بيت العرايس و العرسان

إمرأة واحدة..لا تكفي

2009-05-09T09:51:00.000-07:00

اولا مش عارف بكتب ليه بس غير لاني حسيت اني محتاج اشارك حد في اللي جوايا

ثانيا : حكايتي
شاب مصري عادي جدا زي زي بقيه شباب جيلنا خلصت المدعوقه ثانويه عاميه وخلت احد الكليات شبه المرموقه في مصر شاء السميع العليم ان اثناء دراستي بالجامعه عيني تقع على انسانه كانت في نظري اجمل بنات حواء وتشتعل المشاعر في قلبي طوال سنين الجامعه الطويله ولكن بلا فائده تذكر فبيني وبينهاالكثير من الحواجز فهي واحده من هذه المجموعات المعتادة في الجامعات التي دائما ما يعرفوا على انهم " كلاس " وعلى الجانب الاخر فانا ابن اسره ميسوره الحال بفضل الله ولكنها تعيش حياتنا المصريه العادية

المهم تخرجت من الجامعه وبفضل من الله وبمساعده احد الاقرباء سافرت الي الخليج بعد تخرجي بشهور قليله وبدأت حياتي هناك وما ان مرت شهور على وصولي واستقراري واذا بعائلتي تطرح علي امر الارتباط والزواج فانت الان رجل مغترب وقادر على الزواج ويجب ان تخطو تلك الخطوة حتى تجد من تعينك على الحياه وتهون عليك غربتك وفعلا عرض علي الرتباط بفتاه من اقرب الاقرباء وكانت الظروف قد جمعتني بها اكثر من مره فوافقت وتمت مراسم قراءه الفاتحه بين والدي ووالدها وانا بعيد وبدائنا نتعرف على بعضنا البعض عن طريق الهاتف

هي خجوله طيبه متدينه هادئه حلوه المعشر وصفات كثيره جميله والاكثر من هذا تحمل مشاعر تعلق وحب لي منذ فتره بدأنا نقترب من بعضنا شيئا فشيئا وبدأت اعترف بحبها واسمع منها واسمعها كلامات العشق والغرام والهيام طوال فتره الخطبه

وقبل ميعاد الزواج بشهور ظهرت اخرى في حياتي بجمالها المبهر وشخصيتها المشابهة لتلك الفتاه التي رافقني حبها سنين طوال في الجامعه ولكن الفرق كل الفرق الان فانا شخص مختلف تماما من حيث المظهر والشخصيه واللباقه فانا مدير باحدي كبريات الشركات الخليجيه اتحدث بلباقه باكثر من لغه واعبر عن ما بداخلي بمنتهى الكياسه والكثير الكثير الذي تغير في اسلوبي وطريقتي خلال عامين ونصف وفعلا بدأت العلاقه فيما بيننا تطور سريعا وبدأت هي تنبهر بشخصيتي ولكن شاء الله ان تحدث بعض المشاكل فيما بيننا فاعتبرتها اشاره لاني اسلك الطريق الخاطيء واخون تلك المسكينه التي تنتظر عودتي خلال ايام لاتمام اجراءات الزواج فقطعت علاقتي تماما بتلك الاخرى وعدت على الفور لاتمم زيجتي من عروسي المنتظره

وتم الزواج وعشنا سويا عاما سعيدا نقترب من بعضنا البعض يوما بعد يوما ونعيش حياه حسدنا عليها الكثيرون وطالما قالوا اننا زوجين نتفنن في " تدليع بعض والأهتمام ببعض" وفعلا فقد عشت اياما وشهورا طويله في غايه السعادة لم تقطعهم سوى لحظات قليله نادره تسائلت فيها هل اصبت في اختياري ام لا ثم شاء المولى عز وجل ان يزيد تلك العلاقه قربا بجنين ينمو في احشائها

واقترب موعد الوضع فقررنا ان تسافر تعود هي الي مصر لتكون بالقرب مع اهلها واخواتها خلال الشهور الاخيره من حملها وخلال الوضع على ان اسافر اليها فور علمي بوضعها للمولد وسافرت هي واصبحت انا هنا وحيدا ثانيا لشهور طوال وياليتني ما عشت تلك الشهور
ففجأة احسست اني اعيش قصه من الحب المصطنع وفجأه بدأت اتسائل كل يوم هل ما اعيشه هو ما حلمت به طوال عمري وهل زوجتي هي من حلمت ان ارتبط بها فلقد احببت طوال عمري الفتاه الإجتماعيه المرحه المتكلمه وها انا متزوج من امرأه هادئه طيبه قليله الكلام حلمت بامرأه تفوقني جنونا وتزوجت امرأه تعتبر ضحكاتي جنونا لا يوصف حلمت بامرأه تشاركني واشاركها بكل ما في انفسنا تحدثني واحدثها فوجدت نفسي مع امرأه تكتم بداخلها مائه كلمه مقابل كل كلمه تنطقها تكتم مشاعرها حتى تصل بها لنوبات من البكاء لا حدود لها ولا مسبب واضح لها حلمت بامرأه تشاركني القدره على الهرب من الحزن والانفعال فوجد نفسي مع امرأه تكتم حزنها بداخلها حتى يقتلني ويقتلها حلمت بحب على صفيح ساخن واقصى ما حصلت عليه هو دفء " كوفرته " حتى في المظهر كثيرا من ما تمنيته في امرأتي ليس بها
واذا بهذا الاحساس يلهبني ساعه بعد ساعه يوما بعد يوما واذ بي اجد نفسي احادث هذة واتكلم مع تلك واشغل وقتي بضحكات مع اخرى واذا بي اجد نفسي على علاقه بعشراااااات من الفتيات في نفس الوقت حتى اصبحت انسى اسمائهم ولا سبيل لتذكرهم سوا بوضع بعد الملاحظات مع اسمائهم والا فلن اتذكرهم

وولدت ابنتي
ولم احضر الولاده ولم احضر بعد الولاده سوى بشهور وعادوا معي وبدأت زوجتي تلاحظ التغيير ولا يمكن ان تتخيلي وقع ذالك عليها فهي اولا امرأه انجبت من شهور قليله ولازالت تعاني من ما يعرف باكتئاب بعد الولاده بالاضافه لكونها تعاني من حمل تلك الفتاه الصغيره التي لا معين لها في تحمل مسئوليتها سوى الله

اكتشفت الامر وحدثت مشاكل لا حصر لها ولا حدود واقسمت ووعدت ان لا اعود لمثل هذا وعدت وعادت واقسمت مره واخرى واخرى فقد تحول الامر لأدمان لدي

لكن ولا اعلم كيف حدث هذا ولا اجد له مبررا ولا سببا سوى انه رزق من الله سبحانه ثم خوفي على ابنتي من ان يصيبها وزر ما فعلت استطعت التوقف واستطعت البعد عن ما افعل واعتقدت انها شعرت بي وبالتغيير للاحسن لكن للاسف اكتشف ان الاوان قد فات فهي وان استطاعت لسنه كامله ان تتعايش مع الأمر للاسف بمجرد ان مررنا بموقف ذكرها بما كان يحدث سابقا انهارت وقررت الابتعاد

وانفصلنا
ومررنا بأسوأ تجربه يمكن ان يمر بها ابوين فمستقبل ابنتنا على المحك وحاولت مرارا ان اعيد بناء ما هدمته ولكن بلا فائده حاولت لاقسى ما يمكن ان تتخيلوا ولكن بلا فائده حاولت حتى فوجئت بالكبار في عائلتها يدعونني ويجلسون معي ليس للومي او عتابي ولكن لينصحونني ان اكف عن ما افعله من محاولات فهم لا يرضون لرجل ان يتنازل عن كل شيء فقد اكون اخطأت ولكن خير الخطائين التوابون وانت قد اعلنت توبتك فلا يبقى الا ان تتدعوا الله ليتقبل وفجأه وبدون اي مقدمات تحولت الفريسه لصياد فها هي المراة التي طالما اشتكت من جراحها تطلق علي شائعات يعلم الله اني منها براء وتخبر عني اخبارا يذهل كل من يسمعها بل ويكاد يجن ان اكون انا الرجل الذي عرفوه هو نفسه المجنون الذي تخبرهم عنه.

عاتبتها ولمت عليها ما قالت وحاولت ان اوضح لها ان ما تقوله لا يسيء سوى لسمعة ابنتنا ومستقبلها فاقسمت انها لم تتحدث بمثل هذا وان " الناس فهموها غلط " فتركتها وحالها في صدقها او كذبها الي الله سبحانه
فلمااستيقنت انه لا مفر سلمت امري لله وقررت ان اعطي كل جهدي ووقتي لابنتي وان اتقي الله فيها وفي مستقبلها.
ولم تنتهي المفاجأت فها هي ترسل لي انها عائدة وانها فكرت كثيرا وان ابنتها وابنتي تستحق ان نعيش سويا لاجلها فسكت وعادت وعشنا ولا زلنا نعيش وبداخلي كل يوم نفس السؤال هل استطيع ان اكمل عمري معها بدون ان اجرحها ثانيه او تتهمني وتهينني ثانية و هل ساستطيع ان اكمل اعواما ولربما شهورا ولعلها ساعات كتبها الله لي كبقيه عمر في هذا العالم مع امرأه لا احبها.

إمضـــــــاء
(س)

من أول نظرة

2009-02-07T17:27:00.000-08:00

السلام عليكم
إزيك يا برايد
كنت عايزة أفضفض مع حد و أحكيله و مالقتش قدامي غير بيت العرايس فاتحلي أبوابه ..قلت في نفسي طالما
الموضوع - و الحمدلله- ما انتهاش على خير و بالتالي مش هنكد على برايد حبيبتي رفيقة الكفاح ..يبقى
أستعين بالله و أبعته ..و العاقبة عندكم في المسرات

بصي يا ستي..الحكاية بدأت من 3 سنين أول مادخلت شغلي الجديد , سمعتي عن الحب من أول نظرة..
أهو هو ده, من أول مرة شفته فيها كنا كلنا تحت التدريب من غير ما أعرف حتى إسمه طول فترة التدريب ما
عرفتش إسمه لحد ما خلصنا و كل واحد فينا راح في مكان ..في الشركة كل ما كنت باسمعهم بيتكلموا عن حد
ماعرفش هو مين ..لكن باحس أو باتخيل إنه هو ..سنة مابنشوفش بعض لكن حبه بيكبر جوايا يوم بعد يوم

و روحي يا أيام و تعالي يا أيام و اتنقل و اشتغل معاه في نفس القسم و أعرفه و يعرفني..روحي تاني يا أيام و
تعالي تاني برضه ..و أبقى المساعد بتاعه و دراعه اليمين زي مابيقولوا ..نسيت أقول لك إنه شاطر قوي
..شاطر في كل حاجة عشان كده طلع بسرعة و كمان الظروف خدمته

حاولت ألفت نظره بكل الطرق و باستخدام الحاسة الثامنة اللي اتكلمتي عليها لكن مافيش فايده..إتلفت نظره أخيرا
بعد سنة و أكتر و شويه و عرفت منه إنه كان حاسس بكل حاجة من زمان و إن كان فيه في حياته قصة حب فاشلة
هي اللي خلته مش بيفكر أصلا في الموضوع

و في لحظة واحدة و كأنه حلم لقيت الدنيا كلها في إيدي و لقيت نفسي حبه الحقيقي و الوحيد و قاللي إنه كان دافن
نفسه بالحيا و إزاي حرم نفسه طول المدة دي من السعادة الحقيقية و اللي بتتمثل فيا أنا..و إنه طبعا عمره ما حب
قبلي و إنه كان متهيأله إنه مش هيحب أبدا لحد ما قابلني و عرف إني أول و آخر حب في حياته و بسرعة
قويييييييييي جاب أهله و دخل البيت ..مش قادر يعدي يوم و هو مش جنبي فيه

و بسسسسسسسسسسسسسسسسسسسس

المفاجأة بأه إن مامته رفضت الجوازة كلها لأسباب وجيهة جدا

أولا: إني قدمتلهم شاي و جاتوه مع إن المفروض إني أقدملهم عصير

ثانيا:كان فيه دبانة مضيقاها في القاعدة - و مش هي دي المشكلة- المشكلة إني قمت فتحت البلكونة عشان
أطردها فكان تعليقها : فيه عروسة في الدنيا تقوم و "تتمشى" و تفتح البلكونة؟

ثالثا: إن بيتنا تحته قهوة بلدي يعني أكيد أنا مش متربية - ده باعتبار إنهم لاقوني على
الناصية- ..
تفتكري يا برايد لو كانت كافيتريا ولاد و بنات كان هيبقى رأيها إيه؟

رابعا: و السبب الأهم ..إني كنت لابسه طويل و مقفول و ما كانتش عارفة تشوف مني حاجة -وجهة نظر
برضه

و دارت الإسطوانة المشروخة :

آسف يا حبيبتي ..أهلي و ما أقدرش أخالفهم

عرفت بعدها إنهم خيروه بيني و بين الشقة و العربية فاختار الأغلى طبعا و البنات على قفا مين يشيل
و روحي يا أيام و تعالي يا أيام تاني..رجع

وحشاني و مش قادر أستغنى عنك و مش قادر أسيبك ..لكن جواز مش بإيدي يا روحي و مش عارف أعمل إيه
؟..و هاموت نفسي عشان أرتاح و إحساسي بالعجز مش مخليني عارف أبص في وشك

و في عز ما الإسطوانة دي شغالة و أنا باموت نفسي من الحزن و القهر عشانه و عشانيربنا يقدر إني أقعد على
جهاز الكومبيوتر بتاعه في مره عشان أطلع شغل من عليه و ألاقي الماسنجر بتاعه مفتوح و ألاقيه بيكلم مين؟..
أعز صاحباتي و بيقولها إنه عمره ما حب غير حبيبته الأولانيه و إنه بس كان مشتاق لإحساس الحب و ساب نفسه
يعيش معايا و إني أنا اللي غاوية أعذب نفسي عشان أنا لسه بافكر في الموضوع و هو خلاص الموضوع بالنسبة له
إنتهى و إن مافيش حد بيضحي عشان حد و لا بيتمسك بحد ببلاش و إنها لو دورت ورايا أكيد هتلاقي مصلحة من
تمسكي بيه كان نفسي أتشل قدام الجهاز أو أتعمى و ماأقراش باقي الكلام..قعدت بعدها يومين مش بانطق في الشغل و كل ما
يسألني مالك يا حبيبتي أبقى عايزة أنفجر في وشه و أدمره لكن أبص ألاقي نفسي ساكته لحد ماقدرت ألم نفسي و
أواجهه باللي شفته و أنا نفسي يكدبني و يقوللي إنتي فهمتي غلط حتى لو بالكدب..تصدقي كان نفسي أصدقه حتى
لو كدب عليا..لكن لاقيته إتحول تحول الديناصورات ..طلعني ما اتساهلش و إني باتجسس عليه و هو غلطان
إنه حبني و إن أنا اللي جرحته و بعته و إنه مش هيسامحني طول حياته

ما عادش فيه حاجه جوايا ما اتكسرتش بسببه
ما عادش عندي حاجة ما خسرتهاش بسببه

معلش طولت عليكي بس كنت محتاجة مكان أفضفض فيه ..من 4 شهور و أنا مش لاقيه المكان ده ..و الحمد
لله إني لاقيته هنا في بيت العرايس

أختك المقهورة : ضي

قصة بدون عنوان

2008-12-06T07:11:00.000-08:00

يا برايد أنا علشان مزعلكيش آدي قصتى ولو أنها مؤثرة أوى بالنسبة لى .

من خمس سنين كنت فى السنة الأخيرة فى كلية الهندسة جامعة الاسكنرية و كنت ماشى على أد حالى بس بعد ما أتخرجت ربنا وفقنى الى أن التحق بشركة بترول و كان مرتبها محلمش بيه و الحمد لله حبه حبه بدأت الظروف تتحسن و بدأت أعمل فلوس و ربنا وفقنى و جبت شقة بس لسه الى الأن عليها أقساط المهم والدتى بدأـ تقولى أنها عايزة تفرح بيه و بدأـ تدور على عروسة و الحمد لله ربنا و فقنا الى فتاة لا أظن حلمت بأفضل منها لا خلقا " رغم أنه يندر فى هذا الزمن " ولا نسبا فقد كانت حقا نعم الفتاه .

و تقريبا لم نختلف على شى و الحق بردوه كان أبوها فرحان بيه و بيعاملنى معاملة طيبة و قلنا ان شاء الله بعد سنتين نبقى فى بيت الزوجية السعيد .

و قضينا 6 أشهر من أفضل أوقات حياتى على الاطلاق فسح و حب و معاملة كويسة بس فى مرة كنت فى العمل و حدث أ، سقط على الأرض مرة واحدة و ذهبوا بى الى الطبيب و عنده تم افاقتى و الحمد لله بس الدكتور طلب منى فحوصات و تحاليل فقلت له هو فى أه قال لى خيرا ان شاء الله

و فعلت عملت التحاليل و ذهبت بها الى الطبيب و كان الخبر الأليمأن الموضوع كله أيام و ينتهى كل شى تقريبا أغمى عليه بس و أ،ا فايق حسيت أن الدنيا اسودت مفيش حاجة تانية يمكن مفيش بكرة أه الى حصل و كيف و لكنه قضاء اللهالذى شئنا أو أبينا سينفز اللى الأبد فلابد أن نقبله بنفس راضية و الحمد لله .

الطبيب قال لى شد حيلك و لازم أن تثق فى الله و ان ربنا قادر يشفى كل مرضى الكون فى لحظة واحدة والعلاج الكيميائى دلوقتى جايب نتائج مزهلة .

و مشيت من عند الدكتور ساعة أذان العساء و على فكرة أنا و الحمد لله كنت مواظب على الصلأة فى جماعة دخلت صليت و شعرت أنها من الممكن أن تكون أخر صلاة فى حياتى و أستشعرت و قتها معنى قول الأمام "صلوا صلاة مودع " .

و روحت البيت و مقلتش لوالدتى بس بصراحة صعبت عليه أوى و فكرت فى خطيبتى و ماذا سوف يحدث .

و عندما صارحت خطيبتى بحقيقة الأمر بكت بكاء شديدا و يكأنها طفل أخذ من بين أحضان أمه ثم انتهى اللقاء و كان أخر لقاء

و فى اليوم التالى وجدت أبوها يتصل بى و يقول أصبر يا بنى و أحتسب و لكن يجب أن تعلم أن علاقتك بابنتى قد انتهى و كانت هذه صدمة أخر لم أكن أحتملها و الله أنا عازرها و عازر أبوها بس كده كل حاجة بتضيع فى لحظة واحدة و بكلمة دكتور طيب ما أنا كنت معرض للموت بدون المرض

و لكن للحقيقة أنا لو كنت مكان والدها ربما فعلت مثل ما فعل خوفا على أبنتى.

أرجو من كل واحد قرأقصتى أن يدعو الله لى بالشفاء و أصلاح قلبى و أن يهدنى و أ،يحسن خاتمتى و خاتمة المسلمين أجمعين

قصة حب..عادية جدا

2008-12-05T04:42:00.000-08:00

حذفت القصة بناءا على طلب صاحبها

شخصيتها كوية

2008-10-23T14:40:00.000-07:00

.. عارفة يا برايد أنا مكنش في فكري أبدًا إني أبعتلك، دايمًا بتابع مدونتك بصمت بدون أي رد، وكل ما أقرا حاجة في بيت العرايس والعرسان وأقول هرد أرجع أتراجع واكتفي بالمتابعة، المهم يعني إني فجاءتاً كده النهاردة أتطلتش بخبر جابلي كئابة تلاقيكي عارفاها بتأكيد، خبر خطوبة واحدة صاحبتي و توزيع صور خطوبتها علينا وكمان صاحبتي أصغر مني، المشكلة أني مصممة أقنع روحي أن الموضوع مش مآثر عليا خالص ولا مضايقني ولكن الحقيقة بقى انه مضايقني.. والحقيقة إني في اللحظة دي بالذات فتحت مدونتك وقررت إني أبعتلك وأتجرد-جلوه أتجرد دي- من أي تزيف للصورة أو لمشاعري وأتكلم بصراحة مطلقة في بيت العرايس والعرسان..
الكل يرسل مشاكله مع العرسان والعرائس الفاشلة أعتقد أن مشكلتي جديدة شوية.. أنا بقى مشكلتي إن مفيش مشاكل

..
أنا (ن) عندي 27 سنه، منذ أكثر من 14 سنه سمعت والدة واحدة صديقتي تتكلم على ابنة جارتهم بهمس وهي تمصص شفتيها حسرة -بعد أن رفضت ابنتها التي هي صديقتي 3 عرسان هذا الأسبوع - بأن فلانة المسكينة التي تقطن في الدور الأعلى عندها الآن 23 سنه ومتجوزتش، لم ادري وقتها لما هي مسكينة يعني؟؟ وعندما تساءلت ببراءة أخبرتني والدة صديقتي أن البنت وصلت لهذه العمر ولم تتزوج وليس الأمر إنها ترفض ولكن المشكلة إنها لم يتقدم لها عريس واحد حتى هذه السن، وأخذت تكلمني عن أن كل بنات العمارة قد تقدم لهم أكثر من شخص و أن أبنتها (صديقتي) تقدم لها 6 عرسان حتى هذه اللحظة ورفضوا ، ولكن هذه الفتاة المسكينة لم يتقدم لها أي عريس... الحقيقة أن الأمر لم يمر علي مرور الكرام وقتها ، فأنا لم يكن يعنيني موضوع عرسان صديقتي الـ6 هؤلاء أولا لأنها اكبر مني بعدة سنوات أنا من صغار صغار السن في الدارسة لذا لم أشعر مطلقًا بأنني الأكبر في مواقف كهذه طوال فترات عمري الأولى، لكن هذه كانت أول مرة أشعر بالخوف، هل يمكن أن أصل أنا الأخرى لسن ال23 هذا –الذي يبدو من كلام طنط هذه سن كبير جدًا- ولا أتزوج أو بالمعنى الأكثر رعبًا لا يتقدم لي احد

..
المهم أن الأيام مرت، طبعًا كنت دائمًا متفوقة في دراستي لأقصى درجة، وكما يقال عني ، لي شخصية مستقلة ورأي في كل مصيبة على حد قول أصدقائي ، لم أتلفت لموضوع الزواج هذا، ولكن هناك غصة أثرت بي في فترة ما، لماذا لم أمر بقصة حب كما تفعل كل صديقاتي؟؟ ، منذ الصف الأول الثانوي وأنا كاتم أسرار صديقاتي و زميلاتي وربما البنات الآتي يمرون أمام الفصول يعرفون أن هناك كاتم أسرار وفتاة تفتح فرع لباب مشاكل القلوب في هذا الفصل فيأتون لي ليطلبوا النصيحة، لم أتعمد هذا الدور ، ولكني وجدتني العبه فجاءه على غير تخطيط ، ، الحقيقة وكلام بيني وبينك ومن يقرأن هذه الكلمات فقط كنت أشعر إنهم سخيفات مدللات و أن ما يفعلونه هذا ليس هو الحب ولا ما أريده ، هذا تهريج مراهقة سطحية ولكني لم أكن أتذمر أو أعلن عن شعوري بالهيافة هذا، و عندما دخلت الجامعة فوجئت وكأن احدهم باغتني بأنني لم أمر يومًا بما مرت به كل البنات.. لم أحب شخص واجلس الليل لأتعذب بالتفكير به، ولم أحب حتى المدرس الذي كانت بنات مدرستنا جميعًا يتمنون فقط أن ينظر لهم مجرد نظره .. والغريب انه لم يحبني أي شخص أيضا ولم يطلب ودي..و دخلت أنا الكلية والغصة تكبر إنه لم أكن يومًا فتاة تملك حدوته حقيقة أحست هي بها بمشاعر حب أو أعلن احدهم رغبة ارتباط صريحة بها ولو على سبيل المراهقة كالباقيات..

الصراحة إنني بدأت انظر للمرآة وأقول هل أنا دميمة؟؟ هل أنا سيئة الشكل أو منفرة لدرجة تجعل إنه لا أحد مررت برأسه لدقيقة يومًا؟؟ كانت المرآة تكذب ذلك لست الفتاة التي يسعى إليها الشبان أفوجًا من اجل الجمال ولكني لست دميمة أو قبيحه بأي حال، أسأل والدتي وخالاتي وبناتهم الأكبر مني المقربين والكل يتهمني بالمبالغة وإنني جميلة وجيده تمامًا هو الحظ فقط، توقفت عن الموضوع لأبدأ عصر الدراسات والعمل والنشاطات الجانبية الأخرى سواء كانت ثقافية أو أدبيه، دائرة معارفي تكبر يومًا بعد يومًا بصورة كبيرة أنا اجتماعية حقًا إلى حد كبير طوال هذه السنوات اجتماعية ولكن متحفظة لا أتعامل مع أي شخص بدرجة تخرج عن الأخلاق أو الدين والاحترام الذي وضعتهم أمامي دائمًا كي لا تعتقدي مثلاً أن اجتماعيتي هذه هي ما تبعد البعض عني، المهم إنني فوجئت مع توسع مدارك حياتي بأن ذات الدور يفرض ذاته علي، عشرات من معارفي نساءً ورجالاً يعتبروني المستشار الخاص في حياتهم.. يعتبروني الصديق الأفضل..
هل تعتقدي أن الرجال ينفرون ويبعدون عني العجيب انه يطلبون ودي وبشدة تمامًا ولكن كصديق .. كصديق بالفعل .. ولولا تحفظي أنا الطبيعي لكنت الصديق المقرب لمعظمهم ولكني دائمًا أحافظ على المسافة التي أضعها لذاتي في التعامل، فوجئت بأنهم جميعًا رجالا ونساء يتقربون مني ولكن الرجال لأنهم يريدون صديق عاقل الفقط

..
لقد ضقت زرعًا بحق بدأت أختنق بذلك الدور فوجئت إنني تخطيت عمر الـ23 كثيرًا التي تكلمت عنه والدة صديقتي منذ سنين مع حقيقة انه لم يطرق بابي أحد .. وفي أحد المرات زميل لي كان قد أعلن ارتباطه في ذلك اليوم من صديقة لنا وكنت أبارك له لأفاجئ به يقول بشيء من الخجل الغريب، كان المفترض أن تكوني أنت؟؟ الحقيقة إنني فغرت فاهي عدم فهم ودهشة ، أنا أبارك لك يا أخ على الخطوبة من صديقة لي فتقول مثل هذا الكلام؟؟ لقد طقت طوال سنوات عمري ليأتي شخص ويقول كلمة مثل هذه فتأتي بهذا الشكل المهين والذي يعتبر في عرفي مجرد التحدث فيه خيانة لإنسانه احترامها لأقصى درجة، ثم إنني للأمانة لم اعتبرك يومًا –وأنا قلت إنني سأقول لكِ الحقيقة تمامًا- أكثر من زميل والكارثة إنني كنت أحترمه إنه من الأشخاص القلائل الذين حازوا احترامي لعقلهم في هذه الحياة ، جمعت شتات نفسي وأخبرته إنني لا أحب أن اسمع مثل هذا الكلام أساسا الذي اعتبره أهانه لصديقة لي وكدت اتركه فأكد لي إنها تعلم، هذه المرة كان انفتاح فمي يستطيع أن يدخل فرس نهر كامل ربما بالنهر الخاص به أيضًا ، فسألته، معذرة؟؟ ماذا تقول؟؟ أخبرني أن خطيبه تعلم إنه كان يميل إلي بل إن كثيرون من أصدقائنا المشتركين يعلمون، بصراحة لم أجيب ، ولكنه أكمل ببساطة أنهم حتى كأصدقاء شباب من مجموعتنا يعرفون أن بعضهم يميل لي كثيرًا ، كدت أقوله له، بجد ربنا يكرمك على المجاملة دي ولكنه أكمل إنه فكر كثيرا في أن يطلب يدي ولكنه قد خاف ، هنا كنت أكاد أبدأ في الضحك كالمجانين من عدم ترابط الأمر وسخرية هذا الموقف، لم يعرف عني أنني أأكل عشرة أطفال قبل العشاء يوميًا ليخاف احدهم من طلب يدي؟؟ وأكمل بأنه خاف من قوة شخصيتي و أن الشاب لا يريد فتاة يشعر أنها أقوى منه شخصية وأكثر مهارة وأكثر قدرة على القيادة ولها أراء وموقف في الحياة، هذا الكلام بنص تعبيريه ، ثم واصل أمام صمتي أنه كان يمكن أن يصمت كما صمت بعض أصدقائنا المشتركين سابقًا وهم كانوا يفكرون في أمر الارتباط بي هذا ولكن يتراجعوا لذات السبب ، ولكنه وجد إننا عاقلين تمامًا،كما كان هو و خطيبته في مناقشة الأمر- ....

كدت أرقع بالصوت الحياني وأعطيه شلوت لتنضم لتهمي السابقة تهمة ضرب الرجال بالشلوت أيضًا وتنقضي فرصتي بالزواج وعيش حياة أتمناها تمامًا، ولكن سيطرت على ذاتي بشدة ومنعت ركبتي أن تنطلق في الشلوت في اللحظة الأخيرة..

فسد يومي تمامًا بل ربما فسد مزاجي في الفترة التالية و أقنعتني والدتي وصديقتي المقربة وهي تضرب أبنها الثاني ليخرس لتتمكن من محادثتي (ابنه السيدة التي تحسرت على الفتاة التي لم تتزوج) بأن هذا الشاب وإن كان عاقل مثقف فهو ضعيف الشخصية وكل الشباب ليسوا هكذا وطبعًا كانوا الاثنتان يلمحوا بأن أظهر القليل من الانقياد والضعف حيال الآخرين وخصوصًا الرجال ، يا نهار مش طالعله شمس؟؟ إذن انتن أيضا ترون المثل؟؟ ولكن قالت صديقتي سريعًا، لا نحن فقط نقول أنه عليكِ أن تتمسكني حتى تتمكني، فأعلنتها أكيده إنني لا أتجمل، أنا هذه من سيتقدم لي سيجدني قبل الخطوبة مثل بعدها مثل بعد الزواج بعشر سنوات لا أحب التزييف ولا التجمل الكاذب ولن أضحك على احد لأظفر بزوج

..
، و لم تكد تمر سنه حتى كان أحد معارفنا و أحد أصدقاء أخي قد قدم ذات الأسطوانة المشروخة لأخي الأكبر بأنه كان يتمنى الزواج من أخته لولا؟؟؟!!!!
وجاء أخي ليحكي لي هذا ضاحكًا ولكن تحاشيت زقل أخي من فوق السلم لو حدث ذلك لما وجدت زوج يومًا حتى في كوكب المريخ؟؟
الصراحة الصراحة إنني أفكر الآن فأجد إنني وصلت لسن الـ27 دون مشروع ارتباط واحد.. أنا الشخص الوحيد الذي لو نشرت قصتي في بيت العرايس والعرسان الذي لا يعاني من مشاكل قصص الحب والزواج لأنني لم يعرض علي أي عروض حب أو زواج مطلقًا.. طبعًا طبعا لدي أفضل مجموعة زائفة عن قائمة العرسان الذين رفضتهم واحد واحد والتي احكيها في المناسبات المشابهة التي تحكي بها الفتيات مثل هذه الأمور.. و كل فترة لا يسهو عليّ أن أمتنع عن لقاء أو مقابلة أو أتغيب مع التلميح الشهير بأن لدينا ضيوف اليوم ، ثم العودة وحكي القصة المثيرة التي تنتهي دائمًا بأنني مترددة ثم ارفض أو إن العريس لا يطاق

..
هل هذا كذب؟؟ نعم هو كذلك ولكن ماذا افعل تخيلي منظري يا برايد بين عشرات الفتيات الغير مخطوبات أو مخطوبات أو المتزوجات اللاتي يتباهون بعدد الخطاب وطالبي الود ثم تخيلي منظري عندما يمروا بعيونهم نحوي ينتظرون قصتي.. وتخيلي حالي لو قلت أنني لا أملك واحدة لأنه لم يتقدم احد؟؟
اعتذر عن الإطالة ولكني كنت أريد أتكلم حتى لا انفجر

..
(ن)
قصتها و بأسلوبها

(مع بعض الإختصار)

ح م م

2008-08-06T09:58:00.000-07:00

هالو يا دكتوره
انا مكنتش حابب اقلب المواجع بس يالا عشان ما تقوليش ان فيه صمت وتجاهل ومؤامرات تحاك في الظلام
تحياتي

انا اسمي ( ح ) أكبر اخواتي الخمسة ، ووالدي موظف بسيط ، قدر يربيني كويس وبكرم ربنا كنت متفوق ودخلت كلية قمة ويوم ما اتخرجت كان والدي طلع معاش والشركة اللي بيشتغل فيها شغلتني مكانه ، وده طبعا عشان ربنا مابينساش حد
طبعا هتقولي ان الحدوته ديه رايحه للمدونة اللي جنبك بتاعت خالدة الذكر فايزة واصف ...بس انا باقول يا ريت نصبر ، خصوصا انك يعني مش من النوع المختصر ورغايا في الفاضية والمليانه ( ديه اشاده مش هجاء علي فكره )
المهم انا كنت في كلية قمة وكنت شاطر فاسمي كان معروف جدا في المحاضرات ، بس طبعا مكانش ليا في الرجلات والحفلات وكده لأسباب واضحه
بس كان فيه سبب تاني مخليني مشهور في أوساط الطلبه المكبرين ...ان عنيا خضرا بشكل ملفت وشبه عينين المطرب الاسكندراني الشهير ( مش هقول مصطفي قمر عشان مايبقاش اعلان )
وصدقوني يا جماعه ان الموضوع ده كان عاملي " سوكسيه " جامد جدا ، يعني جمعت المجد من طرفيه " ذكي وشاطر وشبه مصطفي قمر كمان
باعتباري كنت مركز في الدراسة كنت باتجاهل الحركات الشهيرة من الزميلات اللي بترمي الكتب او عاوزين يستلفوا الكشاكيل او يصوروها ( وحياتكم بيحصل من ايام احمد رمزي لدلوقتي ) عشان انا فاهم اللي فيها خصوصا البنات اللي اسمائها بتبدأ ب ( ح) وهيبقوا مأنسين جنبي في اللجنة
بس للأسف مكنتش اقدر اقاوم ( م ) عشان كانت متفوقة وذكية ومتعرفش مصطفي قمر ، وغير كده كانت وحشه ، مش شبه الشاويش عطيه يعني ، بس محدش يقدر يغلط ويقول انه شاف اخر فيديو كليب ليها ، او يقتكرها قريبة من بعيد لنانسي أو حتي امال ماهر
طول الكلية ما جرؤتش اني اكلمها واكتفيت بالسهوكه والتسبيل ، وفجأة لقيت نفسي اتخرجت وباشتغل والآنسة ( م ) اختفت من جدولي
طبعا كرم ربنا استمر وغرقني ، وعرفت الاقي شغله احسن في شركة كبيرة بمرتب محترم خلاني اتنطق حبتين وابطل ركوب مكروباصات واركب الاتوبيس المكيف وكده
وبعد شغل لمده 3 شهور لقيت نفسي قصاد ( م ) ... اتاريها بتشتغل في نفس الشركة وانا طول الشهور ديه ما خدتش بالي منها ...مغفل وبتاع شغل هاقول ايه
كلمتها كاننا كنا صحاب من ايام مدرسة الوحدة العربية الابتدائية ، والغريبة انها كلمتني باعتبارنا كنا بنقسم سندوتشات المربي سوا
قلت الحمد لله ، يعني مش كفاية اشتغلت في مكان محترم ولقيت عروسة احلامي ...اكثر من كده ايه ))))))
وخلال ست شهور العلاقة تطورت بشكل ايجابي وبقيت اوصلها يومياً ...اه صحيح ماقلتلكمش اني جبت عربية بقرض شخصي من الشركة
المهم توكلت علي الله وفاتحتها وطلبت معاد اقابل والدها في بيتهم اللطيف في 555 شارع نوال حلمي في العجوزه ( عنوان افتراضي ) وهنا شفت وشها بيحمر للمرة الأولي وقالت انها هترتب مع والدها وترد عليا

في اليوم الموعود خدت والدي ورحنا بيتهم وبعد ما رحب بينا والدها جت هي ووالدتها وقعدوا فوالدي قال
ان ابني ( ح ) – اللي هو انا يعني مش اخويا مثلا – شاب مجتهد وطموح وذكي واهم حاجه انه ملتزم ومتدين وعشان كده ربنا بيكرمه لدرجة انه لما اتخرج اتعين بعدها بيوم في شركة كذا اللي هو كان شغال فيها ،
فرد والد ( م ) وقال
عشان كده انت شكلك مش غريب علي انا كنت رئيس قطاع في الشركة ديه ، اكيد لمحتك ، انت كنت ماسك انهي قطاع ،
والدي اتحرج شويه بس قال
انا كنت في الحسابات ،
فوالدها ابتسم وقال
يعني كنت بتتحكم في مرتباتنا وفلوسنا ، ده انت اهم واحد في الشركة

الحقيقة انا انبسطت من والدها وذكائه ، وانه راجل راسي وعاقل ، وفضلنا قاعدين نصف ساعة كمان نتعرف وبصيت ل ( م ) لقيتها بتتفادي نظراتي فقلت يمكن مكسوفه
تاني يوم استنيتها في الشغل ما جتش ، اتصلتبيها ما ردتش ، سألت عليها في مكتبها قالوا انها واخده اجازة اسبوع
استغربت جدا ، ليه ما قالتليش
حاولت اتصل تاني لقيت موبايلها خارج التغطيه
عدي الاسبوع ولقيتها باعتالي رسالة انها سافرت الساحل الشمالي عشان تنفرد بنفسها وتفكر في الموضوع
انا حقيقة استغربت ، هو مش احنا بقالنا ست شهور نعرف بعض ؟ ايه بقي اللي اتغير ومحتاج سفر مفاجئ وساحل شمالي وحركات ؟
قلت يا واد اصبر ، وطال صبري
لما رجعت الشغل لقيتها رجعت لايام الكلية تقريبا ، معاملة رسمي ومن طراطيف مناخيرها ويا استاذ ( ح ) ، وحضرتك ، وهكذا دواليك
رحت رايح بقي مكتبها وقفلت ورايا الباب وقلتلها
بقي ردي عليا دلوقتي ايه اللي جري ؟ هو انا دست علي مناخيرك مثلا وانا مش واخد بالي فعشان كده كل ما تشوفيني تكلميني من طراطيفها ؟
قالتلي
يا ( ح ) انا فكرت في الموضوع وشايفه ان احنا مش لايقين علي بعض ومفيش نصيب
انا خدت الموضوع عالبارد فقلتلها
عشان انت طويلة وانا قصير ؟ والا انا عنيا خضرا وانت عنيكي سودا ؟
قالت
انت فاهم كويس ومتخلنيش اقول حاجة تضايقك ، بس تصور ان رؤساء القطاعات يحضروا فرح كريمة زميلهم علي ابن موظف حسابات عالمعاش ...

طبعا انا كان نفسي اسيب كل ده وامسك في ( كريمة ) ديه ، بس مسكت اعصابي وقلتلها ما قاله بديع الزمان الهمذاني في كتاب نصوص اولي ثانوي
" الحمد لله الذي عافاني من ربقة الذل في وفائك بيدي جفائك"

مش عارف بقي هيا فهمت ولا لا ، بس انا كان نفسي اقول الجملة ديه لحد واخيرا قلتها
منكرش اني اتضايقت وزعلت وحسيت بالاستياء المشوب بالقرف ، بس الحياة لازم تستمر ورجعت اشتغل زي الحمير تاني ، ولقيت ان الشركة بتدي دورات كمبيوتر فقررت اروح بعد الشغل كمان عشان ما اروحش غير اخر الليل اتنيل انام واصحي الصبح الف في الساقية وخلاص
بس في دورة الكمبيوتر قابلت بنت لطيفة جدا حسستني ان ( م ) كانت حقيقي الشاويش عطيه ، لطيفه وهادية ومعقولة لحد كبير والالطف ان اسمها كان ( م ) برضه
انا حسيت اني اتعلمت كثير من التجربة الاولانية وقررت اني استغل فترة الدورة عشان اخذ قرار ، ولما كان الموضوع بيتطور بشكل ايجابي وسريع ، استخرت في الاخر واتقدمتلها ، فقاتلي اجيب والدي وازورهم فقلتلها
من الاول والدي موظف حسابات عالمعاش واحنا مش ساكنين في 555 شارع نوال حلمي في العجوزه
ضحكت جدا وقالتلي
انت عرفت منين عنوان بيتنا ؟ انت بتمشي ورايا ؟
قلتلها
لا انا باقول مثلا
قالتلي
ده عنواننا بالضبط
ويا تري ساكنين في الدور الخامس شقة 18 ؟
لا الدور السابع شقة 22

الحمد لله بعد 3 سنين من القصة ديه انا دلوقتي متجوز ( م ) اللي في الدور السابع شقة 22 ، وفي فرحنا كان فيه دعوة لشقة 18 في الدور الخامس بس للآسف محدش جيه ،
حد يعرف ليه ؟؟؟

إمضاء

(قصته و بأسلوبه)

علبة سجاير

2008-04-03T15:00:00.000-07:00

هاى برايد

عاملة إيه؟ يا رب تردى بالصيحة الأشهر "وجدته" - معلش بقى ارشميدس ما يزعلش -

شوفى يا أختى أنا طبعاً من كتر العرسان اللى إترزيت بيهم (مع الإعتذار للرزية) مش قادرة أفتكر هم كام بالضبط بس خلينا كده واحدة واحدة سوا من أول واحد وأنا عندى 18 سنة لحد ما بعيد عنك وعن القارئات ما بقيت 33 سنة

أول واحد ده يا ستى كان اسمه على مسمى "ماهر"
طول عمرى يا ستى أسمع إن طريق الألف ميل يبدأ بخطوة لكن يبدأ بعلبة سجاير دى كانت جديدة وشوفى بقى
كنت فى ثانوية عامة وبأحلم بواحد فى وسامة توم كروز (أحمد عز ما كانش لسه طلع) وكنت شاطرة موت وطموحى أدخل كلية قمة وفى مرة ماما بعتتنى أودى حاجة عند طنط منى صاحبتها وقعدت طنط تدردرش معايا عن الكلية اللى نفسى أدخلها وقلتلها إزاى البيت عندى مش عاوزنى أدخلها لأن كل شغلها مجهد جداً للبنت وسكتت طنط شوية وقالت لى

سيبى لى أنا الموضوع ده إبن جيرانا فى نفس الكلية دى وتعالى نسأله صحيح الكلام ولا إيه

جريت طنط على التليفون ورجعت بعد دقيقتين تقولى

"ماهر" جاى دلوقت وهنعرف كل حاجة

ورن الجرس ودخل ماهر وأختك كان هيغمى عليها وحسيت إن عينى طالعة بره وشى زى عصفور ساعة الحيطة لما تدق
وسلم علىً وأنا مديت إيدى أسلم يمكن أسند على إيده قبل ما أقع من طولى
مفيش فيه غلطة يا برايد دالق جردل برفان عليه وشياكة ايه ورقة ايه وعيون إيه يالهووووووووووووووووى (طبعاً ده إحساسى ساعتها) قعدت متنحة وطنط هى اللى بتسال وهو يجاوب ويبص لى وأنا مش فاكرة من الدنيا غير جملة د/ نبيل فاروق فى روايات الزهور "وغرقت فى عينيه

المهم فقت يا أختى على كلمة

"

عموماً خدى رقم تليفونى لو حبيتى تدخلى الكلية لما تنجحى عشان أقولك تعملى إيه فى إختبار القدرات"

لو حبيتى؟ أهبل ده يا أخواتى طبعاً أحب وأحب وجيت أتكلم صوتى طلع زى ما تكون بتسمع حد بيكلمك فى الموبايل والشبكة واقعة "

هو حضرتك فى سنة كام؟

" فى سنة تالتة يعنى لو جيتى كليتى هتلحقينى فى سنة

وسلم ومشى وأنا جرى من وراه شكرت طنط ونزلت هوا قبل ما تأخد بالها إنى مبرقة زى مرضى عنبر الخطرين فى العباسية
مشيت بقى ولا شادية وهى بتغنى سونة يا سونسون لحسن يوسف ولا حيبيى أهو لعماد حمدى والقمر ده ممكن أشوفه كل يوم لو دخلت الكليه دى وكان فاضل شهر على الإمتحانات وفضلت أذاكر ولا كأنى عبد الحليم فى فيلم الوسادة الخالية وخلصت الإمتحانات وإستنيت النتيجة تطلع بفارغ الصبر عشان ألقى حجة أتصل بيه ده غير مرواحى عند طنط منى بمناسبة وبغير مناسبة عشان أشوفه ولو من بعيد
وطلعت النتيجة وجبت مجموع الكلية وكان الكل فرحان بالمجموع وأنا اللى فرحانة بأبو العيون العسلية وكلمت طنط منى تبدأ تقنع ماما ورحنا لطنط وتانى جه القمر وبدأ يشرح لماما مزايا الكلية وأن فيه كذا قسم ومنهم اللى شغله مناسب للبنت ومش عارفة إزاى قدر يقنع ماما اللى كانت معاندة وفى الآخر استئذن وقال لى

أنا تحت أمرك فى أى سؤال

وضحكت طنط ضحكة حسيت كده أنها خبيثة شوية
وقالت لو مش فهمتى حاجة نجيب ماهر يذاكر لك عندى

أبوسك منين يا طنط يا حلوة يا جميلة يا يا يا.......عارفين كل الكلام الحلو اللى فى الأفلام العربى تقوله البنت لأمها بعد ما تقابل الجو
وطبعاً ما صدقت واتصلت أشكره ويا خرابى على الرقة يا خرابى وبدأنا نتكلم كل أسبوع كده مرة وكل مرة وأنا إيه عاملة زى اللى بيأخدوا حقن مورفين وبدأت السنة واستهبلت فيها طبعاً وقلت أنا مش فاهمة المحاسبة دى عشان أنا أدبى واتعمدت أقول كده قدام طنط منى وكانت هى معايا على الخط تقريباً لأنها ردت

بسرعة خلاص ماهر يذاكرها لك

وجه اليوم الموعود واتصلت أأكد عليه المعاد قبل ما أنزل وطلب منى وأنا جاية أجيب له "علبة سجاير" يادى الحوسة يا أولاد ودى هأجيبها إزاى بس رديت يسرعة بس كده حاضر السوبر ماركت زى اللى عاملة عملة وشاورت للراجل على علبة السجاير من بعيد وخبتها معايا زى اللى مخبية جثة ولما وصلت اديتها له ورفضت بشدة تمنها
لا مش ممكن أبدا كفاية تعبك معايا كفاية معطلاك

وتكرر الدرس واتكررت السجاير -ممكن أقولك كل الماركات الحريمى والرجالى- وأنا كفاية أسمع كلمة
"
ميرسيه" "أصل أنا مش بأتكسف منك عشان أنتى قريبة منى"

وحكى لى عن مشاكله العائلية اللى مخلية باباه معاند مع مامته ومش بيصرف عليهم وأنا أسح يا أختى عشانه طول الليل وبدأ كلام

"بصراحة انا بأحبك بس عارف أنك مش ممكن تقبلى واحد لسه مش أتخرج ولا معاه فلوس
...إلخ إلخ"
ويا لهوى على كلام

"أنا صريح معاكى موت أصلى بأحس لما بأكلمك أنى قدام نفسى كأنى قدام مرايا أرجوكى ساندينى"
وأختكم ما كدبتش خبر وعملت فيها البنت المصرية الأصيلة وقعدت أتخيل نفسى بعد ما ربنا يفرجها عليه ويشتغل ويبنى نفسه ونتجوز وأنه هيكون عظيم ووراء كل عظيم إمراءة (المحروسة أنا) وأثبت أصلى بداية من علبة السجاير لحد مصروف جيبه مروراً بالهدوم والبرفانات وساندوتشات الكلية وكل ما تتخيلونه وإتخرج "سبعى" وقعد مستنى الجيش وكانت آخر كلمة له قبل ما يروح يتقدم للجيش

"أرجوكى إوعى تسيبينى لازم تيجى تزورينى بأكل وسجاير وفلوس"

وما راحش الجيش وبرضه ما لقاش شغل وفضلت وصلة السجاير والفلوس مستمرة وأنا بلا تذمر وبلا نقود أيضاً ولقى شغل ونطيت من على الأرض حبيبى هيشتغل وكل مشاكلنا هتتحل ويجى يخطبنى واشتغل وبفلوس كتير وبرضه فضل يطلب علبة سجاير كل ما يشوفنى وفلوس برضه ما يمنعش ورغم إن ربنا إدى له كتير لكن عمره ما فكر يجيب لى وردة ولو بلاستيك حتى ولا اتقدم لى برضه بحجة أنه عايز يكمل من مجاميعه وبعدين يتقدم وأنا زى العبيطة أفرح وأقول بيحبنى خايف أهلى يلاقوا حجة ويرفضوه فبيقطع عليهم الطريق
وفى يوم اتفقنا نتقابل وكان هو جاب موبايل ودخلت الكافيه وهو فى وضع مش يسمح له يشوفنى وسمعته بيقول

"يا عبير يا حبيبتى أنا مش بأتكسف منك أنا بأكلمك زى ما أكون بأكلم نفسى قدام مرايا أشوفك بليل وما تنسيش تجيبى لىً علبة سجاير"
أنأن أنأن أنأن.......وهوب

مفيش داعى لوصف السنين السودة اللى جت بعد كده علىً والحمد لله أن كان عمرى بقى 22 سنة بس فعلى ما استرديت وعيى من غيبوبة الصدمة كنت وصلت 24 سنة

عارفة يا برايد قابلنى صدفة من 5 سنين فى مول وسألنى

مش محتاجة حاجة تخدى فلوس أنتى يا ما أديتينى

وطلع لى 50 جنيه وهو بيسألنى

صحيح أنتى ليه مش أتجوزتى لحد دلوقتى؟
رديت بهدوء وأنا بأنسحب من قدامه

"عشان لسه مالقتش راجل"

بس وشكم كلمته زى فاتن حمامة ما كلمت استيفان روستى فى فيلم سيدة القصر نفس البصة يا أخواتى وهى بتسأله "أنت بتشتغل إيه بالضبط؟" (أموت أنا فى الكلاسيكيات دى)

أوعوا يا بنات تغرقوا فى العين العسلية وأحذر أى بنت من لعب دور المضحية الشهمة تمهيداً للعب دور الزوجة العظيمة
والمثل بيقول

عيش ندل تموت مستور

أختك جيجي

قصتها و بأسلوبها

بمنتهى اللطف

2008-02-27T22:41:00.000-08:00

طيب يابرايد اسمعى حكاية لسة طازة.

انا ياستى كنت غير كل البنات، مش قصدى الأغنية لكن أنا عمرى ما حلمت انى اتجوز بسرعة زى كل البنات – تفتشكرى هو ده السبب- ويا اما اتبطرت ياختى والله ( تفتشكرى برضه ده ممكن يكون سبب)، - لا طبعا ده نصيب - وربنا يسامحنى بأة ويعفو عنى . انا كنت طموحة جدا وعايزة احققق لنفسى حاجة لانى كنت حاسة انى ولا حاجة وحددت لفنسى اانى هابتدى افكر ف الجواز على سن 26 سنة يعنى اكون حققت طموحاتى المهنية وكمان اكون نضجت كفاية لانى اصغر واحدة وتصرفاتى كانت طفولية شوية وكمان كانت شخصيتى غير مسئولة بعض الشىء

.
الحمد لله اتخرجت من كلية قمة زى ما بيقولو اشتغلت كمان ف مكان مالتى ناشونال وابتديت ف سكة تحقيق الطموح المزعومة، وعديت على السنة اياها المشار اليها عاليه ، وحسيت انى جوايا بركان على وشك الانفجار ورغبة قوية وملحة انى اتجوز وبسرعة ... استغربت اوى من احساسى ده، لانى كنت بصحى من النوم فى نص الليل على كلمة اللهم ارزقنى الزوج الصالح.... كانت مرحلة غريبة اوى ومؤلمة وحالة انا مش فاهماها زى ما اكون استغفر الله العظيم شايفة انى حياتى ممكن تمشى بالمسطرة ، لكن طبعا كله بارادة ربنا... اللهم اغفر لى.

ولأن شغلى حساس وجدولى مليان فانا منش عندى اى فرص للخروج اوالتعارف ، وعلاقاتى بالجنس الاخر محدودة جدا وفى اطار الزمالة البعيدة كمان، ومش مشتركة ف نادى ولا عيلتى كبيرة ولا علاقاتى واسعة.ولا بخرج مع صحباتى اللى كل واحدة فيهم عاملة زى المكنة من البيت للشغل ومن الشغل للبيت وكلهن آنسات ومناصب وجميلات وغير مرتبطات. فاضطريت – بحكم كونى اصبحت شخصية عملية – انى اجرب مواقع الزواج الاسلامية اللى ع النت،

وكتبت مواصفات اللى انا عايزاه مواصفاته واحد اتنين تلاتة .... مش بقولك شخصية عملية، المهم حصل توافق بينى وبين واحد ، ابتدينا نتكلم ونتعرف على بعض ، رغبتى من انى احس بيه كانت اقوى بكتير من احساسى بيه، يعنى تقدرى تقولى كده حبيته قبل ما حتى احس انه بحبه ، زى اللى بتتلكك عشان تحب، لانى كان عندى مخزون "عاطشفى" متجاهلاه الى ان بلغت المرحلة العمرية اللى سمحت فيها لنفسى انى افتح قلبى بأة، وفتحته .. وعينك ما تشوف الا النور!!!!! ، الولد كويس ومش تافه ومحترم وتفكيره حلو بس مشكلته زى مشاكل كل الشباب ... الفلوس .... بس هو يتميز شوية بانه بيدرس ف المانيا، بيحضر ما جيستير (عقبالك يابرايد) وهو نفس مجال دراستى على فكرة، بس انا جبت م الاخر ووفرت على امى الفلوس ونزلت انا كمان اشتغل واجيب فلوس.
المهم، ابتديت احس انه الفارس اللى جايلى ع الحصان الأبيض ( اللى اتضح لى بعد كده انه حصان طروادة) وان احنا مخلوقين لبعض وكل الكلام الساذج اللى بيتضحك بيه ع البنات ف اول تجاربهم وبيتصدق طبعاً عشان ما مروش بتجارب تعلمهم وانا كنت كده.
وهو ادانى حب واهتمام كبير جدا وعيشنى ف حالة حب وقالى كلام – احلى كلام – من يومها وانا بضرب نفسى بالشبشب انى صدقته....

فاجئنى بعد نزوله بطلب اننا نسيب بعض، قلت كل شىء نصيب والحمد لله ان ده حصل دلوقتى قبل ما يبقى فى حاجة رسمى، رضيت بقضاء ربنا ووافقت بمنتهى السهولة ونهيت كل اتصال بيننا،
وفوجئت به راجع وبقوة يطلب منى انى ارجعله وكلام بأة من اللى قلبك يحبه، وعقلك يستعبط ويصدقه ( متسيبنيش ، متضيعيش كل حاجة بسهولة كده
انا ما صدقت لقيتك..انا بحبك... انا محتاجلك، خليكى جنبى انا جاى من اخر الدنيا علشانك
،،
) وفعلا عملت كده وسامحته ونسيت ورجعتله "بمنتهى اللطف" لانى فعلا كنت حبيته أو يمكن عشان سيت تروس قلبى تقوم بوظيفتها و وتخيلت انى مش هقدر اوقفها تانى، واذا بهذا الموقف يتكرر مرة اخرى، وانا بأة نهر النيل ورمز العطاء والوفاء والتسامح اللى باغفر انسى وارجع "بمنتهى اللطف".

واذا به بعد ما ييجى البيت والموضوع يمشى ف تراك الاجراءت الرسمية ، يكرر نفس الطلب وهو اننا نكون اخوات بس يكون فى بينا اتصال لانه حاسس انه ولا حاجة ومعهوش اى فلوس ولا حتى تمن الدبلة ، ولانى بحقيقى شايفة ان تقييم الانسان مش بالفلوس خالص ولانى الحمد لله ربنا كارمنى ورازقنى ولان اخر سبب ممكن ارفضه عشانه هو امكانياته المادية، لانه شاب ومستقبله كويس وهو ده الكنز الحقيقى، عرضت عليه انى اسلفه بس رفض "لكن مش بقوة"، مامته كانت ست جميله وبتحبنى وكانت بتكلمنى من وراه ، وعرضت عليها انه اديها فلوس تديهاله من غير ما تقوله انها منى.... بس برضه محصلش وأنا ما ألحتش... لانى فكرت ف نظرة الناس ليا لو حد تانى عرف، انا برضه مش رخيصة ، انا بس بحب ولطيفة.
وقلت له "بمنتهى اللطف"
انا ميهمنيش الفلوس لانها بتاعة ربنا ورزق وكمان احنا اللى بنعملها مش هى اللى بتعملنا واحنا لسة فى بداية حياتنا ولسة ادامك مستقبلك بعد ما تخلص دراستك
، كنت بحاول اقف جنبه على اد ما اقدر، بس كمان انا كنت تعبت اوى اتألمت وحسيت بالاهانة ، حسيت انى يويو مربوط بأستك ضعيف يشده شوية ناحيته وبعدين يرميه ف الهوا ويتفرج عليه وهو بيبعد وبعدين يرجع يشده تانى بمنتهى السهولة:

وقعدت ادندن "بمنتهى الطف":

( هتروح؟ ما تروح وسيبنى وروح وروح علشان اعلم قلبى يعيش مجروح .... هتبيع؟ متبيع ما انا لازم اضيع ،علشان اتعلم عمرى ما آمنش اللى يبيع.... بهواك؟ بهواك كان لازم اهواك ، علشان انا قلبى طيب وانت حبك هلاك).

تعرفى يابرايد اخر مرة دى حسيت انى برتعش ، تقريبا الاستك كان ابتدا يتقطع، وفعلا حسيت ان بطارية قلبى شحهنا ابتدا يفضى وهو استنفذ كل طاقتى واحاسيسى ما بين مشاكل امكانياته المادية المتعسرة ورسالة الماجيستير وابحاثه المهددين بالضياع والشقة وظروفه ف البيت وعلاقته بوالده وكراهيته لمصر و...... مع انى كنت راضية واوجدتله حل لكل حاجة حتى مشكلة الشقة حليتها. وقلت له انى الحاجات دى عمرها ما هتفرق بينا، واننا نبعد عن بعض بس لو مش بنحب بعض، وطالما الحب موجود كل المشاكل دى بتدوب وبتعدى وبتتحول لذكرى.
بس بعد شوية زهقت من المحايلة واتخنقت جوايا مشاعرى ناحيته ، تعرفى كان ايه رد فعله، رفض رد فعلى بالاستسلام لرأية اننا نسيب بعض للمرة الرابعة او الخامسة مش فاكرة ( وده كله فى ايام ميكملوش اسبوعين ) ،
وقالى بالحرف
انا مستنى منك تحسسينى انك متمسكة بيه لان ظروفى صعبه وتعبان وهو ده اللى انا محتاجه منك، وان مش متزن وتعبان نفسيا وده بيحصلى لما ينزل مصر، اللى مستحيل أعيش فيها وانه خايف لحسن متعرفش تيجى معايا المانيا
، فوافقت "بمنتهى اللطف" وجبت ورقى وابتديت اجهز لاجراءات السفر، لقيته تحمس وعنيه لمعت وبعد نص ساعة تحول وقالى انه لما يبقى غنى هيبقى ييجى يتجوزنى ورمانى ف الشارع .. ومشى.. حسيت احساس فظيع يا برايد، يمكن شبه احساسك لما اتسرقت منك الفلوس ف الميكروباص، بس الفرق ان انا قلبى وكرامتى اللى اتسرقوا....
الادهى من كل ده انه بعد ما طلب منى اتحمله واحسسه انى متمسكه بيه، بعدها بعتلى يقولى انا مش فاهم سر تمسكك بيا، اللى بيحصل ده مش طبيعى

ويوم الفالانتين كان تاريخ فراقنا الفعلى، رجعتله هديته اللى كان جايبهالى لما جه من السفر، وأخدها بسهولة، وشحنى بالأحاسيس السلبية ناحية نفسى، وحواره لم يخل من كراهيته لمصر وترابها وشعبها والتخلف اللى فيها والفساد و.....وتخيلى لقيته بيدينى ورق عشان اساعده واعمله له، وبيطلب منى اننا نفضل على اتصال وكان محسسنى ان ده اكبر جميل بيعمله لى.... مش قادرة أقولك كرهت نفسى اد ايه ف اللحظة دى وحسيت انى ولا حاجة وانى مكسورة أوى ، وقررت اعمل اى حاجة ارد بيها اعتبارى لنفسى وانتقم بيها منه وأرد كرامتى اللى ضاعت فى تراب مصر الغالية اللى انا بحبها بجد وبحب نيلها ( حبيبى بتاع العطاء) ، بس مالقيتش ادامى غير الورق بتاعه اللى كان مديهونى عشان اشتغله فيه بعد ما اشتغل لى هو ف الأزرق وعيشنى فى الأسود، رحت واخدة قرارى بمنتهى القوة والحزم والشجاعة وقررت الا اكون فى "منتهى اللطف" واعتذرت لحبيبى نهر النيل بتاع العطاء، وقلت هى دى اللحظة الحاسمة ، انا لازم افوق من الوهم ده بأة وأدوس على تروس قلبى حتى لو اضطريت انى اكرسها.
ومسكت الورق بتاعة "بعنف".........
وبوسته"برقة" .......
ورميته ف الزبالة" بمنتهى اللطف ".

( فى حد يحب حد بيوجعة بالشكل ده، ويرضى يضحى بحياته، فى حد عنده عمر يضيعه هدر كده ، وما يبكيش ع اللى فاته).

إمضاء
المعذبة اللطيفة بنت النيل

(قصتها و بإسلوبها)

أستاذ حماده إتجوز يا ميييييييييينز

2007-11-03T13:55:00.000-07:00

في الأول جاتلي الرسالة بالأخبار الحلوة....لكن التفاصيل مبهمة

هاى برايد عاملة ايه . انا حمادة صاحب اول بوست فى بيت العرايس والعرسان ياترى لسة فكرانى ؟
انا باكتب لك لسببينالأول انى . أهنيكى على البوست الجميل اللى فى بلوج عايز اتجوز واللى أكد لى انك فعلا موهوبة كبيرة وانك (وياريت متزعليش) خسارة فى الصيدلة وانك تدفنى الموهبة الجميلة دى بين ريحة الفورمالين واليود ومركبات الباراسيتامول

.
السبب التانى انى عايزك تعرفى انى أخيرا وبعد طول عذاب ومقالب أتجوزت ولسه راجع من شهر العسل ( اللى كان شهر فعلا ) وانك كنتى سبب أساسى فى جوازى وأكيد هاكتب لك قصة جوازى علشان تشاركينى انتى وقراء المدونات بتاعتك الفرحة زى ما شاركتونى جزء من المقالب اللى شربتها .
عقبالك وعقبال كل سكان وقراء بيت العرايس والعرسان ( الغير متزوجين طبعا) و حقيقى موش عارف اشكرك إزاى .

و بعدين جاتلي التفاصيل..ماصدقتش نفسي من كتر سعادتي...انا كنت السبب في إن القصة الجميلة دي تكتمل

حقيقي سعادة لا توصف ان الواحدة تبقى سبب و لو غير مباشر في توفيق اتنين بيحبوا بعض...فييييييييينك يا طنط حشرية تشوفي

اقروا معايا

هاى برايدإزيك عاملة ايه وايه أخبار كل الناس فى بيت العرايس والعرسان حقيقى وحشتونى ووحشتنى قصص بيت العرايس والعرسان وتعليقات زوار البيت

كنت بعتلك رسالة أول مارجعت من شهر العسل أشكرك فيها لأنك كان ليكى دور كبير فى جوازى( انا شخصيا باعتبر جوازى معجزة بعد كل اللى شوفته ) وعلشان مطولش عليكى أحكيلك القصة .بعد ما نشرتى قصتى الأولى عن حبيبتى اللى طلعت بنت صديق قديم بحوالى أسبوعين لقيت جرس التليفون بيرن فى مكتبى أول ما دخلت رنة تليفون من خارج الفندق.,اول ما قولت ألو رد علية صوت خلى قلبى فعلا ينزل فى رجليه . كان صوت حبيبتى اللى حكيت لكم قصتى معاها . فعلا حسيت انى موش عارف اعمل ايه . افرح ولا أقفل ولا أعمل عبيط .المهم أنى أخترت الأختيار الأخير وعملت فيها عبيط وموش عارف مين اللى بيكلمنى لغاية ماعرف أتلم على نفسى

.سألت بصوت مرعوش واضح فيه الإستعباط

مين معايا؟

بعد فترة سكوت قالت لى انا فلانة . انت نسيت صوتى ؟

استمريت فى حالة الإستعباط طبعا وقلت لها أهلا وسهلا . إزيك وإزى بابا وماما عاملين ايه والكلام العبيط ده

( قالت لى بعد كده ان صوتى كان واضح فيه انى باستعبط وموش عارف اسبك الدور)

المهم بعد انتهاء حالة الإستعباط قالت لى

انا قريت البوست اللى فى المدونة الجديدة بتاعت برايد وأكيد طبعا انت اللى كاتبه

حسيت ساعتها كأنى واقف تحت المطر فى عز يناير بمايوه ومعرفتش أقول لها ايه غير انى آسف انى كتبت حكايتنا من غير إذن منها . المهم انها طلبت منى اننا نتقابل لأنها عايزة تكلمنى فى موضوع مهم . طبعا قلت لها ده مستحيل طبعا أنى أقابل بنت صاحبى من وراه وإن أخلاقى وسنى ميسمحوش بحاجة زى دى.وحسيت بان سكينة كبيرة من بتوع الجزارين بتنغرس فى قلبى لما سمعت صوت بكاءها فى التليفون وهى بتقولى هستناك بكرة فى المكان اللى كنا بنتقابل فيه سواء جيت او مجتش

. طبعا فضلت من ساعتها لغاية ما روحت البيت وانا موش عارف اعمل أيه أو أتصرف إزاى وفضلت سهران طول الليل أفكر .وطبعا قررت بكل حسم انى موش هاروح لكن لقيت نفسى قبل المعاد بساعة كاملة رايح على المكان وقعدت أحاول الاقى تبرير لرجوعى فى القرار لكن معرفتش . لكن السبب الحقيقى كان جوايا وهو انى فعلا باحبها وانها أجمل فرصة تيجى لواحد فى سنى انه يحب ويلاقى اللى تحبه وتتمسك بيه .وقبل المعاد بنص ساعة لقيت حبيتى داخلة من الباب وفعلا حسيت انى كنت غلطان انى أتخليت عنها لما لقيت وزنها نزل كتير ولونها شاحب وكأنها كبرت عشر سنين فى الكام شهر اللى بعدت عنها فيهم . وموش عارف هتصدقينى ولا لأ لمل أقولك انى بمجرد ما إيدى لمست أيديها نسيت كل حاجة كنت قررتها وكل المعاناة اللى عشت فيها الشهور اللى فاتت .ولما سألتها عن سبب طلبها مقابلتى بعد ما أتفقنا انى أكون ليها مجرد صديق قديم لوالدها قالت لى انها لما شافت البوست اللى كتبته حست بأننا هنظلم نفسنا لو محاولناش ,

بصراحة حسيت انها رغم سنها الصغير طلعت اشجعع منى وانها صارحت نفسها باللى انا مقدرتش اصارح بيه نفسى .وقالت لى انها صارحت والدتها بأنى أنا الإنسان اللى كان المفروض يتقدم لها ووالدتها تفهمت الموقف ووعدتها بالمساعدة لو اتقدمت .

روحت وانا فعلا طاير من الفرح وقررت انى أصارح والدها واللى يحصل يحصل وخلاص أول ما وصلت البيت اتصلت بالصديق المشترك اللى بينى وبين أبو حبيبتى واللى كان معاه يوم ما طلب منى إنى احاول احط حد لعلاقة بنته بالراجل اللى فى سن أبوها (اللى هو انا ) قابلته وحكيت له الحكاية على بلاطة زى مابيقولوا لقيت وشه بقى لونه اصفررررررررر والعرق مغطيه

وقال لى بمنتهى الغباء

طيب وانا اقدر اعملك ايه ؟

رديت عليه بنفس الغباء والبرود

زى ما كنت السبب انى ماتقدمتش لها تيجى معايا وانا باطلبها من ابوها

نط كأن فيه تعبان قرصه وقالى

لا يا عم ماليش دعوة

قلت له

هتيجى يعنى هتيجى .

المهم بعد محايلة وإقناع وافق انه يجى معايا على اساس يحوش عنى لو العملية قلبت بغم ويهدى النفوس ويمكن ربنا يفتح عليه بكلمة كويسةالمهم اتصل بوالد حبيبتى واتفق معاه اننا نزوره تانى يوم انا وهو وطبعا الراجل رحب (مانا صاحب فضل عليه بقى) تانى يوم الصبح حبيبتى اتصلت بيا واتفقنا هنعمل ايه لما أكون عندهم ( وإتأكدت انها حافظة رقم الإسعاف علشان لو انا اتعورت ولا حاجة )ورحنا انا وصديقى بيتهم فى حى من أحياء القاهرة الجديدة و أخدت معايا بوكيه ورد شيك .الراجل الصراحة رحب بينا جدا وقعدنا فى الصالون وجه الشاى

.ودخلت علينا حبييتى وسلمت علينا وقالت لوالدها لو سمحت عايزة اوريك حاجة طبعا الراجل استغرب وفهمها انه موش وقته هى أصرت وطبعا أنا كمان اصريت انه يروح معاهاالمهم الراجل راح مع بنته وبعد حوالى تلت ساعة سمعت صوت حاجة بتنهبد وحاجات بتتكسر وصوت زعيق . تفتكروا ليييييه؟ حببيتى فتحت الكومبيوتر على البوست اللى كنت كاتبه وجابت باباها قراه

طبعا الراجل ( وليه حق ) الدم غلى فى عروقه وقام هابد الكومبوتر فى الأرض كسره ميت حتة لأنه فهم الموضوع على طول أول ما قراه خصوصا أن فيه واحد من الإخوة اللى علقوا على البوست كتب عنه كلمتين زودوا عنده ضغط الدم . ورجع لنا الصالون ووشه إتحول للون غريب بين الأحمر والنبيتى وعنيه لون الطماطم ومن غير ما يتكلم ولا كلمة شاور لنا على الباب .طبعا حاولت اتكلم لكن غيرت رأيى لما لقيت عنيه بتتردد بين فازة كبيرة وبين دماغىطبعا آثرت السلامة زى ما بيقولوا وخرجت وحمدت ربنا ان الصالون فى الدور الأولانى لأنه لو كان اعلى من كده كان رمانى من الشباك من غير تردد المهم سبت صاحبى يحاول يقنعه ومشيت وكنت متفق مع صاحبى اننا لو أفترقنا فى المعركة هستناه على القهوة فى مدينة نصر .بعد حوالى ساعة ( عدت كأنها سنة) صاحبى جالى وقال كلمة سعد زغلول الخالدة ( مفيش فايدة )طبعا كل ده كنت متوقعه وكنت متأكد انى موش هاكسب حبيبتى بعد أول جولة أبدا . تانى جولة بقى كانت فى النادى وطبعا إستعنت فيها بكل الأصدقاء اللى اعرفهم علشان أعرف أدخل النادى اللى انا موش عضو فيه .

المهم بعد ماربنا وفقنى ووقف لى ولاد الحلال دخلت النادى اللى كنت عارف ان عيلة صديقى العزيز موجودة فيه (طبعا كانت حبيبتى ناقلة لى تحركات ابوها أول بأول ) وبصراحة أول ما الراجل شافنى رحب بيا زى أى واحد ما بيرحب بعفريت طلع له فى الضلمة واتنطر من على الكرسى ولولا ان حماتى العزيزة غيرت الجو(حبيبتى كانت كسبتها فى صفنا) وزغرت لصديقى العزيز زغرة رجعته على كرسيه تانى

وسألنى بمنتهى الغلاسة والبرود

عايز ايه يا أستاذ

قولت له

انت عارف أنا عايز أيه

رد على بكل هدوء

لأ موش عارف ومفيش داعى تقولى انت عايز ايه

وبص لبنته بصة نارية ومن غير ما يدرى قالها

لو سمحتى قومى شوفى لك حاجة تعمليها على ماخلص كلام مع عمك حمادة (شوفتى الكلمة البايخة)

المهم انها قامت وهى متعمدة تخلى أبوها يشوفها وهى بتبصلى وفتحت الموضوع تانى معاه وطبعا بمساندة حماتى مقدرش يعلى صوته تانى (علشان متبقاش فضيحة فى وسط النادى طبعا)فهمته انى بعدت فى الأول احتراما لصداقتنا القديمة وأنى دلوقت باحاول انى أحافظ على الصداقة دى (وطبعا قلت له كل الكلام اللى فى الأفلام العربى القديمة والجديدة) المهم انه عمل نفسه موش سامعنى لكن لاحظت فى وشه شئ من اللين واعتبرت ده إنتصار لياالمهم قام علشان يصلى الجمعة رحت معاه الجامع وبعد الصلاة كان هدى شوية لكن برضه سابنى وروح من غير ما يدينى جواب

بعد كده بدأت رحلة مطاردة للراجل فى كل حتة ولأننا بنشتغل فى نفس المجال ففيه ناس كتير بيتعاملوا معايا ومعاه ومنهم ناس هو بيحترمهم وبيسمع كلامهم ووسط كل اللى يعرفهم ويعرفونى عنده علشان يوافق وطبعا حبيبتى ومامتها قاموا بدورهم فى البيت فبقى الراجل ياعينى متحاصر فى الشغل بالمعارف وفى البيت بالنكد وماستحملش غير إسبوعين وإستسلم ووافق انى اتقدم لبنته بصفة رسميةوأخيرا تم الإتفاق على كل حاجة ولأننا لا أنا ولا هو عندنا مشاكل مادية وماهوش حجة يأخر بيها الجواز أصر ان مفيش تحديد مواعيد غير بعد ما أجهز الشقة ونشترى العفش وبصراحة زمايلى اللى بيشتغلوا فى الديكور وفى المشتريات عملوا معايا واجب كبير جدا بحيث ان الشقة اتجددت ديكوراتها والعفش جه وركب خلال شهر واحد

وأخيرا حددنا يوم الفرح وحجزت اكبر قاعة فى الفندق وكانت ليلة جميلة فعلا كان نفسى أعزمك فيها أنتى وكل سكان بيت العرايس والعرسان لكن ده طبعا كان هيبقى محتاج انى اعمل الفرح فى الأستاد موش فى قاعة فندق طبعا كنت شايف فى عيون ناس كتير الحسد (ودول طبعا اللى فى سنى ) بسبب عروستى اللى فعلا فى الليلة دى كانت زى القمر . وفيه ناس كانت عنيها مليانة إشمئناط (علشان واحد متجوز واحدة اصغر منه بكتير) . لكن فعلا كان فيه ناس كتير حسيت انهم فرحانين لى بجد وبعد الفرح قضينا شهر عسل أكتر من رائع لفينا فيه أكتر من بلد وبعد ما رجعنا بدأت العلاقة تتحسن بينى وبين حمايا العزيز وقدر يتقبل الموقف

انا باكتب لك دلوقت وحبيبتى جنبى وبعد ما عرفنا أن فيه فرد جديد هينضم لعيلتنا الصغيرة وبعد الفترة اللى مرت على جوازى دى حسيت ان ربنا عوضنى عن كل المقالب اللى أخدتها فى رحلة البحث عن نصى الحلو وان ربنا فعلا بيعوض الصابرين بكل خيرومرة تانية بأشكرك يا برايد وربنا يديكى العريس اللى تتمنيه واللى يسعدك . وعقبال كل سكان بيت العرايس والعرسان

سلام بقى لأننا طولنا عليكم بقى وأكيد زيارتى لبيت العرايس والعرسان عمرها ما هتنقطع باااااااااااااى

ألف مبروك يا أستاذ حماده

و الله و الله فرحتلك

سمك شيكولاته بطاطس...أحمدك يا رب

2007-07-14T14:21:00.000-07:00

هاي يا برايد ..إزيك

أنا كنت بعتلك ايميل قبل كده و كنت بادخل على المدونة كتير و باعلق و من يجي شهرين كده ربنا سهلهالي و اتكعبلت في عريس كويس ..قلت يا بت مابدهاش اطلعي من الطابور و ادي فرصة لغيرك

فعشان خاطر كل بنات مصر اللي انا واقفة في سكتهم ..و عشان خاطري برضه ..قمت اتخطبت

و بما انك واخده علينا عهد في المدونة ان اللي تتخطب ماتقولش عشان خاطر الضغط و النقطة و شلل الأطفال و كده ..قلت يا بت بلاش تنكدي على برايد و تقوليلها و هي لما تلاقي الطابور فضي قدامها هتفهم لوحدها

شوفي يا ستي

قبل الخطوبة بكام يوم رحنا نحجز الورد من عند الراجل

قلت اما اخده معايا..مانا طول عمري نفسي يبقالي راجل كده أمشي معاه و اتباهى قدام الناس ..و كل اما حد يجي يكلمني أشاور عليه و أقول اتكلم مع الأستاذ بتاعي ..أصلوا مابيحبنيش أكلم شوباب خااالص

و فضلت ماشية معاه و فاضلي تكة و اوقف الناس اللي في الشارع عشان أقولهم..حبيييبي اهه ..ترارم ترارم..خطيييبي أهه..تررارم تررارم..الليه يمسيكي بالخير يا شادية

وصلنا للراجل بتاع الورد و انا في نفس حالة الإفتخار و الإعتزاز دي..الراجل وراني الورد و عجبني خدته مسكته في ايدي..و أستنى أستنى أستنى..الراجل برضه شكله قلق..أبص على الأستاذ بتاعي..ألاقيه سرحان..طب اعمل ايه؟؟ أفوقه ..أعمل اني بوريلوا الورد و ادلق عليه شوية ماية و الا ايه...قلت يا واد طنش خاااالص..عديها بأه جايز فعلا مش واخد باله ..قلت يا بت جايز مش واخد باله بجد ..رحت مطلعه الفلوس و حاسبت الراجل..بسيطة يعني..

و عملنا الخطوبة ..ماعزمتكيش عشان بحبك ..مانا عارفة النظام بأه..بعد الخطوبة بشوية كده قاللي تعالي أما اعزمك على الغدا...قلت يادي الهنا يادي المنا..ابتسم كده و بقه بأه 2متر و هو بيسألني..تحبي تتغدي فين..؟؟؟

قلتله على محل سمك مشهور عندنا مانا اسكندرانية بأه..لقيت ابتسامته بقت سالب خمسه و ارتبك و بلم..قلتله مالك في حاجة ..قاللي لأ بسيطة بسيطة

يوم العزومة فات عليا و انا ايه لابسه اللي ع الحبل و في العربية لقيته رايح سكه تانية خالص ..ايه فيه ايه ..فين السمك؟؟؟

قاللي لأ أبدا ..أصل بتاع السمك ده غالي شوية و احنا لازم نعمل حساب لمستقبل أولادنا ..أمال ايه؟..أنا هاوديكي حتة أفخم و أحلى بكتير...كوك دوور

كوك دوووور؟

وشي اتقلب و علامات الإذبهلال طلعت عليه ...بس كتمت في نفسي و قلت معلش يابت يمكن المرتب طلع جمعيات ..مانا بنت أصل ولازم أستحمل

قعدنا و طلبنا السندوتشات و قعدنا نتكلم و شدينا في الكلام شوية و مالحقناش ناكل السندوتشات ..المهم خدناهم دليفري ..الراجل لفهوملنا في كيسه و خرجنا بعد ماوصلنا لبيتي لقيته واخد السندوتشات في حضنه و فتح الكيس و طالعلي البطاطس و قاللي ..خدي دي أنا مش باحبها و نزلت من العربية وانا ماسكه علبة البطاطس و فاتحه بقي من الإذبهلال على آخره ..و هو خد السندويتشات في حضنه و مشي

شفتي الهنا اللي انا فيه؟

ده غير انه مرة جابلي كيسه كده و قاللي ماتوريهاش لحد
قلت يبقى قبض جمعية م الجمعيات و جابلي حتة دهب كده و الا حاجة
و الله و صبرك طلع على خير يابت
ماهي حاجة مش عايز حد يشوفها و لا حتى أمه ...أفتح الكيس يا برايد ألاقيلك كيلو شيكولاته

طب أحكيلك ايه تاني ..والا تكونيش زهقتي ؟؟

أكملك بعدين

عندي حكايات كتييير عن سي الأستاذ بتاعي

استني الباقي أجمل

أختك..روأه

ماتقولش أمين شرطة..والا دبلوماسي

2007-06-27T13:19:00.000-07:00

انا مش شاطره في الكتابه لكني قررت احكيلكوا و
الا هطق,انا مهرة و ظروفي و سني مشابهين لبرايد جدا مع فارق بسيط و هو اني شفت حوالي 30 عريس وان كانوا ما يتخيروش عن عرسان برايد,و ده أدي الي اني هيست تماما
المهم من حوالي سنه و انا في معمعه الاستعداد للامتحانات,امتحانات الماجستير طبعا لحسن حد يتجن في عقله و يفتكرني لسه صغيره,ماما جت و قالتلي

جايللك عريس
تاني-

تاني ايه,انت متلخبطه في العدد والا ايه-
ههه-
المره دي دبلوماسي و مش هتقدري ترفضي-
و ده يتقدملي ليه اقصد يعرفني منين-
طنط فلانه تعرف مامته, بس؟ بس؟ بس؟-
بس ايه؟-
عايزين يشوفوا صورتك الاول-
ايه,دي اهانه ,انا لا اقبل,استحاله-

براحتك-
استني بس,الدنيا مش قفش كده-
امري لله لو ما كنتيش تلحي

,بدايه سيئه لاني فعلا مش فوتوجنيك,يلا برضه لو رفض تبقي في بيتها يعني ماحدش يعرف غير انا و
ماما وبابا و طنط و ما.. و و و و,يعني حوالي 20 نفر بس
الغريبه ان بعد اسبوع ماماجت منشكحه قوي و بتقولي انه عايز يقابلني,يظهر ان نظره ضعيف,
ها يجيلليك الشغل؟-

اوعي يهوب هناك,احنا ناقصين وقف حال,احنا نتقابل في ارض-
محايده ولا يستني احسن لما اخلص امتحانات عشان اروق له
ما انتي بترفضي كل العرسان, يعني نقول للراجل استني شهر و نصف و بعدين تقولي لا
معاك حق,الي الارض المحايده-
يا ريت نفتكر الحوار الاخير ده لانه مهم جدا
و قد كان ,

ويا مهرة نعرفك على ماهر ههههههه

و هاتك يا ضحك من كل الستات اللي قاعده ,بس يا حلاوه يا ولاد تقولش امين شرطه اسم الله و لا دبلوماسي,علي رأي السندريلا الله يرحمها,صحيح هو ابعد ما يكون عن حسين فهمي بس هو مقبول جدا و لابس بدله,نخش في الجد بقه,برضه شكله ذكي و عاقل و مبتسم,بس حاجه داخليه كده قالتلي انه مش ناوي و قبل ما نعبر حدود الارض
المحايده كنت قلتلهم كده و انا بضحك

لا طبعا,الولد شكله مبسوط و مبتسم,انتي لسه صغيره,علي- كل حال انتي بتضحكي علي ايه,اشششششششششش
هشيت بما اني صغيره و دي مجامله ما مبتحصلش كتير دلوقت,سبحان الله ما عداش سواد الليل و كانوا متصلين يقولوا انهم موافقين و مبسوطين,يظهر اني فعلا ما بفهمش ,و عايزيين يتقابلوا تاني,صوتت بالبلدي زي بنت سلطح بابا
و الامتحانات-
امتحانات ايه؟-
ناقص اسبوع يا ماما-
....يوووووه,دا الاسبوع فيه 7 ايام ,في 24 ساعه في 60-

هاقابله,ماما ممكن تستمر لغايه الفمتو ثانيه,لو اظهرت اي مقاومه,و بالفعل في عز نقحه الشمس نزلنا و انا لابسه البلوفر الهاي كول و الكعب 7 سم لزوم حفله الكوكتيل اللي احنا رايحينها و اذ فجأه شخص ما اقترح ان انا و هو نتمشي في الغالب امه,يا دي المصيبه و ال7 سم ,قمت ولا حول و لا قوه الا بالله ,بس التضحيه الكبيره دي جت بفايده و اتفكت عقده لسانه وهاتك يا كلام اشي سياسه خارجيه علي حزب العمل الاسرائيلي علي ابن جني, اي و الله, جني اما
يعفرت كيانك يا بعيد, بس سيبكوا من الهزار انا اتكيفت من الكلمتين دول ما نا قلتلكوا اني مهيسه قديمه و احب الحاجات دي زي عينيه,بس الحر يا اعزائي,بقيت عامله زي الفراخ المسلوقه و بعد ما كان قلبي بس بينزف بقت رجلي كمان ,لحد هنا و استوب لازم اقعد,تقريبا ما عجبوش اللي حصل و سكت ,يظهر برمجه الكلام عنده علي الواقف بس,المهم رجعت البيت و انا لسه مقتنعه برأيي,بس كلهم وقفوا ضدي و قالولي انه كان مبتسم

عدي اسبوع كمان و بدأت امتحانات و هما و لا حس و لا خبر حتي ماما بدأ يتزعزع ايمانها العتيد و ما خبيش عليكوا انا كمان قلقت,صحيح هم ما قالوش غير انهم موافقين بس الساعه البيلوجيه بتاعتي ما كنتش مطمنه,كمان ما يصحش ما يسألوش عليا و انا بامتحن,المهم اتصلوا و عايزيين يتقابلوا,شوف الظلم يا جدع طلعوا ماكانوش عايزين يعطلوني,

ماما ماعجبهاش الكلام ده كله الا الكرامه و مسكت طنط فلانه

ولو هو مش عايز,خلاص كل منمنا يروح لحاله

و طنط يا عيني صعبت عليا قدام الهجوم الكاسح و اعترفت والله العظيم هو مبسوط و موافق,نزل عليا الكلام ده بردا و سلاما و اقعدت احلم بقه بلا مذاكره بلا
هم,الست مالهاش الا بيتها برضه

و اتقابلنا لثالث مره,المره دي عملت احتيطاتي و لبست جينز و زحافي لزوم المارثون و بالفعل 3 ساعات من المشي المتواصل لما رجلي بقيت زي رجلين اطفال الشوارع,اه نسيت اقولكوا حاجه مهمه,امه اقصد والدته اخدت ماما و قعدتها علي دكه في الشارع اللي في النادي , و بعد ما رجعينا من اللف عزمتها علي مياه معدنيه و الله العظيم و ده اللي اكد عند ماما شكها بانهم بخلاء بس دي كلها سفاسف زي مانتو عارفين و لا يمكن توقف موضوع عرفوا ينتزعوا مني موافقه عليه,احكيلكوا بقه علي المارثون طبق الاصل العل.. المره الفاتت بس الحقيقه المره دي كان مبسوط فعلا و قعد يتكلم عن نفسه و عن السياسه الخارجيه برضه و تعرفي فوكوياما؟ ههه وقعيت في حيص بيص,و ده ايه دا كمان؟ اكله صيني و لا ماركه موبايل؟المهم هاقولوكوا واكتبوها يمكن تنفعكوا,ده الراجل بتاع صراع الحضارات و حضاره الصراعات,ما علينا الموضوع كان فيه اسامي كتيره بس بلاش نجيب في سيره الناس ,اهم حاجه اني المره دي لبست السلطانيه فعلا

حسيت انه خلاص ماهر لمهرة

و حصوة

في عين اللي ما يصلي علي النبي ,ده حتي ماكنش عايز يمشي و ثبتت الرؤيه و ما حكيلكوش عن الايام و الاحلام

تسألوني يا جلال,جلال مين,ايه يا مهرة اللي حصل؟ما حصلش حاجه خالص,خالصصص؟مالللللللللللللللللللللللص
غطس ماقبش,هنا لازم حد يفرملني والا هاستمر في الكتابه للابد اييييييييه دنيا,و بعد شهر و نصف بالضبط من بدايه الموضوع المنيل ده,اتصلت طنط فلانه و قالت ان مافيش نصيب,يا سلااااااااااااااام و جاي علي نفسك ليه؟اقول ايه بس؟ فاكرين الحوار,حسبي الله و نعم الوكيل,بصقه موجهه لوشي بدون اي ذنب و ربنا يشمتتني فيك يا اخي شماتي في العريس رقم 13 ,اما تفسيري للحصل ان الاخ متأثر بالسياسه الامريكيه "الغابه غابتنا نبرطع براحتنا" عامه انا من يومها طلقت السياسه و ما رحتش انتخب كمان في انتخابات مجلس الشوري,هه!!!,و مركزه دلوقت في العرسان من وزاره التأمين و المعاشات بعد فشلي مع وزارات الصحه والداخليه والخارجيه و برضه الدهن في العتاقي

توقيع :أختك مــهرة

قصتها و بأسلوبها

الكعب للقفا..بالحب و الوفا

2007-05-29T08:39:00.000-07:00

بناءا على طلب الجماهير..اللي اكتئبوا و اتعقدوا و قربوا يولعوا في نفسهم و في بيت العرايس و العرسان من كتر القصص الغير موفقه و الشخصيات المريضة اللي بتظهر في كل القصص..أخيرا لقيتلكم قصه من القصص المتفاءله المشرقة كانت مبعوتالي من فترة و سهيت عنها في وسط قصص النكد اللي باموت فيها..و رغم اني باتشائم من التجارب الناجحة دي..بس برضه مايهونش عليا حد يولع في روحة بسببي.. و عشان كده

آدي القصة المتفائلة الناجحة

الكعب للقفا..بالحب و الوفا

الإرتباط ده موضوع يشبه البحث عن إبرة فى كومة قش
المهم الإبر مش موضوعنا دلوقتى أنا كنت بفكر فى نظام كونى مختلف يتماشى مع العصر الحالى. يعنى زمان مكانش فيه البشر دى كلها. المسألة كانت سهلة، آدم لحوا و حوا لآدم إنما دلوقتى فيه 3 بليون آدم و 3 بليون حوا ، الموضوع إتعقد شوية و مكنش حد عامل حسابه و أكيد محتاج حل من فوق أكبر منى و منك عشان كده فكرت فى طريقة تانية للموضوع ده، أحكيلكوا الحكاية الأول؟

- بابا عايز أتجوز

ورينى قفاك يابنى -

إتفضل يا بابا -

بصوت عالى

هاتى نضارة القراية يا فوزية

تجرى فوزية مهرولة و تحضر النضارة و هى تتمتم،

يا ألف نهار أبيض، و ترقع زغروتة مدوية

يقرأ الوالد بصعوبة من على قفا إبنه
- إسمها نادية عبد السلام و نمرتها أهى
- ميرسى يا بابا إستنى أديها رنة
- رنة إيه يا واد إبقى حب فيها براحتك بعدين كلمها خد عنوان البيت

يتصل الشاب بالنمرة

- ألو أيوه أنا تامر يا نادية
- تامر مين؟
- عريسك،إسمك مكتوب عندى
- صحيح يا تامر؟ إنت باباك عايش؟
- آه ليه؟
- طب و حياة والدك إبعتلى صورة قفاك
- قفايا؟ طب مش تشوفى وشى الأول؟
- يوه طب خد عندك العنوان أهه

يدق تامر بقوة على باب العروسة واقفاً متأنتكاً مع أهله، يفتح الباب رجلاً ضخماً و يقول
- أهلاً يا مرحب، إنت تامر يابنى؟
- أيوه يا أنكل عبد السلام - مشيراً بإصبعه إلى نقطة وراء رأسه - أنا العريس
- من وراء الباب - صوت أم العروس

- شرفتوا و أنستوا إتفضلوا
يدخل تامر و العائلة يتعارفون مع أهل العروس التى تخرج عليهم فى أبهى صورة.

يمد تامر يده ليسلم على عروسته نصيبه ، تسلم عليه سريعاً و تقول له:
- لف يا تامر
- نعم؟
- يوه لف خلينى أخلص
تخرج نادية تليفونها المزود بكاميرا و فلاش و تقوم بتصوير قفا تامر ثم تسارع بإرسال صورة القفا إلى كل صديقاتها إس إم إس موضحة إسمها و نمرتها على القفا
تتململ الست فوزية فى كرسيها فتقول الست أم نادية:
- دحنا زارنا النبى
فتقول الست فوزية
- يا نادية يا بنتى حد يلبس شراب برضه فى المناسبة دى؟ مش دى الأصول أبداً

تجلس نادية و تقوم بخلع الحذاء الرياضى و الشراب كاشفين عن قدمها اليسرى و تجلس الست فوزية على الأرض أمام نادية و تقترب من كعبها بعيونها و تقرأ بصوت مخنوق:
- تامر أبو العزايم

يقول والد العريس المثل الشهير: الكعب للقفا

و يكمل والد العروس: بالحب و الوفا
ترتسم إبتسامة خجول على وجه نادية و تنطلق الزغاريد من بيت العروس معلنة إكتشاف العريس

.
سهلة مش كده؟ مفيش أسهل من إن كل واحد يتولد و مكتوب على قفاه و لا كعبه إسم شريك مستقبله و نمرته، حاجة من عند ربنا كده - مش الناس بتقول نصيب؟ خلاص يبقى مفيش حاجة تمنع إنه يبقى معروف من الأول هتوفر وقت و مشاكل و كهربا و فلوس و وجع قلب

.
الكعب للقفا بالحب و الوفا.

ميشو

http://mishotopia.blogspot.com

اذا لم تكن خروفا..فلا تجعلني معزة

2007-05-11T12:37:00.000-07:00

شفته انا و اهلى عن طريق الشيخ "محمد" جارنا كان كلامه تقليدى .
كل اللى عرفناه عنه قبل ما ييجى
انه دكتور اسنان و عنده عياده . و بعد التعارف المبدئى بره البيت جالنا تانى مره
البيت و كان ذوق قوى جايب
معاه تورته و الابتسامه على وشه عريضه و هندامه منمق و بصراحه اكتر حاجه
لفتت نظرى انه بيحب النظافه
قوى حتى الشوز من كتر النظافه كان شكلها لسه جايه من المحل و هدومه لسه جايه
من المكوى حاجه تفرح
بس لما كمان اتكلمت معاه لقيته و لا بيحب ياكل بره و
لا يجيب اكل جاهز غير قليل قوى عشان بيخاف من الامراض
و كرهنى فى كل اصناف الاكل الجاهزه حتى الفول و الطعميه يعنى من الآخر
حينقعنى فى الديتول3 او 4 ايام قبل ما نتجوز !
بعد اول زياره فى البيت اتضح لى انه دكتور الصبح و مقاول بعد الظهر و فاتح
مكتب للتجاره و ما عندوش
عياده و لا حاجه و لقيت طريقه كلامه مره توحى بأنه راجل اكاديمى و مره
تانيه الاقيه عامل زى التجار
و طريقه كلامه سوقى و حتى تفكيره زى التجار فبقيت مش
عارفه احدد هو ايه بالضبط

.
كان فرق السن بيننا كبير 15 سنه بس انا قلت شكله كده انسان محترم
و يعتمد عليه و راجل بجد ممكن
يتحمل المسئوليه و لقيته هو اللى خايف انى اكون مدلعه و ما اقدرش
اشيل مسؤليه بيت و سألنى
زى ما اكون فى امتحان عن طريقه عمل الملوخيه و المحشى و سألنى
اذا كنت بنظف البيت و لا بجيب
حد يساعدنى

بصراحه انا بشتغل و ماما تعبانه عشان كده بنجيب
ام محمد تساعدنا كل اسبوعين

لقيته اتشال و اتحط

"لأ أنا ما احبش حد غريب يدخل بيتى "

دى ام محمد بنتعامل معاها من سنين
"لأ انا ما احبش ابقى زى حد "

يا سيدى الناس اغلبها كده"

انا ما ليش دعوه بحد"

طيب نعدى الحكايه دى .
سألته بيحب يخرج فين قال لى

انا ما بحبش الخروج و بصراحه المولات و
الكافيهات دى اماكن للدعاره و مقابله البنات و الاولاد

"طيب يا سيدى و احنا مالنا بيهم , المولات دى فيها محلات
لبس و الناس بتقضى طلباتها هناك "
رد عليا

"الكلام ده مش مضبوط و الاماكن دى مشبوهه و لو اى حد راح
بتكون شبهه حتى لو الست
حتروح مع جوزها و كمان لبس العبايات شبهه . من الآخر انا ما بنزلش
غير وسط البلد و مش كتير
كمان انا مش فاضى للخروج كل شويه و ما احبش مراتى تخرج لوحدها
ابدا حتى و لا مع اهلها .لازم
اكون معاها . تزورى اهلك ساعه ساعتين و اروحك بنفسى"

شكل الموضوع
كده غم من اوله انا صحيح مش غاويه خروج بس ده اسمه حظر تجول و انا كمان بشتغل و
اتعلمت ازاى الموضوع يكون فيه توازن لا خروج على طول و لا قعاد على طول

.
نلاقيه دايما مشغول لما ييجى يزورنا ما يكملش ساعه و يمشى عشان الشغل
و العملاء و التجاره والمكتب و الاعلانات حتى ما عندوش اجازه و لا يوم فى الاسبوع .
يخرج للشغل الساعه 7 مساءا و يروح ساعه ساعتين و ينزل الشغل تانى و
يرجع واحده بالليل و عينيه شكلها عايزه نوم 10 سنين قدام هو صحيح مجتهد بس الحياه كده صعبه
و سألته اذا كان بيحب الاطفال احباب الله

قال لى دول وجع دماغ .
و مره بسأله

بتحب طيب تصيف مره فى السنه

لقيت الرد

" بسافر طبعا يوم
و ارجع فى نفس اليوم او تانى
يوم بالكتير امال يعنى اتفرج على المايوهات و المسخره "

يعنىمن الآخر
لا بيحب الخروج و لا الاطفال
والمصايف و لا عنده وقت من اساسه !!
بتروح يوم و ترجع فى نفس اليوم ازاى يعنى بتعمل امه زى الاستغمايه و
ترجع مثلا و بعدين مش كل
المصايف مسخره . المصايف فيها بحر الواحد يتمشى جنبه او حتى على
الكورنيش يروح الاسواق
يعنى ياكل بره و يغير جو

"لأ يا آنسه اذا كنتى فكرانى بتسستم لأ , و
اذا كنتى فكرانى خروف
من بتوع اليومين دول انا مش خروف "

ما كانش فيه غير رد واحد على لسانى

"
اذا كنت انت مش خروف فأنا كمان مش معزه و
حتسحبها وراك عن اذنك يا دكتور

أختك المعذبة:ميريت

قصتها و بأسلوبها!"

عروسة تانية للأستاذ حمادة

2007-04-27T07:12:00.000-07:00

هاى برايد

تعليقات الأصدقاء على قصتى الأولى كانت جميلة جدا وده شجعنى أنى أبعت لك موقف تانى إتعرضت ليه أثناء رحلة بحثى عن شريكة حياة . الموقف له تعرضت له وانا لسه سنى صغير يعنى فى نهاية الثمانينات أو أوائل التسعينات (هاعمل نفسى موش فاكر علشان مافتكرش سنى )وقتها كان لسه جرح أول بمبة (واكبر بمبة على فكرة) لسه زى مابيقولوا بينزف وفشلت محاولات إيقاف هذا النزيف أو مداواة الجرح مع إنى حاولت (لكن مفيش فايدة ) بدأت القصة يوم أجازتى الأسبوعية من شغلى . يومها صحيت على أصوات خبط ورزع فى البيت كأنهم بيعزلوا من البيت مثلا .قمت متنرفز طبعا أشوف ايه السبب فى المولد اللى عاملينه وانا عايز انام لأجد أمى العزيزة و المقروضة أختى (البنت الوحيدة على عدد من الأولاد ) ومعهم كمان اتنين ستات شايلين البيت والستاير والسجاجيد وشغالين تنفيض وتلميع . طبعا أصابتنى دهشة شديدة من اللى حاصل بس مقدرتش أتكلم طبعا قدام الناس الغرب الموجودين .وسألت المقروضة بمنتهى البراءة .

هو العيد قرب ولا حاجة يا مقروضة؟

فردت بابتسامة لأ طبعا يا حمادة العيد لسه بدرى عليه .

وأوحت لى إبتسامتها بأن هناك خبر سعيد سوف أسمعه . فأبتسمت ونظرت لها فى خبث قائلا :

والله كبرت يامقروضة وجالك عريس . ألف مبروك يا حبيبتى .

فزادت إبتسامتها إتساعا وردت قائلة : لا ياحمادة موش عريش ليا ولا حاجة .

فأزاد فضولى طبعا وسألتها أمال فيه إيه؟

وقبل أن تفتح فمها هبطت علينا أمى العزيزة وزغرت لها زغرة وقفت الكلام فى زورها وقالت لى معرفش .

إستعوضت ربنا فى اليوم وقفلت على نفسى صومعتى (اللى هى أوضتى يعنى) وقررت أنى أنفصل عن العالم مع فتاة أحلامى (إللى هى سوسن بدر ) .وقبل أن استغرق فى الأحلام وجدت أمى العزيزة واقفة فوق دماغى وهى جايبة لى الفطار ومع الفطار أمر بعدم التحرك من المنزل بعد الضهر علشان فيه ضيوف جايين لنا و ميصحش أسيب والدى معاهم لوحده . فأعترضت على اساس أنى عمرى ما قعدت مع ضيوف غير ضيوفى وعندها أخين غيرى ممكن يقوموا بمهمة البيبى سيتر لضيوفها الأعزاء .فانفجرت فى وجهى موضحة لة بأن أخى الوسط راح الجيش الصبح والأصغر رايح لخطيبته ( مع نظرة المقصود منها جتك خيبة الصغير خاطب وهيتجوز وانت لسه قاعد لى ) . فتأكدت وقتها أن اليوم قد تم تدميره بواسطة أمى العزيزة وأن عزائى الوحيد هو الجلوس منفردا بسوسن أشكو لها همى فهى الوحيدة التى سوف تستمع لى فى هذا المنزل .

وأتت الساعة الخامسة وهو موعد وصول ضيوف أمى و انا طبعا أحاول تجاهل الموقف عل أمى تنسانى وترحمنى من هذه المهمة الثقيلة على قلبى ولكن مفيش فايدة برضه أتت أمى الى صومعتى مع أمر بالتوجه الى الصالون للسلام على ضيوفها .طبعا قلت حاضر وأستأذنت من فتاة أحلامى وفى طريق خروجى من الغرفة إستوقفتنى أم حمادة قائلة :

إيه الزفت اللى إنت لابسه ده ؟( الزفت ده طبعا اللى هى هدومى) إقلع هدوم الشحاتين اللى إنت لابسها دى والبس حاجة عدلة.انت فاكر نفسك رايح للميكانيكى ولا خارج تتصرمح مع الصيع اصحابك . دول ناس محترمين يا أفندى.

حاضر يا امى .

وغيرت هدومى ولبست القميص الجديد والبنطلون الجديد و الشراب الجديد وكله جديد علشان اريح دماغى واليوم يعدى على خير .وبعد أن فحصتنى ست الحاجة كويس سمحت لى بالنزول والسلام على الضيوف .ومع اول خطوة داخل غرفة الصالون إكتشفت سبب إهتمام أم حمادة بهدومى . حيث وجدت سيدة رائعة الجمال ومعها بنت تشبه العروسة باربى (فى الشكل موش الحجم طبعا ) .شعر أصفر طويل وعيون زرقاء وبشرة بيضاء وجسم متناسق كأجسام المانيكان .واصارحكم القول يا أصدقاء أن مشاعرى تجاه الفتاة المصرية التى تحمل هذه الصفات تكون فى منتهى السلبية . حيث تكونت لدى فكرة أن المصرية التى تحمل هذه الصفات تحمل معها على نفس الجينات صفات الغلاسة والغرور وهما أكثر ما أكرهه فى المرأة . ( وياريت الأخوة بتوع الفسيولوجى يشوفولنا حد بتاع جينتكس يفيدنا فى الموضوع ده )

المهم جلست وانا فى وادى وهم فى واد آخر أو كما اوضحت لى المقروضة أختى بعدها أن الكرسى اللى كنت قاعد عليه كان له صوت اكتر منى . ومرت الجلسة على خير والحمد لله وأفرجت عنى أمى وسمحت لى بالذهاب الى مكانى المفضل (اللى هوالمقهى الوحيد اللى فى الحى )وجاء الأسبوع التالى وبرضه يوم الأجازة الصبح وجدت امر من ابو حمادة المرة دى انى مرحش حتة بعد الضهر لتوصيل امى و المقروضة أختى الى منزل إحدى صديقات لأنه تعبان وموش هيقدر يسوق . وافقت طبعا على مضض ( طبعا موش عايز أسمع كلمتين زى اللى سمعتهم الأسبوع اللى قبله)ولما سألت عن المكان المراد توصيلهم إليه نلت زغرة عظيمة وردت أمى على قائلة :

هنبقى نقولك وانت سايق

حاضر ياأمى ( ده أنا اللى بقول )

وبعد الضهر فوجئت بان صديقة أمى هذه تسكن على بعد 3 شوارع من شارعنا وليس الأمر فى حاجة الى سيارة ولا حاجة .وأمام البيت المنشود وقفت بالسيارة وأنزلت أمى وأختى وقلت لهم أن المقهى فى نهاية الشارع وانهم بعد ما يخلصوا زيارتهم يتصلوا بيا هناك (مكانش الموبايل جه مصر لسه) فانفجرت فى وجهى ام حمادة متوعدة بغضبها على ( وبالتالى غضب ربنا ) فانصعت لأمرها مضطرا وصعدت معها لأجد ان هذه الزيارة رد لزيارة السبوع السابق (يعنى نفس البنت الغلسة اللى مضطر أقعد معاها )وبعد ان رحب بنا أصحاب المنزل ذهبوا لإحضار الشاى والجاتوه والذى منه ووجدت أختى تزغدنى فى جانبى وهى تقول لى :

ما تنطق تقول اى حاجة

قلت لها : اقول ايه؟

فردت أمى : والله لو مانعدلت اسيب لكم البيت . انطق يا أخى بأى حاجة . ولا المقلب اللى أخدته خرسك .

فابتلعت الإهانة ودعوت ربى ان يجعل هذا اليوم يمر على خير . وعندما عادت و بدأت تتكلم لأول مرة (واضح ان امها عملت فيها اللى امى عملته فيا ) وجدت أن هناك ما يمكن ان نتكلم فيه حيث كان لديها جهاز كومبيوتر ( كان لسه إختراع جديد ) ولا تعرف كيف تستعمله .فقفزت المقروضة اختى فى الحوار قائلة

أن حمادة شاطر جدا فى الكومبيوتر وممكن يوريكى اللى انتى عايزاه .

ولدهشتى الشديدة ودهشة البنت كذلك وجدت أمها تقترح أن نذهب الى غرفتها لرؤية الجهاز وما زادنى دهشة هو تأييد امى لهذا الأقتراح .

وذهبنا الى غرفتها وكان الكومبيوتر هو مدخل لحوار اكتشفت فيه ان هذه الفتاة ليست كما تصورت . ووجدتها تحمل روحا مرحة وقلب طيب . وانتهت الزيارة وذهبت بأمى لمنزلنا وبمجرد جلوسنا وجدت أبى يسألنى :

إيه رأيك؟

رايى فى ايه يا حاج؟

فى العروسة الى زى القمر اللى كنتم عندها .

بصراحة يابا الحاج انا موش بافكر فىالموضوع ده ولا هافكر فيه غير بعد مانسى اللى حصل معايا علشان ماظلمش حد معايا

وذهبت الى المقهى حيث ادفن أحزانى فى الضحك مع الأصدقاء .وماهى إلا نصف ساعة ووجدت أبى العزيز على باب المقهى يبحث عنى بعينيه . فقمت سريعا ( بعد مارميت الشيشة بعيد طبعا ) وأخذنى الى ركن منعزل وبدأ فى محاولة إقناعى بفكرة الأرتباط ولما وجد منى رفض للموضوع اقترح بأن أقوم بعدة زيارات للعروسة المرشحة ونتحدث معا بدون أى إرتباطات لعلنا نغير رأينا ( واضح إن هى كمان كان رايها زى رأيى ) فوافقت وأنا متاكد من أن هذا الأقتراح لن يلاقى قبولا لدى الطرف الآخر . ولكن تأتى الرياح بما لاتشتهى السفن .وجاء الرد بالموافقة على إقتراح ابو حمادة صادما لى حيث كنت آمل ان يرفض (واستريح ) واتفقنا على أن أزورهم كل اسبوع لمدة شهر واحد بصحبة المقروضة أختى طبعا حيث كانت تعيش هى وامها وحيدتين بعد زواج أخيها الأكبر ووفاة والدها .وخلال هذه الزيارات أتضح لى أنها فعلا فتاة مختلفة تماما عما كنت أتوقع . فوجدتها رقيقة و مرحة

و عرفت منها ان لها قصة مشابهة لقصتى حيث خطبت لأحد أقاربها بعد قصة حب منذ الطفولة ( وهو بالمناسبة كان يعمل بوظيفة مرموقة من تلك التى تبهر الفتيات ) واكتشفت بنفسها خيانته لها عندما ضبطته بملابس النوم عند صديقتها المتزوجة عندم زارتها زيارة مفاجأة ( كانت صديقتها المقربة أو الأنتيم كما يقولون ) وقررنا سويا أن تتم خطبتنا على أن تكون هذه الخطوبة فترة إختبار لمشاعر كل منا وفى حالة إحساس اى منا بأنه لن يسعد الآخرفإننا نفترق دون ان تتاثر صداقتنا .واتفقنا على أن تطول فترة الخطوبة سنة كاملة حتى يكون إختبار مشاعرنا جدى ولا يظلم أحدنا الآخر بعدها .

وتمت حفلة الخطوبة وبدأنا فى إعداد الشقة التى أشتريتها فى فترة الحب الأول (قصدى البمبة الكبيرة )وبدأت هى فى أختيار ألوان الشقة وبدأت أنا فى شراء كتالوجات العفش كى تنتقى منها خطيبتى الجميلة ما تشاء ونبدافى تصنيعه . بعد 3 شهور من الخطوبة بدأت أشعر بالفة ناحية خطيبتى . ليست حبا ولكنه إحساس بالراحة ونمت بيننا صداقة حقيقية وكنا نتكلم فى التليفون يوميا لساعات طويلة حتى اصبح كل منا يدرى تاريخ حياة الآخر بالتفصيلوبدأت زياراتنا للنجارين لمتابعة مراحل تصنيع موبيليات بيتنا المنتظر وكنت نستغل أيام الأشراف على تصنيع الموبيليا فىالخروج سويا للسينما وتناول العشاء أو الغداء فى الأماكن التى تليق بجمال خطيبتى العزيزة

حتى أتى يوم (كان يوم أزرق بصراحة) كنا نجلس سويا بأحد الكافيتريات الشهيرة بوسط القاهرة لاحظت تغير مفاجئ على خطيبتى وبعد إلحاح منى عرفت منها أن خطيبها السابق يجلس خلفى وينظر إليها .والتفت لأرى غريمى السابق وأصارحكم القول داخلنى شعور بالزهو أن من كانت مخطوبة لهذا الشخص قد وافقت على أن تنظر إلى من الأصل (مش توافق انها تتخطب لى ) فقد كان مثل نجوم السينما . يشبهها من حيث الشعر الأصفر والعيون الزرقاء . طويل وعريض وذو جسم رياضى . ويرتدى ملابس فى منتهى الأناقة .المهم وبأخلاق الجنتلمان (شوفتوا العبط ) قمت إليه وعرفته بنفسى وبأننى خطيب قريبته ودعوته للجلوس معنا . الراجل بمنتهى الهدوء إعتذر بأنه مشغول وانصرف على الفور بعد أن رمقنى بنظرة لم أعرف معناها وقتها .

واكملنا يومنا بعد ان حاولت إخراج خطيبتى من الحالة النفسية السيئة التىكانت عليها وأعتقد أنى نجحت فى ذلك وذهبنا إلى السينما وكانت المرة الأولى التى أحتوى يدها الرقيقة فى يدى . واعتبرت ان حركة الجنتلمان التى قمت بها قد اعطتنى نقاطا فى قلب خطيبتى الجميلة وأنها خطوة جيدة .

وبعد أن أوصلت خطيبتى الى باب بيتها وانتظرت حتى أشارت لى من شباك غرفتها أنها وصلت بالسلامة ثم أخذت طريقى فى إتجاه المقهى لمقابلة الأصدقاء.وعند أول منعطف وجدت يدا ثقيلة توضع على كتفى بفظاظة والتفت جانبا ثم لأعلى لأجد شخصية كريهة من الذين أراهم على المقهى ويعذى اليه الفضل فى إختفاء عدد من رواد المقهى . سألنى بمنتهى الفظاظة إنت فلان

فجاوبت بمنتهى الغلاسة وانت مال أهلك .

فقال بتهكم إنت بقى اللى عايز تخطب خطيبة فلان بيه .

فصعد الدم الى عروق رأسى وأجبته بكلمة فى منتهى القبح معناها المؤدب (طظ فيك وفيه ) وأنها الآن خطيبتى وسنتزوج .

وقبل أن تصل يده لوجهى كنت اسبقه بصفعة هائلة (شاب متهور بقى ) ووجدت على أثرها اثنين أخرين حملونى إلى قطعة أرض فضاء مجاورة وأدخلونى فى تجربة انسانية فريدة. فعرفت إحساس الكرة عندما يشوطها لاعب مفترى مثل الخطيب مثلا ( أبو تريكة مكانش اتعلم الكورة لسه ) وعرفت إحساس السجادة عندما تنفرد بها شغالة صحتها كويسة(على رأى صلاح قابيل فى الراقصة والسياسى ) كما عرفت أحساس القلة عندما تهوى من بلكونة فى الدور الثالث مثلا . ووقتها عرفت معنى النظرة التى نظرها إلى غريمى . وبعد فترة لم أعد أقاوم الضرب ووجدت الحل الوحيد انى أعمل نفسى ميت ( والله هو ده اللى حصل )وفعلا نجحت خطتى وتركونى ملقى (زى شوال البطاطس فى الأرض ) . وبعد فترة حاولت القيام وطبعا فشلت وبعد عدة محاولات خرجت من قطعة الأرض الفضاء إلى الشارع الخالى من المارة (كنا بعد منتصف الليل فى يناير ) وده طبعا قبل دخول الدش مصر وكانت الناس بتنام بدرى . المهم انى إستجمعت قوتى وأستندت الى الجدران حتى وصلت لأول كرسى فى المقهى وناديت على الواد تباتة الجرسون الذى سمعنى بعد عدة محاولات فاشلة وأتى الى محاولا أن يتعرف على صاحب الوجه الأزرق (من الضرب ) والملابس الممزقة .وعندما تعرف على بصعوبة حاول طبعا أن يعرف سبب حالتى المريعة التى أنا عليها فقلت له حصلت لى حادثة وطلبت منه ان يتصل بصديقى الطبيب والذى كان والده يمتلك مستشفى قريبة حيث كنا جميعا نترك أرقام تليفوناتنا عنده (بإعتبار القهوة هى المقر الرسمى للشلة ) ونقلت إلى المستشفى محمولا على الأعناق وأتصل صديقى بالبيت ليخبرهم بأنى تعرضت لحادث مروع وبأنى فى المستشفى .

طبعا إتكسفت أقول أن اللى عمل فيا كده علقة باعتبار أنى حاصل على ميداليات عديدة فى إحدى الرياضات العنيفة. وفى ظهر اليوم التالى أتى إلى صاحب العمل الذى كنت أعمل به وكان يكن لى تقدير وحب لصداقته الوطيدة بأبى وكان معه العديد من الزملاء (طبعا بعضهم كان شمتان فيا ) وكان هذا الرجل مصدر رعب لجميع العاملين بالشركة حيث أشتهر بأن نظرته توقف الكذب فى حلق أى كذاب وقد يكون أكتسب هذه الصفة من عمله السابق كرئيس لأحد الأجهزة الأمنية بالدولة .

وبعد أن صرف الزملاء نظر إلى نظرة مرعبة وسألنى : مين اللى عمل فيك كده ياله .

ووجدت نفسى أبكى وأنا احكى له ما حدث وبعد ما سمع منى أنتفض الى أقرب تليفون وقبل أن ينتهى من تليفوناته وجدت الدنيا وقد انقلبت فى المستشفى .نيابة وأجهزة أمنية ومولد حصل فى المستشفى ( وطبعا الموضوع إنكشف وفضيحتى بقت بجلاجل)وخرجت من المستشفى بعد يومين الى بيتنا واستمر الموضوع يتضخم وناس رايحة وناس جاية وناس تتوسط لدى أبى للم الموضوع حفاظا على مستقبل قريب خطيبتى ولكن وحتى هذه اللحظة لم تتدخل خطيبتى فى الموضوع لا هى ولا والدتها بأى شكل . وظللت فى الفراش لمدة ثلاث اسابيع وكانت خطيبتى تأتى إلى كل يوم بعد إنتهائها من العمل وكانت تصر على إطعامى بيدها بل أحيانا كانت تصر على أن تعد طعامى بنفسها (يا حلولى ياحلولى من غير إذن برايد عشان مكانتش لسه اتولدت )ولكن خلال هذه الفترة حدث لى شئ غريب عندما بدأت أفكر فى الموضوع بهدوء. وجدت نفسى ألتمس العذر لغريمى . ووضعت نفسى مكانه ماذا أفعل لو أحببت فتاة طول عمرى وأخذها منى شخص آخر؟وجدت نفسى أتعاطف معه و اجده محقا فيما فعل بى ووجدت عندى إستعداد داخلى لأن أسامحه وأغفر له (شوفتوا الهبل)

وبعد أسبوعين من الحادث الأليم وكنت مع خطيبتى وحدنا طلبت منى أن اتنازل عن قضيتى ضد قريبها حتى لا أكون السبب فى ضياع مستقبله وسجنه بما أننا سنصبح عائلة واحدة .ولم أفكر أكثر من دقائق ووافقتها على طلبها فقامت بمنتهى الفرحة و شكرتني شكرا عميقا وشعرت وقتها أن الدنيا قد عوضتنى بها عن حبى الذى صدمت فيه وتأكدت أننى بعملى هذا قد كسبت نقاطا عديدية فى قلبها وبانه مع فتاة تحبنى سوف اسعد أكثر من حياتى مع فتاة أخرى احببتها (وضحكت عليا ) وبعد تمام شفائى عدت لحياتى الطبيعية وقبلت أعتذار غريمى بمنتهى الكرم وقبلت معها صداقته التى عرضها على بعد أن تم الإكتفاء بجزاء إدارى ولم يسجن (ياريتنى سيبته ينسجن )واستمرت رحلة تجهيز البيت وقد عزمت على أن أتم زواجى بخطيبتى فى اقرب وقت (والتى بدأ ينمو داخلى إحساس بالحب تجاهها )

ولكن...................................بعد حوالي شهرين اخرين وفى أثناء دخولى منزل الأسرةصادفت حماتى العزيزة خارجة وهى تتعثر من شئ لم أدريه وقتها وسلمت على فى ارتباك وذهبت مسرعة لأدخل البيت فأجد أم حمادة وهى تثور وتمور( كأنها أسد راكبه عيل صغير ) وعلى الترابيزة الموجودة فى المدخل كرتونة لا أعرف محتوياتها. وعندما فتحت الكرتونة وجدت بها كل هداياى لخطيبتى ومعها علبة الشبكة والدبلة .طبعا الدنيا ضلمت فى وشى ومعرفتش أعمل أيه وليه وازاى وطبعا اكيد عرفتوا إيه السبب بعد ايام وبعد أن استجمعت أعصابى مرة ثانية ذهبت لخطيبتى السابقة فى مكان عملها فقط كى أعرف السبب بعد كل ما فعلته من أجلها . فشرحت لى أن ما حدث اعطى قريبها الفرصة كى يتحدث اليها وأنها شعرت بانها لا زالت تحبه ولن تستطيع ان تسعدنى (وكل الكلام اللى البنات بيقولوه لما ينطروا واحد )طبعا تمنيت لها السعادة وتركتها على وعد بأن نظل أصدقاء حسب إتفاقنا وبالفعل ظللنا أصدقاء حتى الآن وزادت صداقنا عمقا بعد ان تم طلاقها بعد أن عرفت أن زوجها (اللى اتسبب لى فى العلقة ) قد تزوج صديقتها التى كان يخونها معها عرفيا (بعد ما نطرت جوزها طبعا ) وعلى فكرة أنا أستأذنتها قبل ما أكتب لك القصة يا برايد وقرأتها قبل منك .طولت عليكوا كتير قوى المرة دى .لكن أسف على الإطالة

سلام

بقلم:حمادة

قصته و بأسلوبه

عريس من الزمالك

2007-04-12T02:57:00.000-07:00

هاي برايد انا واحدة متابعاكى من زمان اوى من اول ما بداتى , و متابعة تقريبا كل البلوجرز على اختلاف افكارهم و توجهاتهم لكن دى اول مرة احاول اشترك بالكتابة او بالتعليق على اى حاجة و بصراحة اللى خلانى اتحمس و اكتبلك اولا دمك اللى زى السكر لدرجة انى لما بكون قاعدة لوحدى و انا بقرالك بقعد اضحك و بخاف لحد يقول عنى مجنونة و لا حاجة لا سمح الله و اصل الحكاية مش ناقصة يا برايد يا اختى اصل اختك بينها و بينه شعرة( على فكرة و دا برضه بسبب الجواز و سنينه)ايييه ما علينا , المهم بقى انا لسه ما عرفتكوش بنفسى انا اكبر منكوا شوية انا فى التلاتينات( مش بكتيرقوى يعنى)و ليا باع طويل قوى مع مواضيع العرسان, حلوة باع دى مش كده و طبعا زى ما انتو عارفين ان اللى يعيش يا ما يشوف و انا بقى شوفت العجب فيه بس كلمه عاوزه اقولها , انه البخت واحد سواء البنت كان بيجيلها كتير و لا قليل و على راي طنط مامت واحدة صاحبتنا لما قالتلها يا بنتى يتغير الراجل و البخت ما يتغير و دا كان تعليق على ميلة بخت بنتها!!!! المهم طولت عليكو احكيلكوا على العريس بقى

____
فى يوم من ذوات الايام رن التليفون و ردت ماما : ايوه يا فلانة (دى طنط واحدة قريبتنا)ازيك و ازى الاولاد عاملين ايه
نونا (دا الاسم الكودى و اللى بيتغير ساعات حسب الظروف يعنى مثلا : ريتا العفريته او ناضا العضاضه و هكذا حسب الحاله) اه كويسة الحمد لله و اشمعنا يعنى هيه اللى بتسالى عليها؟!!! خير ان شا الله (فترة صمت)
و بعدين ماما قفلت معاها و نديتنى و قالت انها جايبالى عريس و ان العريس دا بيشتغل فى مكان كويس قوى و مستقبله ما شاء الله و انه ساكن فى الزمالك من زمان اوى يعنى مش بس مامته و باباه لا دا حتى من ايام الجدود و ان العماره اللى ساكن فيها دى ميراث من جده لابوه انما بقى شقته اللى هيتجوز فيها فى الزمالك برضه لكن فى عمارة تانيه برضه بتاعتهم( على فكرة التفاصيل دي لها علاقة باللى جاى خلى بالكوا من مواصفاته هوا و عيلته) و ان سنه مناسب ليه و بيدور على عروسه بنت ناس و محترمه و من عيله كويسه زيهم كده علشان يكمل نص دينه و ان طنط قريبتنا دى شافت انى مناسبه له فى كل حاجه فرشحتنى ليه و فعلا تم تحديد موعد المقابلة ,

عاوزة اقول لكو ان انا من كتر ما شوفت ما عدش بحب العرسان يجوا البيت اول مرة بقيت بفضل اننا نتقابل فى مكان عام و بعدين لو حصل قبول يبقى يجى البيت – اصل مش معقول كل شويه ناس نازلة و ناس طالعة و البواب و مراته ربنا يتمم بخيريا مدام ربنا يكمل لها على خير يا بيه و بعدين ينزل كله على مافيش ,

المهم بقى جينا نحدد مكان بره و دا الا راسه و الف سيف انه يكون عندنا فى البيت !!! ما علينا يالله , و بعدين وصل العريس و معاه مامته ست كبيره شويتين فى السن اما باباه ماقدرش يجى لانه كبير قوى و صحته تعبانه , و بعد السلامات و التحيات و اللذى منه سالت طنط (مامته) بابايا :

الا هيه العمارة دى بتعاعتكو ملك و الاالشقة دى ايجار؟

و بمجرد ما بابا رد عليها ادته السؤال اللى بعده

و انتا بتشتغل فين؟ و عندك دخل تانى غيرشغلك؟ عندك شقق تانيه فى القاهره؟ واخد حاجة فى الساحل؟

و ما اقولكوش لما عرفت اننا مش واخدين فى مارينا بصت لنا بصه!!! (ناس بيئة احنا)

و يا ترى العروسة بتشتغل ؟ و بتروحى شغلك بايه؟ عندك عربيه؟

و بعد ما خلصت على بابا قصدى مع بابا اديرت على ماما!!!!

و حضرتك منين؟ عندكو ارض فى البلد؟ كام فدان؟ زارعينها ايه؟

والله العظيم ان دا اللى حصل و اللى ذاكرتى لسا فاكره منه اقل القليل لان الحكايه دى من زمان شويتين يجى 5 او 6 سنين كده بس من غرابتها مش قادره انساها, و هكذا يا حضرات تحولت القعدة كلهابقدرة قادر لاستجواب من قبل والدته لاهلى و اتقلب الحال فبدل ما ابويا هوا اللي يحاول يسال عن احوال العريس عشان يطمن على بنته بقينا احنا اللى مطالبين بكشف حساب عن كل ما نملك و ما فيش مانع من التلميح للى ممكن بابايا يخصنى بيه بعدين, مع انى عاوزة اقول لكوا انه اذا هوا ساكن فى الزمالك فاحنا كمان ساكنين فى مكان مايقلش ابدا عن كدا و كل حاجة فى البيت تدل على وضع ممتاز ابتداء من البيت وانتهاء بالحاجات اللى اتقدمت لهم كواجب للضيافة بالاضافه انه طنط الواسطه مش عبيطه هيا عارفه انه فى تناسب فى المستوى و علشان كده رشحتنى ليه ,

,و نسيت اقول لكم على الهديه اللى جابوها!!!!! اصغر تورتة فى التاريخ و ياريت على كده و بس لاء دى بايتة و مش اقل من يومين عندهم فى التلاجة و من محل مالوش علاقة لا بالزمالك و لا حتى ببولاق( التورته دى يا ولاد اترمت فى الزبالة بعد ما خرجوا فورا) و احنا قولنا ما ندقش فى الموضوع دا اصلا الأم كبيرة قوى و جايز هوا مش عارف فى الحاجات دى) و على راى بابا انتى ممكن بعدين تبقى تلفتى نظره بطريقة رقيقة و مش جارحة,

المهم بقى ان العريس طول الوقت دا ما اشتركش مع مامته فى اى حاجة و كان ساكت على طول و بعد ما نزلم انا و ماما و بابا بقينا نبص لبعض مش قادرين نفهم الست دي ازاى عملت كده و بعد جهد جهيد هدانا تفكيرنا انها ست كبيره و لسه عايشه فى الماضى و مش واخده بالها من كلامها و ان ابنها كان ساكت لانه محرج منها بس هيعمل ايه ما يقدرش يقولها حاجة قدام الناس سيبكم اولاد الناس المتربيين حاجة تانية برضه!!

, تانى يوم اتصل العريس بيه و ابدى اعجابه و رغبته فى انه يتمم الموضوع و بصراحه انا توقعت اى تعليق على كلام والدته من نوعية ماما ست كبيرة او اىحااااجة و لكن ما فيش و اتكررت مكالماتة على نفس الحال لمدة3 ايام و بعدين فوجئنا بطنط الواسطة بتكلم ماما و هيه محرجة و فنص هدومها و بتقول لها ان والدته كلمتها فى التليفون و هيه زعلانه اوى لانهم عاوزين يجيبوا الموضوع على جنب بقى علشان يشوفو يكملوا ولا لا ؟ عاوزين يعرفو التفاصيل الدقيقة عننا

, يعنى لازم نفهم انهم عيله كل البنات اللى بيدخلوها لازم يكونوا عندهم دخل محترم و شهرى ثابت من اهاليهم و عربيه كويسة قوى لانه عيب البنت اللى تدخل عيلتهم تكون بعربيه اى كلام!!! فتصوروا بقى لو مافيش عربيه اصلا!!!

و مافيش مانع ان باباها يكتب لها شقه اواي حاجة باسمها و اللى مزعل الست قوى انها ماقدرتش تعرف كل المعلمات دى مننا و ان ابنها الهمام حاول يستانف الاستجواب لما كان بيكلمنى لكنه ما خرجش منى بفايدة تذكر فلما زهقوا مننا قرروا يكلموا الواسطة بصراحة بقى!!!!!!!!!!!!!!!!!!!!!!!

طبعا نهينا الموضوع معاهم بالعبارة التقليدية انه مافيش نصيب و خلاص و احنا بنضرب كف على كف و مع خلفية الموسيقى التصويرية لاغنية الرائعة وردة (هيا الدنيا جرى فيها ايه على حتى الناس صبحت مش هيه) ايش حال لو ما كانوش ولاد عز قديم و متاصلين فيه كانوا عملوا ايه ؟ المهم بقى انه و بعد مرور حوالى سنه على هذا الحادث الاسيف جت طنط الواسطة و قالت لنا انها العريس كلمها من كام يوم و انه سالها عليا اذا كنت اتخطبت و لا لسه لانه بعد ما رفضناه و ما قلناش ايه السبب دخل كذا بيت بعد كده و الظااااهر يا ولاد والله اعلم انهم عرفوه غلطه فعرف اننا كنا ناس طيبن قوى ( اصل انا كنت اول عروسة المحروس يشوفها) و كان نفسه يرجع يتقدم تانى بس على ميييين توبه و النبى توبه.

إمضاء..نونا

قصتها و بأسلوبها

فرصة نضيفة

2007-03-31T13:44:00.000-07:00

أنا بقى – ولا أعوذ بالله من كلمة أنا – هي يعني كلمة "أنا" عيب ولا إيه ؟!
المهم أنا ليّ تجربة واحدة, وبطلت بعهدها الموضوع ده خالص..زي ماتقولوا كده طلعت من التصفيات
أنا أصلاً لا ليّ في الطور ولا في الطحين..إلا صحيح إيه علاقة الطور بالطحين..ما علينا
يعني من الآخر أصلاً مكبر دماغي من موضوع الجواز ده خالص..عايش بطولي كده مع دماغي وكل علاقاتي مع الجنس الآخر تنحصر في أم علاء مرات البواب..ومدام كريمة موظفة التأمينات الاجتماعية..وخالتي بهية اللي ساكنة في الوراق
غير كده مافيش أي علاقات نسائية غير بقى الزمالات والصداقات, وبيني وبينكم كده كل الصديقات والزميلات - ولا مؤاخذة يعني – شبهي

آخر واحدة حلوة شوفتها في حياتي كانت فاتن حمادة الله يرحمها في فيلم العذراء والطفل الأحمر

المهم كان فيه واحدة صديقة –صداقة بريئة- من زمان, وبنتعامل أنا وهي عادي
وشوية كده حسيت إنها بدأت تتكلم في كلام فارغ وبتسأل أسئلة غبية
وطبعاً العبد لله ردوده أغبى
حاجات من نوعيه

إيه رأيك في البارفان بتاعي ؟

لا والله عندي زكام
بتحس بإيه وإحنا مع بعض ؟

إنتو مين وبتبقوا مع بعض إمتى

!
خلاصة الكلام عشان ماتتخنقوش زي ما هيّ اتخنقت البت جابت من الآخر
وعملِت زي ما قالت المطربة العصماء "أنا هاطلب إيدك بكرة..أنا بجحة قوي على فكرة"
لقيتها بقى بتاعة حب وكلام فاضي..وبتقولي أنها اكتشفت إن أنا بحبها بس مكسوف أصارحها, مش هي اللي بتحبني لأ أنا اللي بحبها, شوفته بجاحة أكتر من كده؟

الخلاصة البت صعبت عليّ وقلت أخطبها بقى وخلاص..والبت مش بطالة يعني وأنا صحيح مابفكرش في الجواز بس كلنا لها في النهاية, وأهو كله بثوابه

اليوم الموعود بقى..ضربت الحتة الكلاسيك الكحلي..ودلقت على نفسي نص إزازة البارفان اللي عندي من ثانية ثانوي..واشتريت طبق حلويات من قويدر بخمسة وتمانين جنيه, وروحت أقابل أبوها
خبطت على الباب وفتحلي أبوها..راجل محترم كده وباين عليه ذوق, دخلنا على الريسبشن حاجة كده عشرين متر في أربعين متر..زي ملعب كرة اليد
بعد السلامات والترحيب والذي منه –كشف الهيئة يعني- دخلنا في الجد على طول
شقتك فين؟

-مش يسأل عندك شقة ولا لأ.. ده الطبيعي عنده إن فيه شقة-
في مدينة نصر سيادتك
فين في مدينة نصر؟
أنا قلت إيه الأسئلة دي..الراجل شغال في التعداد ولا إيه
قصره..نجاوب وخلاص..
في الحي السابع..اوصل حضرتك بس عند موقف عربيات المقطم واسأل عن بسيوني الحلاق..أنا العمارة اللي بعده على طول
عربيتك إيه ؟
خلاص بقى أنا فهمت اللعبة..الراجل حاسس بقيمتي وسائل عني وعارف كويس امكانياتي ومش هيضيع وقتنا في سؤال أنا عندي ولا لأ..المهم الكواليتي
أنا اتجعصت ورديت بفخر..

سيات..بس معالجة للسخونة..وهاجيبلها كاوتش جديد إن شاء الله في عيد العمال الجاي
وطبعاً معاك مبلغ يكفي لمصاريف الجواز
إلا معايا..أنا صحيح مش من نواب القرود..بس مستورة
معاك كام يعني؟
بقولك مستورة يا حاج..وبلاش نفضحها

الراجل اتعدل في قعدته وبدأ يتكلم
بص يابني..إنت شاب مجتهد, والبنت عايزاك..بس لازم عندك نقاط ضعف لازم تعالجها
يا نهار إسود ومنيل! عرف منين ده؟! هوه أنا باين عليّ قوي كده؟!
لسه هاقوله يا عمي أنا بالفعل بدأت أعالجها..وبعدين دي مش حاجة تعطل الجواز وخصوصاً بعد نزول الفياجرا الهندي أم خمسة جنيه للقرص

لقيته بيتكلم في موضوع تاني خالص..بيقولي

إنت لازم يبقى معاك على الأقل ربع مليون جنيه في البنك عشان تتجوز بنتي
ليه يا عم؟ هاتجوز سمية القيصر ؟! -ولا باين اسمها سمية الخشاب..الي بيقولوا عليها حلوة..معلش أصل أنا مش متابع الحركة الفنية-
أقولك أنا ليه
تبيع شقتك وتكمل عليها وتجيب شقة في الزمالك أو المهندسين
صدقت أنا ساعتها كلام بنته بعد ما كانت يوم عندي في البيت – مالكوش دعوة بتعمل إيه في البيت, قلنا قبل كده صداقة بريئة, اطرد هذه الفكرة القذرة من رأسك يا فتى- وقالتلي يومها إن أبوها مش هايوافق إننا نتجوز هنا وكنت فاكرها بتهزر, إيه يا جماعة؟ هوه أنا ساكن في مزبلة ولا إيه؟
وفرش الشقة يليق بينا..وطبعاً هنشارك معاك في الفرش

–لأ كتّر خيرك الصراحة-
وتجيب شبكة بثلاثين ألف جنيه
والفرح في مش عارف إيه...
و

......

أنا بقى فقدت حاسة السمع ومش مركز معاه, وهوّ قاعد يملي شروطه وأنا الصراحة كل تفكيري في حاجة واحدة
طبق الحلويات أبو خمسة وتمانين جنيه

وفجأة فوقت عليه وهوّ بيقول

وطبعاً تغير عربيتك وتجيبلك عربية نضيفة!
لحد هنا واستوب..كله إلا عربيتي
قال عربية نضيفة قال! انتفضت من مكاني وقلت له..
فرصة نضيفة قوي يافندم..كل شئ قسمة ونصيب

خرجت من عنده وأنا مش شايف قدامي وسايق العربية بسرعة وزي أفلام السينما بقى شريط الذكريات بيجري قدامي
ووقف الشريط عند نقطة مريرة للغاية..لأ يا فالحين طبعاً مش طبق الحلويات أبو خمسة وتمانين جنيه, أنا مش بخيل يعني للدرجة دي..ده أن سامحت فيه خلاص
بس افتكرت إزازة البارفان الميت مللي اللي استعملت منها تلاتين مللي على مدار أربعتاشر سنة.. وضيعت منها خمسين مللي النهاردة

وفجأة يقطع شريط ذكرياتي صوت يصرخ..امشي عِدِل يا بني آدم..أمال لو كنت راكب عربية نضيفة كنت عملت إيه

إمضاء
أخوكي...وائل

قصته و بأسلوبه

ابو ركبه

2007-03-18T14:17:00.000-07:00

اخبارك يا برايد و احوالك بعد السلام و التحيه و الذي منه احب اختار لك انا من المجموعه بتاعتي العريس ابو ركبه
طبعا انا قلت لك انا عندي 23 سنه لسه يعني مدخلتش في قاموس القطر فتها و الكلام ده بس انا و لله الحمد ماشيه في الطريق ده , قلت لك يا برايد اني الحمد لله من نواحي كتير كويسه و دي مشكله في الزمن ده لانك بتلاقي كل من هب و دب عايز يفوز بالحاجه النادره دي و ده مش غرور و لا كلام من عندي و الله بس ده اللي بيتقلي خصوصا مع نسبه العرسان العاليا اللي بتيجي ( الله ما لا حسد) وطبعا كلهم فشنك,,,
ما علينا

تبدأ الحكايه يوم ما رحت الشركه القديمه بتاعتي و اللي اتعينت فيها لسببين اني شاطره و عنيا خضرا
المهم كنت كل ما امشي في الكريدور بتاع الشركه اسمع همس ورايا و لمذ للموظفين و منهم و احد ما شاء الله بدقن و شيخ
و نظرا لاني متربيه ما كنتش بتسكع علي المكاتب و لا احاول انقل كلام و اتطقس علي اللي بيحصل
كنت كيف البطه البلدي يا برايد يا ختي –و لازلت – المهم بقيت شايفه الشيخ ده كل ما يشفني عنيه تلمع
عارفه انت اللمعه دي اللي في الرجاله اللي تخوف –يا دي النيله و ده عايز ايه ده كمان, ,, انا ناقصه ما اللي قبليه كان عايز يدخلني في الجماعه الاسلاميه لانه شاف فيا رغبه للاتجاه الصحيح و الصلاح و اني ممكن اكون اخت من الاخوات , ده متنيل متجوز عايز ايه ده كمان , هيطبق مثني و ثلاث و رباع عليا خيبه قويه .
و كنت بخاف منه موت ,

لحد ما راح لزملتي اللي اكبر مني و متجوزه و قالها انا عايزك في موضوع بخصوص البنت اللي معاكي , بصراحه كده انا كنت بتصنت عليهم و راميه و داني و سمعته بيقول كده و عملت عبيطه , المهم مشيوا الاتنين و انا عماله اقول يخيبك راجل بقي يا مدهول عايز تتجوزني , يا خبر يا خبر ده قد ابويا

جت صحبتي و بصت ليا بنظره خبيثه و انا قالبي كان بيتنفض من الغيظ و الخوف, و قالت لي ده عم الشيخ سالني عليكي و قال انه عايزك لخوه الصغير و خليكو معايا في صغير دي و افتكروها كويس
بجد !!ده انا,,, بقي كل الفحص و المحص ده عشان اخوه امال لو هو اللي عايز يتجوز كان عمل ايه المهم قلت الراجل بيعز اخوه ,,, وعرفت بعض التفاصيل زي ان العريس مهندس و عنده 26 سنه و ده اكيد طبعا سن مثالي ليا و اخلاق و خلافه ,,,, الخ الخ

اتفقنا نروح النادي يوم الصبح عشان هو ده الوقت الفاضي ليه و اهو ناخد اليوم من اوله . و كالعاده سحبت امي المسكينه و قلنا نقابل العريس و امه ,عشان نبقي علي راحتنا و نستني سهم كيوبيد يرشق في قلبنا- و جع في قلبه -
طبعا لاني بنت مودرن و روشه كنت ديما بقول لازم العريس يشفني علي طبعتي يعني مش لازم الايشارب ابو ترتر عشان يزغلل عنيه و الا الميكب الفاقع و التحديد عشان اكبر شفايفي و ابقي اليسا. رحت عادي جدا بجيب جينز و كوتشي و سويت شيرت لطيف كده بنوته علي الاخر,,,, ما احنا رايحين النادي بقي, الصبح بقي, هلبس ايه يعني سواريه, عيب,, , المهم و الاهم ان انا اؤزعه و قله علي الاخر و لما بلبس الكوتشي ببقي ازعنن بنت في الدنيا مع الجيبه ببقبي تقريبا لا أري بالعين المجرده

وجت اللحظه الحاسمه,,,,, و ركنت العربيه بتاعتي و شفته بيركن ما كانش باين اوي هو ايه بس اللي كان و اضح انه شب جسمه كويس ما شاء الله باين جوه العربيه وبعديييييييين...
تم تم تشششششششششششششش( موسيقي تصوريه) لما يا جماعه المارد خرج من القمقم اااقصد العريس خرج من العربيه
بالظبط يا جماعه نفس احساس الاعلان بتاع ميلودي تتحدي الملل تقريبا نفس النظر بتاعت الراجل اللي طلع من العربيه و ميلودي اتسرع منه
لا تتخيلو قد ايه هو ضخم و بكرش كبيييييييييييير لا يمكن يكون رباه في 26 سنه بس لا, ده اكيد و اخده ورث من جده و او جد جده او جد جد جده

مش مهم , يا بت خالي المركب تمشي
و اهو ضل رجل و لا ضل حيطه و ده مش اي رجل هيعمل ضل كويس في ايام اغسطس و الحر, ديتها بس يفرد كفه فوق دماغك و هيبقي مظله و لا مظلة استاد القاهره, و بالنسبه للحيطه فهو ماشي بيها ,,, معلش شوفي الجوهر و سيبك من المظهر

طبعا ما قولكمش علي مدي الفرحه الي هو كان فيها ,, طبعا لاقي عروسه بلاستك يلعب بيها لما يكون زهقان حاجه كده فك و تركيب بالنسبه له و ده كان نفس انطباع مامته اللي مش قادره افهم لحد دلوقتي و لدته ازاي لكن دي الحكمه الاهيه اللي و ضعها في الام!! بس اللي متاكده منه انه ما نزلش زينا كده
استغفر الله باخد ذنوب بالهبل ,,, (وهو اللي اتعمل فيا مش ذنوب) ما علينا

الانيل بقي ان حضرته كان لابس بدله رمادي من بتوع الارشيف و كانت يادوب يا دوب دخله فيه (مافيش مقاسه بقي نعمل ايه) و طبعا لان اليوم كان حر و الصبح,, كان بيشر عرق ( ما أكيد طبيا نسبه الدهون اللي علي قلبه عاليا) حسيت و الله اني و اقفه قدام يحي شاهين او عماد حمدي
من غير تطويل قاعدت معه علي اساس اني لازم اشوف الجوهر
الجوهر يا دودو الجوهر يا حببتي ما تتخضيش يا ماما لازم تكوني عاقله( ده انا بصبر نفسي)
ااااااااااااااااه

جه الجوهر,,, الاستاذ مش مجرد شكله ضخم و كانه جايب مراته و عياله جوه الجكته لا ده لاستاذ بيكلمني كانه راجل عنده 56 سنه مش 26 انا فضلت فاتحه بوقي لحد لما جيت اقفله و جعني,, الفك السفلي نمل يا برايد يا اختي
من كتر الكلام اللي قاله بقيت بقوله حضرتك بشكل لا ارادي,,,,,بجد كبير جدا في كل حاجه
و سئالته هو انت ارتبطت قبل كده قالي ااااااااااه ارتبطت مرتين
لما فتح بوقه و قال كده حسيت ان البنتين دول بلعهم قبل كده و طلعين وارا لسان المزمار بيقولولي طلعينا من هنا
( يا ماميييييييييييييييييييي)
فضلت ساكته و شايله في قلبي اعرف دماغه فيها ايه بجد انا مش عايزه اظلم حد و برده عاااااا مش عايزه اتظلم
علي الرغم من اني بشتغل و هو عارف ده و اخوه جايبني من الشركه لا انه شرط عليا اني اقعد في البيت لاني جميله و جوهره مكنونه و لازم يحافظ عليها ( اكيد عايز يربيني زي البط عشان ابقي اده) كلام جميل بس اللي اجمل انه ليه اختار و احده بتشتغل من الاصل؟ و لاغرب انه بيقعد من الساعه 6 الصبح ل 9 باليل في الشغل, و انا مفروض اكون حاطه ايدي علي خدي استناه!!!!! ماشي,, حاضر,, مفيهاش حاجه,, الست ما لهاش غير بيتها و عيالها برده

المهم فجأه
عيني جت علي ركبته
لاااااااااااااااااااااا
حرام
لحد كده بقي و ستوب
بدون مبالغه او تهريج
ركبته قد دماغي
حقيقي ركبته ,
الركبه اللي هي المفصل ده ,,اللي في الرجل, الصغنن ده,
قد دماغي

سعتها قمت و قولت الله يلعن ... العقل و الجوهر و النيله ,,لا جوهر و لا مظهر و ندهت علي امي و قلت لها اجري اجري يا ماما لحد ما اسهيه و احصلك قبل ما نتبلع ده يشوف له و احده يا دوب اد امه تعرف تتفاهم معه

التعليق بقي بتاع ماما ....... اني بتتبطري,,,بس انا كنت علمي و اخدت فيزياء و عارفه يعني ايه كتله و حجم
و الاغرب انها بتقول عليه و شه بيبي فيس ,,بالزمه بيبي فيس ده
فيس متركب عليه بيبي
حسبي الله و نعم الوكيل
و اشوفك في بيت العدل و ما يشمتش فيكي عدو يا حببتشي

إمضاء حبيبتشك دودو

قصتها و بأسلوبها

عروسة الأستاذ حماده

2007-03-07T15:07:00.000-08:00

هاى برايد انا قريت تهديديك بهد بيت العرايس والعرسان ولأنى موش باحب الهدد فقررت أنى أبعت لك قصة من القصص الكتير اللى حصلت لى فى رحلة البحث عن عروسة (بقالى عشرين سنة بادورعلى عروسة ) . عمرى 43 سنة ولسة ملقيتش عروسة

.وخلينى أبدأمن الآخر علشان أثبت لك صعوبة الأختيار فى سن زى سنى دى أولا انا باشتغل فى فندق كبير فى مصر ومركزى برضه مش صغير كمدير قسم من الأقسام بدأت القصة من كام شهر فى يوم التعريف للموظفين الجدد المعينين فى نفس الشهر وهو عبارة عن إن كل الموظفين اللى أتعينوا فى نفس الشهر بيقوموا بجولة على جميع أقسام الفندق ويتعرفوا على إسلوب العمل فيه وإيه أهميته بالنسبة للفندق . ولما وصل الشباب الجداد للقسم اللى أنا رئيسه بدأت أتعرف عليهم حسب المفروض وأعرف كل واحد فيهم أتعين فى أى قسم
.

ولأول وهلة وقعت عينى على واحدة منهم حسيت كأنها فراشة وسطهم بجمالها الهادى وعينيها اللى خلت قلبى يدق بدون سابق إنذار لكن طبعا إحتفظت بهدوئى ووقارى (مدير بقى ) لكن فيه حاجة مموش عارفها كانت بتخلينى ابص ناحيتها بطرف عينى من وقت للتانى ولدهشتى الشديدة لاحظت أنها مركزة معايا مع إن كل اللى حواليها كانوا زهقانين منى ومركزين فى الحاجات اللى حواليهم بيتفرجوا عليها أول مرة قولت صدفة تانى مرة قولت يمكن بتحاول تفهم غير الأغبيا التانيين (ناصحة وذكية )لكن تالت مرة لقيت قلبى بيرقص (ياحلولو يا حلولى على رأى الأنسة برايد )وقررت إنى أتأكد وفجأتن على رأى عمناإسماعيل ياسين قمت راشق عينى فى عينها وهى مركزة معايا . وهى ثوانى ولقيت البنت وشها إحمر زى الطمطماية وبصت فى الأرض وهنا كان نفسى أرقص لولا خوفى من ضياع الهيبة وسط العيال الجدادولقيت روحى بأقول لروحى ياواد يا حمادة يا جامد والله لسة فيك نفس وفيه بنات حلوين بيبصوا لك
.

ا ورجعت على مكتبى بعد ماخلصت جولتى معاهم فى القسم وانا فى حالة من الإذبهلال وقعدت على مكتبى مغمض خايف صورتها تروح من عينى (عارف ان فيه ناس هاتقول عبيط بس ده اللى حصل)بعدها لقيت نفسى رايح ناحية الكافيتريا فى ميعاد غدا برنامج التعريف زى العربية اللى فراملها سابت بفعل فاعل طبعا لقيتهم عاملين مولد فى الكافيتريا ولا مولد الحسين زى أى عيال فرحانة وطبعا ظهور واحد زيى بيفرض هدوء فى المكان وممكن تسمع واحد منهم بيقول ايه اللى جاب الحمار ده هنا إحنا عايزين ناخد راحتنا من غير قلق. المهم إنى عملت عبيط وسألتهم مبسوطين يا شباب وإيه أخبار الجولة وكدة وانا بابص بطرف عينى على ايديها باستكشف فيه دبلة فى ايدها اليمين ولا الشمال (حركة قديمة وأعتقد ان كل البنات فاقسينها) المهم ملقيتش دبل فى إيديها فرجعت تانى المكتب وقفلت عليا بالمفتاح وقعدت ارقص (موش عايز أسمع حد بيقول إيه العبيط ده) وتانى يوم أخدت الحركة التانية إنى أعرف إيه ظروفها قبل ماعمل اى حركة عبط أندم عليها بعدين.

المهم رفعت سماعة التليفون اتصل بمدير شئون العاملين أطلب منه سكرتيرة جديدة بعد ماطفشت السكرتيرة العاشرة من وشى الكشر وشغلى اللى مابيخلصش وانا عارف انه هيرشح لى البنات الجداد نظرا لسمعتى المنيلة فى المكان كله بأنى كشر ومبضحكش ومببطلش شغل وبناء عليه فمافيش واحدة عارفانى هاترضى تشتغل معايا . الراجل قالى تعالى المكتب ونشوف السى فى بتاعت الموظفات الجداد ويرشح لى واحدة منهم .رحت مكتب الراجل وبدأت أبص فى الورق وانا موش شايف حاجة أساسا لأنى كنت بادور على صورتها .ولما وقع فى أيدى السى فى بتاعها قريته ولقيت إنها بنت ممتازة عائليا (طبعا أنا كنت بأقيم عروسة موش سكرتيرة )المهم أستبعدت السى فى بتاعها من موضوع السكرتارية ده ....طبعا العملية موش ناقصة انى أشغلها معايا فتكرهنى

المهم قعدت بعد كده إسبوع بافكر فى الخطوة اللى بعدها وموش لاقيها لغاية مالقيت التليفون بيرن ولما رفعت السماعة سمعت أجمل صوت يتسمع فى سماعة التليفون ولقيتها هى على الخط .وفكرتنى بنفسها (طبعا عملت عبيط و إن عندى فقدان ذاكرة من بتوع أفلام ليلى مراد وأنور وجدى) وسالتها عن طلبها بكل غلاسة (مدير بقى بيتكلم مع موظفة جديدة ) فطلبت طلب هايف متعلق بالشغل يعمله أصغر موظف فى القسم موش مديره . وقتها حسيت أنى طاير وباخبط فى السقف وارجع تانى زى الكورة الكاوتش وخفت أحسن الناس اللى ماشية فى الشارع تسمع دقات قلبى . المهم إنى بدل مابعت أى موظف يعمل لها شغلها قمت جرى على مكان شغلها أعمل المطلوب بنفسى وانا باحاول أسيطر على نفسى وحاسس إن ودانى بتطلع نار من الإنفعال .وشيلت الوش الخشب اللى بتعامل بيه مع الموظفين فى الفندق وحطيت الوش الحقيقى وبدأت أتكلم معاها و انا باتعمد ابطء أيدى علشان افضل معاها أطول وقت ممكن لدرجة ان طلبها كان يخلص فى خمس دقايق انا خلصته فى ساعة ونص . ومقدرش اوصف كانت سعادتى اد ايه لما بقيت بابص ليها ألاقيها باصة لى من صحيح كان وشها بيحمر من الكسوف لكن مكانتش بتبعد عينيها لما بارشق فيها عنيا وبالتدريج زال الخجل وبدأت أستمتع بنظرة عنيها الرايقة الجميلة

رجعت المكتب وانا فى حالة غير طبيعية واترميت على الكرسى أسترجع كل كلمة وكل حركة وكل حاجة حصلت فى الساعة ونص دول ( برضه موش عايز اسمع حد يقول مراهقة متأخرة)عنها وخدت نفسى وروحت على البيت أخدت دش محترم وخففت هدومى وعزمت نفسى على واحد نسكافيه وولعت لى حجر شيشة وقعدت فى ركن التفكير على الشيزلونج بعد ما شغلت اسطوانة مونامور وبدأت أعيد تقييم الموقف حسب المستجدات الأخيرة (شوفتوا الغلاسة )طبعا ماكنش فى مجال إنى اقيم البنت لإنها بصراحة فوق مستوى التقييم بكتير وعنها وبدأت فى تقييم نفسى بالنسبة لها .وطبعا بدأت فى النقط اللى فى صالحى ( شوفتوا الإستهبال ) لقيت انى مستريح ماديا وعندى شقة فخمة فى عمارة ضخمة وسمعتى كويسة بين جيرانى وفى شغلى وصحتى كويسة ومستقيم واعرف ربنا ومبسمعش لا سعد الصغير ولا الأخت اللى بتركب الحنطور وتتحنطر .

وبدأت بقى فى الجنب التانى.لقيت إنى شكليا موش فتى أحلام أى بنت إزاى ؟أقولكم.أى بنت بتحب يكون عريسها طول بعرض وارتفاع (حسب القول المأثور للبنت برايد) وانا موش ده بس برضه موش قصير ولا رفيع ولا تخين يعنى متوسط فى الحكاية دى. بس وجود عضلات كبيرة شوية عندى ممكن ينفر بعض البنات منى . وكمان شعرى خفيف لكن موش اصلع (يمشى برضه) تانى حاجة اى بنت تتمنى انها تتجوز شاب وسيم زى كريم عبد العزيز وانا برضه موش وسيم!!!!بس برضه موش دميم مع إن الشنب اللى فى وشى شكله يخض .النقطة التالتة بقى يا حمادة اللى إنت بتهرب منها !!!!!!!!!!!!!!!!!فرق السن!!!!!!!!!!!!!!!!!!!!!!!!!!!!!!!!!!!!!!!!!!!! انت أكبر منها بتسعتاشر سنة (يانهار أسود ) دى موش نقطة دى كلكيعة رأيك فيها إيه؟؟؟؟؟؟؟؟؟؟؟؟دى بقى تتوقف عليها شخصيا (شوفتوا الخباثة)وعنها وبعد ماسحبت نفس شديد من الشيشة قررت إنى أكلمها والرزق على الله واهو وقوع البلا خير من إنتظاره . بس هاتفاتحها إزاى يا حمادة من غير ماتبوظ الدنيا ؟؟؟؟؟؟؟؟؟؟؟؟؟؟؟؟؟؟؟وبعد نفس شديد آخر من الشيشة قررت إن إسلوب الخطوة خطوة هو أحسن إسلوب .

وهوب جرى على السرير مع قرار بدأ العمليات من تانى يوم فورا . وأول ما دخلت المكتب إيدى على سماعة التليفون أكلمها عامل إنى بتطمن على الشغل اللى عملته عندها لقيتها بتقولى ياريت تيجى تطمن بنفسك وجرى عيها (اطمن على الشغل طبعا ) ومديت إيدى أسلم عليها لقيتها بتمد إيدها سابقانى وهوب الكهربا عملت كونتاكت على رأى عبد الفتاح القصرى وخليت إيدها فى إيدى ثوانى كانت كفاية إنها تولع فى قلبى نار متقدرش تطفيها مطافى العتبة وطبعا ماتكلمناش فى أى شغل وسبتها ونزلت مكتبى وانا قافل ايديا أحسن اللمسة تطير منها. وقبل مادخل المكتب لقيت التليفون بيرن رفعت السماعة (بايدى الشمال) ولقيتها على الخط وقالت لى بعد ألو كلمة واحدة . قالت أنا...................انا............... وسكتت وقفلت السماعة حطيت السماعة وانا فى شبه غيبوبة موش عارف أتلم على نفسى وركبى بتخبط على الجيران على رأى السيد المحترم اللمبى . فضلت على الحالة دى يمكن ساعة لاعارف أقف ولا عارف أشوف شغلى ولا عارف أعمل إيه زى العيل اللى تاه من أمه فى المولد .ولما ربنا قدرنى وقدرت ارفع سماعة التليفون أتصلت بمكتبها قالولى انها أخدت إذن وروحت علشان موش قادرة تشتغل .طبعا موش هاقدر أوصف لكم حسيت بأيه ساعتها لكن كانت حالتى أشبه بالجنون فرحة مع حزن مع ضحك مع رغبة جامدة فى العياط (موش عايز حد يقول إيه الهبل ده ) عنها وقمت كاتب اليوم أجازة وأخدت نفسى وروحت (معملتهاش من يوم ماتعينت فى الفندق)وقضيت اليوم وانا موش عارف اعمل إيه لا عارف اقف ولا عارف اقعد ولا انام ولا آكل ولا حاجة (برضه محدش يطلب لى مستشفى المجانين)

تانى يوم أول ما دخلت المكتب جرى على التليفون أتصل بيها مكانتش وصلت لسه ورد على موظف الوردية اللى قبل منها (اكتشفت إنى رحت الشغل قبل معادى بساعتين) طبعا طلبت منه طلب عبيط علشان مكسفش نفسى وقعدت جنب التليفون زى اللى مستنى نتيجة الثانوية العامة, وأول مارن خطفت السماعة وقبل ماتكمل كلمة صباح الخير قولت لها انا عايز أتكلم معاكى بعيد عن الشغل سكتت شوية مروا عليا كأنهم سنين وردت وصوتها بيتكعبل من الكسوف وانا كمان واتفقنا نتقابل بعد الشغل فى مكان بعيد عن الفندق واخترت انا مكان هادى وراقى على النيل .

طبعا كل واحد فينا راح لوحده وانا رايح أخدت وردة حمرا فى ايدي ووصلت لقيتها سبقتنى وقعدت فى مكان بعيد عن كل الترابيزات . اديتها الوردة وانا موش عارف أبدأ الكلام إزاى وواضح انها كانت موش عارفة هى كمان تقول أيه لكن أخدت الوردة بمنتهى الرقة وبأنوثة عفوية عمرى ماشوفتها قبل كدة باستها . قعدت قدامها مبنطقش ( محدش يقول عليا عبيط) لغاية ما الجرسون جه وطلبنا القهوة والنسكافيه وبدأت أتكلم فى كلام أهبل مالوش لازمة وهى حاطة وشها فى الترابيزة و فجأة رفعت عنيها ناحيتى لقيت نفسى من غير مناسبة باقولها انا باحبك لقيت رموشها بتتحرك بسرعة وبصت تانى فى الترابيزة اتشجعت ومديت غيدى مسكت ايديها لقيتها عرقانة ولا كأنها فى ساونا سألتها توافقى تتجوزى واحد فى سنى بصت لى بصة عمرى ماهنساها وقالت لو انت عمرك ميت سنة برضه كنت هاحبك (إيه يا حمادة يا جامد) ده انا باقول لنفسى بت زى القمر كده وبتحبك؟ معقول يا ناس المهم إتجاوزنا مرحلة الخجل دى ولقيت نفسى باحكيلها كل حاجة عنى من أول الزومبة الكبيرة اللى خدتها وانا شاب (يمكن ييجى يوم أحكيها لكم) لغاية سبب التكشيرة اللى بارسمها على وشى وانا رايح الشغل الصبح وهى كمان حكت لى عن نفسها وإنها إتربت برة مصر وعن اهلها وبيتها وكل حاجة.

حد غلس يقولى المرحلة دى إستمرت أد إيه هاقوله شهر واحنا بنتقابل مرة كل إسبوع نحكى فيها عن كل اللى فات من حياتنا وانا فى كل مرة آخد لها وردة حمرا ..ومحدش يسأل ليه وردة وليه حمرا علشان هى جت كده
المهم يا حضرات بدأنا ندخل فى الجد والتحضير للمعركة الفاصلة وبدأت هى تجس نبض أهلها وطبعا الخطوة الأولى إنها تقول لأمها عنى وتحكى لها ظروفى .وتمت الخطوة الأولى بدون خسائر ولا مكاسب (يعنى أمها مأبديتش أى رد فعل لا حلو ولا وحش) و بدات أحضر نفسى للخطوة التانية اللى هى المواجهة طبعا وتحديدي معاد مع الوالد واتفقنا انها هاتفاتحه ان فيه واحد عاوز يطلبها منه وانها هاتكلمه يوم الجمعة عشان يكون رايق (يعنى بعد 6 ايام)

يومها جانى تليفون من واحد صاحبى من أيام الجامعة (هو الوحيد تقريبا اللى صداقتنا أستمرت لغاية دلوقت بعد ما فرقت شلتنا الأيام)المهم صاحبى ده قاللى انه عايز يقابلنى فطبعا كان ردى الطبيعى انى اقوله وإيه الأدب اللى نزل على اهلك ده من غير مناسبة مانت بتيجيلى فى أى وقت زى القضا المستعجل . ضحك وقالى بس انا معايا المرة دى ضيف مشوفتوش من عشرين سنة .قولت ياسيدى اتهبب انت وأى واحد وتعالى مجتش على كوباية شاى أو حتى مج نسكافيه موش خسارة فيكوا حتى بالمرة أحكيلك أخبارى وافرحك فيا علشان هاتجوز .واتفقنا على معاد بليل ييحى هو وهذا الصديق المجهول اللى حلف لى أنه هيكون مفاجأة غير متوقعة الساعة 7 دق صاحبى جرس الباب بأدب على غير عادته وفتحت له هو والضيف اللى حاولت أفتكره معرفتش .وبدأ صاحبى الرذل يفكرنى (وياريته ماتنيل وفكرنى) بزميلنا القديم وفعلا إفتكرته لأنه كان أشهر شخصية فى الدفعة بس شكله كان متغير( بفعل عوامل التعرية وسنين
الغربة) صاحبنا ده كان مشهور لييييييييييييييييهلانه كان الوحيد فى الجامعة اللى إتجوز وهو فى سنة تانية وخلف وهو فى سنة تالتة وحضرنا كلنا سبوع المولود وبالتالى كان موضع حسد ونق كل الشبان (طبعا كلنا عارفين ليه)وأول
ما أفتكرته قمت أخدته بالحضن وازيك وازى مراتك وعندك كام عيل دلوقت وايه اللى عمل فى دماغك كده وشعرك اتنشل منك فين وهات يا ضحك وتهريج زى أيام الجامعة .

المهم بعد فاصل التهريج اكتسى وش زميلى القديم بمظهر الجد وقالى أنا عايزك فى موضوع بحق العيش والطعمية اللى أكلنهم سوا على الرصيف .طبعا قولت له رقبتى يا معلم أنت طلباتك أوامراكتسى وشه بحزن غريب و دار بينا الحديث التالى: هو : انا عرفت أنك شغال فى الفندق الفلانى أنا : بقالى عشر سنين وبقيت مدير قسم فيه هو :بنتى إتعينت عندكو فى الفندق أنا : ومالك حزين كده هى إتعينت فى مكتب حانوتى دى إتعينت فى مكان يتمناه كل أب لبنته أنا برضه : هى فى قسم إيه؟ هو : فى القسم الفلانى أنا : طيب ده قسم محترم ومرتباته زى الفل هو : ياريتها ماتعينت ولا اتنيلت أنا :ليه كده يأاخى بعد الشر عنها من النيلةأنا تانى : هى تعبانة فى الشغل تحب اوصيلك عليها أو حتى أنقلها فى القسم عندى أنا ممكن أخدمها فى الموضوع ده بكل سهولةهو :لأ الموضوع غير كده خالص أنا :طيب إيه هو الموضوع هو : والله الواحد مكسوف موش عارف أقول أيه أنا : ياعم قول متنكسفش داحنا أخواتهو : فيه واحد ضحك عندكم أكل دماغ البنت وحبته وقال إيه عايز يتجوزها أنا :طيب وإيه المشكلة ياعم حد لاقى عرسان دلوقت والا انت خايف لتبقى جدو :المشكلة أنه موش مناسب ليها أنا : إزاى ياعم دا كل اللى بيتعينوا عندنا ولاد ناس هو : ده راجل عجوز وفى سن أبوها والظاهر عنده مراهقة متأخرة

وهنا يا حضرات بدأ قلبى يغوص فى قدمى متوقع المصيبة المنتظر ان تقع فوق نافوخ أهلى واللى أكيد كلكم أتوقعتوها وسألته السؤال اللى كان لازم اسأله من الأول سألت بصوت حاولت أن يخرج طبيعيا هى إسمها إيه وفعلا قاللى إسمها فلانة عندها شعرت ان كل شواكيش العالم إجتمعت ودقت دماغى فى ضربة رجل واحد حسب قول أبو جهل فى فيلم الشيماءسألته : وانت تعرف الراجل ده أسمه إيه أو فى قسم إيه جاوب : هى حكت لأمها بس مقالتش أسمه ولا وظيفته وانا معنديش إستعداد بنتى الوحيدة إللى شقيت فى تربيتها تتجوز واحد وبعد كام سنة تتحول ممرضة ليه .

وهنا شعرت برغبة شديدة فى ان تنشق الأرض وتبلعنى أو تبلعه هو وصاحبى التانى (طبعا لو بلعتهم هم تبقى مصلحة)وفضل الراجل يحلفنى بالعيش والملح اللى أكلناه سوا (بيفكرنى بالملبس اللى أكله لنا فى السبوع بتاع حبيبتى أكيد) ووعدته خير وانا موش عارف هاعمل إيه بعد ما نزلوا لقيت نفسى باقول لنفسى يااااااااااااااااه يحمادة انت اد كده بقيت عجوز وكمان بتحب بنت كان المفروض يكون عندك أدها لو كنت عايش بشكل طبيعى طيب البنت المسكينة اللى خليتها تحبك ذنبها إيه تتحمل ندالتك لو وفيت بوعدك لأبوها ؟ بس العيش والملح (أو الطعمية) اللى أكلتهم مع ابوها ليهم حق عليكيعنى تتعذب انت وهى علشان خاطر ابوها؟ومنين عرفت انها هاتكون سعيدة معاك بعد كام سنة لما تعجز وتتحول هى ممرضة ليك على رأى ابوهابس انت بتحبها وهى بتحبك تضمن الحب ده كام سنة؟وحاولت إنى احسم الصراع اللى حاصل فى دماغى يا حضرات بأنى أسترجع لحظاتى السعيدة معاها بس حصل حاجة غريبة جدا لقيت الوردة اللى كنت باقدمها لها فى كل لقاء بتتحول فى ذهنى لمصاصاية بديها لها وهى طفلة ولقيت المركب اللى إتفسحنا فيه يوم بيتحول فى دماغى لمراجيح وهى طفلة برضه بتتمرجح عليها

وهنا إتأكدت يا حضرات انى خلاص فعلا راجل عجوز يروح يشوف له عروسة فى دار المسنين يمكن يلاقى واحدة تاريخ صلاحيتها بعيد شوية وأخدت قرارى بأنى أدوس على قلبى علشان أضمن لها ساعدتها اللى أكيد هتلاقيها مع شاب فى سنها موش مع واحد زيى كشر وبشنب طبعا قلبى أتقطع ميت حتة لما شوفت دموعها وانا باحكى لها اللى حصل وباحاول اشرح لها إن صداقتى بأبوها هاتفضل طول عمرها حاجز بيننا وحزنت جدا إنها أستقالت قبل ما تكمل حتى فترة الإختبار وكان نفسى اخنق أبوها لما إتصل بيا يشكرنى على الواجب اللى عملته معاه ( كنت باقول فى سرى الله يقطعك ويقطع الواجب ويقطع اليوم الأسود اللى دخلت فيه كلية واحدة معاك) آسف يا برايد إذا كنت طولت عليكى وآسف كمان انها قلبت بنكد فى الآخر بس أبوها بقى الله ينكد عليه هو السبب

ودى كانت نهاية قصة حب من اللى مروا عليا وكلهم انتهوا بفشل ساحق ماحق لايصد ولا يرد على راى المذيع الممل بتاع التنس اللى مبفهمش فيه حاجة وبرضه بتفرج عليه مانا موش لاقى حاجة أعملها بقىمن فضلك يا برايد إذا كنتى هتنزلى قصتى فى المدونة بتاعتك تبقى تقولى لى إيه رأى الناس فيه يمكن أتشجع وأبعت لكم باقى مغامراتى فى البحث عن عروسةباىىىىىىىىى

إمضاء
الأستاذ حماده

"قصته و باسلوبه"

يااهلا

2006-12-22T03:40:00.000-08:00

خش برجلك اليمين لو سمحت

الحكاية مش ناقصة نحس