الكعب للقفا..بالحب و الوفا

بناءا على طلب الجماهير..اللي اكتئبوا و اتعقدوا و قربوا يولعوا في نفسهم و في بيت العرايس و العرسان من كتر القصص الغير موفقه و الشخصيات المريضة اللي بتظهر في كل القصص..أخيرا لقيتلكم قصه من القصص المتفاءله المشرقة كانت مبعوتالي من فترة و سهيت عنها في وسط قصص النكد اللي باموت فيها..و رغم اني باتشائم من التجارب الناجحة دي..بس برضه مايهونش عليا حد يولع في روحة بسببي.. و عشان كده

آدي القصة المتفائلة الناجحة

الكعب للقفا..بالحب و الوفا

الإرتباط ده موضوع يشبه البحث عن إبرة فى كومة قش
المهم الإبر مش موضوعنا دلوقتى أنا كنت بفكر فى نظام كونى مختلف يتماشى مع العصر الحالى. يعنى زمان مكانش فيه البشر دى كلها. المسألة كانت سهلة، آدم لحوا و حوا لآدم إنما دلوقتى فيه 3 بليون آدم و 3 بليون حوا ، الموضوع إتعقد شوية و مكنش حد عامل حسابه و أكيد محتاج حل من فوق أكبر منى و منك عشان كده فكرت فى طريقة تانية للموضوع ده، أحكيلكوا الحكاية الأول؟

- بابا عايز أتجوز

ورينى قفاك يابنى -

إتفضل يا بابا -

بصوت عالى

هاتى نضارة القراية يا فوزية

تجرى فوزية مهرولة و تحضر النضارة و هى تتمتم،

يا ألف نهار أبيض، و ترقع زغروتة مدوية

يقرأ الوالد بصعوبة من على قفا إبنه
- إسمها نادية عبد السلام و نمرتها أهى
- ميرسى يا بابا إستنى أديها رنة
- رنة إيه يا واد إبقى حب فيها براحتك بعدين كلمها خد عنوان البيت

يتصل الشاب بالنمرة

- ألو أيوه أنا تامر يا نادية
- تامر مين؟
- عريسك،إسمك مكتوب عندى
- صحيح يا تامر؟ إنت باباك عايش؟
- آه ليه؟
- طب و حياة والدك إبعتلى صورة قفاك
- قفايا؟ طب مش تشوفى وشى الأول؟
- يوه طب خد عندك العنوان أهه

يدق تامر بقوة على باب العروسة واقفاً متأنتكاً مع أهله، يفتح الباب رجلاً ضخماً و يقول
- أهلاً يا مرحب، إنت تامر يابنى؟
- أيوه يا أنكل عبد السلام - مشيراً بإصبعه إلى نقطة وراء رأسه - أنا العريس
- من وراء الباب - صوت أم العروس

- شرفتوا و أنستوا إتفضلوا
يدخل تامر و العائلة يتعارفون مع أهل العروس التى تخرج عليهم فى أبهى صورة.

يمد تامر يده ليسلم على عروسته نصيبه ، تسلم عليه سريعاً و تقول له:
- لف يا تامر
- نعم؟
- يوه لف خلينى أخلص
تخرج نادية تليفونها المزود بكاميرا و فلاش و تقوم بتصوير قفا تامر ثم تسارع بإرسال صورة القفا إلى كل صديقاتها إس إم إس موضحة إسمها و نمرتها على القفا
تتململ الست فوزية فى كرسيها فتقول الست أم نادية:
- دحنا زارنا النبى
فتقول الست فوزية
- يا نادية يا بنتى حد يلبس شراب برضه فى المناسبة دى؟ مش دى الأصول أبداً

تجلس نادية و تقوم بخلع الحذاء الرياضى و الشراب كاشفين عن قدمها اليسرى و تجلس الست فوزية على الأرض أمام نادية و تقترب من كعبها بعيونها و تقرأ بصوت مخنوق:
- تامر أبو العزايم

يقول والد العريس المثل الشهير: الكعب للقفا

و يكمل والد العروس: بالحب و الوفا
ترتسم إبتسامة خجول على وجه نادية و تنطلق الزغاريد من بيت العروس معلنة إكتشاف العريس

.
سهلة مش كده؟ مفيش أسهل من إن كل واحد يتولد و مكتوب على قفاه و لا كعبه إسم شريك مستقبله و نمرته، حاجة من عند ربنا كده - مش الناس بتقول نصيب؟ خلاص يبقى مفيش حاجة تمنع إنه يبقى معروف من الأول هتوفر وقت و مشاكل و كهربا و فلوس و وجع قلب

.
الكعب للقفا بالحب و الوفا.


ميشو

http://mishotopia.blogspot.com