogger أبو أمك said...

وبعد أن هدأت العاصفة
أرد بقى
هو صحيح دايماً اللي يرد في المدونات صاحب المدونة..بس مش مشكلة عادي زي بيتنا برضه
وبعدين أنا شريك هنا..برايد براس المال وأنا بالمجهود

esmerlada
مبروك المركز الأول..تكسبي الميدالية الذهبية في النشان
كويس إني جلدة..أهو ينفع تجلدي بيها حد تاني

anonymous
ربنا يخليك..قول لهم عشان مش مصدقين

the groom
لقد حقق الله أمنيتك..يا راجل يا بركة
وتحياتي ليك

ert3ashat
فعلاً كفاية طلبات..بس لو طلب أخير
يبقى طلب كفتة مخصوص

shower-mirror
يعني هانعمل إيه في البيت بنقاط الضعف ؟
إجابة السؤالين في رد واحد أهو

ahmed nasr
أصل أنا مارضيتش أصاحب اللي من مستواي عملاً بقول الشاعر
إذا أردت النجاح فابتعد عن الفاشلين

مصر هي أمي
لازم أزعل نفسي..اصلهم دخلوا طبق الحلويات جوه

baby face
هتشتريها بعد عيد العمال ولا قبله ؟
أصلها تفرق عشان الكاوتش الجديد

emos
شكراً شكراً
بس ماتقوليش عليعا طنط الراقصة
احترمي الجنس اللطيف

islamist bloke
ده سؤال بسيط ؟ أمال لو كان سؤال معقد كنت سألت إيه
المهم أنا هاجاوب..بس مش دلوقتي

anima
همي مش على البارفان بس
على طبق الحلويات كمان

noony
حتى لو بدأت بداية غلط
إذا بدأت في حماقة..فإمض حتى النهاية

الطريق إلى الكنز
إيه يا عم إنت بتحضر رد في جامعة أوكسفورد ؟

sa7bet nouny
يعني لو كانت الحلويات من العيسوي اللي في أول شبرا ماكانش بقى فيه أي حاجة محترمة ؟

sameh
بسيطة..يبيع الشقة ويكمل بفلوس الجواز
ويعمل شهر عسل في اوروبا

سيدوفسكي
وعليكم السلام ورحمة الله وبركاته
ربنا يكرمك..والله الأسلوب عاجبني أنا كمان بيني وبينك

lojain
طب كويس إنك مش هاتشوفيني
باشتغل في السيرك..أمشي على الحبل

anonymous
سيبك إنت
شوفتني وأنا باتكربج ؟

فاقد الذاكرة
ماعندبش رصيد في البنك
بس عندي رصيد في الموبايل..ينفع ؟

إنسانة
اللي يعيش ياما يشوف

tam
خاتم بخمستاشر..عشرين ألف جنيه
طب نبقى عملنا إيه ؟

سمسم
أحبك وإنت رافع معنوياتي

sampateek
وإنتي أسكر
وإنتي أروع

شروق الشمس
المهم تحس إني الراجل..اللي تتمناه بقى أو لأ مش فارقة بعد كده

سكينة
أنا شتمت في حد ؟ ده أنا غلبان

4:17 PM  
Blogger emos said...

حتى الرد بتاعك مفهوش امل
ربنا يهديك يا ابنى

هو انت لية الجنس اللطيف مش فارق معاك اوى كدة متحكلنا القصة اللى قبل القصة دى عشان نعرف انت اتعقدت من اية يمكن القصة الاولى بتاعتك تخلينا نحس ان انت فيك امل او نحس ان انت عندك مشاعر

6:42 AM  
Anonymous متعقد جدا said...

ايموس متحاملة عليك موووت هي و صاحبتها ...
بس انت الصراحة دخلت في الأول باستهتار شويتين و ده اللي قلل التعاطف معاك...
و مين يعرف ؟ يمكن تكون حكيت باستهتار قاصد عشان تبين انك مش متأثر بالموقف ...
اما أيموس فعليها انها تقولنا هي بتدافع عن الستات عموما و لا عن المحترمات اللي فعلا و للأسف بقوا قليلين جدا .....

10:04 AM  
Blogger emos said...

لا انا بدافع عن البنات المحترمات
و اللى مش محترمات بيصعبة عليا لانهم برضو عندهم مشاعر رقيقة

12:25 PM  
Blogger 7mada said...

معلش يا وائل ولا يهمك من اللى حصل
بس اسمج لى اقولك رأيىى بصراحة من غير ما تزعل علشان انا أكبر منك ويمكن أعرف وجهة النظر بتاعت أبو العروسة بحكم السن
-واضح يا أستاذ ان انت فعلا بخيل جلدة وانك انت اللى حطيت عينك على البنت المستريحة اللى فى الصورة قدامك موش هى اللى رمت عليك الشبك زى ما قولت وسيبك من حكاية كانت معاك فى الشقة دى
- تانى حاجة واضح ان الراجل قراك من الأول وحس ببخلك وبأنك جلدة(وده أكبر عيب بيكون فى الراجل)فحب يعمل لك إختبار وانت سقطت فيه بجدارة يا معلم
-بالنسبة بقى للعربية بتاعتك فالراجل حب يريحنا كلنا من العطلة اللى بتعطلها لنا كلنا لما عربيتك بتقف بيك كل يوم على الكوبرى وتوقف حالنا معاك
_ على كل حال انت ممكن تحط العربية على باقى غزازة البلافان اللى عندك وتبدلهم بموبيل حديث من بتوع الجيل التالت وهو تبقى استفدت وريحتنا منها
متزعلش منى يا وائل لأنى بصراحة مرارتى بتنفقع من البخلا واللى عندهم عربيات بتسخن فوق الكوبرى
سلام

2:50 PM  
Anonymous شيرين said...

يااخ وائل انت السبب في الي حصلك ده لانك ماشي كده وخلاص مش محدد هدف لحياتك المرة الي جاية بقي ابقي فكر واختار صح والاهم انك تختار زوجة صالحة تصونك وتحافظ على بيتك واولادك

5:00 AM  
Blogger هدى said...

انا جاية متاخر وحاسة ان كل اللي في نفسي قالو اموس وحماده وغيرهم ومع ذلك فانا حسيت من اول جمله انك ضربتني قلم على وشي

واحد مش عايز يجوز

وقال ايه مالوش في البنات

وايه؟

البنت الكلاس اللي عايشة في قصر راميه جتتها عليه

ومش تكتفي بهذا القدر من الاساءة للبنت وليك

لا ..ازاي؟
تدخل جملة الشقة وكأنها شيطان وانت الملاك البريء

فيه ايه ؟؟

يمكن تحليل حمادة يكون صح

لكنه غيظني اكتر

وضايقني زيادة

ربنا يهديك ويهدي اللي زيك

8:14 AM  
Blogger أبو أمك said...

متعقد جداً
تعاطفك لوحده مش كفاية

7mada
أكبر عيب في الراجل إنه يبقى بخيل جلدة ؟
طمأنت قلبي يا رجل

شيرين
أنا برضه باقول كده
أنا اللي جبت ده كله لنفسي

هدى
ياريت المرة الجاية تيجي في معادك عشان تقولي اللي في نفسك قبل ما يسبقك حد

10:18 AM  
Blogger lojain said...

لتانى مرة احييى ايموس و الله:
صحيح مهو اكييييييييد فى حد عقده و عقده كبيرة , عقدة محترمة اصلى مش المضروب بتاع تايوان
والموضوع مش تحامل ولا حاجة عشان اللى راح لها دى مش بنت خالتنا اللى عايشة فى اليونان ولا كنا منمرين عليه وخلا بينا
كل الحكاية انه كل واحدة بتشوف نفسها مكان البنت دى وبتزعل جدا لما تتخيل نفسها مكانها
خصوصاااااا لو كانت البنت دى محترمة فبالتالى الواد بيدافع عن البنات المحترمة اللى بيبصوا لهم الناس على انهم حاجة زى الرز ومالية السوق بس اللى يرضى و يشترى
توب علينا يارب

12:15 AM  
Blogger lojain said...

وللعلم ان شايفة ان تحليل حمادة فى محله جدا جدا

12:16 AM  
Anonymous Anonymous said...

واحدة محترمة وابوها محترم عايز يصونها حيهتم بدين العريس واخلاقة وتفكيرة ومستقبلة

مش سكنة فين وعربيتة نوعها اية ؟

مفيش واحدة حتبقي محترمة وفي نفس الوقت شيك وتجزبك من نظرة ولبسها يبقي ملفت وتدوخك وراها في الشغل

ومفيش واحد حيبقي محترم ومتدين ومعاة فلوس وشقتة جاهزة وحيختارك لانك لبسك ملفت او عايشة ستايل بالمعني الوحش

الطيبون للطيبات

ربنا يستر ومنقعش واقعة وحشة الحوار دة عاملنا كعبلة في دماغنا كلنا

8:54 AM  
Blogger mohra2il said...

بص يا اخ وائل
ا احب اشكرك انك مسحت التعليق بتاعى الاولانى
لان دخ دليل قاطع ان سياتك...........
بلاش اكمل
وانا مش هكتبه تانى
لان فى واحدة هنا اختصرت اللى عايزة اقوله بزوق شوية عنى
لان لسه فى ناس وبنات عندها مبدا زى
ايموس
وبجد انا بحيها من كل قلبى

وشكرا مرة تانى على مسح التعليق

3:19 PM  
Blogger أبو أمك said...

lojain
أيوه صح..عقدة أصلي
وعليها ضمان سنة

Anonymous
حيلك يا باشا..دين العريس وأخلاقه ومستقبله إيه بس
ده أنا أعزل وأجيب عربية تانية أسهل

mohra2il
مسح تعليق إيه بس..أنا ماقدرش أمسح تعليقات
دي مش مدونتي ولا مدونة أبويا..ده أنا مأجر مكان بوست واحد بس

12:58 PM  
Blogger السندريللا السعيدة said...

هههههههههههههههههههههههههههههههههههه

يخرب عقلك يا وائل ايه الاسلوب الي يجنن دا...
والله انت فيك شيئ لله ....

قال عربية نضيفة قال ...هما الطبقة الي فاكرين نفسهم اغنية شوية دول ايه..

بلا نيلة

امال لو كنت هتجوز ملكة جمال الكون كان ابوها هيطلب منك ايه..

والنبي ربنا نجاك من العيلة الفقرية دي...خليك مع دماغك بقة لغاية ما ربنا يكرمك ببنوتة كدة قمر وعسل زيك وتكون تستاهل فعلا ...ويكون همها وائل بس وقلبو مش العيشة فين وايه الي عندك وبتملك ايه ..بلا وجع دماغ...

عالعموم ربنا يعوضك خير ويوفقك يا رب ..
وفرصة نضيفة يا واد انت..سلااام يا عسل ..اختك السنديللا

8:40 AM  
Blogger for my best friend leyl said...

ههههههههههههههههههههههه


بجد فرصه نضيفه

طب والنبى انا لو معايا ربع مليون جنيه

مش هاتجوز اساسا

اجيب لنفسى وجع الدماغ ليه

6:21 AM  
Blogger Mohammed Osman said...

ههههههههههههههههههههههه


بجد فرصه نضيفه

طب والنبى انا لو معايا ربع مليون جنيه

مش هاتجوز اساسا

اجيب لنفسى وجع الدماغ ليه

6:24 AM  
Blogger أبو أمك said...

السندريلا السعيدة
بعد الكلمتين اللي قولتيهم دول هاصدق نفسي
والمرة الجاية هتلاقيني رايح أخطب ملكة بريطانيا

mohammed_osman
إنت لو معاك ربع مليون جنيه كانوا بقوا نص مليون دلوقتي
عشان إنت داخل بنفرين

12:47 PM  
Anonymous salma said...

اولا احب اقول اني مش مصرية انا تونسية ف انا مش هعرف اكلم بخفة الدم الجميلة دي الي بتتميزوا بيها
انا عجبتني القصةواسلوبك كان حلو

برشا برشا يا وائل

2:08 PM  
Blogger المشى بمحاذاة رجل يشبهنى said...

جميلة وحلوه
وان كانت مؤلمة

11:50 AM  
Blogger دوبى said...

ههههههههههههه
طب انت نسيت تقولنا
ايه ماركة البارفان

2:46 PM  
Anonymous cinderella said...

هههههههههههههههههههههههههههههههههههههههههه
معلش يا وائل هى دى اخرتك بس طبعا هقولك كلمه حكمه
ارف رأسك يا أخي فقد مضي عهد الاستعمار
ههههههههههههههههههههههههههههههه
مش عارفه ليه بجد عاوزة اضحك اوى
يعني بعد ما قالت لك انها ( هى اللى حاسه وعارفه ومتأكده كمان بالمره يعني) انك بتحبها وانت يا حرام مش واخد بالك يطلع منهم كل ده امال لو ماكنتش حاسه كانوا عملوا ايه
يلا ولا يهمك بس بجد اسلوبك جميل اوى

5:36 PM  
Blogger haneen said...

اولا عوزه اقول شى انا دخلت بلوجر
ده غلط او عن طريق قريبه ليه وسجلت لنفسى جمله مش لطيفه ايها الراقدتحت التراب وكنت بهرج بس دخلت وقرات كتير وحاجات حلو تجنن من برايد وعوانس اسفه على الكلمه بس ممكن حد يساعدنى على فهم البلوجر وازاى اسجل فى خواطر او شعر انا بحب اكتب بس لسه مستجده ممكن المساعده من برايد او اى حد يقراء تعليقى شكرا

10:20 AM  
Blogger haneen said...

واثل قصدتك بتاخد العقل على رئي اخونا العرب والله هموت من الضحك

10:35 AM  
Blogger dreem said...

معلش يا وائل بس عايزة اقولك مش كل الاهالى ولا البنات بيدوروا عالماديات يعنى كما قال رسول الله صلى الله عليه وسلم : اذا جاءكم من ترضون دينه فزوجه
فيه كتير ناس بتعمل بالكلام ده وكتير ناس فعلا بتشترى راجل
تحياتى

4:36 PM  
Blogger MoodyLicious said...

اولا انت تستاهل الى حصلك عشان نقيت واحده غلط و بعدين القرار ده مش بالساهل عشان تاخده كده و هى اصلا غلط لان هى اللى ادت سمعة للبنات انهم ملقحين جتتهم و كده

8:34 PM  
Blogger princesse aimy said...

عارفة يا برايد انا عندي 24 سنة و لو اتسألت زي مسرحية عادل امام (شاهد ما شافش حاجة ) في مشهد المحكمة : ايه علاقتك بالجنس الاخر هارد اقول :زي علاقتي بحضرتك كده
كلهم بيعتبروني اختهم صاحبتهم لا لا لا اخوهم صاحبهم الانتيم مع اني و الله يا برايد بنت ;)
تفتكري ايه الحل يا برايد ؟

1:47 PM  
Blogger hassanelazazy said...

يا جماعة انتو ليه بتحكموا علي البنت من غير ما تسمعوا منها احنا سمعنا الكلام من طرف واحد بس و هو وائل افندي هو غلطان فعلا انه اتخذ قراره بدون تفكير علي كلامه(زي ماتيجي يعني) ده جواز مش لعبة و لنفرض ان ابوها سهله الامور كان هيعمل ايه و ازاي كان هيقبل علي نفسه انه يجوز لمجرد اهي جوازة و خلاص يا اخ وائل اعد التفكير في نفسك وقيمها صحيح زي ما قيل ان البنات عددهم كتير بالنسبة لعدد الشباب في بلدنا لكن زي ما قيل ايضا ان البنات اللي تنفع تفتح بيت و تشيل مسئوليته قليلين بس ايضا الشباب اللي ينفعوا يفتحوا بيت و يشيلوا مسؤلية اقل بالكثير و انت مش واحد منهم و ده حكم علي كلامك انت
وشكرا ... مدونة ارحمونا...

5:02 AM  
Blogger mora_227 said...

هو لسة فيه ناس بتفكر كده ... ما تفرحش اوى الكلام ده موجه ليك و ليها .
بتعايب عليها و انت سورى يعنى مش ملاحظ نفسك خالص .
و بعدين ازازة البرفان دى زادت ثقب اندلقت امتى بالظبط اكيد يوم ثقب الاوزون ما زاد اتساعا ، دى كانت لازم تنحط فى خرسانة و تتردم على اعماق سحيقة زى المواد المشعة .

8:22 PM  
Blogger هابى said...

السلام عليكم ورحمة الله اولا ثانيا انتم ناس زى السكر وربنا يكرمكم جميعا وثالثا بقة يارب مكونش عضوة تقيلة

3:56 PM  
Blogger amani said...

هههههههههههه
اكيد مش بجد
في حد مش فارقة معاه للدرجة دي ؟؟؟

9:52 AM  
Anonymous SPICE00000@HOTMAIL.COM said...

تعرفوا أحلى حاجه فى البنات انها لما تكون خلاص عايزه تتجوز تحسس القرد أنه فتى احلامها وانها دايبه فى هواه وأى قرد بقى مش قرد أو اتنيين لأ حسب ما يقع قدامها ولما يقلبها تقوله أنه قرد وواطى ومعفن وأنها كانت مش طايئه اهله طيب ليه من الأول مهو القرد قرد هو هيتغير

5:10 PM  
Blogger زهرة الاحزان said...

وائل بصراحة الغلط راكبك من ساسك لراسك
المفروض اصلا تحسن اختيار الزوجة والنبى قال تخيرو من هى ذات خلق ودين وجمال وحسب طبعا مش فاكرة نص الحديث بظبط وطبعا انت سمعت تعليقات من الاخوة هنا لا حصر لها بس بصراحة ... بصراحة يعنى ... ولا بلاش ربنا يكرمك بالزوجة الصالحة يارب والمرة الجاية تحسن الاختيار وساعتها تيجى تقولنا خلاص انا اجوووووووزت

12:53 PM  
Blogger dolly said...

و الله تستاهل كل اللى يجرا لك

8:03 AM  
Anonymous Sam said...

asl el gawaz ba2a safka ya bashmohandes inshallah ! 7aga hebab

4:56 AM  
Anonymous BAD~~AWY said...

انا جاي متأخر ولا بس دي من المرات القليلة اللي هعلق فيها

لأ تقريباً دي اول مرة المهم يعني عاوز اقولك كلمتين انت دماغك عالية .............اوي مشيها اوي دلوقتي لو عندك قصص من دي ياريت تقول الاقيها فين لأن اسلوبك كوميدي............اوي مشيها اوي المرة دي كمان


كلمة للناسس اللي اتضايقت من الراجل ده الراجل ده ببساطة لسه مش حاطط فدماغه الهموم اللي انتوا حاسين بيها عشان كده الموضوع قالب معاه كوميديا

وصدقوني الاسلوب ده احسن لتجنب الاكتئاب والضغط والسكر بس بلاش حد يحاول يتقمص الاسلوب ده لأن اللي هيحاول يتقمصه من غير ما يكون حاسه هيجيله اكتئاب وضغط وسكر وهو بيحاول

قشطة بلوجز عربي......ام الأجنبي

4:05 PM  
Blogger lemo said...

حلوة جداااااااااااااااااااااااا
وفعلا افتكرت شريط الذكريات وقف عندالطبق ابو 85 جنية

7:40 PM  
Anonymous eng.soma said...

awalan ana m3rfsh el story de mktoba mn emta l2ny lsa moktshfa el blog da mn kam yom y3ni
ma 3lena , el mohem
ana bsra7a mot3tfa m3ak ya wael gedan qstk fkrtny bqst wa7ed o5ty fl kolya
7ab w7da brdo fl kolya w 7b yt2dmlha
el wld msA m3ah 3rbya kwysa w sh2a f mshro3 eskan bta3 nqabt el mohndsen da msh fkra fen i think eno fl 3asher , w bysht3'l f mentor graphics sherka tb3an lw 7d sm3 3nha y3rf hya mortbha ad eh
ra7 lmamtha 2altlo ok ana mwf2a bs bshrt
tbe3 sh2tk (elly hya blmonsba 100 m aw 100 w 7aga) w tegy tshtry sh2a hna fl mohndsen 3shan tb2a bnty gnby
tyb leh ya sety kda ma 7drtk m3aky 3rbya w hya aked babaha aslan hygeblha 3rbya hdyt gwazha w 7ta lw mgabsh hya m3aha 3rbety tb2a tro7lk
2altlo l2 mynf3sh
w tgeblha shbka b msh 3rfa ad eh
w el mo25r b2d eh , w ya kda ya l2
2alha tb3an l2 , w fakas llmwdo3 kolo
rbna ykon f 3onkom bgd fe 7bt omhat w abhat rbna yhdehom
w mt32dsh nfsk 5lek bs el mra el gaya 7res f e5tyark llnas de

8:14 PM  
Anonymous Ganna said...

ياجماعه حرام عليكووووووووووو

انا ابويا كده

بس انا مش كده و مش ذنبي
وابويا فرق بيني و بين الى بحبو بسبب اسلوبو دة

محدش يتكلم على البنت مش كويس لانكو متعرفوش موقفها
ولا هي لازم تروح تتجوزو من ورا ابوها عشان تعجبكو ؟

10:47 AM  
Anonymous Anonymous said...

من التعليقات لاحظت ان الولاد في صف الولد وانه اتظلم _ والبنات في صف البنت وانها اتظلمت _ والناظر لماكتب بتروي يري ان كاتب الموضوع _ مع كامل أسفي _ غير مسئول عن افعاله, وان والد البنت طبيعي يعقدله الدنيا عشان يكرشه

2:50 AM  
Blogger أبو السلطان said...

كل قصة وانت طيب
وكل نضيفة وانت بخير
متقلقش بكرة الأروسة هتيجي تخطبك انت
انت بتفكر اللى عنده عربية سيات يبقة شوية فى البلد دى
بس نصيحتى ليك سوق على مهلك سوق
وسيبك
ربك هيعدلها
وارزاق ومقسمها الخلاق

1:13 AM  

Post a Comment

<< Home