بيت العرايس و العرسان

اللي يحبنا ما يضربش نار عندنا

Wednesday, August 06, 2008

ح م م

هالو يا دكتوره
انا مكنتش حابب اقلب المواجع بس يالا عشان ما تقوليش ان فيه صمت وتجاهل ومؤامرات تحاك في الظلام
تحياتي


انا اسمي ( ح ) أكبر اخواتي الخمسة ، ووالدي موظف بسيط ، قدر يربيني كويس وبكرم ربنا كنت متفوق ودخلت كلية قمة ويوم ما اتخرجت كان والدي طلع معاش والشركة اللي بيشتغل فيها شغلتني مكانه ، وده طبعا عشان ربنا مابينساش حد
طبعا هتقولي ان الحدوته ديه رايحه للمدونة اللي جنبك بتاعت خالدة الذكر فايزة واصف ...بس انا باقول يا ريت نصبر ، خصوصا انك يعني مش من النوع المختصر ورغايا في الفاضية والمليانه ( ديه اشاده مش هجاء علي فكره )
المهم انا كنت في كلية قمة وكنت شاطر فاسمي كان معروف جدا في المحاضرات ، بس طبعا مكانش ليا في الرجلات والحفلات وكده لأسباب واضحه
بس كان فيه سبب تاني مخليني مشهور في أوساط الطلبه المكبرين ...ان عنيا خضرا بشكل ملفت وشبه عينين المطرب الاسكندراني الشهير ( مش هقول مصطفي قمر عشان مايبقاش اعلان )
وصدقوني يا جماعه ان الموضوع ده كان عاملي " سوكسيه " جامد جدا ، يعني جمعت المجد من طرفيه " ذكي وشاطر وشبه مصطفي قمر كمان
باعتباري كنت مركز في الدراسة كنت باتجاهل الحركات الشهيرة من الزميلات اللي بترمي الكتب او عاوزين يستلفوا الكشاكيل او يصوروها ( وحياتكم بيحصل من ايام احمد رمزي لدلوقتي ) عشان انا فاهم اللي فيها خصوصا البنات اللي اسمائها بتبدأ ب ( ح) وهيبقوا مأنسين جنبي في اللجنة
بس للأسف مكنتش اقدر اقاوم ( م ) عشان كانت متفوقة وذكية ومتعرفش مصطفي قمر ، وغير كده كانت وحشه ، مش شبه الشاويش عطيه يعني ، بس محدش يقدر يغلط ويقول انه شاف اخر فيديو كليب ليها ، او يقتكرها قريبة من بعيد لنانسي أو حتي امال ماهر
طول الكلية ما جرؤتش اني اكلمها واكتفيت بالسهوكه والتسبيل ، وفجأة لقيت نفسي اتخرجت وباشتغل والآنسة ( م ) اختفت من جدولي
طبعا كرم ربنا استمر وغرقني ، وعرفت الاقي شغله احسن في شركة كبيرة بمرتب محترم خلاني اتنطق حبتين وابطل ركوب مكروباصات واركب الاتوبيس المكيف وكده
وبعد شغل لمده 3 شهور لقيت نفسي قصاد ( م ) ... اتاريها بتشتغل في نفس الشركة وانا طول الشهور ديه ما خدتش بالي منها ...مغفل وبتاع شغل هاقول ايه
كلمتها كاننا كنا صحاب من ايام مدرسة الوحدة العربية الابتدائية ، والغريبة انها كلمتني باعتبارنا كنا بنقسم سندوتشات المربي سوا
قلت الحمد لله ، يعني مش كفاية اشتغلت في مكان محترم ولقيت عروسة احلامي ...اكثر من كده ايه ))))))
وخلال ست شهور العلاقة تطورت بشكل ايجابي وبقيت اوصلها يومياً ...اه صحيح ماقلتلكمش اني جبت عربية بقرض شخصي من الشركة
المهم توكلت علي الله وفاتحتها وطلبت معاد اقابل والدها في بيتهم اللطيف في 555 شارع نوال حلمي في العجوزه ( عنوان افتراضي ) وهنا شفت وشها بيحمر للمرة الأولي وقالت انها هترتب مع والدها وترد عليا


في اليوم الموعود خدت والدي ورحنا بيتهم وبعد ما رحب بينا والدها جت هي ووالدتها وقعدوا فوالدي قال
ان ابني ( ح ) – اللي هو انا يعني مش اخويا مثلا – شاب مجتهد وطموح وذكي واهم حاجه انه ملتزم ومتدين وعشان كده ربنا بيكرمه لدرجة انه لما اتخرج اتعين بعدها بيوم في شركة كذا اللي هو كان شغال فيها ،
فرد والد ( م ) وقال
عشان كده انت شكلك مش غريب علي انا كنت رئيس قطاع في الشركة ديه ، اكيد لمحتك ، انت كنت ماسك انهي قطاع ،
والدي اتحرج شويه بس قال
انا كنت في الحسابات ،
فوالدها ابتسم وقال
يعني كنت بتتحكم في مرتباتنا وفلوسنا ، ده انت اهم واحد في الشركة

الحقيقة انا انبسطت من والدها وذكائه ، وانه راجل راسي وعاقل ، وفضلنا قاعدين نصف ساعة كمان نتعرف وبصيت ل ( م ) لقيتها بتتفادي نظراتي فقلت يمكن مكسوفه
تاني يوم استنيتها في الشغل ما جتش ، اتصلتبيها ما ردتش ، سألت عليها في مكتبها قالوا انها واخده اجازة اسبوع
استغربت جدا ، ليه ما قالتليش
حاولت اتصل تاني لقيت موبايلها خارج التغطيه
عدي الاسبوع ولقيتها باعتالي رسالة انها سافرت الساحل الشمالي عشان تنفرد بنفسها وتفكر في الموضوع
انا حقيقة استغربت ، هو مش احنا بقالنا ست شهور نعرف بعض ؟ ايه بقي اللي اتغير ومحتاج سفر مفاجئ وساحل شمالي وحركات ؟
قلت يا واد اصبر ، وطال صبري
لما رجعت الشغل لقيتها رجعت لايام الكلية تقريبا ، معاملة رسمي ومن طراطيف مناخيرها ويا استاذ ( ح ) ، وحضرتك ، وهكذا دواليك
رحت رايح بقي مكتبها وقفلت ورايا الباب وقلتلها
بقي ردي عليا دلوقتي ايه اللي جري ؟ هو انا دست علي مناخيرك مثلا وانا مش واخد بالي فعشان كده كل ما تشوفيني تكلميني من طراطيفها ؟
قالتلي
يا ( ح ) انا فكرت في الموضوع وشايفه ان احنا مش لايقين علي بعض ومفيش نصيب
انا خدت الموضوع عالبارد فقلتلها
عشان انت طويلة وانا قصير ؟ والا انا عنيا خضرا وانت عنيكي سودا ؟
قالت
انت فاهم كويس ومتخلنيش اقول حاجة تضايقك ، بس تصور ان رؤساء القطاعات يحضروا فرح كريمة زميلهم علي ابن
موظف حسابات عالمعاش ...

طبعا انا كان نفسي اسيب كل ده وامسك في ( كريمة ) ديه ، بس مسكت اعصابي وقلتلها ما قاله بديع الزمان الهمذاني في كتاب نصوص اولي ثانوي
" الحمد لله الذي عافاني من ربقة الذل في وفائك بيدي جفائك"

مش عارف بقي هيا فهمت ولا لا ، بس انا كان نفسي اقول الجملة ديه لحد واخيرا قلتها
منكرش اني اتضايقت وزعلت وحسيت بالاستياء المشوب بالقرف ، بس الحياة لازم تستمر ورجعت اشتغل زي الحمير تاني ، ولقيت ان الشركة بتدي دورات كمبيوتر فقررت اروح بعد الشغل كمان عشان ما اروحش غير اخر الليل اتنيل انام واصحي الصبح الف في الساقية وخلاص
بس في دورة الكمبيوتر قابلت بنت لطيفة جدا حسستني ان ( م ) كانت حقيقي الشاويش عطيه ، لطيفه وهادية ومعقولة لحد كبير والالطف ان اسمها كان ( م ) برضه
انا حسيت اني اتعلمت كثير من التجربة الاولانية وقررت اني استغل فترة الدورة عشان اخذ قرار ، ولما كان الموضوع بيتطور بشكل ايجابي وسريع ، استخرت في الاخر واتقدمتلها ، فقاتلي اجيب والدي وازورهم فقلتلها
من الاول والدي موظف حسابات عالمعاش واحنا مش ساكنين في 555 شارع نوال حلمي في العجوزه
ضحكت جدا وقالتلي
انت عرفت منين عنوان بيتنا ؟ انت بتمشي ورايا ؟
قلتلها
لا انا باقول مثلا
قالتلي
ده عنواننا بالضبط
ويا تري ساكنين في الدور الخامس شقة 18 ؟
لا الدور السابع شقة 22


الحمد لله بعد 3 سنين من القصة ديه انا دلوقتي متجوز ( م ) اللي في الدور السابع شقة 22 ، وفي فرحنا كان فيه دعوة لشقة 18 في الدور الخامس بس للآسف محدش جيه ،
حد يعرف ليه ؟؟؟

إمضاء

ح

(قصته و بأسلوبه)

54 Comments:

Anonymous Anonymous said...

الصراحة يا اخ ح انت تستاهل حيث انك وبكل وضوح انجذبت للخت م الاولانية بس عشان هي كرفتك صدقني ثانيا حاجة معروفة ان الرجالة عنهم مركبات نقص-ماعاد منصور طبعا- يعني مفيش راجل هيحب ان م بتاعته تبقي احسن منه

5:00 PM  
Anonymous Anonymous said...

Happy ending ??!!
I thought Bride asked for stories that end with failure, frustration or sadness. :D
Congratulations !
Have you got any kids ?

7:37 PM  
Blogger واحد مش فاهم حاجة said...

الحكاية حلو

التفاصيل حاسسها من عندى

نفس الصدف غالبا بتحصلى

مع انى لو شوفت نفس الاحداث دى فى مسلسل او فيلم

ممكن اقعد اشتم المؤلف والمخرج لحد الصبح

بس بجد انا مؤمن بالصدف دى اوى

يمكن تكون هى فى حد ذاتها اختبار

لان لو صاحبها خدها على انها فرصة لة انة ينتقم او يتشفى فى م

يبقى بتبتدى الحكاية من جديد

بس حاسة فاهم الدرس كويس

9:05 PM  
Blogger مدام كعبولة said...

بجد بجد القصة تححححفة


اولا م م دي حكاية

ثانيا الاهم انه قدر يقف علي رجله بسرعة يعني مش يموت نفسه بقي وسزعل علي اللي راح بالعكس تكيف مع الامر بسهولة حتي لو مكنش بسرعة بس حصل

و معملش زي محمد عبد الوهاب يفكر في اللي ناسيه و ينسي اللي فاكره

عموما انا شايفاها نهاية سعيدة بس هو كدة بيقلب المواجع

مش كدة ولا ايه؟؟؟؟؟؟

12:20 AM  
Blogger عصفورة من الشرق said...

الف مبروك يا استاذ ح ولو انها متاخرة 3 سنين
اكيد ربنا انقذك من م الاولانيه ام مناخير عايزه .....؟ ولا بلاش المسامح كريم

1:05 AM  
Blogger سجدة said...

فى واحدة ترفض عريس علشان اللى هيحضروا الفرح والله حاجة غريبة اوى تحفة بجد
يلا اهو ربنا عوضك ربنا يسعدك

1:24 AM  
Anonymous Anonymous said...

لطيفة القصة بس مش اللي انا كنت منتظره
انا عاوز نهايات حزينة لكل الاطراف ولو فيه طرف واحد حزين يبقي يا ريت البطل

1:26 AM  
Anonymous ِugd said...

وعسى أن تكرهو شيئا وهو خيرا لكم

تصدق يا باشا إن الجملة بتاعة بديع الزمان الهمذاني دي كانت عجباني وجدا وبرضو أنا مستني أي موقف ينفع تتقال فيه وهقولها على طول ..

مش بعيد اعمل علاقة مخصوص مع واحد مش من مستوايا .. بس من مستوى اعلى بكتير .. عشان اقولها الجملة دي !!

3:35 AM  
Anonymous Anonymous said...

mabroook 3la el gwaz ya 2ostaz 7 w 3o2baly ya raaab 2olo ameeeeeeeeeeeeeeeeeeeeeeeeeeeeeeeeen

4:19 AM  
Blogger السعادة said...

ألف مبروك يا عم
امكانياتك عالية أوي
عين خضرا
كلية قمة
أبوك اتوسط لك
ياريت أبويا كان حي ..كان اتوسط لي
اشتغل في فرن الحاج مرسي
شكلي كدة هروح اتقدم للبت بطة اللي بتبيع المحشي قدام الحكر بتاعنا
على الأقل لو حبت تفكر..يا دوبك تروح جنينة المحطة تقعد هناك شوية تفكر وترد علي
بصراحة ..خايف ترفضني
بس القصة بتاعتك دي مش داخلة دماغي
لأن طالما انت( ح م)كان لازم العروسة تبقى(س س)(فيلم الخطايا) وكمان
مقولتش إن محمود المليجي دخل السجن
حتة جد بقى:مفهوم الكفاءة عند الناس صار غبيا لدرجة بعيدة لكن سبحان الله جات لك عروسة افضل وفي نفس البلوك(ياعم ما تزعلش أوي كدة في نفس العمارة)
ألف ألف مبروك
أقوم البس الكاوتش البلاستيك الجديد وأروح اشتري محشي من عند بطة
ادعوا لي

4:55 AM  
Blogger mhsharawy said...

والله يا جماعة على الى بيحصل فى الرجالة دة ان شاء الله الرجالة ليها الجنة بس على العموم ألف مبروك يا سيد ح

6:21 AM  
Blogger مش عايز أتجوز said...

أسلوبك في الحكي شيق وألف ألف مبروك ويا رب دايماً في سعادة علي طول وعقبال الذرية الصالحة واللي مريت بيه كان عبارة عن اكتساب خبرات مش حب بجد والحمد لله أتعلمت بسرعة :)
ألف مبروك مرة تانية يا دكتور ( باشمهندس ) ح وعقبال أولادك

9:03 AM  
Blogger maiosha said...

سلام عليكم
القصة حلوة اوى وبجد إنت إنسان كويس جدا
لو كنت إتجوزت زميلتك الأولانية أنا كنت خدت عنك فكرة وحشة خالص
إيه العبط ده.. لسه ممكن يكون فيه حد بيفكر بالطريقة دى

شكلها بتتفرج على فيلم رد قلبى كتير

ربنا يباركلك فى زوجتك ويسعدكم إن شاء الله

12:07 PM  
Blogger واحد مخنوق said...

الإخوة اللي مستغربين من نمط التفكير المتخلف بتاع البشر ده..
مستغربين ليه؟
انا والله أعرف واحد_أعرفه كويس أوى_ اتقدم لواحدة من نفس المستوى تقريبا ماديا و اجتماعيا
ووالدها المحروس اللي اسم النبي حارسه و صاينه إعتذر بعد ما حصل قبول ..عشان شقة صاحبنا 85 متر و الحاج عاوز شقة واسعة يفرشها فرش يتفشخر بيه (كما ذكر هو بالنص)......أه ازاي يعني بنت عمها الفلانية و المفعوسة العلانية يبقى مفروش لها فرش كبير و ضخم و دي يتفرش لها فرش في شقة 85 بس .....حكم
ملحوظة اخيرة.....الحاج اللي رفض ده شقته اللي هو متجوز فيها و ما زال يسكنها لا تتجاوز مساحتها ال 60 متر
و اشهد يا زمن الغباء .......و عجبي

4:32 PM  
Blogger واحد مخنوق said...

الإخوة اللي مستغربين من نمط التفكير المتخلف بتاع البشر ده..
مستغربين ليه؟
انا والله أعرف واحد_أعرفه كويس أوى_ اتقدم لواحدة من نفس المستوى تقريبا ماديا و اجتماعيا
ووالدها المحروس اللي اسم النبي حارسه و صاينه إعتذر بعد ما حصل قبول ..عشان شقة صاحبنا 85 متر و الحاج عاوز شقة واسعة يفرشها فرش يتفشخر بيه (كما ذكر هو بالنص)......أه ازاي يعني بنت عمها الفلانية و المفعوسة العلانية يبقى مفروش لها فرش كبير و ضخم و دي يتفرش لها فرش في شقة 85 بس .....حكم
ملحوظة اخيرة.....الحاج اللي رفض ده شقته اللي هو متجوز فيها و ما زال يسكنها لا تتجاوز مساحتها ال 60 متر
و اشهد يا زمن الغباء .......و عجبي

4:33 PM  
Blogger ساعد نسرين الايمن said...

ههههههههههههههههه

والله انا اعرف واحداتقدم لوحدة رفضته
اتقدم لاختها
عادي
بس انت جبروت يا اخي
تخطب من نفس العمارة
طب افرض الباب كان انفتح
وانتوا طالعين
ولا بابك اصر يعدي يسلم
علي رئيس القطاع

بس حقيقي برفو عليك
انكحفظت علي حرف الم
في ناس بيكون عندها تيمة في حياتها

وياليت الاخت المجهولة اللي معلقة اول واحدة تقولنا ايه حكاية منصور اللي طالع مختلف عن الرجالة
ومعندويش عقدة نقص
لا يكون منصور بتاع الجزيرة
ولا منصور ابومرتضي
او ابو احمد
او ابوايمن
مصيبة لا يكون ابو ثناء

ولا تنسوا جميعا عيد ميلاد برايد يوم 14/08/2008 المقبل

5:48 PM  
Blogger rovy said...

الحمد لله الذى ابلك خيرا منها ان شاء الله تعالى ..
بس يا ريت تأخذ بالك منها خصوصا يعنى ان عنيك خضره و متطمنش ..

الف مبروك و ربنا يديم عليكم السعاده و يكفيكوا شر الحسد يا رب

و شر ..م.. الاولانيه

6:12 PM  
Blogger aboooood said...

أنا مبسوط من حاجة إنك كنت جرئ لأخذ قرارك بالجواز من جارتها في نفس العمارة ويا ترى زوجتك كانت عارفة بإنك كنت مرتبط بجارتها منذ إن كنت في الكلية .
ربنا يسعدكم يااااررررررررب.

1:25 AM  
Blogger maha zein said...

كتها الخيبة (م) الاولانية
قال معرفش ايه و ايه
خسرت
عبيطة
مقدرتش
ربنا هيديها الي يناسبها
واكيد ربنا عوضك بلي احسن
سلم علي م
وقولها معندكوش شقة في الدور الخماشر
؟
تحياتي ليك يا ابو عين خضرا وفيك من مصطفى قمر

12:32 PM  
Blogger Anas said...

واآآآو


ربنا يوفأك ويسهل لك كل أمورك


بارك الله لكما وبارك عليكما وجمع بينكما في خير ياآآرب


:)

4:58 PM  
Blogger يارب احلامي تتحقق said...

طبعا الحدم لله انه عوضك خير ن الموضوع الاول بس انا مش عاوزاك تعتبره انه تجربه مؤلمه لانه فيه ناس حتفضل تفكر بالطريقه ديه مهما اتغيرت العادات ومهما اتكلمنا في الموضوع
وانا شفت بنات بترفض صبيان زي الفل والله لاسباب هبله منها الموضوع ده علي الرغم من ان الصبيان ديه مستواها الثقافي والديني و الاجتماعي افضل
علي العموم ربنا يكرمك ويكرم كل الي زيك

12:10 AM  
Anonymous أحمد هندي said...

من ترك شيئاً لله عوضه الله خيراً منه

10:33 AM  
Anonymous Anonymous said...

بجد جامد جدا بس الواحد بيتصدم في تفكير الناس قد ايه متخلفين معازيم ايه وكريمه ايه؟ مالها يعني الحسابات وبعدين في مقوله هي اوفر شويه بس معبره (ليس الفتي من قال ابي و امي ولكن الفتي من قال انا) المهم ربنا يكرمك يا رب و هي لو ماخفتش من الهبل ده هتتجوز واحد ماعندوش شخصيه و خللي ابوه رئيس الوزاره يبقي ينفعها

10:45 AM  
Blogger Queen Diamond said...

مش فاهمه هي م دي الاولانيه.. رفضت ليه يعني؟؟

12:10 PM  
Blogger السيد ( ح ) said...

السلام عليكم ...تحياتي للجميع
هاكم ردودي
مجهول 1 : اكيد انت تبقي مدام منصور
anon 2 : I guess it ended with f,f and s to M1 , Thank God we have 2 kids
واحد مش فاهم حاجة :الحياة دايما صدفها أغرب من الخيال وبيبقي شئ لا يصدكه عكل علي راي شويكار
مدام كعبولة : شكراً شكراً أخجلتم تواضعي ، هي اكيد نهاية سعيدة بس الحمد لله غادة عدتها المره ديه
عصفورة من الشرق : الله يبارك فيكي ، ولا يهمك عالتأخير فيه ناس أول حرف من اسمهم ( م ) لسه ما باركولناش رغم ان الباب في الباب
سجدة :انا مكنتش مصدق نفسي من السبب وكنت فاكر لاخر لحظة ان المشكلة في لون العينين
مجهول 3 :من عينيا الاتنين المره الجاية هاشوف موضوع ينتهي في عمر مكرم
ugd : الحمد لله ان فيه حد خد باله من بديع الزمان ومفتكرهوش فرط الرمان ، انت بس دور علي حد من هذا المستوي وبعدين ابقي قوله اللي انت عاوزه
مجهول 4 : آآآآآآآآآآآآآآمين
السعادة : لاوم تغير اسمك ، اعتقد ان " قل أعوذ برب الفلق" اسم مناسب جدا ))
هو حقيقة انا مش ح م ، انا ح بس ، وكل واحده فيهم تبقي م ، انت فكرتني كمان بفيلم حسن عابدين بتاع ش ف ...شرف فضيلة ، وفاروق
الفيشاوي...هـ. هـ...هلس في هلس
سلملي علي بطه
mhsharawy: الله يبارك فيك ، مكنوبالنا ان شاء الله
مش عاوز أتجوز : أخيراً ملاحظة أدبية ، متشكر جدا علي تقديرك لمواهبي في الحكي ، واضح انك بتاع موارد بشرية
maiosha : انا طبعا ما تجوزتهاش عشان انت متاخديش عني فكرة وحشة خالص خصوصا انك ( م ) برضه
واحد مخنوق : طيب ما يشخشخ جيبه ويجيب شقة اكبر وياخد الفرق ، عجبت لك يا زمن
ساعد نسرين الأيمن : هو حقيقي كل مره باروح لاهل مراتي باصر اطلع السبع ادوار علي رجلي عشان ما يحصلش وحد من الدور الخامس يعمل فيا حاجة ويضيع فيها شبابي الغالي )) انا معجب جدا باللي انت بتكتبه خصوصا موضوع مدرسة العزيز بالله بتفكرني بالذي مضي ...اكثر من سبع سنين وكام شهر تقريبا ...انت كمان عندك تيمة النون ...نسرين ...ونجوي ))
rovy : لا ماتقلقيش انا مراتي اشترطت عليا في عقد الجواز البس عدسات طول ما انا لوحدي ، م الاولانية ليها حكاية عاوز اقولها بس لو ادكتوره غاده توافق هاقول علي طول
aboooooood : الله انا لا جرئ ولا حاجة ، انا كنت مخنوق وربك هو اللي رزقني بزوجتي بعد فترة قصيرة جدا من الحركة النص كم بتاعة م الاولانية ، وثبتني اني اخد قرار وكان اول حاجة قولتها لزوجتي هو التفاصيل المملة للموضوع الاولاني عشان انا مش عاوز كراسي في الكلوب
maha zein :اول ما الحاج خضري الفكهاني يقرر يعلي خمس ادوار هابعتلك علي طول ، بس انت ما تنسيش تأمني عالشقة وعلي السكان
ana : yep , that was really appalling ))آآآمين
يا رب أحلامي تتحقق : هي مؤلمة بس كانت سبب كبير في نجاح بعدها ، والحمد لله علي كل حال
أحمد هندي : ونعم بالله
مجهول 4 : الف شكر ، الصدمات بتبقي اكثر لما بنحسب اننا فاهمين الناس وبعدين نطلع فاهمين غلط
queen diamond : فوارق طبقية بقي

2:00 AM  
Blogger واحــد ميــت said...

القصة جميلة

وال مليون مبروك على الجواز

ويارب تعيش فى هنا وسعادة دايما

8:39 AM  
Anonymous Anonymous said...

nice story , rbna ywaf2ak .. bs blash welnabi 7'eft dam 3shan msh kol wa7ed betgi meno ma2bola .. a7ianan betet2al 7abten ..
with all my respect.

4:42 PM  
Anonymous Anonymous said...

علي فكره القصه بجد جميله جدا واسلوبك ظريف جدا وماعتقدش ان فيها او اي استظراف او تقل دم انت تقرب ل (م) الاولانيه ولا ايه؟؟؟؟؟؟؟ لا بجد (ح) دمك خفيف سيبك من النقد الهدام

9:40 AM  
Anonymous Anonymous said...

to7faaaa

enta maskhara.....damak zay el 3asal 3ala fekra,,,we 3o2bal el gamee3....

3:35 AM  
Blogger ROMANTIC ROSE said...

انا مش عارفة ازاي الناس اللي علي شاكلة (ح) دي لسه عايشين ف الدنيا و بيتعاملوا مع خلق الله .. لسه فيه ناس كده فعلا ؟؟ ده والدك ربنا يباركلك فيه موظف حسابات ماهواش عامل ولا كناس .. و لو ان حياتنا كلها تتسمم لو اختفي العامل او الكناس برضه .. كل الوظائف كبرت او صغرت ليها اهميتها و دورها ف حياة كل الناس .. يلا يا استاذ (ح) الحمد لله ان ربنا جبر بخاطرك و جمعك ببنت الحلال .. ربنا يهنيكم و يرحمنا من اشباه البشر .. تحياتي

11:24 AM  
Blogger funckydoctor said...

بتحصل فى أكبر العائلات :D

6:25 AM  
Blogger meroo said...

قصه حلوه اوى ما شاء الله
ربنا يسعدكوا

2:23 AM  
Blogger السيد ( ح ) said...

واحد ميت : الله يبارك فيك ، وعقبال عندكم
مجهول : ما يقتل زيداً لا يمس عمرو وبالتاكيد هو ضروري لبكر
مجهول كمان : ربنا يخليك ويعلي مراتبك كمان وكمان
مجهول كمان وكمان : لا ده انت اللي مسخرة وستين مسخره )) متشكر جدا
Romantic rose : وهيفضلوا معانا لغاية ما احنا نبقي زيهم او هما يبقوا زينا
Funcky doctor : طبعا قصدك ان عيلة ( م ) من اكبر العائلات

3:33 AM  
Anonymous Anonymous said...

و عسى ان تكرهوا شيئا وهو خيرا لكم
بجد قصه جميله و واضح انك شخص كويس علشان كده ربنا رزقك بانسانه كويسه

8:05 AM  
Blogger ahmed_k said...

إسأل عالنصيب
اللي مكتوبالك هي نصيبك
مش اللي تحبها

تحياتي

8:59 PM  
Anonymous Anonymous said...

تسلم ايدك يا غاده على اختيار القصة الرااااائعة دي
فعلا الدنيا فيها العجب واللي يعيش ياما يشوف
تعرض الاخ ح لموقف صعب لو حد مكانه كان اكتئب وانعزل عن الدنيا
بس هوه حط همه فشغله وامن بقدر الله ولم يعترض وبالفعل رزقه الله بابنة الحلال التي تقر عينه
ربنا يسعدهم يااااارب
ما اروع الحياة عندما تجد حبيبك نصيبك وتكمل معه حياتك في حب وود ومشاعر رااائعة
يارب ارزقني وكل البنات بالازواج الصالحين قولو امين

2:16 PM  
Anonymous Anonymous said...

الجملة دى يا سيد لابن العميد مش بديع الزمان ايه معديتش على تانية ثانوى قبل كده مع انك كنت دحيح و اكيد ذاكرت نص جفاء الصديق عموما الف مبروك

11:54 AM  
Blogger TAFATEFO said...

ألف مبروك يا أستاذ ح وربنا يباركلك في الأستاذه م ويكتبلكم دوام السعاده والتوفيق

8:56 AM  
Blogger صانعة الأحلام said...

ممممممممممم
بص انا على فكرة استغربت اوي من موقفها

يعني هي طول معرفتها بيك عمرها ما فكرت انك ابن موظف وان ابوها رئيس قطاع

حاجة غريبة

ولا بقى لما لقت الموضوع دخل في الجد

1:48 PM  
Anonymous Anonymous said...

واللهى انتى انسان جميل
وتستحق كل خير
يا قمر

3:27 PM  
Blogger ليلى تنتظرك said...

والله انت انسان تستاهل كل خير عشان بامانة انت راجل
في غيرك لو حصل فيه موقف زي ده او الدنيا كانت صعبة عليه بيقعد يقفل الدنيا وتسود في وشه ويقعد يقول هند سابتني هند سابتني بس انت بجد انسان كويس وتستاهل كل خير
بامانة اول ماسمعت ردها اتخضيت بجد خضة لان اكيد باباها متولدش رئيس قطاع وفي الاول والاخر موظف حكومي
ربنا يهدي

6:10 AM  
Blogger عاقلة علي ارض الجنون said...

ابتسامه عريضه و نهايه سعيده

ياسمبن

9:24 PM  
Blogger كأنني أنا said...

"الطيبون للطيبات"

وواضح انك طيب أوي :)

ألف مبروك

7:30 PM  
Blogger غزل said...

بجد الحكايه حلوة .. ولو كان ع مين وابن مين .. مكنش ابن البواب اتجوز بنت الباشا .. ماعلينا .. يمكن بالحكايه دي تكون قدرت تثبت لناس كتير ان الغنى غنا الروح والقناعه والعلم ومش غنى المال ..
اسلوبك حلو اوي ..
ادام الله عليك نعمته ووفقك فيها ..

3:11 PM  
Blogger دعوة الفردوس said...

سبحان الله على الأقدار

ربنا يقسملك الخير مع زوجتك
وفعلا قصص الزواج فيها من العجب الكثير

بس رائع اصرارك وتخطيك للأمر بتلك الصوره الايجابية
نسأل الله لك سعادة الدارين

7:15 PM  
Blogger rodi said...

معقول فى كده صدف
بس سيبكوا من دى معقول فى كده ناس
لسه بيقولوا الناس تقول ايه ومنظرنا وبريستيجنا والمستوى المادى والاجتماعى طظ فيهم بلاش قرف
وانت عجبتنى انك نسيتها على طول وربنا رزقك باللى احسن منها لانك مضعفتش ونسيت الناس الهم دول على طول

11:50 AM  
Blogger Dr.Soha Adel said...

هي اللي خسرانه
و اللي يفكر بالاسلوب ده مش بحترمه بصراحه
المهم ربنا يوفقك مع م و تكونوا اسعد زوجين ان شاء الله

9:10 PM  
Blogger another pharmacistaia said...

ربنا يباركلكم

1:38 PM  
Blogger زهرة الاحزان said...

عاجبنى اوى اسلوبك فى عرض قصتك وبصراحة انت ابن حلال واللى عاجبنى انك مستعرتش من اهلك ودة حاجة جميلة اوى يعنى معملتش زى سمير صبرى فى فيلم لة مع فريد شوقى واسعر من والدة لانة عامل بالشركة ربنا يبركلك يارب ويسعدك انت وهية اللهم امين ويخلف عليكم بالذرية الصالحة يارب العالمين

12:28 PM  
Blogger AyA said...

اوك, بغض النظر عن تفاصيل القصة, بس ليه حضرتك شايف انها نهاية حزينة عليها؟ مش يمكن ربنا رزقها بشخص... مش هقول افضل منك لكن هقول يناسبها اكثر منك؟ زي ما م التانية تناسبك اكتر منها؟ أنا مش شايفة ان عشان النهاية تبقى سعيدة لازم نشمت في اطراف العلاقات السابقة, ومش منطقي ان العلاقات يبقى فيها شماتة لأن دي مش عربية هتشتريها, لا دي حياة هتقضيها مع بني ادم, فمش مفروض يبقى فيها مقاييس بالمسطرة لا البني ادم ده احسن لا دي خدت اقل منه لا دي لسه متجوزتش! طيب ما يمكن نصيبها الجاي هيسعدها ويعوضها عن كل السنين دي!!! منين افترضت انها تعيسة؟! ماينفعش اصلا نقارن بين البني ادمين بالشكل المهين ده ومش من حق حضرتك تتكلم عنها بالسخرية دي..... وكفاية انها كانت صادقة معاك مرفضتش وسابتك محتار ايه اللي حصل!

5:37 AM  
Blogger مِتجّدَدَه said...

ههههههههههه دمك خفيف و قصة جميلة و استمتعت بيها جدا .

2:43 AM  
Blogger Amira Mostafa said...

Sob7an allah, sometimes real stories can be even better than movies:)..U deserve the best and I believe she is regretting refusing u now....I'm not against that they refused u (everyone has the right to reject proposals) but I refuse that she spent 6 months with u knowing all and still enjoying being closer to u even if she knows she is gonna hurt u oneday..

4:51 AM  
Blogger lemo said...

اسلوبك حلو اوى بجد
واضح انك شخصية مشكلة (مدح مش ذم)
ربنا يهنيكم ببعض واكيد م الاولى هى اللى خسرتك

5:47 AM  
Anonymous BGY said...

انا احييك جدا انك مستسلمتش للحزن وانك قدرت تكمل تاني , وربنا يباركلك في زوجتك وعيالك

7:10 PM  

Post a Comment

<< Home