سمك شيكولاته بطاطس...أحمدك يا رب
هاي يا برايد ..إزيك
أنا كنت بعتلك ايميل قبل كده و كنت بادخل على المدونة كتير و باعلق و من يجي شهرين كده ربنا سهلهالي و اتكعبلت في عريس كويس ..قلت يا بت مابدهاش اطلعي من الطابور و ادي فرصة لغيرك
فعشان خاطر كل بنات مصر اللي انا واقفة في سكتهم ..و عشان خاطري برضه ..قمت اتخطبت
و بما انك واخده علينا عهد في المدونة ان اللي تتخطب ماتقولش عشان خاطر الضغط و النقطة و شلل الأطفال و كده ..قلت يا بت بلاش تنكدي على برايد و تقوليلها و هي لما تلاقي الطابور فضي قدامها هتفهم لوحدها
شوفي يا ستي
قبل الخطوبة بكام يوم رحنا نحجز الورد من عند الراجل
قلت اما اخده معايا..مانا طول عمري نفسي يبقالي راجل كده أمشي معاه و اتباهى قدام الناس ..و كل اما حد يجي يكلمني أشاور عليه و أقول اتكلم مع الأستاذ بتاعي ..أصلوا مابيحبنيش أكلم شوباب خااالص
و فضلت ماشية معاه و فاضلي تكة و اوقف الناس اللي في الشارع عشان أقولهم..حبيييبي اهه ..ترارم ترارم..خطيييبي أهه..تررارم تررارم..الليه يمسيكي بالخير يا شادية
وصلنا للراجل بتاع الورد و انا في نفس حالة الإفتخار و الإعتزاز دي..الراجل وراني الورد و عجبني خدته مسكته في ايدي..و أستنى أستنى أستنى..الراجل برضه شكله قلق..أبص على الأستاذ بتاعي..ألاقيه سرحان..طب اعمل ايه؟؟ أفوقه ..أعمل اني بوريلوا الورد و ادلق عليه شوية ماية و الا ايه...قلت يا واد طنش خاااالص..عديها بأه جايز فعلا مش واخد باله ..قلت يا بت جايز مش واخد باله بجد ..رحت مطلعه الفلوس و حاسبت الراجل..بسيطة يعني..
و عملنا الخطوبة ..ماعزمتكيش عشان بحبك ..مانا عارفة النظام بأه..بعد الخطوبة بشوية كده قاللي تعالي أما اعزمك على الغدا...قلت يادي الهنا يادي المنا..ابتسم كده و بقه بأه 2متر و هو بيسألني..تحبي تتغدي فين..؟؟؟
قلتله على محل سمك مشهور عندنا مانا اسكندرانية بأه..لقيت ابتسامته بقت سالب خمسه و ارتبك و بلم..قلتله مالك في حاجة ..قاللي لأ بسيطة بسيطة
يوم العزومة فات عليا و انا ايه لابسه اللي ع الحبل و في العربية لقيته رايح سكه تانية خالص ..ايه فيه ايه ..فين السمك؟؟؟
قاللي لأ أبدا ..أصل بتاع السمك ده غالي شوية و احنا لازم نعمل حساب لمستقبل أولادنا ..أمال ايه؟..أنا هاوديكي حتة أفخم و أحلى بكتير...كوك دوور
كوك دوووور؟
وشي اتقلب و علامات الإذبهلال طلعت عليه ...بس كتمت في نفسي و قلت معلش يابت يمكن المرتب طلع جمعيات ..مانا بنت أصل ولازم أستحمل
قعدنا و طلبنا السندوتشات و قعدنا نتكلم و شدينا في الكلام شوية و مالحقناش ناكل السندوتشات ..المهم خدناهم دليفري ..الراجل لفهوملنا في كيسه و خرجنا بعد ماوصلنا لبيتي لقيته واخد السندوتشات في حضنه و فتح الكيس و طالعلي البطاطس و قاللي ..خدي دي أنا مش باحبها و نزلت من العربية وانا ماسكه علبة البطاطس و فاتحه بقي من الإذبهلال على آخره ..و هو خد السندويتشات في حضنه و مشي
شفتي الهنا اللي انا فيه؟
ده غير انه مرة جابلي كيسه كده و قاللي ماتوريهاش لحد
قلت يبقى قبض جمعية م الجمعيات و جابلي حتة دهب كده و الا حاجة
و الله و صبرك طلع على خير يابت
ماهي حاجة مش عايز حد يشوفها و لا حتى أمه ...أفتح الكيس يا برايد ألاقيلك كيلو شيكولاته
طب أحكيلك ايه تاني ..والا تكونيش زهقتي ؟؟
أكملك بعدين
عندي حكايات كتييير عن سي الأستاذ بتاعي
استني الباقي أجمل
أختك..روأه
posted by wanna b a bride | 2:21 PM
77 Comments:
أول تعليق هيه هيه
أوووبس
نسيت أعلق
لا حول ولا قوة الا بالله
معلش اختى ان شاء الله باذن الله يكون ربنا مدخر لك حاجة احسن بس سيبيه لانك مش هاتقدرى تستحملى بخله والله المستعان
ربنا يهدي
ابن الإيييييه
ماسابش الكاتشاب ؟؟
ده الاستاذ طلع جلده من اولها كده!
طب ومستنية ايه يعني؟
اللي اوله كده مش عاوزين نشوف اخرته ايه..!
احذرى البخيل
قولا واحدا
كله الا البخيل.....مش هتستحملى معاه.......هيطالبك تشتغلى و بعدين يقولك مصاريف دروس العيال الخصوصية عليكي.........ولو لقى معاكي فلوس زيادة هيقولك كسوة الشتاء ده عليكي.........وبعدين ان كان من اولها بخيل بالاكل يبقى ده ابشع انواع البخل ومش هتقدرى تكملي.....ونظام انه يعمل مش واخد باله فى المحل ده ....حركة بايخة جدا وربنا يعافينا ويسترها علينا كلنا.........احذرى وربنا ييسر لك الحال
والسلام
زهراء
كان لازم تصري ع موقفك يوم السمك وتفهميه انكم لو كلتوا سمك هتفتحوا السمكة هتلاقوا الخاتم
وبعدين الرجل اديك شيكولاتة وبطاطس يعني مش بيحب السمنة وقالك متروريشها لحد عشان هو بيحارب السمنة
وبعدين هو انتي شوفتي حاجة؟
الله يكون ف عونك يا عدالات يامرات خليل البخيل
يالهوي
عيب يا زهراء اللي انت بتقوليه ده على خطيبك
:(
كده الرجالة هيتأكدوا من صحة المقولة بأن المرأة لا تطلب شيء سوى زوج وعندما تحصل عليه ترغب في كل شيء ما عداه..يعني عايزة ثمن الورد وأكلة سمك وساندوتش وكمان حتة ذهب الطمع أخرته وحشة جدا لكن بصراحة أحلى من آخرة البخل
يا بختك يا ضنايا يا آخرة صبرك يا شابة
قبل ما تسيبه تأكدي من حكاية بخله أساليه أحسن يكون قفل ومش بيفهم في الزوق لكن مش بخيل
هههههههههههه
والله انا شايفه انك تسيبيه علي طول لانه بخيل جدا وكمان تلحقي نفسك قبل ميجيبلك فاتورة بكل مليم صرفه عليه
بصراحه يا زهراء ياختي يتقال عليا عانس احسن مايقع في ارابيزي واحد بخيل زي دا و تبقي نهايتي اخد فيه تأبيده في سجن القناطر عموماً لو قدرتي تستحملي بخله كملي المشوار مانتي عارفه الصنف شاحح من السوق و الموجود يسد و خلاص لكن لو مش هاتقدري تستحملي بخله احسنلك ترجعي تقفي في الطابور بكرمتك احنا مستنينك و مكانك موجود
رحمتك يارب
اية البلاوى اللى بتتحدف علينا دى.........بصى يااختشى انتى تعملى بنصيحة قطر الندى وتقفى فالطابور بكرامتك صحيح الشمس سيحت دماغنا بس احسن ماتتدبسى فالراجل الجلدة دة
ال كوك دور ال
اللة يخرب بيتو
لما تيجى تفكى حضرى كيس البطاطس و كيلو الشيكولاتة يحسن يطالبك بيهم !
اخلعيييييييييييييييييييييي بسرعة البخيل في الفلوس بخيل ف كل حاااجة و حطي تحت كل حاجة مليون خط احمر و فوشيا و فوحلوئي و علي راي المثل القعاد في الخزانة و لا جوازة الندامة
كر كر كر
فكرتيني بواحد من اللي جولي
ده حتي ما استناش لحد ما يجيب رجلي و نتخطب
كل اللي اتقدملي لما كنت اكلمهم علي الموبايل يروح مكنسل عليا و مكلمني ذوق بقي و رجوله, الا ده
اعمل تن مجرد تن صغيره يروح فاتح
و في يوم اخدني كافيه طلبنا طلبات و بعد ما خلصنا بشويه كده
عدا الجرسون بعصير كله الوان كده فبصيت عليه شكله حلو, راح قالي ايه عايزه قلت له لا شكله بس حلو راح قالي طيب
و قطم و مكررهاش
معلش يا بنتي
ياما دقت علي الراس طبول
tab ana mafhemtesh
enty lessa ma7'toba
2etdabest walla ehhhhhhhhhhhh
rabena yestorha 3alena ya7'ty
bs baseta baseta 2a7san men 5 7amawat rabena yesahelana game3an
ameeeeeeeeeeeeen
يعني مش مستوعبة معلش .. انتي لسه مخطوباله ولا فركشتي ؟؟
فى نكته على شخصيه زى دى
ممكن هو بس اللى يحضر فرحكم
توفير
يالهويييييييي
كله الا البخل
مقدرش استحمل بجد
لك الله
يااااااااه.... لأ إلا البخل
دى حاجه مش ممكن اى حد طبيعى يتعايش معاها
انا من رأيى تاخدى ديلك فى سنانك و تسيبيه انتى بكرامتك ..احسن تلاقيه هوه اللى سابك بحجة انك مبذره و طلباتك كتير هههههه
و ربنا يكرمك بواحد احسن منه ان شاء الله
اختك ريم
ياجماعه انا عايز كل اسامي البنات اللي بتكتب مدونات علشان مخطبش واحده فيهم و سيرتي تكون علي كل لسان
هو انا مش بخيل والله بس انتوا بدوروا علي عريس ولما يجي بطلعوا فيه القطط الفاطسه
بصى بقى يا قمر انا هقولك على مستقبل اللى هتتجوزه واكيد هتعرفوا انا عرفت منين! اولا يوم فرحك وانتى لسه قايمة من الكزشة وبتستعدى لسفر على حساب أهلك اه والله على حساب اهلك هيقولك عندنا ايه سانتدويتشات تاخدها معانا؟؟؟؟؟؟ولما تيجى تخلفى أول بيبى وآخر ان شاء الله هيجيب لك هدوم اولاد اخواته القدييييييييييييمة ويقولك البيبيهات ما يتجابلهاش حاجة جديدة لانهم بيكبروا بسرعة، ولما اللحمة تبقى بخمسين جنيه يقولك انا مشتريش لحمة الكيلو منها ب50 ده حتى حرام وكأنها هترجع تبقى بتلاتين...ودايما هيحسسك ان اللى بياكلوا دول ناس مفجوعة..خلايكى رشيقة كده على طول..طب ووولادك؟؟ عادى وماله ما ياما أطفال عايشة بأقل من كده
ونسيت أقولك ان عمره ما هيجيب لحد من ولاده حتى بونبونة لان غلط نضيع فلوسنا على الكلام الفاضى ده..واعملى حسابك ان جهازك وهدومك هيكونوا اول وآخر حاجة تشتريها بعد ما دخل حياااتك...والله والله دى حقايق وكفاية عليكوا كده..ومهما قلنا ما حدش بيصدق انكم فى نعمة والله..اجررررررررررررررررى يا بنتى بسرعة بدل ما تلاقى نفسك فى يوم بتكتبى كل اللى قرتيه دلوقتى
ربنا يكرمكم بالازواج الصالحين اللى يراعوا ربنا فيكم..وقد أعذر من بنجر
ya gama3a mofag3a ana fe3lan sebto ba3ed shahreen ta2riban ma esta7meltesh sara7a da kman ma 7'ofya kan a3zaam :))
al 7amd lelah
tamentena 3aleky ya she7'a
rabena yerzo2ek w 2a7san menno ya rab
lolololyyyyyyyyy
خمس انواع من الرجاله اخبطيهم بالحيط:
اللي بيشرب
اللي بيضرب
الشكاك
بتاع البنات
البخيل
هههههههههههههه
بطاطس؟؟؟
لا بجد عريس لوقطة .. الحقى اخلعى منه يابنتى
يالهوي
يا خرابي
مين الدبدوب دة؟
لية يعني؟
هو لسة سي الأستاذ بتاعك؟
حتى انتي عندك أساليب الإثارة والتشويق دي!؟
بس بصراحة أنا لو منك مشفش طلعته البهية دي تاني أبداً
سبحانك يا ربي
مستنيين
:)
نوني
خلاص ياجماعة خلعته والله :))
عارفه لو كونتى اديتله البطاطس عشان يتبرع بيهم للبواب حتى كان فسخ الخطوبه وحنط كيس البطاطس الناس دى انا عارفاها كويس وبيطلق عليهم فى الجروب التابع لسيادتى حبشتكانات وده لعدم التوضيح
سي الأستاذ
ربنا يهد افتراه ويهديه
قولي امين
والحمدلله انه نجاكي من الشرور
تحياتي لك من ماناساس البلد
عندى تاج تعالو جاوبو عليه - يلا بسرعة قبل مأى حد يسبقكم
مستنياكم
هبة
tb feeh so2al me7yrny ... hwa lma 2adalek el btates 2adaky el katshup wala 7'ado m3ah ...:)
انتي بتتكلمي جد ولا بتهزري
ومستنية ايه لحد دلوقتي .. ايه يا بنتي دا
اذا كان دلوقتي كدا اومال بعد الجواز هيبقى ازاي
:0
ETGAWIZEENI YA RAYYA7I DEMAGHEK
لا بجد بجد هو بخيل ولا يمكن يكون مبيحبش السمك او انه بيحب الشيكولاته زى ففاكر انه لو قدم لك شيكولاته احلى من دهب الدنيا كلها فكرى كويس واوعى تظلميه ولو كان فعلا بخيل ودى الحقيقة سيبيييييييه فوراً
ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
يافرحتي بيه
هوا بخيل من اولها
ربنا يقويكي
ويهديه
شباب آخر زمن بجد
السلام عليكم ورحمة الله وبركاته
شوفي يا بنتي نصيحه لله
اوعي البخيل
اي عيب في الدنيا يتغير الا البخل
المصيبه السوده ان ساعات بيبقي مش بخيل في الفلوس وبس
لا كمان ممكن يبقي بخيل في مشاعره وده بقي اخطر انواع البخل في الدنيا
اعرف واحده قريبتي جوزها بخيل من كل حاجه ، لولا ولادها كانت سابته من زمان
ومش قادره اقولك هي متعذبه معاه اد ايه وبتدعي عليه اد ايه ...الله يكون في عونها
فنصيحه انفدي بجلدك وانت لسه علي البر
تحياتي
يا أهالى البلوجات الكرام
طم ططم طم طم
أسمعوا وأعوووووووووووو
لقد قمنا بنشر الفصل الجديد - للقصة المجنونة والجوهرة المدفونة - كشف المستور - وعلى الحاضر أنه يعلم الغايب بحضور المدونة لقراءة القصة وكتابة التعليق - وعلى كل زاير انه ميدخلشى الا برجله اليمين ويجيبلى حاجة حلوة قوى فى ايديه
يا اهالى البلوجات الكرام
مستنياكم كلكم
تعالوووو زوروووووونا
باى باى
دوبه
اكيد كيلو الشيكولاته ده حد كان زارهم بيه واستخسر انه ياكله وقال اهى تحسب هديه وخلاص
الأخت المحترمة أنا أسعى من أجل خوض حملة تحسيسية بخصوص مشكل العنوسة أطلب من عن طريقها من الإخوة المدونين العرب و من كل جهة يهمها الموضوع أن يدلوا برأيهم فيه و يقترحوا الحلول العملية
التي يرونها تصلح لمواجهته
لقد نشرت في مدونتي مقال مطول لأخ من مصر وهو يحيى زكريا كتبه بعد أن اطلع على مدونتك الجريأة و الهادفة و الحقيقة لقد استطاع أن يمس في الصميم كل من اطلع على إدراجه
الرابط الخاص بمدونتي هو الآتي
http://toufik2081967.maktoobblog.com/?post=513012
رابط الأخ يحيى هو كلاآتي
http://yahiaghandy.maktoobblog.com
تمنياتي لك بدوام الصحة و التوفيق
أخوك توفيق التلمساني
لأ كلام جد ...
وانتِ حتقدري تعيشي كدة ولا ايه؟؟ دلوقتي الكلام على ورد على غدوة علي شيكولاته...
بعد كدة حتبقى حاجات كبيرة ... انا مش عارفة هية ايه ... بس أكيد المواضيع ممكن تكبر ...
كله الا البخل و طولة اللسان !
ياه و الله راجل بيفهم راح على البروتين عدل
هي دي اللي بتفعهم و اداكي النشويات
انا بقى لو خطبت و ان شاء الله مش هيحصل مش هعزم حد في كووك دوووووووور لأ[نه غالي جدا
كفايه اوي مطعم الفزل و الطعمية اللي تحت البيت و لو طلبت رفاهية يبقى كشري و لو عاوزين بروتين انا معنديش مانع اتعزم بس اقل من ابو شقره انا مدخلش
ههههه
السلام عليكم
مبروك الخطوبة
بس ياريت تخفي علينا شوية قصصك الرائعة مع الاستاذ بتاعك
اصل محسوبتك مخطوبة بقالي شهرين بس
يعني لسة ما لحقتش أشوف حاجة وحشة عن الموضوع هههه
بس الظاهر يعني والله العالم ان الاستاذ بتاعي مقبول والحمدلله
هههه
تحياتي
وربنا يصبرك
ان شالله ما حد اتجوز
اوعي تكوني لسه مكمله معاه؟؟
هههههههههههههههههه
أمال لما فى الخطوبة كده هيعمل ايه لما تتجوزا
نصيحة انتى تقعدى فى بيت ابوكى احسنلك ميت مرة ويا دار ما دخلك شر
وكمان مش اداكى البطاطس عشان تاكليها لأعشان هو مش بيحبها وبدل ما يديها للقطة قال اسيبهالها وخلاص
أنا جاتلى هستريا ضحك وأنا بقرأ البلوج دا. ربنا يكون فى عونك وعلى فكره أنتى لازم تخلصى منه بسرعه لأن البخل من أسؤ الصفات اللى ممكن تلاقيها فى شريك حياتك. هارد لك
هههههههههههههههههههههه
صبرتي و نولتي و الله يا حبيبتي
السلام عليكم
عجبني اوى حوار كيس الشيكولاتة اللي مش عاوز حد يشوفه
ده دليل حب جارف
مش عاوز حد ياكله معاكي
***
عبد الوهاب مطاوع - الله يرحمه
قال
بلاش:
البخيل
ولا
الكداب
ولا الخاين
ابشع 3 صفات
ولا يمكن يتغيروا ابدا
ولا تزعلي نفسك
خيرها ف غيرها
ان شاء الله
سلاماتي
يا الله خلاص يا جماعة صلوا على النبى البنية سبتة خلاص كفاية انها تقرى بس ردين من المكتبوين علشان تفسخ الخطوبة
هههههههههههههههههههههه بس بجد عندكم حق
مش اي عريس وخلاص
لازم يبقى فيه الحد الادنى من الصفات
يا بنتى الا البخل ولا تكونيش حبتيه ولا ايه اوعى لااااااااا نصيحة انفدى بجلدك يا ماما
اكيد شكلك وحش زى بقيت المصريات
خخخخخخخخخخخخخخخخخخخخخخخخخخ
Marwa..
لا نصيحة منى بجد كلو الا البخيل انا راي تعدي مع نفسك وتشوفى هل عشان تتجوزى وما تقفيش في الطابور تظلمى نفسك طول العمر؟؟ وبعدين ايه موضوع الجواز ده كل واحد لييه نصيب وبعدين يعنى بخيل في الاكل لااا حرام والله حجات غريبة في الزمن دااا هو الرجالة راحو فييين؟؟؟
علي فكرة انا محستشي انة انسان وحش قوي يعني ممكن يكون بس فهمة للزوق مش عالي ولا مش واخد بالة ولا بيستهبل انا اعتقد انك المفروض تصريحة بالي انتي حساة و تشوفي اية امورة هو كدا فعلا و فاهم الي بيعملة ولا اية دة راي و ممكن اكون غلط و اتمنالك التوفيق
و لسة مكملة معاه لحد دلوقتى؟؟؟
الحقى نفسك من دلوقتى \احسن و الله
bossy ana zayek bal 2aktar ana zy mabey2ololly (medawebahom)2''' bossy yasetty 23melly zayy ana 7'ala3t men el 7'otobteen kano bel balady keda (menatennyn) wahed ana 3azamto tegy 11 mara walahy wel tanny kont habos 2edo 3ashan aftakaro behaga 3andenna fel bet lw hata kartonet el torta mesh etorta nafsaha ah we lne3ma
ana ka nelly mesh mosrefa ta7'ayally ba2a lama ahkom 3alaehom bel bo7'l yeb2a homma ezay ...........
ana mesh ha2oll 3'er kelma wahda bas (3abas el daw bey2ol la2)el mall we banonn dy tamselleya bas kanet bet2sar feya molla ana 3ala el 3ommom 3andy now 19 sanna we medawebahom etnnen
bay ba2a 3ashan 3awza a3ayat shwaya.............nelly
ربنا معاكي يابنتي دانتي هايجيلك الضغط والسكر بدري بدري
نصيحه بقه ماعنتيش تقترحي عليه اي حاجه
بالنسبة للبخل انا مش عارفة ايه حكايته اليومين دول..بس باحس انه استعباط(SORRY)
طبعا البداية بتكون ان العريس من دول ييجى البيت من غير حتى كيلو شيكولاتة...
ولما نخرج اسرتين مع بعض بابا اللى يدفع!!!
واحد بأه كان لذيذ جدا ما عجبنيش طعم عصير البرتقال فسبته لقيته بيشرب الباقى و يقول لى تخيلى العصير فى مكان زى ده بتلاته جنيه ونص!!(هما كتير )
اما اغلس واحد فكان زميلى فى الشغل كان قارى فاتحة و الخطوبة بعد اسبوعين.. المهم بعد الشغل قعدنا فى كافيتيريا الشغل.. وبعدين لقيته بيقولى تشربى ايه ..عصير ليمون..
طلب: اتنين كوكتيل وواحد هامبورجر لو سمحت!!
استغربته جدا قولت له بس انا مش بحب الكوكتيل.. و بعدين مع انى مش بحب الاكل هنا لكن المفروض تعزم عليا عشان شكلى قدام الWAITRESS
ضحك ضحكة صفرا... وشرب و اكل و بس...
وبعدين احمدى ربنا انه وداكى كوك دور انا رحت مؤمن !!!
ايه رأيكم!!
ههههههههههههههههههههههههههههه
الله يعينك يا حبيبتشي
هههههههههههههههههههههههههههههههههههههههههههههه
ربنا يصبرك
بس اصبرى
aaahhmd
حبيبتى ربنا يصبر قلبك
بس ده طلع ايييحه اوووى
سيبيه وربنا يرزقك خير
عايزة اقولك ان البخل ده بجد صفة وحشة جدا , أنا عن نفسي كنت مخطوبة قبل كده بواحد وبرضو لاحظت ان تصرفاته غريبة وكان واضح انه بخيل فسبته فورا,
بس انتي حاولي تصارحيه انك م الاخر كده حاسة انو بخيل يعني , ولو عرفتي تغيريه يبقي خير وبركة
اولا احب اهنى البرايد على المدونه و مش عارف اتكلم عن الحاله النفسيه لانى اكيد مش متفهمها اوى لانى شاب و عندى 27 سنه ومش عايز اخطب دلوقتى لكن ليا رجاء بسيط جدا " وانا بقراء التعليقات قريت ح م م ودا مثل ارجو انكم تقروه مره وتنين و ثلاثه لان احنا كشباب واخدين بالنا منه جدا انى لما اتقدم لعروسه انا شايل ميراث أهلى وعيلتى معايا مع ان محدش بيختار اهله و لازم تطبق عليا المواصفات القياسيه عندى شقه و عربيه و عندى المقدره الماليه عشان افرش ولازم الفرش يكون معرفش ايه بحسبه بسيطه وسهله بنتكلم فى 100000 جنيه و العروسه الجميله مش متحمله لى مليم فيهم ولو عايزين نفنطها معنديش مشكله ومش عارف ليه التحامل الزياده عن اللزوم بما اننا ركنا الحب و العواطف فوق الرف يبقى محدش يهاجمنا بالاسلوب ده لا ده بخيل لا ده مبيجيبش هدايا مبيفسحنيش و مبيقولش كلام جميل ميباخدش باله من لبسه و تعبان اوى ض.ج ساقط بالثلث يعنى مرفوض يبقى عايزين تتجوزو ليه مدام الواحد ساقط
لما يجى نحسبها وواحد بيقبض مش هقول وحش على العكس مرتب كويس جدا 1800.00ج هيدخل جمعيات بكام عشان يحوش ال 100000 جنيه و يدى لوالدته فلوس قد ايه دى أمه اللى ربته و حقها عليه اكبر من حقك كخطيبته " انت و مالك لابيك " و مصاريف الشغل و المواصلات و بعد كده مصاريف سعادتك و الفسح و الهدايا و كمان المواسم اللى من غيرها يبقى انا مبفهمش فى الأصول والحل الوحيد عند معظم الشباب زيى انتظار السن المناسب على 35 سنه كده وربنا يعدلها بس ممكن اجاوبلك انا على سؤال مهم طرحتيه فى كتابك ليه اى واحد بيتجوز وهو عنده 35 بيختار عروسه عندها 20 ؟؟؟؟؟؟؟؟
لان اللى عندها 30 كانت رفضته و هو غير قادر و هو بيقدملها حبه و احترامه و قالت لا هستنى الفلوس و المقدره فلما بيبقى معاه الفلوس و هى فاتها القطر و محتاجه للى أقل منه حتى و هترضى بيه متفتكريش انه يرجعلها لا استحاله اللى بيبيع هو انتو و اللى بيصعبو الامور هم اولياء أموركم أبائكم و أمهاتكم فبعدها متستنوش مننا انا نرجع لما نبقى مناسبين متتخليوناش ذئاب بنتربص بيكم كل يوم عايزين نتحرش بيكم و لما نبعد عنكم فاحنا طواغيت و متكبرين و عالم طالعه فيها على الفاضى.
بس بجد عاجبنى الاسلوب الساخر اللى واخدين بيه الموضوع واعوجاج لسانكم يمكن يهون عليكم على عكسى انا و انا فى كل يوم اصلى وادعى لربنا انه يكون أخر يوم فى عذوبتى وحياتى وحيد وانه يهدينى لبنت الحلال اللى تؤنس وحدتى وتعيش معايا بما يرضيه.
دى نظرتنا احنا للامور آدم عليه السلام استوحش فى الجنه من غير حواء تخيلو احنا محتاجنكم قد ايه الجنه متبقاش جنه من غيركم وانتوا شيفنا مجرد ذئاب
هاى يا برايد....
انا جديدة على مدونتك بقالى كام يوم بس بصراحة حسة انها لسن حالنا كلنا كل البنات فكنت عايزة اشارك معاكم بقصصى ومواقفى فى الحياة ويبقى فى حوار مفتوح بينا بس مش عارفة ازاى يعنى هكتب واشترك معاكم ممكن تعرفينى ودة ايميلى
يا خرابى هو فى رجا..... قصدى كائنات كده للدرجه دى انفدى يا بنتى بجلدك و تعالى انا ااكلك من محل السمك اللى انتى عايزاه و حسبنا الله و نعم الوكيل
احسن انك سيبتيه اوحش حاجه فى الراجل البخل لان البخيل بخيل فى كل حاجه حتى مشاعره كمان بيبقي بخيل فيها
الواحد عنده ما يتجوزش احسن ولا يتجوز واحد بخيل
المفروض كان يديكى الساندويتش مع البطاطس طبعا!!
عرفة مسلسل البخيل وانا ههههههههه
خلى بالك كويس يعنى تفضلى من غير جواز احسن مليون مرة من انك تجوزى راجل وبخيل كمان
يمكن لو قلنا الراجحل ع ادة كنا قلنا ماشى انما توصل انة ياخد السندوتش وميدكيش حتة ولا حتى يدفع تمن بوكية الورد
حذارىىىىىىىىىىىىىىى من البخل والبخلاء
ربنا يعوضك خير
دلوقت عرفنا أهم أسباب العنوسة - بنت اليوين دول مش عايزة عريس - عايزة جني مصباح علاء الدين طول الوقت يعطيها ، يعطيها وفلوسة مش بتخلص هههههه
انا مش عارفة اقولك اية غير ان ماينفعش تكملى مع حد كدة ابدا انتى ممكن تقبلى انسان فقير وماتقبليش بخيل اقبح صفة بجد .ماتستعجليش وتقولى ممكن مايجيش غيروا . ماتقبليش وضع انتى مش راضية علية من الاول . وانتى ونصيبك بس عموما ماتخفيش ربنا مابينساش حد ابدا خليكى واثقة من كدة كويس اوى وعيشى حياتك عادى وماتستنيش حاجة
من شاف عرسان الناس هان عليه عريسه
أنتي ايه اللي جبرك علي العيشة دي
البخيل بخيل في كله حتي في مشاعره وأنتي أكتر واحدة تقدري تحكمي دا بخل فعلا ولا هو مش بيعرف يتصرف أحسن من كدا
ومتتأخريش في القرار
وربنا يوفق البنات كلها
يا ساتر يا رب ..
و الله ما عارفه اضحك .. و لا ابكي على حالك ..
الصراحه ..
و نصيحه مني ..
لازم تشوفي حل معاه ..
ماهو صعب انك تعيشي حياتك كلها مع واحد زيوو ..
ربنا يعينك
السلام عليكم انا عارف ان ردى على الموضوع متاخر جدا بالنسبة لتاريخ العرض
تصدقوا دى اول مرة اشوف المجموعة دى والمواضيع كلها مهمة انا بالفعل ماليش اى خبرة بمواضيع الخطوبة والزواج لانى عمرى ما اتقدمت لحد اولا لانى اعمل بالخارج وثانيا لانى لم افكر بالزواج حتى الان
ولكن لانى فجاه حسيت بالرغبة فى الزواج وانى اخطب وغيرة وعمرى الان 28 تقريبا اهتميت اعرف ازاى الخطوبة وايه الكويس والغلط فى اللى بيعمله الشباب طبعا غير المواصفا ت الجسدية اللى لا تعجب البنات او تصرفات عائلته تو انه بخيل وشكاك وغير كده فى قلة فى الكلام بين الطرفين المفروض انا اروح اخطب واحدة ناس شافوا انها مناسبة لى يبقى تحبنى على طول وانا اقع من طولى ومش عارف ايه
الرومانسية والحب كويسين ولكن مش بالسرعة دى على الاقل لازم اعرف تفكيرها وشخصيتها
انا لانى فى دولة عربية (مش السعودية) بتقابل مع جنسيات كتير فى الشارع وفى محيط العمل وبشوف ان البنت المصرية حتى وهى هنا بتتصرف غلط من رايىء
فى شىء فى التربية للطرفين تدفعهم للتصرف بالشكل ده ولو قارنت بالاخرين من جميع الديانات والجنسيات غير بشكل واضح واحسن والشئ اللى لاحظته بالفعل الرومانسية بعد الجواز ومحدش يقول الاولاد والعمل وغيره على العموم نبقى نتكلم بعدين بس انت ياريت تتكلمى معاه الاول وتشوفى قبل اتخاذ القرار
والله ياا ختي اكنك بتتكلمي عن خطيبي قصدي اللي كان خطيبي واهله والله فكرتيني بالذي مضى بس مع اختلاف المواقف هههههههه احكيلك موقف واحد بس كنا بنقدملوا الفاكهة اقسم بالله كان ياكل اكتر من خمس موزات في خمس دقايق وياكل كل اللي ف الطبق انا مبتريقش عليه عشان محدش يقولي انكم كنتم بتبصولوا ف الحاجه اللي مقدمنهاله بس الغريب انه كان يروح يقول لمامته ان احنا مبنقدملوش حاجات قيمته :s
احمدى ربناانك طولتى منه الشيكولاته وكمان بطاطس ؟ايه الجشع اللى فيكى ده؟ انا بقا يا حبيبتشى ماجاليش الا بوكيه ورد مكون من ورده واحده وعود جرجير او كان بقدونس مش فاكره وقام مطلعلى بوكيه الورد اللى هو مش بوكيه اصلا بحركه مسرحيه مش هنساها عمرى كان شويه وهيحطه فى عينى من شده افتخاره باللى هو جايبه, وكيس فزدق وعلبتين كانز وشيكولاته واحده وجابهوملى عشان كان جاى ياخدنى بعد ماخلصت امتحانى ومحصلتش بعديها تانى ابببببببببدا وحرم يروحلى وانا بمتحن لكى لا تتكرر المأساه بس الشهاده لله مره خطيبى ده قابلنى فى الشارع وكنا بالصدفه جنب محل من اللى بيبيعو عصير قصب كان هيموت عشان يشربنى كوبايه عصير قصب وانا اببببببدا قال خطيبى قال والله انا فسخت الخطوبه واتعقدت منه بصى يا قمر يا نتخطب باخلاص يا سنجل وخلاص(اختك نونى)اللى شويه وهتبقى جننونى
ana bgd msh msda2a ana masdoooma howa mab2ash fe regala 5aaales keda
bgd msh 3arfa el banat 3awza tetgawez 3la asas aaa o3ody be karamtek walahy badal ma tetgawezy wa7ed tesrefy enty 3aleh aw temshy enty tedaf3e 3ano fel share3 w law ahlek msh mwaf2en maywaf2osh aho 3la el a2al a7san ma tetgawezy w ba3d keda tetala2o w hayeego fel a5er ye2olo en enty el 3'altana 3la asas en enty konty 3awza tetala2y be mazagek
rabena yostor 3la banatna walahy
Post a Comment
<< Home