بيت العرايس و العرسان

اللي يحبنا ما يضربش نار عندنا

Saturday, February 07, 2009

من أول نظرة

السلام عليكم
إزيك يا برايد
كنت عايزة أفضفض مع حد و أحكيله و مالقتش قدامي غير بيت العرايس فاتحلي أبوابه ..قلت في نفسي طالما
الموضوع - و الحمدلله- ما انتهاش على خير و بالتالي مش هنكد على برايد حبيبتي رفيقة الكفاح ..يبقى
أستعين بالله و أبعته ..و العاقبة عندكم في المسرات


بصي يا ستي..الحكاية بدأت من 3 سنين أول مادخلت شغلي الجديد , سمعتي عن الحب من أول نظرة..
أهو هو ده, من أول مرة شفته فيها كنا كلنا تحت التدريب من غير ما أعرف حتى إسمه طول فترة التدريب ما
عرفتش إسمه لحد ما خلصنا و كل واحد فينا راح في مكان ..في الشركة كل ما كنت باسمعهم بيتكلموا عن حد
ماعرفش هو مين ..لكن باحس أو باتخيل إنه هو ..سنة مابنشوفش بعض لكن حبه بيكبر جوايا يوم بعد يوم


و روحي يا أيام و تعالي يا أيام و اتنقل و اشتغل معاه في نفس القسم و أعرفه و يعرفني..روحي تاني يا أيام و
تعالي تاني برضه ..و أبقى المساعد بتاعه و دراعه اليمين زي مابيقولوا ..نسيت أقول لك إنه شاطر قوي
..شاطر في كل حاجة عشان كده طلع بسرعة و كمان الظروف خدمته


حاولت ألفت نظره بكل الطرق و باستخدام الحاسة الثامنة اللي اتكلمتي عليها لكن مافيش فايده..إتلفت نظره أخيرا
بعد سنة و أكتر و شويه و عرفت منه إنه كان حاسس بكل حاجة من زمان و إن كان فيه في حياته قصة حب فاشلة
هي اللي خلته مش بيفكر أصلا في الموضوع


و في لحظة واحدة و كأنه حلم لقيت الدنيا كلها في إيدي و لقيت نفسي حبه الحقيقي و الوحيد و قاللي إنه كان دافن
نفسه بالحيا و إزاي حرم نفسه طول المدة دي من السعادة الحقيقية و اللي بتتمثل فيا أنا..و إنه طبعا عمره ما حب
قبلي و إنه كان متهيأله إنه مش هيحب أبدا لحد ما قابلني و عرف إني أول و آخر حب في حياته و بسرعة
قويييييييييي جاب أهله و دخل البيت ..مش قادر يعدي يوم و هو مش جنبي فيه



و بسسسسسسسسسسسسسسسسسسسس


المفاجأة بأه إن مامته رفضت الجوازة كلها لأسباب وجيهة جدا




أولا: إني قدمتلهم شاي و جاتوه مع إن المفروض إني أقدملهم عصير



ثانيا:كان فيه دبانة مضيقاها في القاعدة - و مش هي دي المشكلة- المشكلة إني قمت فتحت البلكونة عشان
أطردها فكان تعليقها : فيه عروسة في الدنيا تقوم و "تتمشى" و تفتح البلكونة؟




ثالثا: إن بيتنا تحته قهوة بلدي يعني أكيد أنا مش متربية - ده باعتبار إنهم لاقوني على
الناصية- ..
تفتكري يا برايد لو كانت كافيتريا ولاد و بنات كان هيبقى رأيها إيه؟



رابعا: و السبب الأهم ..إني كنت لابسه طويل و مقفول و ما كانتش عارفة تشوف مني حاجة -وجهة نظر
برضه



و دارت الإسطوانة المشروخة :


آسف يا حبيبتي ..أهلي و ما أقدرش أخالفهم

عرفت بعدها إنهم خيروه بيني و بين الشقة و العربية فاختار الأغلى طبعا و البنات على قفا مين يشيل
و روحي يا أيام و تعالي يا أيام تاني..رجع


وحشاني و مش قادر أستغنى عنك و مش قادر أسيبك ..لكن جواز مش بإيدي يا روحي و مش عارف أعمل إيه
؟..و هاموت نفسي عشان أرتاح و إحساسي بالعجز مش مخليني عارف أبص في وشك


و في عز ما الإسطوانة دي شغالة و أنا باموت نفسي من الحزن و القهر عشانه و عشانيربنا يقدر إني أقعد على
جهاز الكومبيوتر بتاعه في مره عشان أطلع شغل من عليه و ألاقي الماسنجر بتاعه مفتوح و ألاقيه بيكلم مين؟..
أعز صاحباتي و بيقولها إنه عمره ما حب غير حبيبته الأولانيه و إنه بس كان مشتاق لإحساس الحب و ساب نفسه
يعيش معايا و إني أنا اللي غاوية أعذب نفسي عشان أنا لسه بافكر في الموضوع و هو خلاص الموضوع بالنسبة له
إنتهى و إن مافيش حد بيضحي عشان حد و لا بيتمسك بحد ببلاش و إنها لو دورت ورايا أكيد هتلاقي مصلحة من
تمسكي بيه كان نفسي أتشل قدام الجهاز أو أتعمى و ماأقراش باقي الكلام..قعدت بعدها يومين مش بانطق في الشغل و كل ما
يسألني مالك يا حبيبتي أبقى عايزة أنفجر في وشه و أدمره لكن أبص ألاقي نفسي ساكته لحد ماقدرت ألم نفسي و
أواجهه باللي شفته و أنا نفسي يكدبني و يقوللي إنتي فهمتي غلط حتى لو بالكدب..تصدقي كان نفسي أصدقه حتى
لو كدب عليا..لكن لاقيته إتحول تحول الديناصورات ..طلعني ما اتساهلش و إني باتجسس عليه و هو غلطان
إنه حبني و إن أنا اللي جرحته و بعته و إنه مش هيسامحني طول حياته



ما عادش فيه حاجه جوايا ما اتكسرتش بسببه
ما عادش عندي حاجة ما خسرتهاش بسببه



معلش طولت عليكي بس كنت محتاجة مكان أفضفض فيه ..من 4 شهور و أنا مش لاقيه المكان ده ..و الحمد
لله إني لاقيته هنا في بيت العرايس



أختك المقهورة : ضي

75 Comments:

Blogger ايوشة said...

يااااااااااااه كل ده تعرفى الانسان اللى زى ده مش تزعلى ليه انا يمكن هكون معاكى شديدة شوية بس هوا فضل المركز والعريبة عليكى استمرتى ليه فى حبه كان المفروض اخدتى موقف سريع بعد الرفض اللى حصل كرامتك فوق كل شى وموضوع اتجسستى عليه هوا فيها بصراحة عنده حق بس دى حاجة من عند ربنا تعرفك حقيقته
اياكى فى يوم تزعلى على الموضوع ده اعتبريها تجربة اتعلمتى منها واللى جاى احسن بكتير ربنا دايما بقدر الخير وانتى نفسك بعد فترة ان شاء الله لما يكرمك بانسان يقدرك فعلا هتتندمى على الايام اللى ضيعتها فى حبه خليكى قوية دايما دى الحاجة الوحيدة اللى هتخليه يرجعلك ويطلب السماح وساعتها انتى نفسك هتكون مش عايزه
بتمنالك كل خير وربنا يوفقك ويكرمك بالانسان اللى يقدرك بجد

6:25 PM  
Blogger تخاريف الغضب said...

يااااااقول المؤرخون

نحن لا نختار من نحب
ولا نحب من نختاررر

ويقول احسان ما الحب الاول الا وهما كبيرا


وانا بقول ازعلي عليه لانه خسرك

وقديما قالت الناس

نادوا الرجاااااااال
فلم يجيب احداااا

6:47 PM  
Blogger MaNoOoSh said...

والله يا ضى دة واحد واطى ميستاهلش تضيعي عليه فترة حداد اكتر من كام يوم.
واوعى تقولى ان معدش عندك حاجة مخسرتيهاش ولا متكسرتش بسببة
لا صدقينى لسة عندك صحتك وعقلك وقلبك اللى هتلاقية يفيض بكل الحنان مع الانسان اللى يستاهلك ويقدرك حتى اكتر من نفسك
عامليه كانه نكرة واضحكى فى وشة ولا كان حاجة حصلت لان دى الحاجة الوحيدة اللى هتحسسه انه ميسواش حتى انك تحزنى عليه
تحياتى وربنا يوفقك

8:46 PM  
Anonymous Jemimah said...

ضى يا بنتى

أنا جيجى صاحبة قصة علبة سجاير ومش عندى حاجة أقولها لك غير خلاصة تجربتى وهى طظ كبيرة جداً جداً فيه وفى أشكاله وأنتى بقى اتعلمى الكلمة الخالدة عيش ندل تموت مستور عشان الدنيا كلها بقى 99.9% منها حثالة وزبالة فكرى فى نفسك وبس وسيبك من الحزن على واحد واطى زيه عشان هتضربى نفسك بالنار قدام لما تفتكرى إنك ضيعتى دقيقة واحدة مع زبالة زيه
سامحينى فى ألفاظى بس أختك مقروصة زيك وأكتر

12:01 AM  
Blogger صمت المكان * صخب الكلام said...

ما هذا أننى أول معلقة على القصة
تصدقي يا بريد أنا نفسي أعرف انتى بتجيبي القصص أزاى و الناس بتراسلك أزاى؟
المهم بقى نيجي لصاحبة القصة
شوفي مش هقولك أنه شخص مش يستاهلك لانها حاجه معروفه لكن أنت غلطتي لما شفتي مامته بالشكل ده و مع ذلك أتمسكتي بيه
و في كمان نقطه تانيه إلا يتخلى عن حببته_ زي ما بيقول_ عشان شقة و عربيه يبقى لا يمكن يكون بيحبها و مع ذلك أول ما رجع لك تانى وافقتي ترجعي له و دي كانت تانى غلطه ليكي نيجي بقى لتالت غلطه أنه راجع من غير ما يكون فى اي مسئوليه هيتحملها و لا جواز يعني و مع ذلك قبلتي ترجعي له تفتكري بعد كل ده هيعمل معاكي ايه اكيد هيحس انك مدلوقه عليه و بالتالى هيستغل الموقف و قد كان
نصيحه مني متسلميش قلبك لأني راجل حتى لو قالك بموت فيك و هتجوزك حالا.
سلام يا قمر و خيرها في غيرها

1:13 AM  
Anonymous Anonymous said...

ايه يابنتي الغلب ده
انتي كدة متعلقة في حبال الهوي الدايبة
لازم تنتقلي من القسم اللي بسلامتة شغال فية وتبتدي تدوري علي انشطة جديدة تعمليها في حياتك دراسة دبلومة ولا ماستر كورسات لغات
نشاط اجتماعي خيري رسالة مثلاً بتشغل وبتخرج الطاقة اللي عند الواحد
تحفظي قرآن وتدرسي علوم شريعة
يعني لما تشغل نفسك هاتبطلي تفكري فية وفي ندالتة وتدي نفسك فرصة تنسية شوية لغاية منتسية خالص
المشكلة ان كل واحد بيعدي علي القلب ويروح بياخد معاه حتة من قلبنا ويسيب مرارة
ليه صديقة بتقول ان احسن طريقة تنسي بيها الحب انك تتدخلي في حب جديد لكن مش دايماً دي طريقة فعالة وبرضة الجديد زنبة ايه
حاسب من الأحزان وحاسب لها
حاسب علي رقبيك من حبلها
مش انتهت ولابد راح تنتهي
احزان كتير قبلها
عجبي

3:11 AM  
Blogger hasona said...

السلام عليكم

طيب في اعتقادك - نهاية الحب ده ايه ؟؟ اذا كان الزواج مش نافع
حب وخلاص
،،،
هو الحب الاول كده
بنتمسك بيه لدرجة كبيرة - لكي يكبر وينمو - حتي لو غلط -حتي لو مش حب حقيقي
وبعد فترة نحس باننا لم نملك العقل الكافي وقتها
،،،
هو بيقلب الموازين
الضحية أصبح هو الجاني

3:50 AM  
Blogger مهندس مصري said...

معلش و لو إن كلامي ده حيزعل

يعني إيه بتحبيه من غير ما تعرفيه
و بعدين بتلمحي له لمدة سنة و بتحاولي تلفتي نظره ليكي

يعني هو حس إنك معلش في الكلمة مدلوقة عليه

فلما الجوازة ما نفعتش قال في عقل باله أهي تسلية كويسة

إنتي المفروض ما دام الجوازة إتفشكلت كان يبقى تعاملك معاه رسمي و بس

و المفروض ما تدلقيش نفسك على حد ما دام مفيش خطوبة
و حتى في الخطوبة فيه حدود للكلام و التعامل لحد ما تتجوزوا
ساعتها بس يبقى مفيش قيود و لا حدود في المعاملة

معلش يمكن كلامي ناشف شوية
بس دي نصيحة لوجه الله

إفهميها كويس و لو ما عجبتكيش إرميها البحر

3:57 AM  
Blogger وومن said...

يا خبر علي رأي برايد هو مفيش رجالة بتاخد مقالب أحنا بس اللي بنشربها

مش هاتصدقي انا متعاطفة معاكي قد ايه
تقريباً مريت بنفس القصة مع الفارق اني عرفت إن الأستاذ بيخوني وأمتي قبل ما نلبس الدبل رسمي بكام يوم

بس الحمد لله شطبتة من حياتي ونسيت السنين اللي ضيعتها وانا معاه وشوفت شغل تاني وكملت

الدنيا مش بتقف عند حد ولا علي حد ودي نعمة

صدقيني إن شاء الله ربنا هايعوضك في الوقت اللي مش مستنية تعويض

افتكري دايماً الآية الكريمة " ولسوف يعطيك ربك فترضي "

مش عاوزة اطول عليكي بس فوضي امرك لله واحمدية تخيلي واحد زي ده ازاي كان هايبقي ابو ولادك لا قدر الله مثلاً

6:22 AM  
Blogger عاشقه وغلبانه said...

مش لاقيه حاجه اقولها
بس كتير بنتصدم في ناس ونلاقي الحقيقه غير اللي كنا شايفينه او فاهمينه
ونلاقي الناس فجأه بنتغير
وبنتصدم
وبنزعل
بس لا قدرين نرجع الايام علشان مانحبهمش
ولا قادرين نسرع الايام علشن ننساهم
هي صدمه هاتروح بالزمن
ده اللي اقدر اقوله

تحياتي

7:33 AM  
Blogger إيمان said...

بصى هقولك كلام أنا متأكده منه ومجرباه وشفته بعينى وبقلبى .... لو أنتى فعلا إتظلمتى لازم لازم هيجى يوم وفارس الأحلام الهمام هيجى على حصانه الأبيض ويخطف قلبك
.... بس الأول قبلى متطبى فى حبه لازم هو يبين كرامه... المشاعر شيئ غالى قوى متفرطيش فيه ابدا وأوعى تيأسى ولا تفتكرى إن كل الرجاله كده إنتى بس حظك مش تمام زى بنات كتير ... ربنا يوفقك وتانى مره خليكى مصحصحه أكتر
تحياتى ليكى إنتى وبرايد

7:49 AM  
Blogger daktara said...

قصة حب مشروخة
لا تختلف عن الاسطوانات المشروخة اللي كان بيقولها

انظر حولك
د. خالد عزب

12:44 PM  
Blogger Hook said...

الحمد لله انكي عرفتيه على حقيقته...و ربنا يوفقك و يوفقك الجميع ان شاء الله :-)

1:13 PM  
Blogger Scopy said...

لا حول ولاقوة الا بالله نهاية الزمان ده انسان واطي و والدته متخلفة
ومش هقول الا كلام الرسول عليه الصلاة والسلام البر لا يبلي والذنب لا ينسي والديان لايموت افعل يا ابن ادم كماااااااااا شيئت كما تدين تدان

7:56 PM  
Blogger Rozza!.......فاقد الذاكرة said...

ما شاء الله شكلي اول شب اعلق على القصة
شوفي يا ضي
الطيبون للطيبات, وانتي شكلك بنت حلال عشان هييك اعرفتيه على حقيقته, لانو كل حجج والدته كلام فاضي بلا شاي بلا عصير هي جاي تشرب ولا تخطب
انسيه لان الله ان شاء الله بيعوضك الافضل
وهو اصلا لو بيحبك ما سابك
بس الي شايفه بهالزمن انو الشب الكويس بيوقع مع البنت الوحشة
والبنت الكويسة بتوقع مع الشب الوحش
انسيه وما تعبرهوش, لانو اصلا لو فيو اصل مكانش اعد يحكي مع صاحبتك عنك!!!!

12:15 AM  
Blogger Lyssandra said...

معقول في كده ؟؟

لأ في كده وألعن

بس المشكله انه ازاي نكتشف خبث وبشاعة الآخرين اذا هما ارتدوا أثواب ملايكه وحلقوا في أحلامنا بأجنحه بيضا ؟؟

يعني بلاش نثق في حد ؟؟

طيب لو مش بيحبك ولسه متمسك بحبه القديم جه وأهله لعنكوا ليه ؟؟

وبعدين إيه مامته دي ؟؟
دي تعبانه ولا حاجه ؟؟

واللي مامته كده بقي يبقي شكل عقليته إيه ؟؟

حاجه تفرس بجد

بس ربنا أنقذك منه

صحيح كلنا هانقول خيرها في غيرها والحمد لله ان الأمر عدا علي خير ومش ارتبطتوا والكلام ده كله

بس اللي بيحيرني أصلا
ليه بنبقي بنوايا طيبه وبرده نتخدع ؟؟
ليه أصلاً نتعرض للألم ؟؟

:(

...

ربنا يعوضك أحسن منه ألف مرة
وبصراحه بتمناله من قلبي
من صميم قلبي

.
.
.
.


يندم

4:01 AM  
Blogger Heba said...

ياااااااااااااااااااااه, إحساس صعب قوى, ربنا يكون فى عونك

5:19 AM  
Blogger Dr.Online said...

اتأثرت جدا بقصتك و اسلوبك

و مش عاوز اعلق عليه عشان انا ممكن اشتم

بس فيه حاجه عاوز انصحك بيها

متخليش حد يلبسك الطاسه

يعني انتي بتقولي انك واجهتيه لكن بترجعي و تقولي انه طلعك غلطانه ووووو

طبعا كلامه مش منطقي و اهبل

ليه تعديه..... خدي بالك انك في الشغل معاه و الكلام بيتنقل متخليش الكلمه الاخيره له خصوصا انها كلمه غلط و لازم تركبيه الغلط

صح؟

2:05 PM  
Blogger bent 3rab said...

عسى تكرهوا شئ وهو خيرا لكم. انا عارفه انه لو نصحناك من اليوم لبكره ماراح يخفف الغصه التي في داخلك, ولكن هي الدنيا كده يوم حلوا وستين الف يوم زي الزفت , لكننا كلنا نعيش علشان عيون ذالك اليوم الحلو. ربنا يذوقكي ايه عما قريب يارب.

3:36 PM  
Anonymous hayssam said...

اصعب حاجة في الدنيا لما تدي حبك و مشعرك لحد ميستهلش بس اعرفي حاجة واحدة ان ربنا لايكلف نفس إلا وسعها يعني انت اد التجربة و حتستحمليها و حتعدي إن شاء الله و عموما حكاية الارتباط بتفكرني بقصة موسى و الخضر ساعات بنحزن على فراق حد أو بنحزن على تأخر حدوث شيئ مع انه يمكن تاخره ده هو الخير بعينه انا عارف الكلام سهل بس احنا في الدنيا مش الجنة عشان تبقى كل حاجة سهلة

11:03 PM  
Blogger Khokha said...

قطيعة محدش بياكلها بالساهل

ده اللى هتقوليه يا ضى يوم ماربنا يعوضك خير بعد المقلب ده إن شاء الله

متزعليش عليه ولا حتى تفكرى تعيشى فى ندم عالوقت اللى راح معاه لإنه أكيد من وراه خير برضه وهو انك اتعلمتى درس غالى كلنا سبقناكى واتعلمناه

اه بيروح فيه من وقتنا وعمرنا ...سواء كتير او قليل...بس بييجى يوم وبنعرف قيمة الدرس ده
لإن الشىء بالضد يعرف....ومادام قابلتى الوحش يبقى أكيد هييجى يوم تعرفى الشىء الغالى اللى حلو من جوة زى برة ...ومعرفتك السابقة بالرخيص هتخليكى تقدريه أكتر وتحمدى ربنا عليه اكتر وأكتر

بس اصبرى...وادعيلنا جميعا بالصبر لحد ما ربنا يكتبلنا موعد لقاؤه

قولوا آمييييييييين :))

11:51 PM  
Blogger dody sam said...

بصي يابنتي
خديها نصيحه مني
الواطي هيفضل واطي
المفروض انك تزعلي علي صاحبتك اللي هيتغرغر بيها وعاملي فيها عم المضحي والمتفاني
وبعدين حما ايه دي والنبي اللي مراقبه الدبانه
ولا هدومك التقيله
نفضي يابنتي

12:54 AM  
Anonymous Anonymous said...

HA2OLK EIH YA DAI, RBNA Y3AWADEK A7SAN MNOH ALF MARA WE YEGY YOM TD7AKY FEH 3LA ENK KONTY 7ATA T3RAFEH. ANA 3ARFA ENOH E7SAS SA3B BGD ENK T7BY 7AD WE YTLA3 MAYSTAHELSH. SADA2INY ANA GARBT
E7SASK WE KONT BAZ3L MN NAFSY AWY LMA A7ES ENOH WA7ESHNY BAS N3ML EIH YA 2AMR EL DONYA LAZEM TMSHY ;)

4:10 AM  
Anonymous Anonymous said...

و لا تزعلي عليه
دهفعلا كلب و راح
و لا حتى يسوى انك تفكري فيه

5:42 AM  
Blogger علياء said...

السلام عليكم ورحمة الله وبركاته
أعتقد إن الغلطه من البدايه
من أول ما حاولتى تلفتى نظره ليكى بكافة الطرق فعلا كده تقلى في نظره
تانى شيء
ليه تقبلتى حبه ليكى تانى بعد إعتراض مامته واللى قالته
وبعد ما قالك سورى
طب ازاى تطيقي ترجعى تانى
هل بتثأرى لنفسك
طب وإيه كان العمل طالما مامته رفضتك؟
كنتم هتتزوجوا ازاى

5:53 AM  
Blogger Sarah el eskafy said...

احمدى ربنا انه نجاكى منه
دى العيلة كلها معاقة يابنتى
قدر الله وما شاء فعل

7:39 AM  
Anonymous Anonymous said...

السلام عليكم يا اخت ضى احمدى ربنا انة خلصك منة هو ميتهلكيش اصلا لكن اسمحى لى بصراحة انتى رخصتى نفسك وزى ما قال احد الاخوة انك كنتى مدلوقة علية الراجل بيحب البنت الغالية يعنى البنت الى يتعب عشان يوصلها ودى تنفع مع الرجالة الى مش سهلين يعنى الرجالة الى لفو ودارو كتير اما الرجالة المحترمين والغلبنين هما الى ينفع معاهم الاسلوب الى اتبعتية مع الانسان الندل الى كنتى حترتبطى بية

5:45 PM  
Blogger emos said...

والله يا بنتى هو من ناحية انه يختار العروسه ولا الشقة و العربية يبقى اختياره كان صحيح 100% انتى بقى اللى اخترتى غلط لانة ده واحد اهلة بيتحكموا فيه
سواء مامتة وافقت عليكى ولا موافقتش
لو كانت وافقت كنتى هتدخلى فى حوارات العفش اللى هيتجاب على مزاجها و كلام الحموات اللى كلنا عارفينه
على العموم انتى ربنا انقذك منه من ساعت لما مامته موافقتش بغض النظر عن اللى حصل بعد كدة
و ربنا يرزقك باللى يستاهلك ان شاء الله

12:25 PM  
Anonymous Anonymous said...

انا معنديش غير رد واحد
يا مأمنه للرجال يا مامنه للمايه في الغربال
وشكرا

5:22 AM  
Blogger moony said...

حبيبتى ضى انتى اغلى من كده بكتييييييييييييييير,انتى بس اسمحيلى اللى اخترتى غلط..
اذا سمحتيلى عايزة اقولك متضيعيش ثانية تفكير تانى فى الموضوع ده حتى بينك وبين نفسك,واوعى واحد زى ده يلعب باللى جواكى تانى,, ان شاء الله ربنا يعوضك باللى يستاهلك ويلملم جراحك, ومتقلقيش ان شاء الله جراحك دى كلها هتروق وهتبقى ذكرى صغنتوتة كل فين وفين اما حاجة تفكرك بيها ,مرة قريت مقوله وصدقتها بعدين "ما كان يوما حزنا, اصبح الآن سلاما" أحزانك دى وان كانت دلوقتى كبيرة قوى بكرة تصغر بس انتى ابعدى عنه وعن اى احتكاك بيه او بأى حد او حاجة تبعه, لأنك اغلى واصدق من كل ده بكتييييييييييييييير خالص تحياتى.ويسعدنى التواصل معك.

7:36 AM  
Anonymous Anonymous said...

تصدقى ياضى انا حصل معايا موقف شبه دا واهله برضوا قالوا مش هنساعدك ماديا لو كملت فى الموضوع دا وكان السبب عبيط زى الاسباب دى وسمعت نفس الاسطونة اللى اتقالت وقال يعنى الواد منهار وباخد مهدئات انا قولت ياضنايا الواد هينتحر تصدقى يومين وكان بيعاكس على الفيس بوك يا اخونا حد يقولنا الرجالة راحت فين انا اخر شاب سألته قالى الرجالة غرقت فى المصيف والحكومة مخبية عشان متعملش قلق يقولناطيب عشان مندورش ونتعب نفسنا
غادة

9:48 PM  
Anonymous Anonymous said...

حبيبتى ضى
انا كمان مريت بحاجة شبه كده مع انى كنت ماشية معاه بما يرضى الله من غير مقابلات و لا اى شئ بعد ما اتعرفنا بالصدفة و قال انه عايز يتقدم و تسبب فى رفضى عرسان كتير لانى قدرت ما كان يقال عليه مجازا حبه ليا و تدينه ، و تسبب فى تعلقى به ابتدى الكذب و التسويف و ست شهور * اربعة غيرهم و بابا بيموت و ماما اتكسحت لمجرد تقديرى لظروفه
و النهاية كلمة مستحيل ارتبط دلوقتى
و لقيت الحل طبعا ربنا بيحبنى و بيحبك علشان انقذنا و الصبر و الصلاة كتير و الدعاء و دعيت عليه لمجرد ان ربنا يستجيب دعائى و ينتقم منه فيعرف ان الله حق و ان بنات الناس مش لعبة
و اتبعى نصيحتتى ابتسامتك تفقده متعة الشعور بالنصر و تعاملى معه كانه حبة هوا بارد عدى و ما اثرش فيكى ابدا ابتسمى و اضحكى و قولى انه ندل اتجوز واحد ندل ؟
mandolen 80

10:55 AM  
Anonymous Anonymous said...

مش عارفه أعلق
انت بتحكي قصتى مع الفرق انها حصلتلي مرتين مرتتتتتتتتتتتين
انا بقى اعمل ايه
الأكتئاب خسسني النص
ربنا يصبرنا جميعا
بس انا نفسي اعرف ليه كده محدش عايز يتحمل المسئولية من معظم الشباب ؟؟؟؟
ليه ليه ليه
دلوقتي انا ولا عايزة حب و لا حاجة لانه ده للأسف مش زمنه
زمنه من سنين فاتت
دلوقتي بقت المصلحة و انا وما بعدي الطوفان
حائرة........

11:13 AM  
Blogger ROMANTIC ROSE said...

زي كل الافلام العربي .. تطلعي ف الاخر انتي المذنبة الشريرة مع انك يا ولداه انتي اللي متقطعه من الغدر و الخيانة .. حسبي الله و نعم الوكيل .. هوني علي نفسك و ربنا يرزقك بسيد سيدة :) تحياتي

12:41 AM  
Anonymous Anonymous said...

احمدي ربنا انك اكتشفتي الحكايه بدري بدري
قبل ما يضيع من عمرك خمس ست سنين وتتحصري وتكرهي الرجاله وتحلفي ما تعرفي راجل تاني ولاا جواز ولاا غيره بلاهمممممم

4:08 PM  
Blogger زوجة عنيدة said...

عزيزتى


انا مش هواسيكى واقولك كلام كتير على ان الصابرين على خير بس انا هقولك قصة حقيقية يمكن تصبرك على اللى حصلك

انا اتخطبت لاء وكمان اتكتب كتابى على شخص فى محيط الاسرة وكان قمة فى الحب والكلام المعسول وحبيبتى ونور عينى والخ الخ...............
ومرت ايام بس الحمد لله مش طويلة اوى
وعرفت حقيقتة انه كان طمعان فينا وفى شغلى ومرتبى _مع انا مش ضد ان الزوجة تساعد زوجها لكن برضاها_المهم دة مش موضوعنا.
وتوالت الاحداث والمفاجات وتم طلاقى قبل زواجى
ومثلما اخذت لفب زوجة على الورق اخذت لفب مطلقة على الورق

ولكن

قلت لكى الصابرين على خير

الحمد لله انا الان زوجة لزوج احمد الله اننى اصبحت زوجة له _بس الحياة مش على وتيرة واحدة اكيد بيحصل خلافات_ وانا عروس جديدة منذ شهر ونصف

وافتتحت مدونة جديدة لآروى فيها نوادر الزواج
واستفيد من الاخرين

وعقبالك قريبا ان شاء الله
تحياتى ليكى

2:29 PM  
Blogger barbie girl said...

مينفعش تزعلى عليه ولا ثانية بالعكس تصرفه دا المفروض يقويكى .. دورى على مصلحتك وشوفى حياتك بشكل صح وكبرى نفوخك

5:38 AM  
Blogger سكينة said...

بعد الشر عنك من القهر
الحياة مليانة أندال كون ربنا عثرك بواحد منهم فدي رحمة عشان تقدري نعمة البعد عن كل غير المناسبين
مكانش لازم تصارحيه ولا تديه فرصة يطلعك غلطانة هو انتي لما ترمي حاجة بتقفي تقوليها سبب أنك بترميها
يلا علقة تفوت ولا حد يموت بكره ربنا يعوضك وأجر الصابرين بغير حساب
ثلاث بوسات من طنط سكينة

12:58 PM  
Anonymous Anonymous said...

انا لو منك بعد ما قرأت الكلام ده ولا كنت عبرته اصلا ولا اتكلمت مع بني ادم زي ده تاني ولا حتى عاتبته

مش اقوله قرأت وشفت ومستنياه يكدب اللى قرأته

ربنا يجبر كسرك ويرزقك باللى يستاهلك لانه ده مايستاهلش

5:54 AM  
Blogger mosooz said...

دى حاجة فعلا ممكن محصلتلكيش انتى بس
ولكن حصلت لناس كتير جدا..والمجتمع بيعانى من كدة
ومن الافضل عدم الاتجاة الى الطريق دة...والنظر الى طرق اخرى

فهذة الطريقة اثبتت فشلها..من جميع جوانبها...فلو فترضنا ان فى 1%كويس
فيوجد 99% مش كويسين

ومن السهل اوى انك تقعى فى 99 %

7:44 AM  
Blogger محدش بيموت ناقص حلم said...

الراجل ده فصه اسود

وزمته خربانه

قوليله بالسلامه

6:10 PM  
Anonymous مصطفي ريان said...

معلش يعني كل اللي انتي حكتيه بياكد حاجةواحدةانك غلطانة
مافيش حد يحب حد كدة من اول نظرة انتي ماتعرفيش حاجةعنه علشان تحبيه
ومافيش حاجةاسمها افضل مستنياه اكتر من سنة وافضل امنى نفسي بحاجات في دماغي انا لوحدي بس
ثم حتى لما امه رفضتك وهواختار الشقة والعربية وفضلهم عليكي كان لازم تعرفي انه انسان مالوش شخصية وبيلعب بيكي
انتي اللي عملتي كدةفي نفسك
والصح انك تنسيه وتقطعي كل علاقتك بيه

12:44 PM  
Blogger الباز أفندى said...

مش قريت غير الموضوع

ياعنى ماقريتش التعليقات

بس احب اقول

فين بقا المشكله؟

حد اكتشفتى انه كداب

يبقا مع السلامه

حد اكتشفتو انو دلدول

يبقا المركب اللى يودى

حد طلع ولا يسوى

هيفرق معاكى فى ايه


**

مع ملاحظة ان كل قصه فى حياتنا مؤلمه بتعدى بتسيب فينا اثارها وخبراتها
ياعنى ناخد الجزء الاْيجابى فى الموضوع اللى هو انك اتعلمتى درس جديد فى الحياه

1:40 PM  
Blogger ليلى فى عالم ادم said...

صحيح وحش ان الجوازة تبوظ
لكن وحش كمان انها تكمل



تعالى عندى مدونتى واقرى بوستاتى وانت تفهمى قصدى

2:16 AM  
Anonymous Anonymous said...

اولا السلام عليكم انا صاحبة القصة من اول نظرة
ثانيا اشكركم جميعا على ردودكم ونصائحكم الغلية
اشكرك يا برايد على دعمك المعنوى وربنا يخليكى للمقهورين
ثالثا بقى احب اطمنكم جدا
دلوقت خلاص كل واحد فينا فى وادى يعنى سبت الشغل واحتمال كمان اسافر قريب واسيب البلد كلها
الحاجه الوحيده اللى انا متاكده منها دلوقت ان لو فيه حد ندمان يبقى انااااااااااا بكل شجاعه ندمانه على كل كلمه ولحظه وعلى حتى مجرد التفكير
والشئ الوحيد اللى اتعلمته ان اللى بيدى كل حاجه مش بيفضله فى الاخر الا الندم عشان يعض فيه
كلكم اجمعتم انى انا اللى عملت فى نفسى كده وانا اؤيدكم فى هذا الراى
ومن هذا المنطلق قررت انى مش هدى تانى ابدا ادعولى اقدر

1:37 AM  
Blogger هرطقة said...

فرضا كدة انك ماكتشفتيش خيانته
وبعدين
هل كنتى هتفضلى تحبيه ومتشعلقة بيه على الفاضى؟!!
أصل حتى لو مش بيخون.. دا مش راجل أصلا
يعنى الأهل ليهم النصيحة
لكن سخص طول بعرض كده, ومستنى مامته توافق على الجوازة ولا لأ
واخد لقب راجل بتاع ايه لامؤاخذة
وده قبل حتى ما يضغطوا عليه ويقولوله شقة وعربية

2:22 AM  
Blogger عبد من عباد الله said...

فيه حاجه غلط !!!

و المشكله اني بسمعها في معظم قصص الحب كدا : ( حبيته بطريقه فظيعه و الحياه من غيره ملهاش طعم و بقى هو كل حاجه في حياتي و مش بنام غير اما اكلمه و و و ... ) و بعد كدا سابني و الدنيا ما بقاش ليها طعم و حياتي بقت سوده و مفيش نقطه بمبي حتى و تستمر الحكايه و هكذا ....

مش عارف ليه حاسس ان المعادله فيها حاجه غلط ، ما هو يعني ايه احب حد كدا و يبقى هو كل حاجه في حياتي بالسرعه دي و من اول نظره و يقلبلي حياتي و تبقى حياتي متوقفه عليه و هو كل حاجه ؟ يعني ايه ازاي يعني ؟!

بعيداً عن اللي حيقولي الجمله المشهوره ( معلش اصلك انت مجربتش الحب دا ) ههههههه اه فعلاً مجربتهوش لانه مش داخل دماغي لان دا علشان يحصل يبقى حاجه من الاتنين :

- يا اما انت معتوه و ماشي تحب على نفسك زي ما بيقولوا و قبلت حد شكله كدا حلو و طريقه في الكلام جميله و قريب لصوره شريك الاحلام اللي في بالك فرحت حبيته بقى و قولت ادي الشغل حقه و احب باخلاص و اموت شهيد من اجل الحب ههههههههه ( الكلام فعلاً بيضحكني من ساذجته الرهيبه ) و في الحاله دي حقولك يا اما تروح تتعالج او الدنيا حتخليك انسان ناقم على الحياه و كلامك حيبقى فيه من الجمل بتاعت ... مفيش حب خلاص دلوقتي .. كل واحد بيحب حد علشان مصلحه .. الحب دا كان زمان و انتهى .

- يا اما تكون للأسف انسان سحطي جداً شفت حد عجبك و جاي على هواك و كلمتين حب على اغنيتين من عمرو دياب و حته لكاظم على كام رساله رقيقه و سته ميسد كول في اليوم و الحياه تبقى ميه ميه يا معلم .. ( لذيذه الناس دي و الله ) و تفضل تقول فعلاً الحب بيغير الانسان يا جدع و بجد الحب دا اللي بيبني البيوت و يخليها تستمر لسنين و تفضل مقتنع ان اللي انت عايش فيه دا هو الحب اللي محدش يعرفه في زمانا دا و انت بس اللي عرفته ( الف مبروك ) .. و للأسف النوع دا بقى منتشر دلوقتي .

10:45 AM  
Blogger 77Math. said...

حقير

3:07 PM  
Blogger عبير بنت النيل said...

تاثرت بقصتك ياعزيزتى جدا

9:34 AM  
Blogger MǿиY El-Shreef said...

مايستهلش والله كل الي انتي فيه ده

من اول ما مامته قالت ده كله

الست دي اكيد في حاجه ف دماغها والله

انا مش هقولك ياريتك كنتي خدتي بالك وكده

كل حاجه قدر .. بس من دلوقتي ابقي بصي كويس للي هتحبيه وصدقيني اربع شهور حزن .. كتييييير عليه اووووي

4:41 PM  
Anonymous تحياتى لمن دمر حياتى said...

يااااااااااااااااااااااه دا احنا طيبين اوى اللهم عليك بالرجاله ومن عاونهم

4:53 AM  
Anonymous Tamer M. Fawzy said...

استغفر الله العظيم
ده انسان مريض

قولي الحمد لله ان الجوازة ما كملتش و اشكري ربنا

8:58 AM  
Blogger hoba habhob said...

بصى يا ضى محدش بيتعلم ببلاش ويمكن ربنا حطك فى الموقف ده عشان تاخدى بالك من الناس ومن التعامل معاهم بعد كده ومفروض لما سابك عشان شقه ولا عربيه مكنتيش ترجعيله ابدا لان ده انسان غير جدير بيكى واحمدى ربنا ان الست هنم والدته بوظت الموضوع مين عارف لو كنتو اتخطبتو كان هيحصل ايه هو جرح كبير انا عرفه بس مسير الايام هتداويه وتلاقى اللى يحبك بجد ويعوضك اما صاحبنا ده ربنا هيجازيه بافعاله

5:02 PM  
Anonymous Anonymous said...

حبيبتي ضي..بصراحة هيدا مش رجال أصلا..وبعرف أنو الحب منو بئيدنا بس انتي حبيتي شخص تاني بنيتي صورة مثالية ألو بخيالك..اعتبريه مات وشوفي حياتك وانا متأكدة انك رح تلاقي أحسن منو بألف مرة..رجال آخر زمن والله
أختك سوسو

5:14 PM  
Blogger sad lady 99 said...

ياما فى قلوب مجروحه ومافيش حد حاسس بيها

8:45 AM  
Anonymous Anonymous said...

السلام عليكم

والله أنا شايف إن ديه تجربة بعتهالك ربنا علشان تستفيدى منها وتطلعى غلطاتك ومتكريرهاش
وبلاش تتعقدى زى مانا شوفت من أخوات

يارب تكون نصيحة خفيفة ومفيدة

أخوكِ
MMH

9:08 AM  
Blogger Dr.Dalia Hikal said...

hayate-whwa-mosh-fiha.blogspot.com
أدعو قرائك لقراءة ومتابعة مدونتى وأشكرك

8:46 AM  
Blogger Dina said...

شوفى أنا مش هكلمك عليه
أنا هأولك ازاى تنسيه
( لا يهزم الحب الا الحب( وداوينى بالتى كانت هى الداء) وشكرا

3:35 PM  
Blogger hasona said...

أكيد دلوقتي بتحاول تنسي
بتحاولي تعيشي حياتك عادي

10:36 PM  
Blogger Inevitable said...

سورى ممكن يكون ردى متاخر بس انت عملت اكتر من غلط يا ضى
1- اعتقد ان كان عندك رغبة كبيرة فى الحب وبسببها فضلت عايشة فى قصة لوحدك لمدة سنة من غير حتى ما تعرفى اسمه
2- غالبا ده اول قصة حب ليكى علشان كدا حبيتى قوى وضعفيتى قوى وكنت هتضعفى اكتر قدامه لاخر لحظة و انا شايف ان ده كان اكبر غلط انت حبيتى وبس علشان تحبى من تغير ما تفكرى انت رايحة فين
3- انت اتمسكتى بالعلاقة حتى بعد اللى حصل واتاكدتى انها مش هتكمل خالص او هتكمل بصعوبة تضيع حلاوتها وحتى بعد ما فضل عليكى الشقة والعربية زى ماقال واشك فى كلامه , بس انت حبيتى الحكاية بحب وبتحب بس انا متاكد انك لو بصيتى للشخص نفسه وفكرتى فيه بعقلك هتلاقى الف علامة استفهام عليه زى ازاى اترقى بسرعة كده فى الشغل واشارات ومواقف تانية حصلت قدامك بتاكدك على صفات معينة تبعدك بس انت رفضتى

انا مش عايز اقول كلام يضايقك لان اخر حاجة انت محتاجة دلوقتى حد يقعد يلومك ومش اقول كلام اتقال فى كمنتس قبلى بس الحب لسه موجود والرجال اللى تستحق تديها قلبك لسه موجودة مش زى ما فى ناس بتنكر ان فيه حب و تستهزئ من الى بيحب واو يقولوا مفيش رجالة لا الاتنين موجودين بس لما نحب لازم نسال عقلنا الشخص ده يستاهل ولا لا ونختبره كتييير قبل ما نصدق مشاعرنا ومنقبلش حد يهون كرامتنا ولا يكسرنا علشان بنحبه وضعاف قصاده ونقدر نفرق بين الحب الحقيقى اللى بيجى بعد الجواز لما كل طرف يعرف كل حاجه عن الطرف التانى والوهم الحقيقى اللى ممكن نرمى نفسنا فيه وياما ضيع قلوب

وانا مش مع اللى بيقولك حبى تانى بسرعة ده اسمه هروب وممكن نجنى على شخص تالت ونجرح قلبنا اكتر , اكرمى جرحك يا ضى خليه ياخد وقته ويدبل وارحمى قلبك وحافظى عليه وماترميهوش قدام اى حد وخلى مشاعرك عزيزة صعب حد يوصلها بسهولة وابعدى عن اى حاجة تفكرك بالتجربة ديه خاصة صاحبتك اللى مش فاهم هى ليه ملاتقكيش اللى قالوا عليكى افرضى مكنتيش شوفتى الكلام ده بالصدفة ؟ واوعى تحبى دور المظلومة ابدا الحياة اكبر من كده بكتيييير

واخيرا حبى نفسك اكتر من كده واحمدى ربنا سبحانه وتعالى انه نور بصيرتك فى الوقت المناسب قبل ما تضعفى اكتر وزى الاستاذ عبد الوهاب مطاوع رحمه الله ما قال انتظرى جوائز السماء

بكره تلاقى اللى يقدرك ويصونك ويكون راجل بجد وشاريكى بجد وتذكرى " وعسى ان تكرهوا شيئا وهو خيرا لكم وعسى ان تحبوا شيئا وهو شر لكم " " لكى لا تأسوا على ما فاتكم ولا تفرحوا بما اتاكم"
واسف للاطالة بس كان عندى كلام كتير عايز اقوله

1:14 AM  
Blogger الحائرة said...

حبيبتى ضى كلنا فى الهم سوا مين فينا متجرحش مين فينا معداش عليه قلب جرحه ومين فينا مجرحش حد من غير مايقصد
ان كمان مر عليا نفس قصتك مامته رفضتنى علشان هى عيازاه يتجوز بينت من عيله كبيرة ترفعه واياها وهو برغم حبه ليا وانه هو اللى جرى ورايا بالمشوار فضل انه يسمع كلام والدته لان العقل بيقول ان كلامها صح وهو فى اللحظه ديه لغى قلبه ونسى الحب ونسى انه احلى حاجه فيا زيى مابيقول تدينى وتمسكى بالقيم والاخلاق وانه عايز يعمل زى مالرسول وصى "اظفر بذات الدين تربت يداك " نسى الكلام ده كله وافتكر وصيه مامته "بنت مستواها المادى والاجتماعى عالى اه البنت ديه كويسه ومؤدبه لكن انا عايزة واحده ترفعك وعيله تقف جنبك" من امتى الراجل بيستنى شئ من البنت اللى هيتجوزها غير انها تصون اسمه وشرفه وتربيله عياله تربيه صح وتحافظ على بيتها من امتى بيحسب هياخد من وراها كام ولا من ورا اهلها كام
المهم اتجرحت وحسيت بالاهانه وحسيت اد ايه انا قليله ويمكن لحد دلوقتى بتالم لانه برضه فى نفس مكان شغلى لكن بقول دايما حسبى الله ونعم الوكيل وبصبر وبحاول انسى
وانا رايى متتنقليش من شغلك خليه ادامك واتحدى ضعفك وانسيه وهو ادامك واعملى حسابك انه فى يوم هتعرفى انه خطب واستعدى للموقف ده باعصاب بارده ورد فعل هادئ
واعرفى كويس ان ربنا هيكرمك لان الانسان اللى يحكم على واحده من خلال الاخرين ويحاسبها على وضع ربنا اراده ليها يبقى انسان طالم ولازم فى يوم الظلم ده هيترد
ربنا معاكى ويصبرك ويعينك ويعينى معاكى

9:23 AM  
Anonymous Anonymous said...

اختى ضى

انا كتبت لك تعليق قبل كده
و قلت لك انى مريت بحاجة شبه كده
بس انا للاسف كان الوقت اطول لذلك كان الانسحاب اصعب
و لكنى استطعت بل و امامه (انا قوية و سعيدة و اكمل حياتى و اعمل و ابحث عن شريك حياة محترم و محب و اشكر الله لانى اشعر بحبه لى )
و ارفض انسحابك
لانك كلما قاومتى احسستى بقوتك و اشعرتيه بضعفه و ندالته و حقارته
رايى تعودى لعملك انتى لم تخطئى
انسحابك و ضعفك يشعره بلذة النصر و اكمال مسيرته فى ايذاء خلق الله

mandolen 80 اختك

11:07 AM  
Blogger الكروان الضائع said...

انتي بجد غلطي في البدايه انك سبتي مشاعرك تنجرف منك في طيق انا متأكده انك كنت عارفه نهايته
وادتيله الفرصه انه يلعب بيكويستغل مشاعرك
لان البنت لما بتحب بتضحى كتير وبتستحمل كتير اما الولد لا
دا اذا كان حب اصلا فما بالك بالشخص ده اللى كان بيتسلى بيكي

3:50 AM  
Anonymous Anonymous said...

انا عارفه ان احساس الانكسار اللي انتي فيه قد ايه صعب عليكي بس المهم دلوقتي انك تبصي لنفسك وتهتمي بنفسك مافيش حد بجد بيقدر يخفف عن حد اي حاجه انتي اللي لازم تخففي عن نفسك بنفسك حاولي تشوفي الموضوع من وجهه نظر تانيه مش من وجهه نظر المظلومه شوفيه من وجه نظر واحده بتقيم بني ادم قصادها اي بني ادم حتلاقي انه انسان مش يستاهل اصلا التفكير فيه وان ربنا بيحبك انه وضح ليكي شخصيته وطبعه ده قبل ما ترتبطي بيه وقبل ما يكون في مصيبه اكبر تخيلي لو انسان زي ده ارتبطي بيه حيكون وجه معاناتك كل يوم قد ايه؟
الموضوع مش سهل بس ربنا معاك استعيني بربنا وان شاء الله حتعدي المرحله دي

5:48 PM  
Blogger مستكه said...

مفروسه جداااااا

ايه ده هو الرجاله دي فاكره نفسها ايه

هو انت غلطتي بس مش مبرر لكل اللي حصل ده

يانهار فيه كده

وبعدين ايه والدته دي دا كلام يقال

سوري يعني دا يغور عشان خاطر والدته دي

حاجه تنقط

بصي يابنتي اتبعي المثل اللي بيقول :

من باعك بيعه واكسر وراه زيييييييييييييير

حسبي الله ونعم الوكيل

10:10 AM  
Blogger Douby said...

عزيزتي
ولا تزعلي ولا تفكري أصلا ,,عارفة إن ده كلام تنفيذه من أصعب مايمكن ,,بس واللهِ مايستاهل تفكيرك لانها ببساطة علاقة فاشلة وإنسان كداب وواضح جدا إن أهله مش تابعين اساسا .يعني احمدي ربنا إنك ماتجوزتهوش والشكري ربنا كتير إنه بينلك الحقيقة ..أما عن كلامه إنتي بتجسسي علي وال عبط ده لإنه مش لاقي حاجة يقولها ولانه مابيحبكيش فعلا فـعايز يخرج من الموقف وخلاص بدل مايبرر ,ده إذًا كان عنده مبرر اساسا ,,,وكلهم بعمله كده في مثل هذا الموقف ..إزاي تتجسسي عليَّ ,,طب سؤال هو لو مكانك وربنا اظهر قدام عينه حاجة زي كده مش هيعد يقرأها مش ممكن طبعا ,,,بس لإنه معندوش حاجة يقولها ترك الموضوع نفسه ومسك بتتجسيسي عشان تطلعي انتيو الغلطانة ..يلا ولا يهمك ده مايتزعلش عليه واللهِ .
تحياتي

4:13 AM  
Anonymous Anonymous said...

مش هقولك غير كلمه واحده
"مايستهلكييييييييييييش"

3:15 AM  
Blogger LONELYBRIDE said...

دا من اللي يتقال عليهم لا يتفرح بيهم ولا يتحزن عليهم دا قلته أحسن أنا عارفه ان الموضوع صعب أصلي عقبال عند اللي مجربشي لسه وأخد صدمة الحب من أول نظرة بس والنبي عيشت كام يوم حلوين كأني بنت 18 يوم فوووووووووووق ويوم تحت هوبا فوق هوبا تحت بس الحمد لله أنا وقت الصدمة مش بيأخد معايا أكتر من ساعتين وبعدين اعيط شوية وابدأ ارقص واتأكد انه لو كان علشاني ولا الدنيا كلها كانت هتفرقنا

5:23 PM  
Anonymous Anonymous said...

KALBBBBBBBBBBBB WE RAAAAAAAAAAAAAA7

5:04 PM  
Blogger الغاردينيا said...

!!!!!!!

داااااا انتي تحمدي ربناااااا

مش بيستاهلك

وربنا بيحبك عشان خلصك من امثاله

ربنا بيعوضك خيرررررر

4:51 AM  
Blogger basbosa said...

في ستين داهية ريته ماتولد زيادة عدد بس
لا اخلاق ولا مرؤة
انتي ماخسرت شيء انتي كسبت تجربة

7:19 PM  
Anonymous Anonymous said...

يا حبيبتى انتى نصيبك مكتوبلك من قبل السما والارض ما ربنا يخلقهم بخمسييييييين الف سنه واللى اكيد ان شاء الله مش هيكون البنى آدم ده دا لو يستاهل يتسمى بنى آدم اصلا عيشى حياتك واشغلى نفسك واستنى نصيبك واتمنى ترجعى تبعتى قصه تانيه تقوليلنا فيها انك تجاوزتى المرحله دى واديتيله اثتماره سته بصحيح ..الاشكال دى اصلها عاوزه تتحرق فى ميدان عام دول شياطين الانس والعياذ بالله متخصصين فى حرق قلوب البنات.. متزعليش واعرفى انه داين تدان واللى عمله فيكى ده هيتعمل حرفيا فى اخته او بنته فى المستقبل لو مالهوش اخت المهم انه هيدوقه وخلاص باى شكل.. نفسى بقا واحد ييجى يلطم ويصوت ويحكى عن صدمته انما دول ابدا بيصدمو بس انما يتصدموا مستحيل مفيش ولد بيحب بجد كلهم بياعين وملهمش غالى الا من رحم ربى).(

7:43 PM  
Anonymous Anonymous said...

احمدى ربنا ان ده حصل
انتى الكسبانة
وحسبى الله ونعم الوكيل

5:00 AM  
Blogger dark angel said...

حكاية التجسس دى تافهة بالنسبة لكلامه اللى قاله ولتصرفه دى حتى لو اعتبرناها غلط فى زمن مليان بالخيانة والكدب اعتبرى نفسك حبيتى من طرف واحد انسان كداب لانه دى حقيقته وان شاء الله ربنا يعوضك باللى يستحق فعلا الحب وينسيك كل حاجة وحشة

7:55 AM  
Anonymous موديل said...

كله هيعدي و هترجعي تضحي من نفسك و تقولي الحمد الله الذي عافاني منه و اكيد و لا يستاهل ثانية تفكري فيه

اما موضوع الصديقات الخونة فكتر جدا
تخيلي ده اللي يضايق بجد
بادعيلك
موديل
صاحبة مدونة
عايزة اخس

1:25 PM  

Post a Comment

<< Home