بيت العرايس و العرسان

اللي يحبنا ما يضربش نار عندنا

Wednesday, June 27, 2007

ماتقولش أمين شرطة..والا دبلوماسي


انا مش شاطره في الكتابه لكني قررت احكيلكوا و
الا هطق,انا مهرة و ظروفي و سني مشابهين لبرايد جدا مع فارق بسيط و هو اني شفت حوالي 30 عريس وان كانوا ما يتخيروش عن عرسان برايد,و ده أدي الي اني هيست تماما
المهم من حوالي سنه و انا في معمعه الاستعداد للامتحانات,امتحانات الماجستير طبعا لحسن حد يتجن في عقله و يفتكرني لسه صغيره,ماما جت و قالتلي
جايللك عريس
تاني-

تاني ايه,انت متلخبطه في العدد والا ايه-
ههه-
المره دي دبلوماسي و مش هتقدري ترفضي-
و ده يتقدملي ليه اقصد يعرفني منين-
طنط فلانه تعرف مامته, بس؟ بس؟ بس؟-
بس ايه؟-
عايزين يشوفوا صورتك الاول-
ايه,دي اهانه ,انا لا اقبل,استحاله-

براحتك-
استني بس,الدنيا مش قفش كده-
امري لله لو ما كنتيش تلحي
,بدايه سيئه لاني فعلا مش فوتوجنيك,يلا برضه لو رفض تبقي في بيتها يعني ماحدش يعرف غير انا و
ماما وبابا و طنط و ما.. و و و و,يعني حوالي 20 نفر بس
الغريبه ان بعد اسبوع ماماجت منشكحه قوي و بتقولي انه عايز يقابلني,يظهر ان نظره ضعيف,
ها يجيلليك الشغل؟-

اوعي يهوب هناك,احنا ناقصين وقف حال,احنا نتقابل في ارض-
محايده ولا يستني احسن لما اخلص امتحانات عشان اروق له

ما انتي بترفضي كل العرسان, يعني نقول للراجل استني شهر و نصف و بعدين تقولي لا
معاك حق,الي الارض المحايده-
يا ريت نفتكر الحوار الاخير ده لانه مهم جدا
و قد كان ,


ويا مهرة نعرفك على ماهر ههههههه
و هاتك يا ضحك من كل الستات اللي قاعده ,بس يا حلاوه يا ولاد تقولش امين شرطه اسم الله و لا دبلوماسي,علي رأي السندريلا الله يرحمها,صحيح هو ابعد ما يكون عن حسين فهمي بس هو مقبول جدا و لابس بدله,نخش في الجد بقه,برضه شكله ذكي و عاقل و مبتسم,بس حاجه داخليه كده قالتلي انه مش ناوي و قبل ما نعبر حدود الارض
المحايده كنت قلتلهم كده و انا بضحك


لا طبعا,الولد شكله مبسوط و مبتسم,انتي لسه صغيره,علي- كل حال انتي بتضحكي علي ايه,اشششششششششش
هشيت بما اني صغيره و دي مجامله ما مبتحصلش كتير دلوقت,سبحان الله ما عداش سواد الليل و كانوا متصلين يقولوا انهم موافقين و مبسوطين,يظهر اني فعلا ما بفهمش ,و عايزيين يتقابلوا تاني,صوتت بالبلدي زي بنت سلطح بابا
و الامتحانات-
امتحانات ايه؟-
ناقص اسبوع يا ماما-
....
يوووووه,دا الاسبوع فيه 7 ايام ,في 24 ساعه في 60-


هاقابله,ماما ممكن تستمر لغايه الفمتو ثانيه,لو اظهرت اي مقاومه,و بالفعل في عز نقحه الشمس نزلنا و انا لابسه البلوفر الهاي كول و الكعب 7 سم لزوم حفله الكوكتيل اللي احنا رايحينها و اذ فجأه شخص ما اقترح ان انا و هو نتمشي في الغالب امه,يا دي المصيبه و ال7 سم ,قمت ولا حول و لا قوه الا بالله ,بس التضحيه الكبيره دي جت بفايده و اتفكت عقده لسانه وهاتك يا كلام اشي سياسه خارجيه علي حزب العمل الاسرائيلي علي ابن جني, اي و الله, جني اما
يعفرت كيانك يا بعيد, بس سيبكوا من الهزار انا اتكيفت من الكلمتين دول ما نا قلتلكوا اني مهيسه قديمه و احب الحاجات دي زي عينيه,بس الحر يا اعزائي,بقيت عامله زي الفراخ المسلوقه و بعد ما كان قلبي بس بينزف بقت رجلي كمان ,لحد هنا و استوب لازم اقعد,تقريبا ما عجبوش اللي حصل و سكت ,يظهر برمجه الكلام عنده علي الواقف بس,المهم رجعت البيت و انا لسه مقتنعه برأيي,بس كلهم وقفوا ضدي و قالولي انه كان مبتسم



عدي اسبوع كمان و بدأت امتحانات و هما و لا حس و لا خبر حتي ماما بدأ يتزعزع ايمانها العتيد و ما خبيش عليكوا انا كمان قلقت,صحيح هم ما قالوش غير انهم موافقين بس الساعه البيلوجيه بتاعتي ما كنتش مطمنه,كمان ما يصحش ما يسألوش عليا و انا بامتحن,المهم اتصلوا و عايزيين يتقابلوا,شوف الظلم يا جدع طلعوا ماكانوش عايزين يعطلوني,


ماما ماعجبهاش الكلام ده كله الا الكرامه و مسكت طنط فلانه
ولو هو مش عايز,خلاص كل منمنا يروح لحاله
و طنط يا عيني صعبت عليا قدام الهجوم الكاسح و اعترفت والله العظيم هو مبسوط و موافق,نزل عليا الكلام ده بردا و سلاما و اقعدت احلم بقه بلا مذاكره بلا
هم,الست مالهاش الا بيتها برضه


و اتقابلنا لثالث مره,المره دي عملت احتيطاتي و لبست جينز و زحافي لزوم المارثون و بالفعل 3 ساعات من المشي المتواصل لما رجلي بقيت زي رجلين اطفال الشوارع,اه نسيت اقولكوا حاجه مهمه,امه اقصد والدته اخدت ماما و قعدتها علي دكه في الشارع اللي في النادي , و بعد ما رجعينا من اللف عزمتها علي مياه معدنيه و الله العظيم و ده اللي اكد عند ماما شكها بانهم بخلاء بس دي كلها سفاسف زي مانتو عارفين و لا يمكن توقف موضوع عرفوا ينتزعوا مني موافقه عليه,احكيلكوا بقه علي المارثون طبق الاصل العل.. المره الفاتت بس الحقيقه المره دي كان مبسوط فعلا و قعد يتكلم عن نفسه و عن السياسه الخارجيه برضه و تعرفي فوكوياما؟ ههه وقعيت في حيص بيص,و ده ايه دا كمان؟ اكله صيني و لا ماركه موبايل؟المهم هاقولوكوا واكتبوها يمكن تنفعكوا,ده الراجل بتاع صراع الحضارات و حضاره الصراعات,ما علينا الموضوع كان فيه اسامي كتيره بس بلاش نجيب في سيره الناس ,اهم حاجه اني المره دي لبست السلطانيه فعلا




حسيت انه خلاص ماهر لمهرة
و حصوة
في عين اللي ما يصلي علي النبي ,ده حتي ماكنش عايز يمشي و ثبتت الرؤيه و ما حكيلكوش عن الايام و الاحلام

تسألوني يا جلال,جلال مين,ايه يا مهرة اللي حصل؟ما حصلش حاجه خالص,خالصصص؟مالللللللللللللللللللللللص
غطس ماقبش,هنا لازم حد يفرملني والا هاستمر في الكتابه للابد اييييييييه دنيا,و بعد شهر و نصف بالضبط من بدايه الموضوع المنيل ده,اتصلت طنط فلانه و قالت ان مافيش نصيب,يا سلااااااااااااااام و جاي علي نفسك ليه؟اقول ايه بس؟ فاكرين الحوار,حسبي الله و نعم الوكيل,بصقه موجهه لوشي بدون اي ذنب و ربنا يشمتتني فيك يا اخي شماتي في العريس رقم 13 ,اما تفسيري للحصل ان الاخ متأثر بالسياسه الامريكيه "الغابه غابتنا نبرطع براحتنا" عامه انا من يومها طلقت السياسه و ما رحتش انتخب كمان في انتخابات مجلس الشوري,هه!!!,و مركزه دلوقت في العرسان من وزاره التأمين و المعاشات بعد فشلي مع وزارات الصحه والداخليه والخارجيه و برضه الدهن في العتاقي
توقيع :أختك مــهرة
قصتها و بأسلوبها

34 Comments:

Blogger sunset said...

السلام عليكم
معلش يا مهره اكيد ربنا شايلك اللى احسن منه وربنا يكرم البنات جميعا
انا بتغاظ جدااااا من رفض الشباب اللى من غير سبب بجد هما بيقولوا لا دى وحش ودى مش عجبانى ويفضلوا يتفرجوا على بنات الناس وميعرفوش ان البنات دى بتنجرح وبتفقد ثقتها فى نفسها
بس عايزاكى تركزى فى دراستك وان شاء الله ربنا يكرمك بالزوج اللى تتمنيه وابعدى عن السياسه

2:28 PM  
Blogger الدرويش المرووش said...

أكيد موضوع فوكوياما ده أثر فى نفسيته يا كبدى
عينى علينا سألنا على مصطفى النحاس و قالولنا ده شارع فى مدينة نصر
و برضه إتجوزنا

على فكره أنا أسف أقولك إن ماهر ده سمعت إنه للأسف خطب
جميلة الجميلات
كونداليزا رايس
و مقضيينها فوكوياما

7:33 PM  
Blogger Islamist Bloke said...

فوكوياما ده ياما خرب بيوت

انا كنت هاشيل مادة الحضارة فى الكلية بسبب فوكوياما

ده قوم الحروب على بعضها وخلى امريكا دخلت افغانستان و العراق

هو صاحب نظرية الزفت صراع الحضارات
clash between civilizations

أآآآآآآآآآآآآآآآآآآآآآآآآآآآآآآآخ لو اشوفه


وكمان يبوظ جوازة فتاة مصرية
!!!!!!!!!!


حراااااااااااااااااااااااااااااام

12:09 AM  
Anonymous ارحم دماغك! said...

إيه يا جدعان هتشككوني فنفسي لييييه؟!

فوكوياما صاحب نظرية صراع الحضارات؟
أومال صمويل هنجتون بيشتغل إيييييه؟!

ده دي النظرية اللي قامت عليها لعبة Age of Empires..
حد يلعب معايا يا جماعة؟

12:32 AM  
Blogger Spyfun said...

هو ايه اللي بتحكي فيه دا
انا اسف لا تستحق النشر في بيت العرايس و العرسان

2:23 AM  
Blogger e7na said...

اسلوبك جميل جدا
بس لازم تعرفى ان الجوازه فشلت لكن اهم حاجه الحضارات تنجح فى الحوار وبلاش صراعات
يوكاهاما
احسنت باليابانى

9:36 AM  
Anonymous مهره said...

شكرا يا جماعه لكل اللي جه و قرا البوست

sunset
ما تقلقيش عليا.الامتحانات دي هي الوحيده اللي جبت فيها امتياز و طلعت من الاوائل كمان.يظهر انا باقول مع النكد بس يا رب انا مش عايزه امتياز عايزه اخلص لو مع مقبول

الدرويش المرووش
صحيح اخد كوندي.يبقي كده دعواتي جابت نتيجه


Islamist Bloke
ياللا ندعي مع بعض يخرب بيتك يا فوكو يا بن ام فوكو


ارحم دماغك
يا عم انا ماقلتش انه صاحب النظريه بس هي مش طالبه محاضرات للعالم الغلابه اللى بتقرا.كفايه انا بس تعرف انا طول عمري باكره اللعبه دي.صحيح قلب المؤمن دليله


Spyfun
الاخ خارجيه؟


e7na
نحي نحي نيه :شكرا بالياباني
بزمتكم في كده.عروسه تجيد 3 لغات2 حيه و واحده ميته.مالوش في الطيب

4:20 AM  
Blogger Ibn Barhoma said...

Yours is a nice writing style ya Mohra. I've been through a very similar situation, but believe me, I later on discovererd that was a real gift from Allah. You should really thank god for his mercy and wisdom. You'll get someone better isa.

9:26 AM  
Blogger The Groom said...


أحسن برضه يا مهرة شكله كان حصان سيسي أي كلام

:)

ربنا يوفقك للخير يا رب

تحياتي لك من ماناساس البلد

9:42 PM  
Blogger emos said...

el regala mato fel 7arb zay ma7ad hena 2ally bs mesh 3arfa meen

5:13 AM  
Blogger littel angel (2alb el 2ased) said...

2na ba2ool 2n el toktok el kan merakbo fe reglo hwa el sabeb fe bwaz el gwaza...ya shee7'a 2a7medy rbona...da kan 7y3'lbek fe kol 7'rooga mashy lma ygeelek berybery :kosa7 bel yabany :)

10:10 AM  
Blogger Noony said...

هو اية اللي جرا للراجالة؟
طيب احمدي ربنا انهم نطقوا وقالوا فعلاً ان مفيش نصيب
أنا بيحصل معايا انهم بيغطسوا مش بيقبوا خالص
بجد أنا متجننة من الموضوع دة
أكتر من واحد ورا بعض..لدرجة إني باتكلم مع واحدة صاحبتي قالتلي ان الموضوع دة حصل معاها أكتر من مرة ومع بنات صحباتنا كتير

هم الراجالة جرالهم اية؟
اية قلة الذوق المتناهية دي؟
يعني اداكي أمل وبعدن شهر ونص افتكر ان في حاجة اسمها كل شيء قسمة ونصيب؟
حسبنا الله نعم الوكيل
ربنا يصبرك يا بنتي
ويعوض صبرك خير
ويرزقك بالزوج الصالح اللي ترضيه دنيا وآخرة إن شاء الله

:)
أختك الل ولعت في نفسها خلاص
نوني

1:47 PM  
Anonymous مهرة said...

Ibn Barhoma
i totaly agree,i thank god on all, good or bad,i just wrote this story a kind of psychothearpy,thanks

The Groom
ماشي كلامك يا "فارس" الاحلام وتحياتي لماناساس البلد

emos

بقاللى 5 سنين بقول الرجاله ماتت في 73 و ماحدش مصدقني.اكيد اتقابلنا قبل كده

littel angel (2alb el 2ased)
toktok LOL ,that was hilarious,i didnt thought about beri beri b4,quite possible u know

Noony
موضوع الغطس ده زاد عن حده فعلا بس اوعي تولعى فى نفسك .الغطسات ديه محتاجه برود سيبيرى انما ايه اسألينى انا عليه

1:00 PM  
Blogger ROMANTIC ROSE said...

هنقول ايه أكتر من اللي قالته الست "ماجدة زكي" ف تتر المسلسل ؟؟ قسمة و نصيب و النبي يا بنات .. مكتوب علي جبين الستات .. قدر البنات ويا نصيبهم مرهون بكلمة من أبو شنبات !!!!
معوض مُخلف يا بنتي .. بس بقترح تعملي ثنائي مع برايد .. هيبقوا اختراااااااااااع !!

4:06 PM  
Anonymous An Angry one said...

هو التطويل و المطوحة شيء سيء جدا فعلا .. بس من حق الشاب انه يرفض , زيه زي ما أي بنت من حقها انها ترفض
انا شخصيا اتعرضت للموقف أكتر من مرة وما سمعتش سبب عليه القيمة في أي مرة منهم

8:09 AM  
Blogger shahy said...

عزيزتي مهرة
ولا يهمك وزي ماقلتي حسبي اللة ونعم الوكيل

وفي الاخر هايطلع جاسوس ولا دبلوماسي ولا حاجة

ادينا اتجوزنا وبعد عشر سنين بيتريق عليا وبيقول اني معرفش مصطفى النحاس

ماشي ماشي

11:35 AM  
Anonymous مهرة said...

ROMANTIC ROSE
اول مره اسمع التتر ده بس جااااامد بس ايه الثنائي ده قصدك اجوزها؟؟انا موافقه بس هى تحن

An Angry one said
بص يا سيدى صحيح هو من حقه يرفض بس من حق البضاعه اللي عمال يقلب فيها توافق علي عمليه المعاينه ما هو مش عشان مهره ابقه من ذوات الاربع و ماتزعلش نفسك من موضوع الاسباب ده لانه في الاخر بيعبر عن شخصيه اللى قدامك مش ضروى حاجه فيك

shahy
اهلا ببقيه العيله الكريمه...بس طلع جاسوس؟ يعني هيرموه من بلكونه فى لندن؟اما عن موضوع مصطفى النحاس فا ده مواضيع عوائليه ما ليش فيها بس انا من موقعي هذا اطالب بان الاسئله تبقى فى مستوي العروسه المتوسطه

4:21 AM  
Blogger Spyfun said...

لا انا مش خارجيه
بس انا قصدي ان الموضوع عادي ممكن يحصل مع اي حد
اسلوبك جميل جدا بس القصه مش تستاهل النشر (رائي شخصي مش اكتر)
ماهو مش كل واحده يجيلها عريس و مايحصلش نصيب تعمله قصه
سلامي ليكي و تحياتي علي اسلوبك الرائع

10:18 AM  
Anonymous مهره said...

Spyfun
لا ده انت مستنصدني بقه طب ما كل
البشر اللي كاتبه قبل كده ناس جالها عرسان و رفضوها او العكس يعني ما شفتش قصه واحده حصل فيها نصيب عامه انا بتكلم عن اسلوب العريس و مسأله مراعاه ظروف الاخرين و مشاعرهم و كفايه عليك كده لاني مش عايزه اتكلم جد و ميرسي علي المجامله يا سيدي

6:48 AM  
Anonymous Anfal said...

مهرة
انت لذيذة جدا بالرغم من اني حسيت بيكي في اخر الكلام
انا عارفة ان بعض التجارب بتبقى مؤلمة جدا بس سيبك انتي زي العسل يا بنتي و الله :)

3:57 PM  
Anonymous مهرة said...

شكرا جدا يا انفال .انا ماكنتش فاكره ان لسه في حد بيقرا البوست و شفت ردك بالصدفه .. اتمني ماكونش اتأخرت عليكي.انا كمان قريت موضوعك
فضفضات امرأةغاضبه و حسيته اوى..ربنا معانا يا بنتى

1:04 PM  
Anonymous Anonymous said...

ماهو اصل الرجالة مابتحسش بمدي الحزن والقهرة من هذه المواقف طبعا

4:42 AM  
Blogger $$Dado$$ said...

انا قرات البوست بتاعك متاخر والله
بس على اد ما انا مبسوطه ان البلوجات دى فجرة موهبة الكتابة عند ناس كتير(اسلوبك جميل بجد ) على اد ما انا زعلانه اوى من موضوع الشباب اللي يعاين العروسة اد شهر و اتنين و الله اكتر كمان و بعد كده يكتشف ان مفيش بينهم كيمياء و فيزياء.وساعات كمان يتفقو على الشقة و الشبكة و بعد كده يفلت....... ده بجد حصل كتتتتير جدا جدا ربنا يهدى الجميع

6:45 AM  
Blogger Miss. Sosa said...

مكانك عندي انضمي لجمعيتي وهتقبضي الاول وبعدين يا ست مهرة ..أكيد لسة خيّالك لسة مجاش
اسلوبك رائع ومش ممكن حد يبدأ البوست الا ولازم ينهيه أسلوب رائع ودمه خفيف

5:19 PM  
Blogger mohra said...

$$Dado$$ & Miss. Sosa
شكرا يا جماعه جدا جدا جدا
انا عملت مدونه لسه طازه يا ريت تزوروها و تقولولى رأيكوا..هابقى احكى عن باقى العرسان برضه
http://el-harafeesh.blogspot.com/

5:35 AM  
Blogger Dr Ahmed said...

انا ببساطة اقدر افسر موقفة العريس اللى انت بتلمحى ليه-اقصد الموقف- انه ببساطة نفسه فى انسانة مثقفة وانت واخده الوضوع هزار وخلاص
انا عندى نفس المشكلة بدور على انسانة مثقفة بس للاسف كل البنات اللى انا شفتهم دماغهم فاضية الا من كلمتين من فيلم او اغنية او من ماما
حاجة تخنق انا عاوز انسانة ممكن اتناقش معاها فى مشاكلى و نبنى حياتنا مع بعض مش كل همها اى واحد المهم هيصرف عليها وخلاص وتخلص من الكابوس الاجتماعى وشبح العنوسة الى بيهددها

6:19 AM  
Anonymous Anonymous said...

بصراحه ما دفعنى للتعليق هو رد د\ احمد لانه مستفز جدا ان البنت بتحكى المشكله بتاعها و ليس معنى معرفتها لموضوع فوكوياما انها مثقفه
الثقافه ليست ان نردد كلام كالببغان فنحن لن ندخل اختبارات من سيربح المليون اقصد العريس فانا مثقفه جدا و لم اسمع بفوكوياما الا منها المشكله الاخرى انى صرت اكره جميع الرجال العرب بصفه عامه فالرجل يختار على اساس موصفاته هو دون ان يسأل نفسه هل انا جدير فعلا بان اختار انسانه بهذه المواصفات فانا مثلا حينما ياتى لى عريس يصر اصرار تام ان يرانى اولا فى العمل و لا يوافق حتى على النادى لأ لازم العمل مهما احرجنى هذا الامر لماذا العمل ؟ طبعا علشان يفرز البضاعه اوكى ماشى ياسيدى و انا على فكره مؤمنه باهمية القبول الشكلى ولكن قبل ما ييجى تجد اهله يسألون وبدون اى حرج هل هى بيضاءام سمراء و طويله ام قصيره و جميله معلش اصل الولد عنده شروط و لما يأتى سبع البرمبه افأجى بأنسان ماذا اقول مظهره بعيد كل البعد عن الشروطه حتى اللبس مبهدل بس ايه يعنى ده راااااجللللللللل ولما تقويلى معلش مفيش نصيب تبقى سطحيه و هايفه وهو اما يشوفك وما تعجبهوش يبقى معلش اصله راجل بالذمه ده كلام والله اعرف واحد اسمر جدا و يريد الزواج بواحده شعرها اصفر و عينيها خضراء وكل نساء العيله بل والجيران يبحثون له بحماسه عن طلبه و كانها اوامر من السلطان بلا اى احساس بالحرج من المطلب اما عن الجوهر و العقليه فحدث و لا حرج عن عقلية الشباب المصرى الهمام فهم ينقسموا الى قسمين جماعة الهايفين و التافهين و جماعة المنغلقين فلا انسجام فكرى و لا توافق ولا حتى طموحات مشتركه والعجيب ان البنت المحترمه التى ترفض التعارف خارج نطاق الاسره هى الضحيه الاولى لافشل نظام على وجه الارض وهو نظام زواج الصالونات وهو زواج اخترع لمصلحة طرف واحد فقط وهو الراجل ذلك المخلوق العجيب الذى يملى شروطه لكى يتنازل و يتقدم لك فاذا انطبقت عليكى الشروط الميمونه فلا تتكلمى من فضلك وافقى هو فى حد طايل ؟ حتى لو كنت احسن منه مليون الف مررره كفايه انه راجل بالذمه فيه ظلم اكثر من كده بس مين يحس و يشعر مين ؟؟؟؟

4:23 AM  
Blogger mohra said...

انا ماكنتش اتخيل ان لسه فى تعليقات و الحقيقه فوجئت بالخناقه اللى فى الاخر ديه

Dr Ahmed
بسرعه كده حللتنى و محصتنى و طلعتنى مش مثقفه و بهرج و عايزه واحد يصرف عليا
كتر خيرك يا سيدى
انا مش هاحاول اغير رأيك او ادافع لانى مش متهمه من الاساس بس كلمه واحده انا لو كنت عايزه اتجوز و السلام كان
زمانى متجوزه و انت لسه عندك عشر سنين
عامه انت مافهمتش قصدى حتى لو انا جاهله زى ما بتقول فده لا يلغى حقى فى ان يحترمنى الاخرين
اما عن الهزار فعمر ما كان حل المشاكل بالندب او الخطب ..على كل علاقتى بالاخ كانت ضعيفه مش محتاجه تهويل
فى النهايه اتمنى لك التوفيق و تلاقى المثقفه اللى تعرف فوكوياما و غيره بس على الله تعاملها زى ما هى تستحق
و انت لسه صغير ولسه هاتشوف كتير...ما تزهقش بسرعه كده

Anonymous
الله يكرمك..والله اسعدتينى..احب اعرفك اكتر... يا ريت تزورى المدونه بتاعتى هتنوريها

1:01 PM  
Anonymous Anonymous said...

ميرسى خالص على شكرك ليا ولا شكر على واجب لان الانسان اذا كان لا يستطيع ان يغير افكار المجتمع ككل فلا اقل من ان يحاول الدفاع عن المظلومين و بما انى لست من الخبيرات فى النت و دخلت الموقع ده بالصدفه اصلا و انتى طلبتى ان تعرفينى وهذا يشرفنى فانا صيدلانيه احضر الماجستير فى الميكروبيولوجيا الصيدليه وعندى ثمانيه و عشرون سنه و بصراحه مر على عرسان من جميع الاشكال و كتبت اليك التعليق وانا فى حالة اختناق شديده من اسلوب المجتمع ككل ولكن ياد. مهره ياعسوله انا و الحمد لله لا افقد الامل فى روح الله و اؤمن بمبدأ الوفره بمعنى انه هناك دائما فتى الاحلام لكل فتاه و هو موجود فى الواقع و لكنه فقط ينتظر الوقت المناسب اى انها مسألة وقت ليس الا و بصراحه انا مفوضه امري كله لله و حسنة الظن به جدا و احب دعائى له و الحاحى فى الدعاء اليه و اسفه للاطاله هذه الرساله لك انتى و ليست للتعليق و اخيرا لا تيأسي لان فى الغد متسع لكل شئ باذن الله و شكرا
R.M.M.G

2:59 PM  
Blogger mohra said...

R.M.M.G
نتشابه فى كثير من الظروف و فى وجهات النظر ايضا
انا من انصار التفأول دائمارغم العجائب التى اراها كل يوم و لن اقنط من روح الله ابدا
سعيده بمعرفتك و باهتمامك

6:03 PM  
Blogger ملكة بحجابى said...

عارفة يا مهرتى
ههههههههههه
كنتى بصى فى عينيه واسرحى كدة
وقوليله
شيكى ميكى ريكى ديكى فيكى بحبك بالأفريقى
كان هيحس ان عندك لغات وده يؤهلك لرفع معنويات الشعب الصينى
ياعبيطة ماتزعليش اصلا
ده العرسان اتجننت
ههههههههههههههه
الله يخربيت الحوجة
هههههههههههههه
والله ربنا بيحبــك اسكتى يا خايبة

4:03 AM  
Blogger اهلاوى صعيدى said...

السلام عليكم انا هنا يا اخونا جديد يعنى لازم ترحبو بيا ههههه نخش فى الموضوع واحب اولا احيى الاخت مهرة وكل الاخو والاخوات فى المدون وفى اعتقادى واراى الشخصى المتواضع انه الرجالة بيعملو كدة عشان يتقو احسن البنات لاانهم بيبقو حطين لنفسهم شروط لبنت الحلال زى مثلا انها تكون جميلة وغنية ومتدين وبنت ناس فلما يروحو لوحدة ومايلاقوش فيعا شرط من الشروط يخلعو ويدور على غيرها ودة على فكرة بسمع عنة من ناس عندينا فى الصعيد
وتقبلو مرورى

7:04 AM  
Blogger اهلاوى صعيدى said...

اعتقد يا اخت مهرة انه العريس دة كان بيلعب

7:08 AM  
Blogger mohra said...

ملكة بحجابى
و الله معاكى حق
بلا هم



اهلاوى صعيدى
احتمال مش بطال برضه
بس انا عندى قصه عن واحد صعيدى انما ايه... بس ابقى تعال اقراها عندى فى المدونه


سلام

2:24 PM  

Post a Comment

<< Home